“O Le Ala o Mea Tonu,: mataupu 3 o le Au Paia: O Le Tala o le Ekalesia a Iesu Keriso i Aso e Gata Ai, Voluma 3, Ma Le Toa, Tamaalii, ma Tutoatasi, 1893--1956 (2021)

Mataupu 3: “O Le Ala o Mea Tonu”

Mataupu 3

O Le Ala o Mea Tonu

Ata

Tapeneko o Sate Leki ma se tagavai tele o le I.S. o loo fofola i le taualuga.

Sa asiasi Anthon i paranesi o le Ekalesia i Siamani, ina ua taunuu atu le tala i le Misiona a Europa e uiga i le faaaliga na maua e Ulifoti Uitilafi e uiga i faamauga. “O lenei faaaliga o le a maua ai le olioli i le tele o loto,” na ia saunoa ai ina ua ia maua le talafou.¹

O le faiga fou e i ai le tulaga taua faapitoa mo le tele o faifeau i lana misiona. Talu lava ona faaalia e le Alii ia Iosefa Samita faapea e mafai e le Au Paia ona faatino ia sauniga e tatau ai mo e ua maliliu, na sailia e tagata o le Ekalesia o latou augatuaa ma faatino ia sauniga mo i latou. O nisi faifeau, o atalii o le Au Paia na malaga mai fafo, na o mai i Europa ma le faamoemoe e aoina nisi faamatalaga e uiga i o latou tuaa mai o latou tauāiga ma nofoaga e maua ai faamaumauga.²

O lea la, i le mavae ai o le faaaliga a Peresitene Uitilafi, sa i ai se faaopoopoga o le faamoemoega ia latou sailiiliga. O le mea moni, e toatele le Au Paia o le Ekalesia atoa, ua naunau atili e sailiili o latou gafa faale’āiga e faamau faatasi ai augatupulaga i se filifili e le mamotusia. Sa fuafuaina foi e le Aposetolo ma le tusitalafaasolopito a le Ekalesia o Franklin Richards e faatulaga se faletusi o gafa e lagolagoina e le Ekalesia.³

E ui i lea, i le i ai o taimi faigata faaletamaoaiga na malaia ai Europa ma le Iunaite Setete, e toatele le Au Paia Europa sa itiiti se faamoemoe e malaga ai i Iuta, na pau lea o le nofoaga e i ai malumalu e mafai ona latou faatino ai nei sauniga mo o latou augatuaa. O le malaia tautupe i le Iunaite Setete sa le mafai ai e le Au Paia o e na o mai i Iuta e sue galuega ai, ma sa popole taitai o le Ekalesia ina nei sosola tagata fai mai mai le teritori e saili ni galuega. O faaletonu tautupe na afua ai ona tuua e nisi o i latou le lafu.⁴

Ia Iulai 1894, sa aoao ai e Anthon ma iloa le ogaoga tele o le tulaga na i ai i Iuta. I se tusi faanatinati i le Misiona i Europa, sa lipoti atu ai e le Au Peresitene Sili e faapea o avega tautupe a le Ekalesia ua toetoe ina a le gafataulimaina, a o faatupulaia uarota ma siteki ua liliu atu i le Ekalesia mo fesoasoani tautupe.

“I le iloa ai o le tulaga lea o mea ua tulai mai ia i tatou,” na tusi atu ai le Au Peresitene Sili, “ua matou manatu ai e faatonuina outou ia le fautuaina le malaga mai o tagata mo le taimi nei.”⁵

I le faia ai o lenei talosaga, sa le’i faamutaina ai e le Au Peresitene Sili le faapotopotoina o Isaraelu. Mo le silia ma le fasefulu tausaga, sa saili naunau ai e le Au Paia e faatino ia faaaliga na poloaiina ai i latou e faapotopoto faatasi. Sa uunaia e faifeautalai ia tagata faatoa liliu mai mai le salafa o le kelope e masii atu i Iuta ma ia faalatalata i le maota o le Alii. Ae sa le mafai ona faaauau pea lena faiga seia faaleleia le tulaga tau i le tamaoaiga.⁶

“O loo matou tatalo pea e le aunoa mo le faapotopotoina o Isaraelu ma olioli e vaai atu i le Au Paia o o mai i Siona,” sa latou tusia ai, ae sa faaopoopo atu, “E tatau ona faaaoga ai le faautautaga tele ina ia mafai ai ona tausisia pea faanaunauga silisili mo e ua faapotopotoina faapea foi i latou e lei faapotopoto maia o Isaraelu.”

Seia oo ina faaleleia tulaga o i ai i Iuta, sa faatonuina e le au peresitene ia Anthon ia faamalolosia le Ekalesia i Europa. “Tuu atu i tagata uma o le Au Paia,” na latou tusi ai, “e manatu i ai o lo latou tiute tatau ma faalelotu le faia o mea uma e mafai ona latou faia e lagolago ai i faifeautalai i le fausiaina o paranesi ma faatumauina.”⁷

Sa auina atu loa lava e Anthon ni kopi o le tusi i taitai o le misiona, ma faatonuina i latou e mulimuli i fautuaga o aumai ai.⁸

I le aso 16 o Iulai, 1894, sa faatagaina ai e le Konekeresi o le Iunaite Setete ma Peresitene Grover Clevelandi ia tagata o Iuta e tosi mai se ata faataatia o se faavae o le setete. Sa olioli mulimuli ane le Au Peresitene Sili ina ua latou mauaina se ualesi mai paaga a le Ekalesia i Uosigitone: “Tulaga faasetete sainia. Ua saoloto tou tagata; ma ”ua mae’a tatou galuega.”⁹

Ina ua faatoa talosaga le Au Paia mo se malo faalesetete i le 1849, sa to atu e le malo ia i latou se malo faateritori nai lo le setete. I le avea ai ma tagatanuu o se teritori, sa le faatagaina tagata o Iuta e filifilia se kovana po o isi taitai maualuluga faalemalo. Ae, sa tatau ona latou faalagolago i le peresitene o le Iunaite Setete e tofia ni taitai mo i latou. O lea faiga na tau atu ai i le tele o feeseeseaiga i le va o le Au Paia, ma isi tagata Iuta, ma le malo o le I.S. mo le tele o tausaga. Na papuipuia ai foi le Au Paia mai le umiaina o tofi i le malo. I lalo o se faigamalo faalesetete, o le a iu ina mafai ai e tagata o Iuta ona puleaina i latou lava.¹⁰

Peitai o lea ua faatoa amata le galuega i Iuta. A o feiloai sui filifilia i le Aai o Sate Leki e tusia se faavae, sa tusia e Emmeline Wells ma isi taitai tamaitai se talosaga e talosagaina ai ia toefuatai mai i le faavae le saolotoga e palota ai, po o aia tatau e palota ai, i tamaitai o Iuta. E ui o le toatele o setete ma teritori i le Iunaite Setete na papuipuia ia tamaitai mai le palota, ae sa toina atu e Iuta le saolotoga e palota ai tagatanuu tamaitai i le 1870. Ona, oo lea i le sefulufitu tausaga mulimuli ane, sa toe faaleaogaina e le Tulafono o le Edmunds-Tucker le aia tatau ina ia faavaivaia ai le paoa faaupufai i le teritori.¹¹

Na matuai le fiafia Emmeline ma isi tamaitai i le tulafono i Iuta, ma oo ai ina latou faatulagaina ia mafutaga mo aia tatau e palota ai tamaitai i le teritori atoa. Sa latou faaauauina foi ona galulue ma isi faalapotopotoga faavaomalo mo aia tatau e palota ai, e tauivi ai mo le aia tatau a tamaitai uma e palota ai.¹² Mo Emmeline, o le saolotoga ma isi aia tatau e palota ai sa i ai se faamoemoega paia. Sa talitonu o ia o le saolotoga o se mataupu faavae o le talalelei a Iesu Keriso. Sa uunaia e le Aualofa ona sui auai ia ola faalagolago i le tagata lava ia ma atia’e o latou tomai. I sauniga Lotu, sa palota foi tamaitai i mataupu faaleekalesia. Aisea o le a latou le olioli ai i avanoa lava e tasi pe a taulima faaiuga faalemalo?¹³

Ae o le saolotoga o tamaitai o se mataupu o loo vevela ai felafolafoaiga, ma e oo lava i taitai o le Ekalesia ua fevaevaeai ai.¹⁴ O tagata e le ioeina le saolotoga o tamaitai e palota ai, e masani ona fai mai o tamaitai e ootia gofie o latou loto e fai ai ni faaiuga faaupufai. Latou te fai mai sa lei manaomia ona palota tamaitai pe a i ai a latou tane, tama, ma tuagane e suia i latou i le pusa palota.¹⁵ Sa faapena foi se talitonuga o Elder B. H. Roberts, o le sa avea ma se sui auai o se mafutaga. Sa tetee foi o ia i le faaaofia ai o le saolotoga o tamaitai e palota ai i le faavae ona sa talitonu o ia e ono fefeu tele ai le pepa o le talosaga mo le mauaina o le faamaoniga mai le au palota a Iuta.¹⁶

Sa tatalaina le mafutaga mo le iloiloina o le faavae i le Aai o Sate Leki i le tautotogo o le 1895. Talu ai ona taofia le au le palota mai le auai aloaia i taualumaga, sa faaaogaina ai e tamaitai se tane a se tasi o e sa taumafai ia maua aia e palota ai, e tauaaoina atu la latou talosaga i le aufono.¹⁷

I le aso 28 o Mati, sa saunoa ai B. H. Roberts e uiga i le mataupu i le mafutaga “E ui ua ou faamatuu atu faapea o le toatele o tagata o lenei teritori ua lagolagoina le saolotoga o tamaitai e palota ai,” na ia faapea mai, “ae ui o lea o loo i ai se aofaiga tele o i latou e le lagolagoina, ma o loo matuai tetee lava i ai, ma o le a palota e tetee i lenei faavae pe afai e i ai se vaega e faatagaina ai.”¹⁸

E lua aso mulimuli ane, ae saunoa Orson Whitney, o se epikopo ua leva ona i ai i le Aai o Sate Leki, i le mafutaga e fai ma sui o i latou o loo taumafai ia maua le aia lea. Na ia tautino atu faapea o le taunuuga o se tamaitai ia saofagā i faigamalo, ma sa ia uunaia sui auai e lagolagoina le saolotoga o tamaitai e palota ai. “Ou te manatu i ai o se tasi lea o meafaigaluega sili e siitia ai e le Silisiliese lenei lalolagi pa’ū, ma sii atu ai ia latalata atili i le afioaga o lona Mataisau,” na ia saunoa ai.¹⁹

I se tusi i le faatonu mo le Woman’s Exponent, sa faaleoina ai foi e Emmeline lona le fiafia i e na teena le saolotoga e palota ai tamaitai “O se mea faʻanoanoa le vaʻai atu i alii o teteʻe i le saolotoga o tamaʻitaʻi ma taumafai e faʻatalitonu fafine e talitonu ona e latou te tapuaʻi ia i latou, ma manatu ua lelei tele,” na ia tusia ai. E le’i toilalo lava tamaitai o Iuta i se taimi o faigata po o le a lava le igoa e faaigoa ai po o le natura, ma e le fesiligia lo latou amio sa’o.”²⁰

I le taimi o le sauniga a le Aualofa i le aso 4 o Aperila i le konafesi aoao, sa toe saunoa ai foi Emmeline e uiga i le saolotoga o tamaitai, ma le mautinoa o le a faaaofia ai e sui auai o le mafutaga i le faavae o le setete fou. O le isi failauga o Jane Richards, na valaaulia ia tamaitai sa i totonu o le potu o e lagolagoina le saolotoga e palota ai, e tutu i luga. Sa tutula’i i luga tamaitai uma sa i ai i le potu.

I le talosaga a Emmeline, na taitai ai e Peresitene Zina Young ia tamaitai i le tatalo, na talosagaina ai faamanuiaga a le Alii mo lenei faamoemoe.²¹

A o talosaga ia tamaitai i le Teritori o Iuta mo le palota, sa malaga ia Albert Jarman mai Lonetona i saute sisifo o Egelani e tuu atu lana molimau i lona tamā. Sa faamoemoe o ia e suia ai le mafaufau o Viliamu e uiga i le Ekalesia ma faamuta ai ana aoaoga faatauma’oi. Sa ia talitonu o ana upu, e tuu atu i se tulaga manino ma le malamalama, e mafai ona tupu ai se mea lelei i lona tama, pe afai e mafai ona faalogo mai.²²

Sa maua atu e Albert o loo soifua manuia Viliamu i se aai e igoa o Exeter. Sa malosi, ae ui o lea o lona lauao ua sina uma ma lana ‘ava mafiafia na foliga ai ua toeaina atu nai lo lona matua sa i ai. Ua silia ma le sefulu tausaga ua mavae talu ona la fevaaia’i o le tasi ma le isi, ma i le taimi muamua sa foliga lava na masalosalo ia Viliamu i le tino mai o Albert.²³ I le mavae ai o le toe taliu i Egelani, sa ta’ua e Viliamu, na ia faalogo i se tala salatua e uiga i le fasiotia o Albert ma sa ia tusi ai i le Au Peresitene e uiga i lea mea. Ina ua latou le tali mai, sa ia fai mai, sa sili atu ona leaga le mea ua oo i ai ona manatu.²⁴

Ae ui o lea, ina ua mavae le la feiloaiga faafesaga’i, sa mafai e Albert ona faatalitonu o ia i lona sese.²⁵ O le fautuaga a Peresitene Lund faapea ia suesue Albert i le talalelei a o lei taumafai e faafetaia’ia Viliamu, o se fautuaga poto. I le mavae ai o le toefaatasia ma lona tama, sa mafai e Albert ona iloa o ia o se tagata atamai.²⁶

Ae e lei agaleaga pe saua Viliamu ia te ia. O le taumalulu o le 1894-95 sa matautia i Egelani, ma sa faateteleina ai ni faafitauli o le mānava na alia’e mai ia Alabert. Sa faataga e Viliamu o ia e nofo i le fale o lona aiga e fotua’i ai seia lelei le tau. Sa faia foi e lona toalua, o Ann mea uma sa ia mafaia e fesoasoani ai ia toe malosi Albert.²⁷

I le taimi na nofo ai iina, sa taumafai Albert e tuu atu lana molimau i lona tama, ae sa le manuia. I nei taimi, sa le mafai ona iloa e Albert pe na pepelo ma le loto lona tama e uiga i le Ekalesia pe ona sa ia tautala soo i mea faavalevalea ua oo ai ina ia talitonu i ai.²⁸

I se tasi aso, sa fai atu ai Viliamu ia Albert ua loto o ia e tuu le osofaia o le Au Paia pe a totogi atu e le Ekalesia ia te ia le £1,000. Mo lenei tupe laitiiti, na ia fai atu ai, o le a ia ta’u sa’o atu ai i le lautele sa sese o ia e uiga i le Au Paia ma e le toe ulufale lava i se potu mo tautalaga e toe faitioina ai le Ekalesia. Sa pasi atu e Albert le talosaga ia Peresitene Lund, ae na teena e le Au Peresitene Sili.²⁹

I le le mafai ai ona suia le mafaufau o lona tama e uiga i le Ekalesia, o lea sa tuua ai e Albert ina ua mavae ni nai vaiaso. A e la te le’i taumavae, sa la o ai ma Viliamu i se falepueata e pue faatasi ai o la ata. I se tasi o ata, sa nofo Viliamu i se laulau, a o tusi lona lima taumatau i se itulau o i se tusi na tatala, a o tu Albert i ona tua. I se isi, sa tutu faatasi ai i la’ua o le tamā ma le atalii. I tua atu o le soesa a Viliamu o loo vaaia ai se ’ata’ata.³⁰

Sa faaiuina le mafutaga mo le iloiloina o le faavae i le Aai o Sate Leki ia Me. Na olioli Emmeline Wells ma le le mafaitaulia o isi tamaitai i Iuta, na palota sui auai ia faaaofia i totonu o le faavae le aia tatau e palota ai tamaitai.³¹

I le mavae ai o le mafutaga, sa tumau pea ona malosi ia B. H. Roberts i polotiki, e ui i ona tiutetauave mo le taimi atoa i le Ekalesia. O ana lauga e faasaga i le saolotoga o tamaitai e palota ai na lei taliaina i le salafa o le setete. Ae o lona igoa tauleleia o se failauga ma se faiaoga na tumau pea le malosi i totonu ma fafo atu o le Ekalesia Ia Setema, e lua masina a o lei faia le isi palota, na faatuina atu ai e le Vaega Faatemokarasi o Iuta ia B.H. e fai ma o latou sui tauva i le Maota o Sui o le Iunaite Setete.³²

Mo le fiasefulu tausaga, sa tele ina umia e taitai o le Ekalesia tulaga taua o le malo i Iuta. Sa palota foi le Au Paia o se vaega o tagata soofaatasi ma tutusa manatu, o nisi taimi e ositaulaga ai o latou talitonuga faaupufai taitasi e tausisia ai le tosinaga a le Ekalesia i le teritori. Ae i le maea ai ona feeseesea’i le Au Paia i vaega faaupufai i le popofou o le 1890, na atili ai ona nofouta taitai o le Ekalesia e uiga i le tuueseeseina o mataupu a le ekalesia mai le setete, ma le silafia e le o tagata uma i Iuta e tutusa manatu faaupufai. O le taimi lena, sa finagalo malilie ai le Au Peresitne Sili ma le Korama a Aposetolo e Toasefululua e le tatau i le au pulega aoao ona tosinaina le au palota e ala i le lauga faalauaitele e uiga i mea faapolotiki.³³

Peitai, i le taimi o le mafutaga faalefaavae, sa tolopo ai mo se taimi le tumau e le Au Peresitene Sili lenei fautuaga, ae faatagaina ai B.H. Ma isi pulega aoao e avea ma ni sui auai. Ina ua faatuina e le Vaega Faatemokarasi ia B.H. e fai ma sui tauva, e lei manatu o ia o se mea sese lona taliaina. Na te lei matauina foi ni tetee mai le Au Peresitene Sili. Na faapena foi lagona o le Aposetolo o Moses Thatcher ina ua faatuina mai o ia e le Au Temokarasi e tauva mo le Senate o le I.S.³⁴

Peitai, i le sauniga aoao a le au peresitene o le konafesi ia Oketopa, 1895, na a’oa’ia ai i se tulaga faalauaitele e Iosefa F. Samita nei alii e toalua, i lo la taliaina o filifiliga e aunoa ma le muai feutagai ma uso o a la korama. “O loo i ai o tatou fofoga taumomoli soifua i le Ekalesia, ma e tatau ona sailia a latou fautuaga,” na ia faamanatu atu ai i le potopotoga. “O le taimi lava e tonu ai i le tamaalii o loo umia le pule e fai e pei ona ia finagalo ai, ua ia laa atu i se tulaga matautia.”³⁵

I lana saunoaga, e lei faitioina e Peresitene Samita ia talitonuga faapolotiki o B.H. Ae, na ia toefaamautuina le le faapito’au faapolotiki o le Ekalesia faapea foi ana aiaiga faavae e faapea, e ao i taitai tofia o le Ekalesia ona taulai atu o latou taimi ma taumafaiga i la latou galuega auauna atu. Peitai, i le mavae ai o le fonotaga sa faaaoga ai e le Vaega Ripapelika le a’oa’iga e osofa’ia ai le faalauiloaga a B.H. Talu ai o Iosefa F, Samita o se Ripapelika, e toatele le Au Temokarasi na tuua’ia o ia i le faaaogaina o lona tulaga i le Ekalesia e faavaivaia ai la latou patī.³⁶

E le’i leva mulimuli ane, i se faatalanoaga ma se nusipepa, sa saunoa ai B.H. i lona faaaloalogia o le pule o le Ekalesia ma na te lei faia se mea e tuua’ia ai le Au Peresitene Sili faapea o taumafai e faamanu’alia lana faalauiloaga. Ae sa tumau pea i lana aia tatau e saili atu i le tofi faapolotiki, e ui i tetee a le Au Peresitene Sili, ona sa ia talitonu na te lei solia tulafono a le Ekalesia. Mulimuli ane sa ia saunoa ai i se tulaga faateia e aunoa ma se nē. I se fonotaga faapolokiki, sa ia faitioina ai tamaloloa sa faaaogaina lo latou malosiaga i le Ekalesia e tosina ai tagata i le mea e palota i ai.³⁷

I le Aso o le Palota, sa mamao le manumalo o sui o le Ripapelika i le atunuu atoa i sui o le Temokarasi e pei o B.H. Roberts ma Moses Thatcher. Ma sa faamaonia e le au palota i Iuta le faavae fou faatasi ai ma ona tuutuuga ua to atu ai aia tatau i tamaitai e palota ai.

Sa taumafai ia B.H. Roberts e faaali ni foliga fiafia i le lautele. Sa iloa e ia ma lana patī e tatau lava ona i ai se tasi e faia’ina. “E foliga ua pa’ū i la matou patī i lenei taimi,” na ia saunoa ai.

Ae o totonu sa ia lagonaina le tiga ma’ini o lona faia’ina.³⁸

I le aso 4 o Ianuari, 1896, na avea ai Iuta ma setete lona fasefulu-ma-le-lima i le Iunaite Setete o Amerika. I le Aai o Sate Leki, sa faapapa ai uafana ma taili faaili e sami ai. Sa tatā faasoloatoa logo i le vanimonimo lanumoana, ma le maatiati o le malulu a o fe’oma’i tagata i magaala, ma faalealea a latou fu’a ma faailoilo.³⁹

E ui o lea, sa popole pea Heber J. Grant e uiga i ana uo o B.H. Roberts ma Moses Thatcher. Sa taufai mumusu nei alii e toalua e faatoese i lo la le feutagai muamua ma o la taitai perisitua a o lei sailia tofi lautele, ma na mafua ai ona faia le faaiuga a le Au Peresitene Sili ma le Toasefululua e faapea, sa la faamuamua a la’ua matata faaupufai i lo la la’ua auaunaga i le Ekalesia. Sa talitonu foi le Au Peresitene Sili na le’i tonu le faitioina e B.H. O i latou ma le Ekalesia i nisi o ana lauga ma faatalanoaga faaupufai.⁴⁰

I le aso 13 o Fepuari, sa fono ai le Au Peresitene Sili ma le toatele o le Toasefululua i le Malumalu o Sate Leki faatasi ai ma B.H. Ma isi peresitene o Fitugafulu. I lena fonotaga, sa fesili atu ai aposetolo ia B.H. E uiga i ana faamatalaga e faasaga i le Au Peresitene Sili. Sa faamautu atu e B.H. o mea uma na ia tautala atu ai ma faia, e leai lava ma se mea o faanoanoa pe salamo ai.

A o faagasolo le fonotaga, sa oo ina faanoanoa le loto o Heber. Sa taitasi taitai ma aioi atu ia B.H. ia faamaualaloina o ia lava, ae sa le aoga a latou upu. Ina ua tulai Heber e saunoa atu i lana uo, sa lofituina o ia i se lagona o’oo’o, ma sa tau le matala atu se upu.

I le mavae ai o saunoaga a aposetolo ma fitugafulu taitoatasi, sa tulai B.H ma faapea mai, e sili ia te ia le le toe iai o sona tulaga i le au peresitene o Fitugafulu nai lo le faatoese ona o mea sa ia faia. Ona ia talosagaina lea o alii sa i totonu o le potu e tatalo ina ia aua ne’i aluese lona faatuatua.

“O le a e tatalo mo oe lava?” na fesili atu ai le aposetolo o Polika Iaga Laitiiti.

“O la’u tala moni lava,” na fai atu ai B.H., “Matua’i leai lava so’u lagona faapena i le taimi nei.”

Ina ua mae’a le fono, sa fofogaina e Heber le tatalo faai’u. Ona taumafai lea o B.H. e tuua le potu, sa mau Heber ia te ia ma opo mai. Sa matala ese mai B.H. ma tele’a’i ese loa, ma ona foliga le fiafia.⁴¹

I ni nai vaiaso mulimuli ane, i le aso 5 o Mati, sa toe fono ai le Au Peresitene Sili ma le korama a Aposetolo e Toasefululua faatasi ai ma B.H. ma iloa ai e lei suia lava o ia. Na tuu atu e Peresitene Uitilafi ia te ia vaiaso e tolu e toe mafaufau ai i lona tulaga. Afai e tumau lona le salamo, o le a latou faamalolo o ia mai le Au Fitugafulu ma faasa o ia mai le faaaogaina o le perisitua.⁴²

O le vaiaso na sosoo ai, sa faatulaga ai e Heber ma lona uso a aposetolo o Francis Lyman e fono faapitoa ma B.H. A o latou talanoa, sa ta’u atu e B.H. I aposetolo o le a le suia lava lona mafaufau. Afai e manaomia e le Au Peresitene Sili e sue se tasi e suia lona tulaga i le au peresitene o Fitugafulu, na ia fai mai ai, e leai se mea e taofia ai i latou e fai.

Sa faamaulu e B.H. lona peleue ma tuua loa. “Ou te manao ia outou iloa o le faaiuga ua outou fuafua e fai faasaga ia te au, ua atili loloto ai lo’u faanoanoa,” o lana tala lea. “Ou te le fia manao tou te manatu faapea ou te le o malamalama i mea uma o le a ou le toe maua.”

Na matau e Heber loimata i mata o lana uo, ma sa ia fai atu ia te ia e nofo i lalo. Ona talanoa atu lea o B.H. i taimi na faatiga ai taitai o le Ekalesia ia te ia i nofoaga faitele, ma sa lauga atu e lagolagoina le Pati a le Ripapelika. Mo le lua itula, sa tali atu ai Heber ma Francis i ona atugaluga ma talosagaina o ia e sui lona ala. Sa manatu Heber e faapei ua faamanuiaina i la’ua ma Francis e iloa mea la te fai atu ai.

Ina ua maea a la’ua tala, sa ta’u atu e B.H. i ana uo ua manao sei mafaufau i lona tulaga i lena po ona toe foi atu lea ia i la’ua ma lana faaiuga i le taeao. Sa faatofa atu Heber i lana uo, ma tatalo ia faamanuia o ia e le Alii.⁴³

O le taeao na sosoo ai na auina atu ai e B.H. se tusi puupuu ia Heber ma Francis. “Ua ou gauai atu i le pule a le Atua o i le usoga,” o se vaega lea o le faitauga. “Talu ai ua latou manatu ou te sese, o le a ou ifo atu ia i latou, ma tuu atu a’u lava i o latou aao o ni auauna a le Atua.”

Sa faia loa lava e Heber se kopi o le tusi ma tamoe atu i le isi ituala i le ofisa o Peresitene Uitilafi.⁴⁴

Pe lua vaiaso mulimuli ane, i le Malumalu o Sate Leki, sa faatoese ai B.H. Roberts i le Au Peresitene Sili, ma ta’u atu lona sese i le le sailia o le faatagaga e tauva mo le tofi faaupufai. Sa faatoese o ia pe afai na i ai sana tala i le lautele na afua ai le gugulu o le Au Paia, ma sa ia folafola atu e faaleleia soo se faatiga na ia faia.

Sa ia fai atu foi e faapea i le taimi o la latou talanoaga ma Heber J. Grant ma Francis Lyman, na faamaluluina lona loto i mafaufauga i ona augatuaa.

“Ua na o a’u o se sui tane i le Ekalesia i le itu o lo’u tama, faapea foi i le itu o lo’u tina,” na ia fai atu ai, “ma o le mafaufauga o le lusi o le perisitua ma tuua o’u augatuaa e momoe e aunoa ma se sui i le perisitua, na matuai malosi le galueaiina ai o o’u lagona.”

“Sa ou alu i le Alii ma sa ou maua ai le malamalama ma faatonuga e ala i Lona Agaga e gauai atu i le pule a le Atua,” na ia faaauau ai. “Ou te faailoa atu ia te outou lo’u naunauga ma le tatalo ia mafai ona ou faia mea uma e faamalieina ai isi, ma ou uia po o le a lava le tulaga faalumaina tou te silafia ua tatau ona tuu mai i o’u luga, ma le faamoemoe ia ou teuina pea pe na o le perisitua a le Atua, ma ou maua le avanoa e faia ai galuega mo o’u tama i lenei maota paia. ”⁴⁵

Na talia e le Au Peresitene Sili le faatoesega a B.H. E sefulu aso mulimuli ane, i lalo o le taitaiga a Peresitene Uitilafi, sa saunia ai e George Q. Cannon se faamatalaga e faamanino ai le tulaga o le Ekalesia i le aofia ai o ona taitai i tulaga faaupufai. Ona ia tuuina atu lea o le faamatalaga i le Au Peresitene Sili ma le au pulega aoao o le Ekalesia mo la latou faamaoniga.⁴⁶

O le aso na sosoo ai, i le konafesi aoao ia Aperila 1896, na faitau atu ai e Heber J. Grant le faamatalaga i le Au Paia. Na sainia e pulega aoao uma o le Ekalesia sei vagana ai Anthon Lund, o le sa i ai pea i Europa, ma Moses Thatcher, o le sa musu e toe faalelei ma le Au Peresitene Sili ma ona uso a aposetolo.

Na faaigoa o le “Manifeso Faaupufai,” na faamautu ai e le faamatalaga le talitonuga o le Ekalesia i le tuueseesega o le ekalesia ma le setete. E manaomia ai foi ia au pulega aoao uma o e sa tautino atu i latou lava i le auaunaga mo le taimi atoa i le galuega a le Alii e faamautu ai le faamaoniga a o latou taitai korama a o lei sailia pe taliaina foi soo se tofi faaupufai.⁴⁷

I le konafesi, sa uunaia ai e B.H. Roberts le Au Paia e lagolago o latou taitai faale-ekalesia, ma sa ia molimau atu i le mautu o le galuega a le Alii. “I le tisipenisione lenei, o le afioga e le toilalo a le Atua, na folafola mai ai e alualu pea i luma lana galuega ma le mausali, e ui i le le atoatoa o tagata,” na ia tautino atu ai.

“E ui atonu na tautevateva nisi i le pogisa,” na ia saunoa ai, “sa mafai lava ona latou toe foi mai i le ala o mea tonu, ma faaaoga lana taitaiga e le sese lava i le lelei o le faaolataga.”⁴⁸