Faamatalaga i Punaoa

O lenei voluma o se galuega o le faamatalaga o tala moni e faavae i luga o le faitau selau o punaoa faaletalafaasolopito. Sa faia mea uma ma le faaeteete silisili ina ia mautinoa ai lona sa’o atoatoa. Ae ui i lea, e lē tatau i tagata faitau ona faapea, o le tala o loo faamatalaina iinei ua lelei atoa pe ua atoatoa. O faamaumauga o aso ua mavae, ma lo tatou tomai e faamatalaina ai i le taimi nei, e faatapulaaina.

O punaoa uma lava o le malamalama faaletalafaasolopito e i ai avanoa, faauiga lua, ma le faaituau. E masani ona latou faailoa atu le manatu o lo latou foafoa, ma molimau i aafiaga o mea lava e tasi, manatua, faauiga, ma faamaumau i latou i se tulaga ese. O le luitau o le tusitala o talafaasolopito o le aoina lea o manatu ua iloga ma tuufaatasia ai se malamalamaaga atoatoa o le taimi ua tuanai.

O leAu Paia o se tala moni o le talafaasolopito o le Ekalesia a Iesu Keriso o le Au Paia o Aso e Gata Ai, e fua i mea ua tatou iloa ma malamalama ai i le taimi nei mai faamaumauga o talafaasolopito o loo i ai nei. E le o se talafaasolopito atoatoa, e le na o le pau foi lea o le faamatalaina e mafai o le talafaasolopito paia o le Ekalesia. Ae o sikola na suesueina, tusia, ma iloiloina lea voluma e iloa lelei lava punaoa o talafaasolopito, ma faaaogaina ma le mafaufau lelei i latou, ma faamauina i latou i faamatalaga i le faaiuga ma le lisi o punaoa ua taua. Ua valaaulia tagata faitau ina ia iloiloina punaoa e i latou lava, o le tele lava ua faaeletonika ma ua fesootai i faamatalaga i le faaiuga. Atonu o le mauaina o nisi punaoa, po o ni faitauga fou o punaoa o loo i ai, o le a maua ai nisi uiga, faaliliuga, ma maua ai nisi manatu.

O le tala i le Au Paia o loo faatatau i punaoa o talafaasolopito o ituaiga e lua: tulaga muamua ma lona tulaga lona lua. O punaoa tulaga muamua e aofia ai faamatalaga e uiga i mea na tutupu mai ia i latou na molimauina na mea e i latou lava ia. O nisi o punaoa i le Tulaga muamua, e pei o tusi, api talaaga, lipoti o lauga, na tusia i le taimi o mea na tutupu o loo latou faamatalaina. O nei punaoa o le taimi lava e tasi e atagia ai manatu o tagata, lagona, ma mea na latou faia i lena taimi, e faaalia ai le ala na faauiga ai le taimi ua tuanai pe a tuu i le taimi nei. O isi punaoa tulaga muamua, e pei o o latou lava talaaga ma faatalanoaga, na tusia ina ua mavae le mea moni. O nei punaoa o manatuaga ua faaalia ai le uiga o le taimi ua tuanai i le tusitala i lena taimi, e masani lava ona sili atu ai nai lo punaoa o i ai nei i le faailoaina o le taua o mea na tutupu i le tuanai. Ona latou te faalagolago i mea e manatua, e ui i lea, o punaoa o mea e manatua e mafai ona aofia ai mea e le sa’o ma e mafai ona faatosinaina i le malamalama ma talitonuga o le tusitala mulimuli ane.

O punaoa o talafaasolopito i lona Tulaga lona lua e aofia ai faamatalaga mai tagata e lei molimauina e i latou lava mea na tutupu ua faamatalaina. O na punaoa e aofia ai talafaasolopito o aiga mulimuli ane ma galuega faaleaoaoga. O lenei voluma o loo aitalafu i le tele o ni isi nei o punaoa, ia ua faamaonia le taua tele mo le faalauteleina o le anotusi ma le galuega faaliliu ua tuuina mai ai.

O punaoa uma lava i le Au Paia na iloiloina mo le sa’o, ma na siakiina soo fuaiupu uma lava mo le ōgatasi ai ma punaoa. O laina o talanoaga ma isi upusii e o mai sao lava mai punaoa faaletalafaasolopito. O sipelaga, faamataitusi tetelēina, ma le faailogaina i upusii tuusao ua faafouina filemu mo le maninoga. I ni tulaga e le masani ai, ua tele ai ni faafouga taua, e pei o le fesiitai mai le gagana o le taimi ua tuanai i le taimi nei po o le kalama ua faafouina, ua faia i upusii ina ia faaleleia ai le faitau. I tulaga faapenei, o faamatalaga i le faaiuga ua faamatalaina ai suiga na faia. O filifiliga e uiga i punaoa e faaaoga ma pe faapefea ona faaaogaina na faia e se vaega o tusitala faasolopito, tusitala, ma faatonu o e na faalagolago a latou faaiuga i le moni o le talafaasolopito faapea foi ma le lelei o le tusi.

A o atili avea le tala o le Ekalesia ma mea ua soo ai le lalolagi, ua faateleina ona faalagolago le Au Paia i punavai e fatuina i gagana e ese mai le gagana Peretania. I ni isi o taimi, ua faalagolago ai le au tusitala o lenei voluma i faaliliuga faavolenitia po o faaliliuga a le masini e mamanu ai le faamatalaina. O upusii uma mai punaoa ua faaliliu e aumai i le au faaliliutusi faapolofesa.

O nisi punaoa le lelei na faaaogaina e tusia ai lenei voluma ma ua ta’ua i faamatalaga. O nei punaoa na faaaogaina muamua lava e faailoa ai uluai tetee i le Ekalesia i le vaitaimi o le senituri sefulu ma le iva ma le seneturi lona luasefulu. E ui ina tele lava ina sauā i le Ekalesia, o nei faamaumauga i nisi taimi e aofia ai faamatalaga auiliili e lei faamaumauina i nisi mea. O nisi o nei faamatalaga na faaaoga ina ua faamaonia mai e isi faamaumauga lo latou sao faalauaitele. O mea moni mai nei faamaumauga tetee na faaaoga e aunoa ma le suia o lo latou faauigaga leaga, ma o le ta’ua ai o se punavai i faamatalaga faaiu, e le faapea ai ua ta’u mai ai se faamaoniga e le Ekalesia.

I le avea ai o se tala faaletalafaasolopito ua tusia mo se aofia lautele, o lenei voluma ua tuuina atu ai se talafaasolopito o le Ekalesia i se tulaga talafeagai, ma faigofie ona mauaina. Ao taulai atu i metotia taatele o le faamatalaina o tala, e lē o agai atu i tua atu o faamatalaga o loo maua i punaoa o le talafaasolopito. Pe a aofia i le tusiga e oo lava i faamatalaga faatauvaa, e pei o foliga faaalia po o tulaga o le tau, e faia ona o nei faamatalaga o loo maua po o aumaia sao lava mai le faamaumauga faatalafaasolopito.

Ina ia faatumauina le mafai ona faitauina le tala, e seasea lava ona ta’ua e le voluma ni luitau i totonu pe agai foi i le faamaumauga o le talafaasolopito i le tusiga lava ia. Nai lo lena, o ia ituaiga o talanoaga e faavae i punaoa o loo maua i totonu o tusiga faaleautu i le saints.ChurchofJesusChrist.org ma o loo faasino foi i faamatalaga faaiu i lalo o le faaulutala faamatamataola o le “Autu.” Ua uunaia tagata faitau ina ia feutagai i nei tala ao latou faitauina le Au Paia.