“Ibqa’ Fija, u Jiena Nibqa’ Fik; Għalhekk Imxi Miegħi”
Il-wegħda tas-Salvatur li jibqa’ fina hija vera u disponibbli għal kull membru tal-Knisja rrestawrata tiegħu li jħares il-patti tiegħu.
Il-profeta tal-qedem Ħenok li naqraw dwaru fit-Testment il-Qadim, fid-Duttrina u Patti, u fil-Ġawhra li Tiswa Ħafna,1 kien strumentali fit-twaqqif tal-belt ta’ Sijon.
Ir-rakkont skritturali tas-sejħa ta’ Ħenok biex iservi jindika li “huwa sama’ leħen mis-smewwiet, jgħid: Ħenok, ibni, mur ħabbar lil dan il-poplu, u għidilhom—Indmu, … għax qalbhom twebbset, u widnejhom tqal biex jisimgħu, u għajnejhom ma jistgħux jaraw fil-bogħod.”2
“ U meta Ħenok sema’ dan il-kliem, huwa nxteħet mal-art … u mar quddiem il-Mulej u qallu: X’inhi r-raġuni għalfejn jiena sibt grazzja quddiemek, għax jiena għadni żagħżugħ, u kulħadd jobgħodni; u jien fommi tqil; għalhekk jiena l-qaddej tiegħek?”3
Jekk jogħġobkom innotaw li fiż-żmien li fih Ħenok ġie msejjaħ biex iservi, huwa sar mill-aktar konxju tal-inadegwatezza u l-limitazzjonijiet personali tiegħu. U naħseb li lkoll kemm aħna f’xi ħin jew ieħor fis-servizzi tagħna fil-Knisja ħassejna lilna nfusna verament bħal Ħenok. Iżda jien nemmen li t-tweġiba li l-Mulej ta lil Ħenok għall-mistoqsija ħerqana tiegħu hi waħda istruttiva u tapplika għalina lkoll illum.
“U l-Mulej qal lil Ħenok: Mur u agħmel kif tlabtek, u l-ebda bniedem mhu se jippenetrak. Iftaħ ħalqek, u ħalqek jimtela, u jiena ngħinek titkellem. …
“Ara l-Ispirtu tiegħi se jkun fuqek, għalhekk jiena niġġustifika dak kollu li inti tgħid; u l-muntanji jaħarbu minn quddiemek, u x-xmajjar idawru r-rotta tagħhom; u inti għandek tibqa’ fija, u jiena nibqa’ fik; għalhekk imxi miegħi”4
Ħenok ultimament sar profeta mill-aktar setgħan u għodda f’idejn Alla biex iwettaq ħidma kbira, iżda hu ma bediex il-ministeru tiegħu b’dak il-mod! Pjuttost, il-kapaċità tiegħu maż-żmien kibret hekk kif huwa tgħallem jibqa’ f’Iben Alla u jimxi miegħu.
Jiena nitlob b’ħerqa għall-għajnuna tal-Ispirtu s-Santu hekk kif nikkunsidraw flimkien il-parir mogħti lil Ħenok mill-Mulej u xi jfisser għalik u għalija llum.
Int Għandek Tibqa’ Fija
Il-Mulej Ġesù Kristu jestendi l-istedina lil kull wieħed u waħda minna biex nibqgħu fih.5 Iżda kif nistgħu sewwasew nitgħallmu u jirnexxielna nibqgħu fih?
Il-kelma ibqgħu tindika li nkunu fissi jew stabbli u sħaħ mingħajr ma nċedu. Il-Presbiteru Jeffrey R. Holland spjega li “nibqgħu” bħala azzjoni tfisser “‘[li] noqogħdu—iżda [li] noqogħdu hemm għal dejjem.’ Din hi s-sejħa tl-messaġġ tal-evanġelju għal … kulħadd … fid-dinja. Ejjew, iżda ejjew biex tibqgħu. Ejjew b’konvinzjoni u b’qawwa. Ejjew b’mod permanenti, għall-ġid tagħkom u għall-ġid tal-ġenerazzjonijiet kollha li ġejjin warajkom.”6 Għalhekk, aħna nibqgħu fi Kristu hekk kif inkunu fermi u sodi fid-devozzjoni tagħna lejn il-Feddej u l-għanijiet qaddisa tiegħu, kemm fi żmien tajjeb kif ukoll ħażin.7
Aħna nibdew nibqgħu fil-Mulej billi neżerċitaw il-volontà morali tagħna li nieħdu fuqna l-madmad tiegħu8 permezz tal-patti u l-ordinanzi tal-evanġelju rrestawrat. Il-konnessjoni tal-patt li għandna ma’ Missierna fis-Smewwiet u mal-Iben il-ħaj u mqajjem mis-Smewwiet tiegħu hija s-sors divin ta’ perspettiva, tama, qawwa, paċi, u hena li tibqa’; hija wkoll is-sisien ibsin daqs il-blat9 li fuqhom għandna nibnu ħajjitna.
Aħna nibqgħu fih billi kontinwament nagħmlu li nistgħu biex insaħħu r-rabta tal-patt individwali tagħna mal-Missier u l-Iben. Per eżempju, li nitolbu b’sinċerità lill-Missier Etern f’isem l-Iben il-Maħbub tiegħu jsaħħaħ u jiffortifika r-rabta tal-patti tagħna magħhom.
Aħna nibqgħu fih billi verament immantnu lilna nfusna permezz ta’ kliem Kristu. Id-duttrina tas-Salvatur tressaqna, bħala wlied il-patt, eqreb lejh10 u tgħidilna dak kollu li għandna nagħmlu.11
Aħna nibqgħu fih billi nitħejjew b’ħerqa biex nipparteċipaw fl-ordinanza tas-sagrament, nagħtu ħarsa u nirriflettu dwar il-wegħdiet tal-patt tagħna u nindmu b’sinċerità. Li b’mod den nieħdu sehem fis-sagrament hija xhieda lil Alla li aħna lesti nieħdu fuqna isem Ġesù Kristu u li se nagħmlu li nistgħu biex “dejjem niftakru fih”12 wara l-mument qasir ta’ ħin meħtieġ biex nipparteċipaw f’dik l-ordinanza sagra.
U aħna nibqgħu fih billi nservu lil Alla kif inservu lil uliedu u nimministraw lil ħutna.13
Is-Salvatur qal, “Jekk tħarsu l-kmandamenti tiegħi, intom tibqgħu fi mħabbti; kif jiena ħarist il-kmandamenti ta’ Missieri u qiegħed f’imħabbtu.”14
Jien iddeskrivejt fil-qosor ħafna mill-modi kif nistgħu nibqgħu fis-Salvatur. U issa nistieden lil kull wieħed u waħda minna bħala dixxipli tiegħu biex nitolbu, infittxu, u nħabbtu, u nitgħallmu għalina nfusna bil-qawwa tal-Ispirtu s-Santu modi oħra sinifikanti kif nistgħu nagħmlu lil Kristu ċ-ċentru ta’ ħajjitna f’dak kollu li nagħmlu.
U Jiena Nibqa’ Fikom
Il-wegħda tas-Salvatur lid-dixxipli tiegħu hi waħda doppja: jekk aħna nibqgħu fih, Huwa jibqa’ fina. Iżda hi ħaġa possibbli għal Kristu li jibqa’ fikom u fija—individwalment u personalment? It-tweġiba għal din il-mistoqsija hija iva b’mod assolut!
Fil-Ktieb ta’ Mormon, nitgħallmu dwar it-tagħlim ta’ Alma u x-xhieda tiegħu lill-foqra li t-tbatija tagħhom wasslithom biex ikunu umli. Fl-istruzzjoni tiegħu, huwa qabbel il-kelma ma’ żerriegħa li jeħtieġ li tiġi miżrugħa u mantnuta, u huwa ddeskriva “il-kelma” bħala l-ħajja, il-missjoni, u s-sagrifiċċju espjatorju ta’ Ġesù Kristu.
Alma qal, “Ibdew emmnu fl-Iben ta’ Alla, li hu għandu jiġi biex jifdi lill-poplu tiegħu, u li se jbati u jmut biex ipatti għal dnubiethom; u li huwa se jerġa’ jqum mill-imwiet, u dan se jġib fis-seħħ il-qawmien, fejn il-bnedmin kollha sejrin jieqfu quddiemu, biex f’jum il-ħaqq finali jsir ħaqq minnhom skont għemilhom.”15
Skont din id-deskrizzjoni tal-“kelma” minn Alma, jekk jogħġobkom ikkunsidraw il-konnessjoni li tispirana li huwa jidentifika wara.
“U issa … nixtieq li intom tiżirgħu din il-kelma f’qalbkom, u hekk kif tibda tespandi bl-istess mod araw li tmantnuha permezz tal-fidi tagħkom. U araw, hija ssir siġra, u tibqa’ tikber fikom sal-ħajja ta’ dejjem. “Imbagħad jalla Alla jħaffef it-toqol tagħna, permezz tal-hena ta’ Ibnu. U jekk tridu intom tistgħu sewwasew tagħmlu dan kollu.”16
Iż-żerriegħa li għandna nagħmlu li nistgħu biex niżirgħu f’qalbna hija l-kelma—sewwasew il-ħajja, il-missjoni, u d-duttrina ta’ Ġesù Kristu. U hekk kif il-kelma tiġi mantnuta permezz tal-fidi hija tista’ ssir siġra u tibqa’ tikber fina sal-ħajja ta’ dejjem.17
X’kien is-simboliżmu tas-siġra fid-dehra ta’ Leħi? Is-siġra tista’ tiġi kkunsidrata bħala rappreżentazzjoni ta’ Ġesù Kristu.18
Għeżież ħuti, il-Kelma tinsab fina? Il-veritajiet tal-evanġelju tas-Salvatur huma miktubin fuq it-twavel tal-laħam ta’ qlubna?19 Qegħdin aħna nersqu lejh u gradwalment insiru aktar bħalu? Is-siġra ta’ Kristu tinsab tikber fina? Qegħdin nagħmlu li nistgħu biex insiru “ħlejjaq ġodda”20 fih?21
Jista’ jkun li dan il-potenzjal mirakoluż ispira lil Alma biex jistaqsi: “Twelidtu intom spiritwalment minn Alla? Irċevejtu intom ix-xbieha tiegħu fuq wiċċkom? “Esperjenzajtu intom din il-bidla qawwija f’qalbkom?”22
Għandna dejjem niftakru fl-istruzzjoni li l-Mulej ta lil Ħenok: “Int għandek tibqa’ fija, u jien nibqa’ fik.”23 Jiena nixhed li l-wegħda tas-Salvatur li jibqa’ fina hija vera u disponibbli għal kull membru tal-Knisja rrestawrata tiegħu li jħares il-patti tiegħu.
Għalhekk Imxu Miegħi
L-Appostlu Pawlu widdeb lill-fidili li rċevew fihom lill-Mulej: “Għalhekk imxu intom fih.”24
Li nimxu fis-Salvatur u miegħu jenfasizza żewġ aspett mill-aktar importanti tad-dixxipulat: (1) li nobdu l-kmandamenti ta’ Alla, u (2) niftakru u nonoraw il-patti sagri li jorbtuna mal-Missier u l-Iben.
Ġwanni ddikjara:
“U b’dan nafu li nagħrfu ’l Ġesù: jekk inżommu l-kmandamenti tiegħu.
“Min jgħid, Jiena nafu, u ma jżommx il-kmandamenti tiegħu, hu giddieb u l-verità mhijiex fih.
Iżda kull min iżomm il-kelma tiegħu, fih hemm tassew l-imħabba ta’ Alla fil-milja tagħha. B’dan nagħrfu li aħna fih.
“Min jgħid li qiegħed jgħammar fih, jeħtieġ li hu jgħix kif għex hu stess.”25
Ġesù jsejjaħ lil kull wieħed u waħda minna, “ejja, imxi warajja”26 u “imxi miegħi.”27
Nixhed li hekk kif aħna nibqgħu mexjin ’il quddiem fil-ħlewwa tal-Ispirtu tal-Mulej,28 aħna niġu mberkin bil-qawwa, bil-gwida, bil-protezzjoni, u l-paċi.
Testimonjanza u Wegħda
Alma jiddeskrivi appell li l-Mulej għamel lill-erwieħ ħajjin kollha:
“Ara, huwa jibgħat stedina lill- bnedmin kollha, għaliex dirgħajn il-ħniena huma lesti biex jilqgħuhom, u jgħid: Indmu, u jien nilqagħkom.
“… Ejjew għandi u intom tieklu mill-frott tas-siġra tal-ħajja; iva, intom tieklu u tixorbu mill-ħobż u l-ilma tal-ħajja b’xejn.”29
Nenfasizza l-komprensività assoluta tal-appell tas-Salvatur. Huwa għandu xewqa li jbierek bil-grazzja u l-ħniena tiegħu lil kull persuna li qed tgħix bħalissa, li qatt għexet, u li qatt trid tgħix fuq din l-art.
Xi membri tal-Knisja jaċċettaw bħala verità d-duttrina, il-prinċipji, u t-testimonjanzi mxandra ripetutament minn quddiem dan il-pulptu fiċ-Ċentru għall-Konferenza u fil-kongregazzjonijiet lokali madwar id-dinja—u madankollu jafu jsibuha diffiċli jemmnu li dawn il-veritajiet eterni japplikaw speċifikament għal ħajjithom u għaċ-ċirkustanzi tagħhom. Huma jemmnu b’sinċerità u jservu b’sens ta’ dover, iżda r-rabta tal-patti tagħhom mal-Missier u I-Iben il-Feddej tiegħu għadha ma saritx realtà ħajja u trasformanti f’ħajjithom.
Inwegħidkom li permezz tal-qawwa tal-Ispirtu s-Santu, intom tistgħu tkunu tafu u tħossu l-veritajiet tal-evanġelju li jiena ppruvajt niddeskrivi għalikom—individwalment u personalment.
Jiena nixhed b’ferħ li Ġesù Kristu huwa s-Salvatur u l-Feddej kollu mħabba u ħaj tagħna. Jekk aħna nibqgħu fih, Hu jibqa’ fina.30 U hekk kif aħna nimxu fih u miegħu, aħna nkunu mberkin biex nipproduċu ħafna frott. Dan nixhdu fl-isem sagru tal-Mulej Ġesù Kristu, amen.