Ġesù Kristu Hu Solliev
Aħna nistgħu nkunu sħab mas-Salvatur biex nipprovdu s-solliev temporali u spiritwali lil dawk fil-bżonn—u waqt li nagħmlu dan insibu s-solliev tagħna stess.
B’fidi f’Ġesù Kristu u b’tama minħabba dak li kienu semgħu dwar il-mirakli tiegħu, dawk li kienu qed jieħdu ħsieb raġel mifluġ ħaduh fejn kien hemm Ġesù. Il-mod kif ħaduh quddiemu kien wieħed innovattiv—huma neħħew is-saqaf u niżżlu lir-raġel, li kien fuq soddtu, fil-post fejn kien hemm Ġesù jgħallem. Met Ġesù “ra l-fidi tagħhom, hu qal [lir-raġel mifluġ], dnubietek maħfura.”1 U mbagħad qalli, “Qum, qiegħed ngħidlek, aqbad friexek u mur lejn darek.”2 U dlonk ir-raġel mifluġ qam u qabad friexu u telaq lejn id-dar, “ifaħħar lil Alla.”3
X’nafu aktar dwar dawk il-ħbieb li pprovdew l-għajnuna lir-raġel mifluġ? Nafu li s-Salvatur għaraf il-fidi tagħhom . U huma li raw u semgħu lis-Salvatur u kienu xhieda tal-mirakli tiegħu, huma “stagħġbu” u “faħħru lil Alla.”4
Ġesù Kristu pprovda l-fejqan mixtieq— solliev fiżiku mill-uġigħ u l-konsegwenzi debilitanti tal-mard kroniku. Sinifikanti l-fatt li s-Salvatur pprovda wkoll solliev spiritwali fejn naddaf lir-raġel mid-dnub.
U l-ħbieb—fl-isforzi tagħhom biex jieħdu ħsieb ta’ xi ħadd fil-bżonn, sabu s-sors ta’ solliev; huma sabu lil Ġesù Kristu.
Jiena nixhed li Ġesù Kristu huwa solliev. Permezz tal-Espjazzjoni ta’ Ġesù Kristu, aħna nistgħu ninħelsu mit-toqol u l-konsegwenzi tad-dnub u niksbu s-serħan fit-tbatia tagħna.
U għax inħobbu lil Alla, u għamilna patt li se nservuh, aħna nistgħu nkunu sħab mas-Salvatur biex nipprovdu s-solliev temporali u spiritwali lil dawk fil-bżonn—u waqt li nagħmlu dan insibu s-solliev tagħna stess ‘Ġesù Kristu.5
Il-maħbub profeta tagħna, il-President Russell M. Nelson, jistedinna biex negħlbu d-dinja u nsibu l-mistrieħ.6 It-tifsira li hu jagħi lil “mistrieħ veru” hi “solliev u paċi.” Il-President Nelson qal: “Peress li s-Salvatur, permezz tal-Espjazzjoni infinita tiegħu, feda lil kull wieħed u waħda minna mid-dgħufija, mill-iżbalji, u mid-dnub, u peress li Huwa esperjenza kull uġigħ, inkwiet, u tagħbija li intom qatt esperjenzajtu, mela, hekk kif intom verament tindmu u tfittxu l-għajnuna tiegħu, intom tkunu tistgħu tegħlbu din id-dinja prekarja ta’ żmienna.”7 Dan hu s-solliev li joffrilna Ġesù Kristu!
Kull wieħed u waħda minna qed iġorr basket wara daharna metaforikament. Dan jaf ikun basket li tibbilanċjah fuq rasek jew xi barżakka jew numru ta’ affarijiet imgeżżwrin fid-drapp li ġġorrhom fuq splejk. Iżda għall-eżempju tagħna, ejja nsejħuħ basket ta’ wara daharna.
Dan il-basket metaforiku ta’ wara daharna hu fejn aħna nġorru t-tagħbija tal-ħajja f’dinja mitlufa. It-tagħbija tagħna hija bħal ġebel fil-basket ta’ wara daharna. Ġeneralment, hemm tliet tipi:
-
Ġebel li jinsab hemm minħabba d-dnub li wettaqna.
-
Ġebel li jinsab fil-basket ta’ wara daharna minħabba deċiżjonijiet żbaljati, imġieba ħażina, u kattiverja ta’ ħaddieħor.
-
U ġebel li nġorru għax qed ngħixu f’kundizzjoni mhux perfetta. Dan jinkludi l-ġebel tal-mard, tal-uġigħ, tal-mard kroniku, tan-niket, tad-diżappunt, tas-solitudni, u tal-effett tad-diżastri naturali.
Jiena b’ferħ niddikjara li t-tagħbija mortali tagħna, dan il-ġebel fil-basket figurattiv ta’ wara daharna, m’hemmx għalfejn inħossuh tqil.
Ġesù Kristu jista’ jħaffef it-tagħbija tagħna.
Ġesù Kristu jista’ jeħlisna mit-toqol tagħna.
Ġesù Kristu jipprovdilna mod kif neħilsu mit-toqol tad-dnub.
Ġesù Kristu huwa s-solliev tagħna.
Huwa qal:
“Ejjew għandi intom ilkoll li tinsabu mħabbtin u mtaqqlin, u jiena nserraħkom [jiġifieri, solliev u paċi].
“Ħudu fuqkom il-madmad tiegħi u tgħallmu minni, għaliex jiena ta’ qalb ħelwa u umli, u intom issibu l-mistrieħ għal ruħkom.
“Għax il-madmad tiegħi ħelu u t-toqol tiegħi ħafif.”8
Li l-madmad huwa ħelu u t-toqol hu ħafif jurina li aħna nġorru l-madmad mas-Salvatur, li aħna naqsmu t-toqol tagħna miegħu, fejn inħalluh jeħlisna mit-tagħbija tagħna. Dan ifisser li nidħlu f’relazzjoni tal-patt ma’ Alla u nżommu dak il-patt, li, kif spjega l-President Nelson “dak kollu relatat mal-ħajja isir aktar faċli.” Huwa qal, “Iżda li tintrabtu mas-Salvatur ifisser li jkollkom aċċess għall-qawwa feddejja tiegħu .”9
Għalhekk għalfejn aħna rridu nibqgħu nżommu fil-basket il-ġebel kollu li għandna? Għalfejn pitcher tal-baseball li jħossu għajjien jirrifjuta li jitlaq minn postu meta r-reliever diġà jinsab hemm biex jagħlaq il-logħba? Għalfejn nibqa’ ninsisti li nibqa’ nġorr kollox jien meta Dak li ġie biex jeħlisni mit-tagħbija lest li jeħodhieli hu?
Il-President Nelson għallem, “Ġesù Kristu … jinsab wieqaf b’dirgħajh miftuħa, fejn qed jittama u jinsab lest biex ifejjaqna, jaħfrilna, inaddafna, isaħħaħna, isaffina u jqaddisna.”10
Għalhekk għalfejn nibqgħu ninsistu li nġorru l-ġebel kollu weħidna?
Din hi intenzjonata bħala mistoqsija personali, biex ilkoll tikkunsidraw.
Ngħid għalija, huwa l-vizzju mill-aktar antik tal-kburija. “Naf x’għandi nagħmel,” jiena ngħid. “Mhux problema; issa nagħmilha.” Huwa l-qarrieq il-kbir li jridni ninħeba minn Alla, li nagħtih dahari, li nagħmel kollox waħdi.
Ħuti, ma nistax nagħmel kollox waħdi, u m’għandix għalfejn, u mhux se nagħmel dan. Għax għażilt li nintrabat mas-Salvatur, Ġesù Kristu, permezz tal-patti li għamilt ma’ Alla, jiena “għal kollox niflaħ bis-saħħa ta’ dak li jqawwini.”11
Dawk li jżommu l-patti huma mberkin bis-solliev tas-Salvatur.
Ikkunsidraw dan l-eżempju mill-Ktieb ta’ Mormon: In-nies ta’ Alma kienu ppersegwitati billi ġew “mgħobbija bix-xogħol, u … tpoġġew fuqhom l-argużini.”12 Peress li ġew imċaħħdin li jitolbu vokalment, huma “fetħu qalbhom ma’ Alla; u hu kien jaf x’kienu l-ħsibijiet ta’ qalbhom.”13
U “semgħu leħen il-Mulej qalb is-sofferenza tagħhom, jgħid: Għollu raskom ’il fuq u ntlew bil-faraġ, għaliex jiena naf bil- patt li intom għamiltu miegħi; u jiena nagħmel patt mal-poplu tiegħi u neħilsu mill-jasar.
“U jiena nħeffef it-tagħbija li għandkom fuq spallejkom, li anke intom stess ma tħossuhiex aktar fuq daharkom.”14
U t-tagħbija tagħhom “saret aktar ħafifa,” u “l-Mulej tahom aktar saħħa sabiex huma jkunu jistgħu jġorru t-tagħbija tagħhom mingħajr wisq diffikultà, u huma ssommettew ruħhom b’ ferħ u b’ tant paċenzja għar-rieda tal-Mulej.”15
Dawk li jżommu l-patt jirċievu s-solliev li jasal forma ta’ faraġ, aktar sabar u kuntentizza, serħan mit-tagħbija tagħhom biex iħossuhom eħfef, u ultimament ħelsien.16
Issa ejjew mmorru lura għall-basket metaforiku ta’ wara daharna.
L-indiema, permezz tal-Espjazzjoni ta’ Ġesù Kristu, hija dik li teħlisna mit-toqol tal-ġebel tad-dnub. U permezz ta’ dan ir-rigal skwiżit, il-ħniena ta’ Alla teħlisna mit-talbiet tal-ġustizzja diffiċli li jafu jkunu tqal wisq għalina.17
L-Espjazzjoni ta’ Ġesù Kristu tagħmilha possibbli wkoll li aħna nirċievu l-qawwa li naħfru, fejn tagħtina ċ-ċans li neħilsu mit-tagħbija li nkunu qed inġorru minħabba t-trattament ħażin ta’ ħaddieħor.18
Għalhekk is-Salvatur kif jeħilsna mit-tagħbija tal-ħajja f’dinja mitlufa bl-iġsma mortali suġġett għan-niket u l-uġigħ?
Ħafna drabi, Huwa jwettaq dak it-tip ta’ solliev permezz tagħna! Bħala membri tal-patt tal-Knisja tiegħu, aħna nwiegħdu li sejrin “nibku ma’ dawk li jibku” u “nfarrġu lil dawk li għandhom bżonn il-faraġ.”19 Peress li aħna “nsiru parti mill-merħla ta’ Alla” u “nissejħu l-poplu tiegħu,” aħna “lesti li nġorru t-tagħbija ta’ xulxin, biex tkun ħafifa.”20
Il-barka pattwali tagħna hi li nkunu sħab ma’ Ġesù Kristu f’li nipprovdu s-solliev, kemm temporali kif ukoll spiritwali, lill-ulied kollha ta’ Alla. Aħna kondjuwit li permezz tiegħu Huwa jipprovdi s-solliev.21
U għalhekk, bħall-ħbieb tar-raġel mifluġ, aħna “ngħinu lil min hu dgħajjef, inqawwu l-idejn mitruħa u nsaħħu l-irkupptejn imriegħda.”22 Aħna “nerfgħu … t-tagħbija ta’ xulxin, u hekk inkunu qegħdin inħarsu l-liġi ta’ Kristu.”23 Hekk kif nagħmlu dan, insiru nafuh, insiru nixbhuh, u nsibu s-solliev tiegħu.24
X’inhu s-solliev?
Huwa t-tneħħija jew in-nuqqas ta’ xi ħaġa li qed tikkawżalna l-uġigħ, tinkwetana, jew ittaqqalna, jew li jkollna s-saħħa li nġorruha. Jirreferi għal xi ħadd li jieħu post persuna oħra. Huwa r-rimedju legali ta’ xi ħaġa ħażina.25 Il-kelma Anglo-Franċiża ġejja mill-Franċiż antik, il-kelma relever, jew “li tqajjem,” u mil-Latin relevare, jew “tqajjem mill-ġdid.”26
Ħuti, Ġesù Kristu huwa solliev. Nixhed li Hu reġa’ qam fit-tielet jum u, wara li ġab fis-seħħ l-Espjazzjoni infinita u kollha mħabba, jinsab wieqaf b’dirgħajh miftuħa, fejn qed joffrilna l-opportunità li nerġgħu nqumu, niksbu s-salvazzjoni, u niġu eżaltati u nsiru bħalu. Is-solliev li Hu joffrilna huwa għal dejjem.
Bħall-mara li deherilha l-anġlu f’dik l-ewwel għodwa tal-Għid, nixtieq li “mmur malajr” u “kollni hena” biex inwassal l-aħbar li Huwa qam.27 F’isem is-Salvatur tagħna, Ġesù Kristu, ammen.