Kiko Nos Salbador a Hasi pa Nos?
JesuCristu a hasi tur loke ku ta esensial pa nos biahe dor di e bida mortal pa e destino deliniá den e plan di nos Tata Selestial.
Den un reunion Djasabra anochi na un konferensiá di estaka hopi aña pasa, mi a konosé un muhé ku a bisa ku su amigunan a puntr’é pa regresá Iglesia bèk despues di hopi aña no ta aktivo, pero e no por a pensa niun motibu pa kiko e lo mester [a regresá]. Pa enkurash‘é, mi a bisa, “Ora ku bo konsiderá tur e kosnan ku e Salbador a hasi pa bo, bo tin hopi motibu pa regresá pa ador‘É i sirbiÉ.” Mi a keda asombrá ora ku el a reakshoná, “Kiko el a hasi pa mi?”
Kiko JesuCristu a hasi pa kada unu di nos? El a hasi tur loke ku ta esensial pa nos biahe dor di e bida mortal pa e destino deliniá den e plan di nos Tata Selestial. Lo mi papia di kuater di e karakterístikanan prinsipal di e plan ei. Den kada un di esakinan, Su Ungénito, JesuCristu, ta e figura sentral. Tur e kos aki ta wòrdu motivá dor “di e amor di Dios, kual ta drama Su mes den e kurason di e yunan di hende; p’esei, e ta [loke] ta mas deseá riba tur kos” (1 Nefi 11:22).
I.
Djis promé ku Djadumingu di Pasku [di Resurekshon], ta oportuno pa promé papia di e Resurekshon di JesuCristu. E Resurekshon di e morto ta e pilar di konfiansa personal di nos kerensia. E ta añadí nifikashon na nos doktrina, motivashon di nos komportashon, i speransa pa nos futuro.
Pasó nos ta kere den e deskripshonnan di Beibel i e Buki di Mormon di e Resurekshon literal di JesuCristu, nos ta aseptá tambe e kantidat grandi di enseñansanan for di skritura ku un resurekshon similar lo bin pa tur esnan mortal ku a yega di biba riba e mundu aki.1 Manera Jesus a siña, “Paso Ami ta biba, bo tambe lo biba” (Juan 14:19 I Su Apòstel a siña ku “mortonan lo lanta inkoruptibel”i “e mortalidat aki lo bisti na inmortalidat” (1 Korintionan 15:52, 54).
Pero e Resurekshon ta duna nos mas ku e siguransa di inmortalidat. E ta kambia nos manera di mira bida mortal.
E Resurekshon ta duna nos e perspektiva i forsa pa soportá e retonan mortal konfrontá dor di kada un di nos i esnan ku nos stima. E ta duna nos un manera nobo pa mira e defisiensianan físiko, mental, òf emoshonal ku nos a nase kuné òf a atkerí durante e bida mortal. E ta duna nos forsa pa soportá tristesanan, frakasonan, i frustrashonnan. Pa motibu ku kada un di nos tin ku resusitá, nos sa ku e defisiensia mortal nan aki i oposishon nan ta solamente temporario.
E Resurekshon ta duna nos tambe un insentivá poderoso pa warda e mandamentu nan di Dios durante nos bida mortal. Ora ku nos lanta for di morto i kontinuá pa nos Huisio Final profetisá, nos lo kier a kalifiká pa risibí e bendishonnan mas selektá ku a wòrdu primintí na e esnan resusitá.2
Fuera di esei, e promesa ku e Resurekshon por inkluí un oportunidat pa ta huntu ku miembronan di famia—kasa, yunan, mayornan, i posteridat—ta un estímulo poderoso pa kumpli ku nos responsabilidatnan familiar den e bida na mundu. Tambe e ta yuda nos biba huntu ku amor den e bida aki, i e ta konsolá nos ora di morto di nos sernan kerí. Nos sa ku e separashonnan mortal aki ta solamente temporal, i nos ta antisipá reunionnan i asosashonnan ku hopi alegria den futuro. E Resurekshon ta proveé nos speransa i forsa pa tin pasenshi segun nos ta warda. Esaki ta prepará nos tambe ku e kurashi i dignidat pa enfrentá nos propio morto—asta un morto ku por wòrdu yama prematuro.
Tur e efektonan di Resurekshon aki ta parti di e promé kontesta riba e pregunta “Kiko JesuCristu a hasi pa mi?”
II.
Pa mayoria di nos, e oportunidat pa wòrdu pordoná di nos pikanan ta e nifikashon mas grandi di e eskpiashon di JesuCristu. Den adorashon, nos ta kanta reverentemente:
Su sanger presioso El a drama boluntariamente;
Su bida El a duna boluntariamente.”
Un sakrifisio sin pika pa kulpa,
Un mundu ku ta muriendo pa salba3
Nos Salbador i Redentor a soportá un sufrimentu inkomprendibel pa yega na ta un sakrifisio pa e pikanan di tur e mortalnan ku arepentí. E sakrifisio di ekspiashon aki a ofresé e bondat máksimo—e lamchi puru sin mancha—pa e máksimo midi di maldat, e pikánan di hinter mundu. El a habri e porta pa kada un di nos por wòrdu laba di nos pikánan personal di manera ku nos por bolbe wòrdu atmití den e presensia di Dios, nos Tata Eterno. E porta habri aki ta disponibel pa tur e yunan di Dios. Den adorashon, nos ta kanta [ma Spañó]:
Me cuesta entender que quisiera Jesús bajar
Del trono divino para mi alma rescatar,
Que Él extendiera perdón a tal pecador.4
E efekto magnífiko i inkomprendibel di e Eskpiashon di JesuCristu ta basa riba Dios Su amor pa kada un di nos. E ta afirmá Su deklarashon ku “e balor di almanan”—kada un—“ta grandi den e bista di Dios” (Doktrina i Kombenionan 18:10). Den e Beibel JesuCristu a splika esaki den tèrminonan di Tata den Shelu Su amor: “Pasó Dios a stima mundu asina tantu, ku El a duna Su Yu Unigénito, pa ken ku kere den Djeno bai pèrdí, ma tin bida etèrno” (Juan 3:16). Den revelashon moderno nos Redentor JesuCristu ta deklará ku Ela stima mundu asina tantu ku E a duna su propio bida, pa tur esnan ku kere den Dje lo bira yunan di Dios” (Doktrina i Kombenionan 34:3).
E ta algu straño ku e buki di Mormon, Otro Tèstamentu di Cristu,” ta konkluí ku e enseñansa ku pa por bira “perfekto” i “santifiká den Cristu,” nos mester “Stima Dios ku tur [nos] poder, mente i forsa”? (Wak Moroni 10:32–33). Su plan kual ta wòrdu stimulá pa amor mester wòrdu risibí ku amor.
III.
Kiko mas nos Salbador, JesuCristu a hasi pa nos? Pa medio di e enseñansanan di Su profetanan i pa medio di Su bida i ministerio personal, Jesus a siña nos e plan di salbashon. E plan aki ta inkluí e Kreashon, e propósito di bida, e nesesidat di oposishon, i e libertat di por skohe. El a siña nos tambe e mandamentu nan i kombenionan ku nos mester obedesé i e ordenansanan ku nos mester eksperensha pa hiba nos bèk na nos mayornan selestial.
Den Beibel nos ta lesa Su enseñansanan, “Ami ta e lus di mundu: esun ku sigui Mi lo no kana den skuridat, pero lo tin e lus di bida” (Juan 8:12). I den revelashon moderno nos ta lesa, “Mira, Ami ta JesuCristu, … un lus ku no por wòrdu skonde den skuridat ” (Doktrina i Kombenionan 14:9). Si nos ta sigui Su enseñansanan, E ta lusa nos kaminda i ta sigurá ku nos destino ta den e siguiente.
Pasó E ta stima nos, E ta reta nos pa enfoká riba DjE na luga di e kosnan di e mundu mortal aki. Den Su gran sermon tokante e pan di bida, Jesus a siña ku nos no mester ta entre esnan ku ta sinti nan mas atraé na e kosnan di mundu—e kosnan ku ta sostené bida riba mundu pero no ta duna alimento na e bida eterno.5 Miéntras ku Jesus ta sigui invitá nos kada bes atrobe, “Sigui Mi.”6
IV.
Finalmente, e Buki di Mormon ta siña ku komo parti di Su Ekspiashon JesuCristu a “[sufri] dolónan i aflikshonnan i tentashonnan di tur sorto; i esaki pa kumpli ku e palabra ku ta bisa ku e lo tuma riba Dje d)olónan i enfermedatnan di su pueblo” (Alma 7:11).
Dikon nos Salbador a sufri e desafionan mortal “di tur sorto aki”? Alma a splika, “I E lo tuma nan enfermedatnan riba Dje, ku Su entrañanan por wòrdu yená ku miserikòrdia, segun e karni, ku E por sa segun e karni kon pa yuda Su pueblo konforme nan enfermedatnan.” (Alma 7:12).
Nos Salbador ta sinti i konosé nos tentashonnan, nos luchanan, nos angustianan, i nos sufrimentunan, pasó boluntariamente El a eksperensiá nan tur komo parti di Su Ekspiashon. Otro eskrituranan ta afirmá esaki. Tèstamentu Nobo ta deklará, “Pa motibu ku e mes a sufri dor di wòrdu tentá, e por yuda esnan ku ta wòrdu tentá” (Hebreo 2:18). Isaias a siña, “No tene miedu; paso Mi ta ku bo: … Mi lo fortalesé bo; si, lo mi yuda bo” (Isaias 41:10). Tur esnan ku ta sufri di kualkier tipo di enfermedat mortal mester kòrda ku nos Salbador a eksperenshá e tipo di doló aki tambe, i ku pa medio di su Ekspiashon, E ta ofresé kada un di nos e fortalesa pa por karg’é.
E Profeta Jose Smith a resumí tur esaki den nos Artíkulo di Fe number 3: “Nos ta kere ku pa medio di Ekspiashon di Cristu, hinter e género humano por wòrdu salbá, pa medio di ta obediente na e leinan i mandamentu nan di e Evangelio.”
“Kiko JesuCristu a hasi pa mi?” e ruman a puntra. Segun e plan di nos Tata Selestial, El “a krea e shelu i tera” (Doktrina i Kombenionan 14:9) di manera kada un di nos por tin e eksperensia mortal nesesario pa buska destino divino. Komo parti di e plan, e Resurekshon di JesuCristu a vense morto pa sigurá nos kada un nos inmortalidat. JesuCristu Su sakrifisio di ekspiashon a duna kada un di nos e oportunidat pa arepentí di nos pikánan i regresá limpi na nos kas selestial. Su mandamentunan i kombenionan ta mustra nos e kaminda, i Su saserdosio ta duna e outoridat pa realisá e ordenansanan ku ta esensial pa alkansá e destino ei. I nos Salbador boluntariamente a eksperensha tur piká i enfermedatnan mortal pa E sa kon pa fortalesé nos òf fortalesé nos den nos aflikshonnan.
JesuCristu a hasi tur esaki pasó E ta stima tur e yunan di Dios. Amor ta e motivashon pa tur e kos, i e tabata asina for di kuminsamentu. Dios a bisa nos den revelashon moderno ku “El a krea … hòmber i muhé, na su semehansa … ; i a duna nan mandamentunan pa stim’é i sirbiÉ” (Doktrina i Kombeninano 20:18–19).
Mi ta duna testimonio di tur esaki i ta resa ku nos tur lo kòrda kiko nos Salbador a hasi pa kada unu di nos i ku nos tur lo stim‘É i SirbiÉ, den e nòmber di JesuCristu, amèn.