Nos Tristesa Lo Bira Goso
Mi ta invitá tur ku ta sinti tristesa, tur ku ta puntra nan mes kiko ta pasa despues ku nos muri, pa pone boso fe den JesuCristu.
Hopi aña pasá, miéntras mi tabata asistiendo reunionnan na Salt Lak City, mi a wòrdu saludá pa nos profeta stimá, Russell-M. Nelson. Den su manera típiko kaloroso i pèrsonal, el a puntra mi, “Mark konta ku bo mama?”
Mi a kont‘é ku mi tabata ku ne na kumisamentu di e siman ei na Nueva Selandia i ku e tabata bira grandi pero yen di fe i un inspirashon pa tur ku konosé.
Ora ei el a bisa, “Porfabor dun‘e tur mi amor … i bis‘é ku mi ta desea di mir‘é atrobe.”
Mi tabata bastante sorprendí i a puntra, “Bo tin un biahe planiá pa Nueva Selandia pronto?”
Ku un sinseridat refleksivo el a kontestá, “Ahn nò, lo mi mir‘é den e proksimo bida”
No tabata un kontesta bashí. E tabata un perfekto ekspreshon natural di un echo. Den e momentu privá i no protehá ei, mi a skucha i sinti testimonio puro di un profeta bibu ku bida ta kontinua despues di morto.
E wikènt di konferensia aki lo boso tende apòstelnan bibu i profetanan testifiká di e resurekshon di JesuCristu. “E prinsípionan fundamental di nos religion ta e testimonio di e Apòstelnan I Profetanan, tokante JesuCristu, ku El a muri, wòrdu derá, i resusitá e di tres dia[;] … tur otro kos ku ta pertenesé na nos religion ta solamente agregashon na [e bèrdat aki]”1 Mi ta primintí ku si bo skucha ku berdadero intenshon, e Spiritu lo konfirmá den bo mente i bo kurason e bèrdat di e testimonio aki2
Apòstelnan antiguo di JesuCristu a kambia pa semper depues ku el a aparesé na nan despues di Su morto. Dies di nan a mira pa nan mes ku El a wòrdu resusitá. Tómas, ku inisialmente tabata ousente, a deklará,“Si mi no mira … , o mi no kere.”3 Despues Jesus a amonestá Tómas: “No sea sin fe, pero kreyente.”4 E ora ei Señor a siña e ròl vital di fe: “Bendishoná ta esnan ku no a mira, i tòg a kere.”5
E Señor resusitá a duna Su apòstelnan e enkargo di testifiká di Dje. Manera ku nos Apòstelnan bibu di awendia, nan ta laga okupashonnan mundano atras i pasa e restu di nan bida deklarando balentemente ku Dios a resusitá e Jesus aki. Nan testimonionan poderoso a hiba ku miles a aseptá a invitashon pa wordu boutisá.6
E glorioso mensahe di Pasku mainta ta sentral pa tur Cristianismo. JesuCristu a resusitá for di morto, i pa motibu di esaki, nos tambe lo biba bèk despues di morto. E konosementu aki ta trese sentido i propósito na nos bida. Si nos sigui dilanti den fe, nos lo wòrdu kambiá pa semper, manera e Apòstelnan di antigwedat. Nos, manera nan, lo ta kapas di soportá kualke difikultat ku fe den JesuCristu. E fe aki tambe lo duna nos speransa pa un tempu ku nos “tristesa lo bira goso.”7
Mi mes fe tabatin su kuminsamentu despues di un tempu di tristesa.
Mi tata i mi mama tabata kriadó di karné na Nueva Selandia.8 Nan tabata gosa di nan bida. Komo un pareha yòn, nan tabata bendishoná ku tres yu muhé chikitu. Esun mas yòn su nòmber tabata Ann. Un dia miéntras nan tabata ku fakansi huntu na un lago, Ann di diessiete luna bieu a kana bai. Despues di hopi minüt di buska desesperadamente, el a wòrdu hañá sin bida den awa.
E pesadia aki tabata kousa di un doló ku no por splika. Tata a skirbi añanan despues, ku algun di e harimentunan a sali for di nan bida pa semper. Tambe el a kousa e anhelo pa hañs kontestanan riba e preguntanan mas importante di bida: Kiko lo ta di nos presioso Ann? Nos lo mir‘é un dia atrobe? Kon nos famia lo por bira felis atrobe?
Algun aña despues di e tragedia aki, dos misionero yòn di E Iglesia Di JesuCristu Di E Santunan Di E Delaster Dianan a bini na nos kunuku. Nan a kuminsá siña e bèrdatnan hañá den e Buki di Mormon i e beibel. E bèrdatnan aki tabata inkluí e seguridat ku awor aki Ann ta biba den e mundu spiritual. Pa motibu di e Resurekshon di JesuCrsitu, e tambe lo wòrdu resusitá. Nan a siña ku E Iglesia Di JesuCristu un biaha mas a wòrdu restourá riba mundu ku un profeta bibu i diesdos apòstel. I nan a siña e doktrina úniko i remarkabel ku famia por wòrdu uní pa semper pa e mesun outoridat di saserdosio ku JesuCristu a duna Su Apòstel mayó, Pedro.9
Mama mesora a rekonosé e bèrdat i a risibí e testimonio di e Spiritu. Tata, snembargoi, a lucha e siguiente aña entre dudanan i impúlsonan spiritual. Tambe, e no tabata ke kambia su manera di biba. Un mainta, despues di un anochi sin drumi, miéntras e tabata kana di un banda pa otro, el a bira i bisa mi mama, “mi ta wòrdu boutisá awe òf nunka.”
Mama a konta e misioneronan kiko a pasa i inmediatamente nan a rekonosé e flam di fe den mi tata ku lo wòrdu sende awor òf paga pa semper.
E mainta ei mes nos famia a bai e playa di mas serka. Inkonsientemente di kiko tabata pasando, nos komo mucha tabata tene un piknik riba e dùinan di santu miéntras e eldernan Boyd Green i Gary Sheffield a guia mi mayornan den laman i boutisá nan. Den un otro akto di fe, Tata a komprometé den privá ku Señor ku kiko ku pasa, e lo keda fiel henter su bida na e promesa ku e tabata hasiendo.
Un aña despues un tèmpel a wòrdu dediká na Hamilton, Nueva Selandia. Poko despues nos famia, ku un hende representando Ann, a hinka rudia rondó di e altar den e kas sagrado di Señor ei. Einan, pa medio di e outoridat di saserdosio, nos tabata uní komo un famia eterno den un simpel i bunita ordenansa. Esaki a trese hopi pas i goso.
Hopi aña depues tata a konta mi, ku si no tabata ta pa e morto trágiko di Ann, e nunka lo tabata sufisientemente humilde pa aseptá e evangelio restourá. Tòg e spiritu di Señor a inkulká speransa ku loke e misioneronan ta siña ta bèrdat. E fe di mi mayornan a kontinuá ta krese te ora kada un a kima ku e kandela di testimonio ku den silensio i humildemente tabata guia tur nan desishonnan den bida.
Ami semper lo ta gradesí pa e ehèmpel di mi mayornan pa e futuro generashon. Ta imposibel midi e kantidat di bida ku a kambia pa semper pa motibu di nan akto di fe komo kontesta riba un doló profundo.
Mi ta invitá tur ku ta sinti tristesa, tur ku ta lucha ku duda, tur ku ta puntra nan mes kiko ta pasa despues ku nos muri, pa pone boso fe den JesuCristu. Mi ta primintí ku si bo tin deseo pa kere, e ora ei aktua den fe i sigui e stèm suave di e Spiritu, lo bo haña goso den e bida aki i den e mundu ku ta bin.
Kuantu mi ta desea pa e dia ku mi lo topa mi ruman Ann. Mi ta desea un reunion di goso ku mi tata, ku a muri trinta aña pasá. Mi ta testifiká di e goso ku ta haña den biba dor di fe kreyendo sin mira, pero sabiendo pa medio di e poder di e Spiritu Santu ku JesuCristu ta bibu. Ku tur mi kurason i alma, mi a skohe pa sigui Cristu i Su evangelio restourá. Esaki ta bendishoná kada aspekto di mi bida. Mi sa ku Jesus ta e Cristu, e Yu di Dios, nos Salbador i nos Redentor. Den e nòmber di JesuCristu, amèn.