Siña na e Salbador Su Manera
E responsabilidat ta kai direktamente riba kada un di nos pa sigui e ehèmpèl di e Maestro i siña manera E.
Maestronan eksepshonal
Un par di luna pasá un eks kompañera di klas di mi siudat natal Overton, Nevada, a sugerí pa nos prepará un regalo di Pasku pa nos maestro stimá di krèsh, ku resientemente a selebrá su di 98 aña. El a siña nos pa ta amabèl, e importansha di un bon soño, e goso di bebe lechi ku buskuchi, i pa stima otro. Danki, hermana Davis, pa ta un maestro asina maravioso .
Mi tabata tin otro maestro eksepshonal temporada ku mi tabata asistí na Ricks College hopi aña pasá. Mi tabata preparando mi mes pa sirbi un mishon i mi a pensa ku lo yuda si mi asistí na un lès di preparashon misional. Lokual ku mi a eksperensiá a kámbia mi bida.
For di e promé dia di e lès, mi a realisá ku mi tabata den e presensia di un maestro mahestral. E maestro tabata Hermano F. Melvin Hammond. Mi tabata sá ku Hermano Hammond stima Señor i stima ami. Mi por a wak‘é na su kara i tend‘é den su stèm. Ora e tabata siña, e Spiritu Santu tabata iluminá mi mente. E tabata siña doktrina, pero tambe e tabata invita’mi pa mi siñ’‘é e riba mi mes. E invitashon ei a yuda mi pa wak klaramente mi responsabilidat pa siña e doktrina di Señor pa mi mes. E ekspriensia ei a kambia mi pa semper. Danki, ruman Hammond, pa siña na e Salvador Su manera.
Rumanan tur, kada un meresé di tin e manera di eksperiensia di siña tantu na kas komo na iglesia.
E introdukshon na Ven, siígueme ta duna un vishon di kiko un enseñansa manera esun di Cristu por logra. “E meta di tur enseñansa i siñamentu di evangelio,” e ta bisa, “ta pa profundisá nos kombershon na JesuCristu i yuda nos pa nos por bira manera E. … E manera di siñamentu di Evangelio, ku ta fortalesé nos fe i ta hiba nos na e milagèr di kombershon no ta pasa mesora. E ta ekstendé mas leu ku [e] klas den un kurason individual i na kas.”1
E skrituranan ta indiká ku e ministerio di e Salbador na Antiguo Amerika tabata asina impaktante i plamá ku “E pueblo henter a konbertí na Señor, riba henter e superfisie di e tera, tantu e Nefitanan komo e Lamanitanan, i no tabatin kontenshon ni pleitunan entre nan, i kada hende a trata hustamente ku otro.”2
Kon nos enseñansa por tin un efekto similar riba esnan ku nos ta stima? Kon nos por siña mas manera e Salvador i yuda otronan bira mas profundamente kombertí? Permiti mi duna boso algún sugerensia.
Imitá e Salbador
Na promé lugá, tuma e resposabilidat di siña tur lokual ku boso por tokante e Maestro Supremo mes. Kon El a ekspresá amor pa otronan? Kiko nan a sinti ora E tabata siña? Kiko El a siña? Kiko tabata Su ekspektativa pa ku esnan ku E tabata siña? Despues ku bo eksplorá preguntanan asina‘ki, evaluá i ahustá bo manera di siña pa tá mas manera esun di Dje.
E Iglesia ta proveé hopi medio di enseñansa den e aplikashon di e biblioteka di evangelio i riba ChurchofJesusChrist.org. Un di e rekursonan ei ta titulá Siña na e Salbador Su manera.} Mi ta invitá boso pa lesa i siña kada un di e palabranan aki. E prinsipionan aki lo yuda boso den boso esfuersonan pa bira mas manera Crustu den boso enseñansa.
Liberá e Poder di e Famianan
Mi siguiente sugerensia por wòrdu ilustrá ku un eksperiensia ku mi tabata tin un par di luna pasá ora mi a bai bishitá un amigu stimá. Mi por a tende su kasá patras papiando ku un persona, e ora ei ma diskulpá mi mes lihé,asina E por a bai bèk ku su famia.
Mas o menos un ora después mi a risibí un mensahe di teksto di su amabèl kasá: “Hermano Newman, danki pa bishitá. Nos mester a invita bo pa pasa paden, pero mi kier kompartí ku bo kiko nos tabata hasiendo. For di e tempu di e pandemia, nos a bin ta tá diskutí Ven, sígueme ku nos yunan mas grandi tur djadumingu via Zoom. Literalmente esaki ta hasiendo milagèrnan. Mi ta kere ku ta e promé biaha ku nos yu muhé a lesa e Buki di Mormon riba su mes. Awe tabata e delastèr lès di e Buki di Mormon, i nos tabata djis kabando ora bo a bini. … Mi a pensa ku lo bo ta interesá pa sá kon Ven, sígueme, Zoom i un pandemia a duna nos e oportunidat na e momentu korekto pa kambia un kurason. … E ta lagami puntra mi mes kuantu milagèr chikitu a sosodé durante e momentunan straño aki.”
Esaki ta lagami kòrda e kumplimentu di e promesa ku Presidente Russell M. Nelson a hasi na òktòber 2018. El a bisa ku e enseñansa di evangelio sentrá na kas i sostené pa iglesia “tin e potensial pa liberá e poder di e famianan, ora kada famia ta sigui konsiente i kuidadosamente pa transformá nan hogar den un santuario di fe. Mi ta primití boso ku ora boso traha diligentemente pa remodelá boso hogar i hasié un sentro di enseñansa di evangelio, ku tempu boso dianan di reposo lo ta berdaderamente un delisia. Boso yunan lo ta ansioso pa siña i pa bibá e enseñansa nan di e Salbador. Kambionan den boso famia lo ta dramátiko i [lo] sostene.”3 Ki promesa mas maravioso!
Pa bida kambia realmente, e kombershon na JesuCristu mester ta enbolbí den henter nos alma i plamá den tur aspekto di nos bida. P‘esei e mester enfoká riba e sentro di nos bida—nos famianan i nos hogarnan.
Kòrda Ku Kombershon Ta Personal.
Mi delaster sugerensia ta pa kòrda ku kombershon mester bini for di paden. Manera e ta wòrdu ilustrá den e parábola di e dies birgennan, nos no por duna niun hende mas e zeta di nos kombershon, manera nos lo kier. Manera Elder David A. Bednar a siña: “E zeta presioso aki ta wòrdu atkerí drùpel pa drùpel… ku pasenshi i perseveransia. No por kòrta kaminda: no por atende na e lastu momentu di preparashon tampoko.”4
Ven, sígueme ta basá riba e bèrdat ei. Mi ta kompar‘é ku e angel ku a yuda Nefi siña tokante JesuCristu dor di bisa,“wak!”5 Manera e angel ei, Ven, sígueme ta invitá nos pa wak den e skrituranan i e palabranan di e profetanan moderno, pa asina haña e Salbador i skuch’È. Manera Nefi, nos lo wòrdu instruí personalmente pa e Spiritu, miéntras nos ta lesa i meditá riba e palabra di Dios. Ven, sígueme ta e sprenkplank ku ta permití nos dùik profundamente den e awa bibu di e doktrina di Cristu.
E responsabilidad di e mayornan ta similar den hopi manera. E muchanan ta heredá hopi kos di nan mayornan, pero e testimonio no ta un di nan. Nos no por duna nos yunan un testimonio, meskos ku nos no por laga un simia krese. Pero nos por proporshoná un ambiente nutritivo, ku bon tera, liber di sumpiña ku lo “sofoká e palabra.” Nos por lucha pa krea e kondishonnan ideal p‘asina nos yunan—i otronan ku nos ta stima— por haña lugá pa e simia, “skucha] e palabra, i [komprondé] esaki.”6 i diskubrí pa nan mes “ku e simia ta bon.”7
Hopi aña pasá, mi yu hòmber Jack i ami tabata tin e oportunidat di hunga na e Old Course di St. Andrews na Eskosia, kaminda e wega di Golf a kuminsá. Tabata simpelmente asombroso! Ora mi a bini bèk, mi a purba di transmití na e otronan e grandesa di e eksperiensia. Pero mi no a logra. E potrètnan, e videonan i mi mihó deskripshon tabata totalmente inadekuá. Finalmente mi a ripará ku e úniko manera ku un hende por konosé e grandesa di St. Andrews ta ora nan ta eksperensiépa wak e kayanan, hala rosea, sinti e bientu na nan kara i tira par di tiru perdí den e refugionan profundo i na e fuerte lagunanan, lo kual nos a hasi ku hopi efisiensia.
Asina tambe ta sosodé ku e palabra di Dios. Nos por siñ’é, nos por predik’é, nos por splik’é. Nos por papia over di dje, nos por deskribi’e, nos por asta testifiká di dje. Pero t’e ora e persona sinti ku e sagrada palabra di Dios ta muha su alma manera e awa di shelu pa medio di e poder di Spiritu,8 lo ta manera wak un karchi di post of e potrètnan di e fakansi di otro persona. Bo tin ku bai einan bo mes. Kombershon ta un biahe personalun hornad di rekohimentu
Tur esnan ku ta siña na kas i na iglesia,por ofresé na e otronan e oportunidat di tin nan propio eksperiensianan spiritual. Dor di e eksperimentonan, nan lo yega pa “konosé e bèrdat di tur kos” pa nan mes.9 Presidente Nelson a siñá: “Si bo tin preguntanan sinsero tokante e evangelio òf e Iglesia, ora bo skohe pa laga Dios triunfá den bo bida lo bo haña i komprondé bèrdatnan apsoluto, i eterno ku lo guia bo bida i lo yuda bo keda firme riba e kaminda di konvenio.”10
Mehorá Dramatikamente e Enseñansa
Mi ta invitá tur e lidernan i maestronan di tur e organisashonnan di Iglesia pa deliberá huntu ku e mayornan i e hóbennan pa mehorá dramatikamente e enseñansa na tur e nivelnan: na e estakanan, na e barionan i na e hogarnan. E ta wòrdu lográ ora ta siña e doktrina i invitá na un análisis yen di e Spiritu tokante e bèrdatnan ku e Spiritu Santu a siña nos na e momentunan trankil di nos estudio personal.
Mi amigunan stimá den Cristu, e responsabilidat ta kai direktamente riba kada un di nos di sigui e ehèmpèl di e Maestro i siña manera E. Su kaminda ta e kaminda berdadero! Segun nos ta siguiÉ “ora E aparesé nos lo ta manera Dje, pasó nos lo mir’é manera E ta; ku nos lo por tin e speransa aki; ku nos lo por ta purifiká meskos ku E ta puru.”13 Den e nòmber di Esun ku a resusitá, e Maestro mes, JesuCristu, amen.