Hasiendo tur esfuerso pa alkansá e Meta
No ta trata asina tantu di loke nos ta pasando den bida pero kiko nos ta birando.
Miéntras mi ta lesa e buki di Echonan i e epístolanan di Pablo, mi ta keda asombrá di kon Pablo a wòrdu impulsá pa amor i gratitut sirbiendo, siñando, i testifikndo di JesuCristu. Kon un persona asina por sirbi ku tantu amor i gratitut, spesialmente konsiderando su gran sufrimentu? Kiko a motivá Pablo pa sirbi? “mi ta hasi tur esfuerso pa alkansá e meta, pa haña e premio di e yamada selestial di Dios den Cristo Jesus.”1
Hasi tur esfuerso pa logra e meta ta, kontinuá fielmente riba e “kaminda stret i smal kual ta kondusí na bida eterno”2 ku nos Salbador i nos Tata Selestial. Pablo a wak su sufrimentunan bèk komo “no digno pa wòrdu kompará ku e gloria ku lo wòrdu revelá den nos.”3 Pablo su karta na e Filipensenan, ku el a skirbi ora ku e tabata será den prizon ta un karta di goso i alegria inmenso i enkurashementu na nos tur, partikularmente den e tempu difísil aki di insertidumbre. Nos tur mester tuma kurashi for di Pablo: “mi ta konsiderá tur kos komo pèrdí pa e ekselensia di e konosementu di Cristu Jesus mi Señor: pa ken mi a sufri e pèrdida di tur kos, i ta konta nan komo nada, pa mi por gana Cristu.”4
Ora ku nos wak e servisio di Pablo, nos ta wòrdu inspirá i elevá dor di nos propio “Pablonan” den nos tempu, kual tambe ta sirbi, siña, i testifiká ku amor i gratitut mei mei di tur e retonan ku nan ta enfrentá den nan bida i den bida di nan sernan kerí. Un eksperensia ku mi tabatin 9 aña pasa a yuda mi realisá e importansia di hasi tur esfuerso pa alkansá e meta.
Na 2012, miéntras mi tabata kana pa promé biaha den e reunion di lidernan den e konferensia general, mi no por a evitá di sinti mi abrumá i inadekuado. Den mi mente tabata tin un bos ta ripití ku persistensia, “Bo no ta pertenesé aki! Un eror grave a wòrdu kometé!” Nèt ora mi tabata trata na haña un lugá pa sinta, Elder Jeffrey R. Holland a kapta mi. El a bin serka mi i bisa, “Edward, ta bon pa wak bo akinan,” i ku kariño tek mi na mi kara. Mi a sinti manera un beibi! Su amor i brasa a laga mi sinti bon i a yuda mi sinti e spiritu di ta pertenesé ei nan, e spiritu di hermandat. Riba e dia siguiente, mi a opservá Elder Holland hasiendo e mesun kos ku el a hasi ku mi e dia anterior, tek kara ku kariño di Elder Dallin H. Oaks’s, kende tin mas antigwedat den e quorum di e diesdos.
Na e momentu ei mi a sinti e amor di Señor pa medio di e hòmbernan aki ku nos ta sostené komo profeta, vidente, i reveladónan. Elder Holland, pa medio di su aktonan natural di bondat, a yuda mi pa surpasá mi egoismo i mi sintimentunan di insufisiensia. El a yuda mi pa enfoká riba e obra sagrado i di goso pa kual mi a wòrdu yama—pa trese almanan na Cristu. E, manera Pablo di antaño, a indiká mip a hasi tur esfuerso pa alkansá e meta.
Na un manera interesante, Pablo ta animá nos pa hasi tur esfuerso pa alkansá e meta, miéntras e ta pidi nos pa lubidá loke a keda tras—nos miedunan di pasado, nos enfoke di pasado, nos frakasnan di pasado, i nos tristesa di pasado. E ta invitando nos, meskos ku nos profeta kerí, Presidente Russell M. Nelson, na un aserkamentu mas nobo i santu.”5 Señor Su promesa ta real: “Pasó esun ku ke salba su bida, lo pèrd’é, ma esun ku pèrdè su bida pa mi motibu, lo hañ’é.”6
Den mi promé diskurso den e konferenshia general, mi a kompartí un eksperensia di mi mama siñando mi traha den nos kunuku. “No wak patras nunka,” el a bisa. “Wak loke nos tin ku hasi ainda.”7
Na final di su bida, miéntras mi mama tabata lucha kontra kanser, e tabata biba ku Naume i ami. Un anochi mi a skuch’é ta yora den su kamber. Su doló tabata inmenso, hasta despues di tuma su último dosis di morfina diario solamente dos ora promé.
Mi a drenta su kamber i a yora ku né. Mi a hasi orashon duru pa el a risibí alivio instante di su doló. I despues el a hasi e meskos ku e tabata hasi na e kunuku hopi aña pasá: el a stòp i a siña mi un lès. Nunka lo mi lubidá su kara na e momentu ei: frágil, batí i yen di doló, mirando ku duele na su yu hòmber tristu. El a hari dor di su lágrimanan, el a mira mi stret den mi wowonan, i a bisa, “E no ta keda na abo tampoko [ni] niun otro hende, pero e ta dependé di Dios si e doló aki ta bai si òf no.”
Mi a lanta sinta ketu. E tambe a sinta ketu. E senario ta keda bibu den mi mente. E anochi ei, pa medio di mi mama, Señor a siña mi un lès ku lo keda den mi pa semper. Ora ku mi mama a ekspresá su aseptashon di Dios Su boluntat, mi a kòrdá e motibu ku JesuCristu a sufri den e Hardin di Getsémani i na e krus di Gòlgota. El a bisa: “Mira mi a duna boso Mi evangelio, i esaki ta [Mi] evangelio ku Mi a duna boso—ku Mi a bini na mundu pa hasi e boluntat di Mi Tata, pasó Mi Tata a manda Mi.”8
Mi ta reflekshoná riba nos Profeta kerí, Presidente Nelson su preguntanan profétiko na nos den e fdelaster konferensia general. Presidente Nelson a puntra: “Bo ta dispuesto pa laga Dios triunfá den bo bida? Bo ta dispuesto pa laga Dios ta e influensia di mas importante den bo bida? … Lo bo pèrmití Su bos pa tuma … prioridat riba tur otro ambishon? Bo ta dispuesto pa bo boluntat wòrdu gulí den esun di DjE?”9 Mi mama lo a respondé ku un “si” emoshonal pero firme, i otro miembronan fiel di Iglesia rònt mundu tambe lo a respondé ku un “si” emoshonal pero firme. Presidente Nelson, danki pa inspirá nos i animá nos ku e preguntanan profétiko aki.
Resientemente, mi tabata tin un kombersashon na Pretoria, Sur Afrika, ku un obispu ku a dera su kasa i su yu muhé adulto mesun dia. Nan bida a wòrdu kitá dor di e pandemia di e vírus di korona aki. Mi a puntra kon tabata bai kuné. Obispu Teddy Thabete su kontesta a fortalesé mi determinashon pa sigui e palabranan i konsehonan di Señor Su profetanan, videntenan i reveladónan. Obispu Thabete a respondé ku semper tin speransa i konsuelo dor di sa ku e Salbador a tuma riba Su mes e dolónan di Su pueblo, pa E por sa kon pa yuda nos.10 Ku fe profundo el a testifiká, “mi ta gradisí pa e plan di salbashon, e plan di felisidat.” Despoes el a hasi mi un pregunta, “Esaki no ta loke nos profeta tabata trata na siña nos den e delaster konferensia?”
Miéntras e desafionan di mortalidat lo bin pa nos tur di un manera òf otro, laga nos enfoká riba e meta di nos “hasi tur esfuerso pa alkansá e meta” ku ta “e preis di e yamamentu haltu di Dios.”11
Mi invitashon humilde pa nos tur ta pa nunka entregá! Nos ta yamá pa “laga un banda tur peso, i e piká ku fásilmente ta rondoná nos, i laga nos kore ku pasenshi e kareda ku tin poné nos dilanti, ku bista riba Jesus e outor i esun ku ta hasi uso di nos fe.”12
No ta trata asina tantu di loke nos ta pasando den bida pero kiko nos ta birando. Tin goso den hasi tur esfuerso pa alkansá e meta. Mi ta testifiká ku E ku a vense tur kos lo yuda nos segun nos ta wak na DjE. Den e nòmber di JesuCristu, amèn.