JesuCristu: E Kuidadó di Nos Alma
Ora nos arepentí genuinamente di nos pikánan,nos ta pèmití e sakrifisio ekspiatorio di Cristu bira kompletamente efektivo den nos bida.
Mi kerido rumannan, riba e mainta di Pasku [di Resurekshon] radiante aki mi kurason ta regosihá rekordando e echo mas maravioso, mas mahestuoso, sin midí ku a sosodé den hinter historia di humanidat - e sakrifisio ekspiatorio di nos Señor, JesuCristu. E palabranan eminente di e profeta Isaías ta magnifiká e grandesa i altruismo di e bida di e kondesendensia i sakrifisio di e Salbador na fabor di tur e yunan di Dios:
“Siertamente el a karga ku nos doló, karga ku nos pena: sin embargo, nos a respeté heridá, heridá di Dios i afligí.
“El a wòrdu heridá pa nos transgreshonnan, el a wòrdu heridá pa nos inikidatnan; e kastigu di nos pas tabata riba dje; i ku su slanan nos ta wòrdu saná.”1
Dor di boluntariamente tuma riba su mes e pikánan di tur humanidat, wòrdu klabá kruelmente na e krus, i viktoriosamente konkistá morto riba e di tres dia,2 Jesus a duna un nifikashon mas sagrado di e ordenansa di Pasku ku a wòrdu otorgá na Israel den tempu di antaño.3 Komp kumplimentu di su profesia, E la ofesé Su propio kurpa i sanger presioso komo e gran i último sakrifisio,4 validando e simbolo tradishonal usá den e selebrashon di Señor su Pasku.5 Hasiendo esaki, Cristu a eksperensiá un sufrimentu físiko i spiritual ku ta inkomprondibel pa e mente humano. E Salbador Mes a bisa:
“Pasó ata‘ki, Ami, Dios, a sufri tur e kosnan aki pa tur, …
“Di kua e sufrimentu a kousa mi mes, ku ta Dios, e mas grandi di tur, tembla pa kousa di doló, i drama sanger di tur porio, i sufri tantu den kurpa komo spiritu—i tabata ke pa mi no mester a bebe for di e kopa margá ei, i desmayá—
“Sinembargo, gloria ta na e Tata, i mi a partisipá i terminá mi preparashonnan pa ku e yunan di hòmber.”6
Cristu ku bon gana a kumpli ku e boluntat di e Tata7 pa medio di Su sakrifisio infinito i miserikordioso. El a surpasá e humiashon di morto físiko i spiritual,8 introdusí na mundu pa medio di e Kaida,9 ofresiendo nos e posibilidat di salbashon eterno.10
Jesus tabata e úniko Ser mas kapas di kumpli ku e sakrifisio eterno i perfekto aki pa nos tur.11 E la wòrdu skohé i pre ordená den e Gran Konsilio di Shelu, hasta antes ku e mundu a wòrdu formá.12 Ademas, dor di a nasí di un mama mortal, El a heredá e morto fisiko, pero for di Dios, komo e Unigénito di e Tata, El la heredá e poder pa entregá Su propio bida i despues bolbe tuma esaki.13 Adishonalmente, Cristu a biba un bida perfekto ku tabata sin mancha i, esmas, tabata eksonerá for di e demandanan di hustisia divino.14 Na un okashon e Profeta José Smith a iña:
“Salbashon no por a bin na e mundu sin e mediashon di JesuCristu.
“Dios … a prepará un sakrifisio dunando Su propio Yu, kende lo wòrdu mandá na su debido tempu… pa habri un porta dor di kual hende por drenta. … den presensia di Señor.”14
Mientras ku pa medio di Su sakrifisio e Salbador a kita e efektonan di e morto físiko inkondishonalmente,16 E no a eliminá nos responsabilidat personal di arepentí di e pikánan ku nos ta kometé.17 Mas bien, El a ekstendé na nos un invitashon di amor pa rekonsiliá ku nos Tata Eterno. Pa medio di JesuCristu i Su sakrifisio ekspiatorio, nos por eksperensiá un kambio poderoso den mente i kurason, tresiendo un aktitut fresku, tantu dirigí riba Dios i riba bida en general.18 Ora nos arepentí sinseramente di nos pikánan i bira nos kurason i boluntat na Dios i Su mandamentunan, nos por risibí Su pordon i sinti e influensha di Su Spíritu Santu den gran abundansia. Miserikordiosamente, nos ta evitá eksperensiá e profundidat di sufrimentu ku Señor a pasa aden.19
E don di arepentimentu ta un ekspreshon di e bondat di Dios pa ku Su yunan i e ta un demostrashon di Su poder inkomparabel pa yuda nos superá e pikánan ku nos kometé. E ta tambe un evidensia di e pasenshi i longaminidat ku nos Tata Selestial tin pa nos debilidatnan i flakesanan mortal. Presidente Russell M. Nelson, nos kerido profeta, a referí na e don aki komo “e yabi di felisidat i pas di mente.”20
Mi kerido amigunan, mi ta testifiká ku si nos arepentí genuinamente di nos pikánan,21nos ta pèmití e sakrifisio ekspiatorio di Cristu bira kompletamente efektivo den nos bida.22 Nos lo bira liber di e gara di piká, haña goso den nos biahe terenal, i bira mas kalifiká pa risibí salbashon eterno, ku a wòrdu prepará for di e fundashon di e mundu pa tur esnan ku ta kere den Jesuristu i pa bin na E.23
Ademas di proveé e don mahestuoso aki di salbashon, e Saslbador ta ofresé nos alivio i konsuelo ora nos ta enfrentá nos aflikshonnan, tentashonnan, i debilidatnan di bida mortal, inkluyendo e sirkumstansianan ku nos a eksperensiá resientemente den e pandemia aktual. Mi ta sigurá bo ku Cristu ta semper konsiente di e atversidatnan ku nos ta eksperensiá den mortalidat. E ta komprondé tur e amarguranan, agonia, i doló físiko i tambe e desafiónan emoshonal i spiritual ku nos ta enfrentá. E entrañanan di e Salbador ta yená ku miserikordia, i E ta semper kla pa sukurí nos. Esaki ta posibel dor ku E personalmente a eksperensiá i tuma riba E mes den e karni e dolónan di nos debilidat i malesanan24
Ku mansedumbre i humildat di kurason, El a desendé bou di tur kos i akseptá di wòrdu despresiá, rechasá i humiliá dor di hende, siendo heridá pa nos transgreshonnan i maldatnan. El a sufri tur e kosnan aki pa nos tur, tumando riba E mes tur e pikánan di mundu,25 pues birando nos kuidadó spiritual mas esensial.
Ora nos ta bin mas serka di DjE, entregando nos mes spiritualmente na Su kuido, nos lo por tuma riba nos mes su yugo, ku ta fásil, i Su karga, ku ta lus, pues enkontrando e konsuelo i e sosiegu primintí. Ademas, nos lo risibí e fortalesa ku nos mester pa por surpasá tur difikultat, debilidat, doló di bida, kua lo ta ekstremadamente difísil pa wanta sin Su yudansa i poder sanadó,26 E skrituranan ta siña nos pa “pone bo karga riba Señor, i e lo sostené bo.”27 “I e ora ei ku Dios lo duna na [nos] ku [nos] karga lo ta liviano, pa medio di e goso di Su Yu.”28
Kasi na kabamentu di aña pasá, mi a bin tende di e morto di un pareha kerí, Mario i Regina Emerick, kendenan tabata hopi fiel na Señor i a fayesé kuater dia for di otro dor di komplikashonnan di COVID-19.
Un di nan yunan, ken aktualmente ta sirbiendo komo obispu na Brazil, a relatá lo siguiente na mi: “Tabata asina difísil pa mira mi mayornan bai for di e mundu aki den e kondishon ei, pero mi por a sinti klaramente e man di Señor den mi bida durante e tragedia ei pasobra mi a risibí e fortalesa i pas ku ta mas ayá di mi entendimentu. Pa medio di mi fé den JesuCristu i Su Ekspiashon, mi a risibí yudansa divino pa fortalesé i konsolá miembronan di mi famia i tur esnan ku a yuda nos durante di e eksperensia difísil aki. Ounke e milager ku kada ken a spera pae no a sosodé, personalmente mi ta un testigu di ehopi otro milager ku a sosodé den mi bida i den e bida di tur e miembronan di mi famia. Mi a sinti nun pas ineksplikabel ku ta penetrá e profundidat di mi kurason, dunando mi speransia i konfiansa den e amor di e Salbador pa ami i e plan di felisidat di Dios pa Su Yunan. Mi a siña ku riba e dianan mas yená ku doló, e brasanan di amor di e Salbador semper ta ekstendé ora nos ta buska E ku tur nos kurason, poder, mente i forsa.”
Mi kerido rumannan, riba e djadumingu di Pasku aki, mi ta duna mi testimonio solemne ku Jesus a lanta for di morto i ku E ta bibu. Mi ta testifiká ku pa medio di diE i Su Ekspiashon infinito, e Salbador ta proveé nos ku e manera pa surpasá morto tantu físikamente komo spiritual. Adishonalmenten na e gran bendishonnan aki, Enta ofresé tambe konsuelo na nos i siguransa den tempu difísil. Mi ta sigurá boso ku ora nos pone nos konfiansa den JesuCristu i den Su Ekspiashon supreme, perseverando den nos fé te na final, nos lo disfrutá e promesánan di nos kerido Tata Selestial, ku ta hasi tur kos ku ta den Su poder pa yuda nos regresá bèk un dia den Su presensia. Esei ta Su obra i Su gloria!29 Mi ta testifiká ku Jesus ta e Jristu, e Redentor di mundu, e Mesias primintí, e resurekshon i e 9Bida.30 I mi ta kompartí e bèrdatnan aki ku boso den Su nòmber sagrado, e Unigénito di e Tata, nos Señor, JesuCristu, amèn.