Dikon e Kaminda di Kombenio
E diferensia di un kaminda di kombenio ta úniko i ku nifikashon eterno.
Durante su ministerio, Presidente Russell M. Nelson a studia i siña di Dios su kombenionan ku Su yunan. E mes ta un ehèmpel briyante di un ku ta kana e kaminda di kombenio. Den su promé mensahe komo Presidente di e Iglesia, Presidente Nelson a bisa:
“Bo kompromiso pa sigui e Salbador dor di hasi kombenionan ku n‘E i despues warda e kombenionan aki lo habri e portanan di kada bendishon spiritual i privilegio disponibel pa hòmber, muhé, i muchanan tur kaminda.
“… E ordenansanan di tèmpel i e kombenionan ku bo hasi einan ta esensial pa fortifiká bo bida, bo matrimonio i famia i bo abilidat pa resistí e atákenan di e atversario. Bo alabansa den e tèmpel i bo servisio einan pa bo antepasadonan lo bensdishoná bo ku oumentu di revelashon personal i pas i lo fòrtifiká bo kompromisio pa keda riba e kaminda di kombenio.”3
Kiko ta e kaminda di kombenio? Ta e úniko kaminda ku ta hiba nan e reino selestial di Dios. Nos ta embarká den un kaminda na e porta di boutismo i despues “sigui pa dilanti ku siguransa den Cristu, teniendo un brio perfekto di speransa, i di amor pa Dios i pa tur hende [e dos gran mandamentunan] … te na final.”2 Den e kurso di e kaminda di kombenio (kual, por sierto, ta ekstende mas ayá di mortalidat), nos ta risibí tur ordenansanan di kombenionan ku ta pertenesé na salbashon i eksaltashon.
E kompromiso general pa ku e kombenionan ta pa kumpli ku Dios Su boluntat “i ta obediente na Su mandamentunan den tur kos ku E manda nos hasi.”3 Siguiendo e prinsipionan i mandamentunan di e evangelio di JesuCristu kada dia ta e kaminda mas felis i mas satisfecho den bida. Sigur ta, un persona ta evitá masha hopi problema i duele. Laga mi usa deporte komo un analogia. Den tènis, tin algu ku ta yama erornan no forsá. Tin kosnan manera dal un bala den e nèt òf kometé un fayo dòbel ora di sùrf Erornan no forsá ta wòrdu konsiderá e resultado di un fayo di e hungadó i no dor di e abilidat di e kontrinkante.
Hopi biaha nos problemanan i desafionan ta nos mes ta kousa nan, e resultado di eskóhonan robes, òf nos por bisa e resultado di “erornan no forsá.” Ora nos ta siguiendo e kaminda di kombenio diligentemente, naturalmente nos ta evita “erornan no forsá.” Nos ta eskivá e vários formanan di adikshon. Nos no ta kai den e roi di kondukta deshonesto. Nos ta krusa ofer di e abismo di imoralidat i infedilidat. Nos ta salta e hendenan ku ta hasi kos ku, ounke asta popular, lo perhudiká nos bienestar físiko i spiritual. Nos ta evitá e eskohonan ku ta dañino of den desbentaha na otronan i na su lugá atkirí e habito di disiplina propio i servisio.4
Ta bisá ku Elder J. Golden Kimball a bisa, “No ta tur [biaha] mi a kana e kaminda stret i smal, pero mi a [purba] na krusé si kada biaha ku mi por.”5 Den un momentu mas serio, mi tin sigur ku Ruman Kimball lo ta di akuerdo ku kedando riba, no djis krusa, e kaminda di kombenio ta nos speransa mas grandi pa evitá miserianan evitabel na un banda i eksitosamente atende ku e problemanan inevitabel di bida na e otro [bana].
Algun por bisa, “mi por hasi bon eskoho ku òf sin boutismo; mi no mester di kombenionan pa ta un persona honorabel i eksitoso.” Siertamente, tin hopi ku, no ta riba e kaminda di kombenio nan mes, ta aktua den un manera ku ta tipifika e eskohonan i kontribushonnan di esnan ku ta riba e kaminda. Bo por bisa ku nan ta kosechá e bendishonnan di kana e kaminda “konsistente ku e kombenio.” Kiko, e ora ei, ta e diferensia e ora ei di e kaminda di kombenio?
Pues, e diferensia tin un signifikado úniko i eterno. E ta inkluí e naturalesa di nos obediensia, e karakter di Dios su kompromiso pa ku nos, e ayuda divino ku nos ta risibí, e bendishonnan mará na reuni komo hendenan di kombenio, i mas iportante, nos herensia eterno.
Obediensia Komprometé
Promé ta e naturalesa di nos obediensia na Dios. Mas ku simplemente tin bon intenshon, nos solemnemente ta komprometé na biba kada palabra ku ta sali for di e boka di Dios. Den esaki, nos ta sigui e ehèmpel di JesuCristu, kende, dor di wòrdu boutisá, “El a demonstrá na e yunan di hende ku, di akuerdo ku e karni e ta humiyá su mes dilanti di e Tata, i testiguá na e Tata ku e lo ta obediente na dje den warda su mandamentunan.”6
Ku kombenionan, nos tin intenshon di mas ku solamente evitá fayonan òf di ta prudente den nos desishonnan. Nos ta sinti responsabel na Dios pa nos eskohonan den nos bida. Nos ta tuma riba nos e nòmber di Cristu. Nos ta enfoká riba Cristu - di ta balente den nos testimonio di Jesus i desaroyando e karakter di Cristu.
Ku kombenionan, obediensia na e prinsipionan di evangelio ta bira manera rais den nos alma. Mi konose un pareha ku, durante tempu di nan matrimonio, e esposa no tabata aktivo den Iglesia i e hòmber nunka a yega di ta miembro di Iglesia. Lo mi referí na nan komo Mary i John, no nan nòmber real. Ora e yunan a kuminsa yega, Mary a sinti e di moda penetrante e nesesidat di lanta nan, manera e skritura ta bisa, “wòrdu nutri i amonestashon di Señor.”7 John tabata di akuerdo. Mary a hasi algun sakrifisio importante di ta na kas pa siña nan e evangelio riba un base konsistente. E la sigurá ku su famia lo benefisia kompletamente di e servisionan i aktividatnand i Iglesia. Mary i John a bira mayornan ehemplar, i nan yunan (tur mucha hòmbernan energetiko) a krese den fé i deboshon na prinsipionan i estandartenan di evangelio.
John su mayornan, e muchanan su abuelonan, tabata komplasí ku e bida sano i logronan di nan ñetunan, pero dor di algun antagonismo pa ku e Iglesia, nan ker a duna atributo di e eksito aki solamente na e abilidatnan di John i Mary komo mayornan. John, ounke no ta un miembro di Iglesia, no a laga e evaluashon aki bai sin wòrdu desafiá. E la insistí ku nan tabata testiguando e frutanan di e enseñansanan di e evangelio— loke su yunan tabata eksperensiá den Iglesia i tambe loke tabata pasa na kas.
John e mes tabata wòrdu influenshá pa e Espíritu, e amor i ehèmpel di su kasa, i e deseonan di su yunan. Ku tempu, e la wòrdu boutisá, kousando hopi alegria den e miembronan d bario i amigunan.
Miéntras bida no ta sin desafio pa nan i nan yunan, Mary i John ta afirmá ku tur nan kurason ku ta realmente e kombenionan di e evangelio ta e rais di nan bendishonnan. Nan a mira Señor su palabranan na Jeremias wòrdu kumplí den nan bidanan i di nan yunan tambe manera di nan: “Lo mi pone mi lei den nan entraña, i skirbi den nan kurason; i lo mi ta nan Dios, i nan lo ta mi pueblo.”8
Mará na Dios
Un di dos aspekto di e kaminda di kombenio ta nos relashon ku e Deidat. E kombenio ku Dios ta ofresé na Su yunan ta hasi mas ku guia nos. Nan ta mara nos na DjE, i, mará na DjE, nos por vense tur kos.9
Un bia mi a lesa un artikulo di un reportero mal informá di korant ku ta splika e manera ku nos ta hasi boutismo pa mortonan dor di sumergi ròlnan di mikrofilm den awa. E ora ei tur e nòmbernan ku ta aparesé riba e microfilm ta wòrdu konsiderá boutisá. E aserkamente ei lo ta efisiente, pero e ta ignorá e balor infinito di kada alma i e importansia kritiko di e kombenio personal ku Dios.
“[Jesus] a bisa … : Drenta den e porta rekto; pasobra e porta ta stret, i smal ta e kamindanan ku ta hiba na bida eterno, i tiki ta esnan ku ta hañ’e.”10 Figurativamente papiá, e porta ta asina smal ku e ta pèrmití solamente un hende drenta kada bia. Kada un di nos ta hasi un kompromiso individual na Dios, i a kambio E ta hasi un kombenio personal ku kada un di nos, na nòmber, pa nos por konta ku implisidat den tempu i eternidat. Ku e e ordenansanan i e kombenionan, “e poder di e dibinidt ta manifestá” den nos bida.11
Ayuda Divino
Esaki ta hiba nos na konsiderashon di un di tres bendishon spesial di e kaminda di kombenio. Dios ta proveé un don kasi inkomprendibel pa yuda esnan ku a hasi kombenio di bira wardadonan di kombenio; e don di e Spíritu Santu. E don aki ta e derechi di e kompania konstante, protekshon, i guia di e Spíritu Santu.12 Tambe konosí komo e Konsoladó, e Spíritu Santu “ta yená ku speransa i amor perfekto.”13 E “sa tur kos, i ta duna testimonio di e Tata i di e Yu.”14 di kual testgu nos ta kompremeté di ta.15
Riba e kaminda di kombenio nos ta haña e bendishonnan esensial di pordon i limpiesa di piká. Esaki ta yudansa ku ta bon solamente pa medio di grasia divino, atministrá pa e Spíritu Santu. “Awor esaki ta e mandamentu: Arepentí, bosonan tur, te na e ekstremonan di mundu, i bin na mi i wòrdu boutisá den mi nòmber, ku boso por wòrdu santifiká dor di a risibí e Spiritu Santu, ku bosonan por para sin mancha dilanti di mi den e delaster dia.”16
Reuní ku e Pueblo di Kombenio
Di Kuaterm, esnan siguiendo e kaminda di kombenio lo enkontrá bendishonnan singular den vários asamblea divinamente apuntá. Profesianan di reunimentu literal di e tribunan perdí di Israel na e paisnan di nan herensia por wòrdu hañá vários kaminda den e skrituranan.17 E kumplimentu di e profesianan i promesanan awó ta na kaminda ku e rekohimentu di e pueblo di kombenio den e Iglesia, e reino di Dios na tera. Presidente Nelson ta splika, “Ora nos ta papia di e reunimentu,simplemente nos ta bisa e bèrdat fundamental aki: kada un di e yunan di nos Tata Selestial, meresé di skucha e mensahe di e evangelio restòurá di JesuCristu.”18
Señor ta manda e miembronan di E Iglesia di Jesucristu di e Santunan di Delaster dianan pa “lanta i briya bai, ku bo lus por ta un estandarte pa tur e nashonnan; … ku e reunimentu huntu riba e tera di Sion, i den su estakanan, por ta un defensa, i pa un refugio for di e tormenta, i for di e ira ora e wòrdu dramá sin kombinashon riba hinter e mundu.”19
Tambe tin un reunion semanal di e pueblo di kombenio na e kas di orashon riba Señor su dia, pa nos por “warda [nos mes] sin mancha di e mundu.”20 Ta un reunion pa partisipá di e pan i awa sakramental komo rekuerdo di e Ekspiashon di JesuCristu i un tempu pa “ayuná i hasi orashon, i papia ku un i otro tokante e bienestar di [nos] almanan.”21 Komo un adolesente, mi tabata e úniko miembro di Iglesia den mi klas di sekundaria. Mi a disfrutá di e asosiashon ku hopi bon amigunan na skol, pero mi a sinti ku mi tabata dependé hopi riba e reunionnan di Sabat aki kada siman pa refreská i renobá mi mes spiritualmente i hasta físikamente. Kon profundamente nos a sinti e pèrdida di e reunion regular aki dor di e aktual pandemia, i kon ansioso nos ta antisipá na e momentu ora nos por reuní atrobe manera antes.
E pueblo di kombenio tambe ta reuní den tèmpel, e kas di Señor, pa optené ordenansanan, bendishonnan i revelashon únikamente disponibel einan. E Profeta Hosé Smirth a siña: “Kiko tabata e ophetivo di reun … e pueblo di Señor den kualke era di mundu? … E ophetivo prinsipal tabata pa edifiká na Señor un kas unda E por revelá na Su pueblo e ordenansanan di Su kas i e glorianan di Su reino, i siña e pueblo e kaminda di salbashon; pasobra tin sierto ordenansanan i prinsipionan ku, ora nan wòrdu siñá i práktika, mester wòrdu hasí den un lugá òf kas trahá pa tal propósito.”22
Heredá e Kombenionan Primintí
Na final, ta solamente den sigui e kaminda di kombenio nos lo heredá e bendishonnan di Abraham, Isaac, i Jakob, e bendishonnan máksimo di salbashon i eksaltashon ku solamente Dios por duna.23
Referensianan di eskritura na e pueblo di kombenio hopi bia ta nifika desendiente literal di Abraham konosí komo e “kas di Israel.” Pero e pueblo di kombenio tambe ta inkluí tur ku risibí e evangelio di JesuCristu.24 Pablo a splika:
“Pasó hopi di boso a wòrdu boutisá den cristu i a tuma Cristu riba bo. …
I si bo ta di Cristu, e ora ei bo ta simiya di Abraham, i heredero di akuerdo ku su promesa.”25
Esnan ku ta fiel na nan kombenionan “lo bin dilanti den e resurekshon di e hustu.”26 Nan ta “wòrdu hasí perfekto pa medio di Jesus e mediadó di e kombenio nobo. … Esakinan ta esnan ku nan kurpa ta selestial, ku nan gloria ta esun di e solo, hasta e gloria di Dios, e mas haltu di tur.”27 “Pesei, tur kos ta di nan, siendo bida òf morto, òf kosnan presente, òf kosnan ku tin ku bin, tur ta di nan i nan ta di cristu, i Cristu ta di Dios.”28
Laga nos sigui e yamada di e profeta pa mantené nos mes riba e kaminda di kombenio. Nefi a mira nos dia den su gran vishon i a skibi: “Ami, Nefi, a mira ku e poder di e Lamchi di Dios a baha riba e santunan di e iglesia di e Lamchi, i riba e pueblo di kombenio di Señor, ku a wòrdu plamá riba henter e superfisie di tera; i nan tabata armá ku rektitut i ku e poder di Dios den gran gloria.”29
Ku Nefi, “mi alma ta deleitá den e kombenionan di Señor.”30 Riba e djadumingu di Pasku, mi ta duna testimonio di JesuCristu, kua Su Resurekshon ta trese speransa i e seguridati di tur loke a wòrdu primintí riba i na final di e kaminda di kombenio. Den e nòmber di JesuCristu, amèn.