COVID-19 i Tèmpelnan
Warda boso kombenionan i bendishonnan di tèmpel spesialmente den boso mente i kurason. Keda fiel na e kombenionan ku boso a hasi.
Mi kerido rumannan, di bèrdat nos tabatin un fiesta spiritual. Mi ta asina gradesí pa tur e orashonnan, mensahenan, i músika di henter e konferensia. Danki pa kada un di boso pa uni ku nos unda ku bo por ta.
Na kuminsamentu di aña pasá, pa motibu d e pandemia di COVID-19 i nos deseo pa ta bon suidadanonan global, nos a tuma desishon difísil pa sera tur tèmpel temporalmente. Durante e lunanan siguiente, nos a sinti nos inspirá pa habri tèmpelnan gradualmente mediante un manera di traha kouteloso. Tèmpelnan ta wòrdu habrí awor den kuater fase, manteniendo estriktamente na gobièrnu lokal su regulashonnan i protokòlnan di seguridat.
Pa tèmpelnan den fase 1, parehanan kualifiká ku anteriormente a risibí nan propio investiduranan por wòrdu seyá komo esposo i esposa.
Pa tèmpelnan den fase 2, tur e ordenansanan pa esnan bibu ta wòrdu ehekutá, inkluso investidura pa bo mes, e seyamentu di esposo i esposa, i e seyamentu di yunan na mayornan. Resientemente nos a modifiká e reglanan di fase 2 i pèrmití nos hubentut, miembronan nobo, i otronan ku uso limitá di rekomendashon pa partisipá komo remplasante den boutismo pa nan antepasadonan.
Pa tèmpelnan den fase 3, esnan ku sitanan planiá por partisipá no solamente den ordenansanan pa esnan bibu pero tambe den tur ordenansanan komo remplasante pa nan antepasadonan.
Fase 4 ta un regreso kompletu, di tur aktividat regular di tèmpel.
Nos ta gradisí pa boso pasenshi i servisio deboto durante e periodo aki di kambio i desafio. Mi ta hasi orashon pa boso deseo pa adorá i sirbi den tèmpel lo mas fuerte awor ku nunka.
Boso probablemente ta puntrando kual tempu boso lo por regresá tèmpel. Kontesta: Boso tèmpel lo habri ora regulashonnan di gobièrnu lokal pèrmití esaki. Ora e insidentenan di COVID-19 den boso área ta den límitenan sigur, boso tèmpel lo wòrdu habrí. Hasi tur loke boso por pa yuda trese e sifranan di COVID abou den boso área pa asina boso oportunidatnan pa tèmpel por oumentá.
Miéntras tantu, warda boso kombenionan i bendishonnan di tèmpel spesialmente den boso mente i kurason. Keda fiel na e kombenionan ku boso a hasi.
Nos ta edifikando pa e futuro! Kuarenta i un tèmpel ta aktualmente bou di konstrukshon òf renobashon. Solamente aña pasá, apesar di e pandemia, a kuminsá ofisialmente ku konstrukshon di 21 tèmpel!
Nos ke trese e kas di Señor ainda mas serka na nos miembronan, pa nan por tin e privilegio sagrado pa bai tèmpel mes tantu biaha ku nan sirkunstansianan ta pèrmití.
Miéntras mi ta anunsiá nos palnnan pa konstruí 20 tèmpel mas, mi ta meditá i apresiá pioneronan—di pasado i presente—kendenan bida konsagrá a yuda pa hasi e historia aki awe. Un tèmpel nobo lo wòrdu knstruí den kada un di e siguiente lokalidatnan:Oslo, Norwega; Bruselas, Bèlgika; Viena, Oustria; Kumasi, Gana; Beira, Mozambique; Ciudad del Cabo, Sudáfrica; Singapur, República de Singapur; Belo Horizonte, Brasil; Cali, Colombia; Querétaro, Mèxico; Torreón, Mèxico; Helena, Montana; Casper, Wyoming; Grand Junction, Colorado; Farmington, Nuevo México; Burley, Idaho; Eugene, Oregón; Elko, Nevada; Yorba Linda, California; y Smithfield, Utah.
Tèmpel ta un parti úniko i vital di e Restourashon di e evangelio di JesuCristu den su plenitut. Ordenansanan di tèmpel ta yena nos bida ku poder i forsa—disponibel den ningun otro manera. Nos ta gradisí Dios pa e bendishonnan ei.
Awor ku nos ta klousurá e konferensia aki, atrobe nos ta ekspresá nos amor pa boso. Nos ta pidiku Dios den orashon lo drama Su bendishonnan i kuida kada un di boso. Huntu nos ta komprometí den Su servisio sagrado. Ku kurashi, laga nos pusha padilanti den e obra maravioso di Señor! Pa esaki mi ta hasi orashon den e nòmber sagrado di JesuCristu, amèn.