Yɛrotweɔn Ewuradze
Gyedzi n’asekyerɛ nye yerenya awerɛhyɛmu wɔ Nyame mu wɔ mber pa nye bɔn mu, a sɛ yebohu amandze ekesi dɛ Ɔbɛda N’abasa edzi wɔ hɛn afã mpo kã ho.
Mo nuanom na nkyerɛbaa adɔfo, hɛn nyina yɛdze enyimpi ayɛ aso—emi mpo kɛse—dɛ yebetsie efi hɛn nkɔnhyɛnyi dɔfo, President Russell M. Nelson n’asɛm a ɔbɛkã dze ewie. Iyi ayɛ ehyiadzi nwanwa, mbom ɔyɛ ne mpɛn ebien a COVID-19 yi asesã hɛn kwan a yɛtaa dze yɛ nhyiamu yi. Yɛaberɛ nsan yarba yi ho asɛm ara yie, ɔyɛ hɛn dɛ yɛntsetsew hɛn tsinhwi. Na ɔyɛ dɛ, m’Enuanom mu binom ayɛ iyi dada. Yɛserɛ hom nhu dɛ yɛbɔ mpaa ma hɔn a ɔyardɔm yi akã hɔn wɔ kwan biara do, nkanka hɔn a wɔayew adɔfo no. Obiara gye to mu dɛ iyi akɔ do akyɛr dodoodow.
Yɛntweɔn nkesi dabɛn mfa nya mboa mfi ahokyer a ɔba hɛn do? Ankorankor nsɔhwɛ horow so a yɛrosɔw ber a yɛtweɔn tweɔn, na mboa ne mbae yɛ nyaa yi so ɛ? Dɛn ntsi na ɔrekyɛr ber a adzesoadze no bor dza yebotum asoa yi?
Ber a yeribisa nsɛmbisa a ɔtsetse dɛm yi no, yebotum, sɛ yɛbɔ mbɔdzen a, yɛatse obi so no sũ a ɔregyegye fi efiadze sufɔɔ, nwinwin sunkamm wɔ awɔwber a wɔayɛ awɔw kyɛn ber biara wɔ dɛm bronɔ no do pɛn.
“O Nyankopɔn, ewɔ hen?” yɛtse fi Liberty Efiadze no bun mu. “Hen na wo ntamadan a ɔkata wo sumabew do no wɔ? Ibesianka wo nsa ekodu dabɛn?”1 Ekodu dabɛn, O Ewuradze, ekodu dabɛn?
Ntsi nnyɛ hɛn na yeedzi kan anaa yebedzi ewiei a yebebisa nsɛmbisa a ɔtse dɛm ber a awerɛhow ahyɛ hɛn do anaa hɛn akoma mu yaw bi kɔ do a onngyae. Sesei merennkasa mmfa wiadze nyina mu ɔyardom ho anaa efiadze horow ho, mbom fa ɔwo, w’ebusua na wo fipamfo a wohyia dɛm ɔhaw ahorow no. Mekasa fa dodow a hɔn ahwehwɛdze nye wɔbɔwar eso wɔnnwaree anaa hɔn a wɔawar na wɔpɛ dɛ hɔn nkitahodzi bɛyɛ ɔsorsor dze kakra. Mekasa fa hɔn a yarba dzendzen bi a wɔmmpɛ asan aba bio—bia ma wonntum nnsã—anaa hɔn a hɔn abrabɔ nyina mu no wɔnye awosu mu esintɔ bedzi akõ. Mekasa fa hɔn a wɔnye nkã-tse na adwen mu yarba ho ɔhaw a ɔhyɛ dodow akra do ma wɔtseetsee, nye hɔn a wɔdɔ hɔn a wɔnye hɔn ruhu amandze wɔ akoma mu. Mekasa fa abɔbɔfo ho, hɔn a Agyenkwa no kãa dɛ mma hɛn werɛ mmfir hɔn dabiarada no, na mekasa fa ɔwo a erotweɔn ɔba, mfe oedzi biara no, a ɔafa kwan a ɔson dza ibɔ ho mpaa dɛ ɔbɛfa do no.
Bio so, megye to mu dɛ ndzɛmba tsentsen yinom a yɛbotweɔn ho dɛ ankorankor no nnkã ɔman sikasɛm, amanyɛsɛm, na amanfo nkitahodzi akɔdaadwen ho a hɛn nyina yehyia no. Hɛn Egya a ɔwɔ Sor enyi da dɛ yebenya ɔman mu nsɛnhia ho mbuae nye ankorankor dze so, naaso mber binom bɛba wɔ hɛn abrabɔ mu a, hɛn sunsum mu mbɔdzembɔ kɛse dɛnara mpo nye hɛn akoma ntotɔserɛ mpaabɔ mpo remmfa konyimdzi horow a yɛrohwehwɛ no mmba, sɛ ɔfa wiadze nyina mu nsɛm ho anaa hɛn ankorankor dze nkakraba no ho. Ntsi ber a yɛyɛ ho edwuma na yɛbɔmu tweɔn hɛn mpaabɔ binom ho mbuae no, mema hom ɔsomafo anohoba dɛ wɔatse na woeyi ano, naaso bia nnyɛ mber no anaa kwan no a yɛrohwehwɛ no. Mbom woyi ano daa wɔ mber na kwan a daapem ɔwofo a onyim adze nyina wɔdɛ oyi ho ano. Mo nuanom na nkyerɛbaa adɔfo, meserɛ hom ntse ase dɛ Ɔno a ɔronntɔ nkom eso ɔrennda no2 dwen Ne mba nyina hɔn enyigye nye ewiei no hɔn nkwagye ntowdo ho kyɛn adze biara dɛm ɔsor abɔdze no wɔ yɛ. Ɔno na ɔdɔ mapã, Ɔda no edzi enyimnyam mu wɔ No mu, na Ehubɔbɔr Egya nye Ne dzin.
Bia ibɛkã dɛ, “Nyew, sɛ ɔtse dɛm dze a, ana ɔnnsɛ dɛ No dɔ na ehumbɔbɔr no paa hɛn ankorankor Po Memen no mu na wɔma hɛn kwan ma yɛnantsew dua hɛn ɔhaw horow mu kɔ wewewdo? Ɔnnsɛ dɛ Ɔsoma ndɛ mber yi mu po-nnoma ma wonntu mfi beebi mbɛmemen hɛn ndɛ mber yi mbɛbɛw a wɔrehaw hɛn yi?”
Nsɛmbisa a ɔtse dɛm yi ne nyiano yɛ “Nyew, Nyankopɔn botum ayɛ anwanwadze awora, mbom ntsɛmara anaa ekyir no yebosũa dɛ hɛn ɔnnkyebo abrabɔ akwantu no ne mber na hyɛber no, Ɔno na Ɔno nkotoo na Ɔkyerɛ kwan.” Ɔhyehyɛ hɛn mu kor biara ne mber no ankorankor. Banyin yarfo biara a wɔsã no yarba hɔnara no ber a ɔrotweɔn akɔ Bethesda Nsutaae mu no,3 obi fofor bɔtweɔn wɔ sar do mfe 40 a ɔrotweɔn ahɛn anohoba asaase no.4 Nephi na Lehi biara a ɔsorsor ogya twa hɔnho hyia dze bɔ hɔnho ban wɔ hɔn gyedzi ho ntsi no5 yɛwɔ Abinai a wɔahyew no wɔ dua do wɔ nedze ho.6 Na hom ma yɛnkaa dɛ dɛm Elijah kor noara a amonmu ɔfrɛɛ gya fii sor dze gyee dase tsiaa Baal akɔmfo no7 nye Elijah kor noara a ɔsɔɔw mber a nsu anntɔ mfe pii mu na wɔ mber kakra mu no, wɔdze edziban kakra ara a akokron dze ne nsa botum asoa dze nyɛɛn no.8 Mara mususu a, dɛm no nnkotum ayɛ dza yɛbɛfrɛ no “edziban dɛw.”
Asɛm no nye ebɛn? Asɛm no nye dɛ gyedzi kyerɛ dɛ yerenya awerɛhyɛmu wɔ Nyame mu wɔ mber pa nye bɔn mu, a sɛ yebohu amandze ekesi dɛ Ɔbɛda N’abasa edzi wɔ hɛn afã mpo kã ho.9 Dɛm no botum ayɛ dzen wɔ ndɛ mber wiadze yi mu a dodowara aba abɛgye edzi dɛ ɔbra pa a ɔkrɔn nye yebokwetsir amandzehu nyina, ama obiara annhaw noho wɔ biribiara ho.10 Mbom dɛm gyedzi no renngya hɛn dabiarada ama “yeedu Christ amayɛ esusudze no pɛn do.”11
Meserɛ Elder Neal A. Maxwell dɛ medze akokodur resakyer na matra biribi a ɔkãa no mpɛn bi mu, mo so mususu dɛ “ankorankor n’abrabɔ … nnkotum ayɛ dza gyedzi ahyɛ mu mã na atseetsee nnkã ho.” Ɔnnkɛyɛ yie dɛ “yebodua abrabɔ yi mu fãafãa a nnyim hwee,” rese ber a yɛretwe nsãdɛw no dɛ: “Ewuradze ma me wo su pa nyina, mbom hwɛ no yie na amma me amandzehu, anaa awerɛhow, anaa dza ɔkõ tsia biara. Meserɛ mma mma obiara nkyir me anaa onnyi me mma, na dza ohia kɛse no, mma mma menntse dɛ Ɔwo anaa hɔn modɔ hɔn no apa me. Nokwar, Ewuradze, yɛ ahwɛyie dɛ Ibeyi me efi sũahu horow no a ɔmaa Iyɛɛ krɔnkrɔn no. Na nkyii, sɛ nkaafo no nyina dua hɔn akwan nkekãkekã no mu wiei, meserɛ ma membra nye Wo mbɛtsena, bea a mubotum etuw moho wɔ mbrɛ hɛn ahoɔdzen na hɛn su si sɛ, ber a meda me Christianyi mununkum do ahotɔ mu dze sen kɔ no.”12
Mo nuanom na nkyerɛbaa adɔfo, Christianyɛ yɛ awerɛkyekye, mbom ɔnntaa nnyɛ ahotɔ. Krɔnkrɔnyɛ na enyigye ho anamɔn kwan a ɔwɔ ha na ndaamba no yɛ tsentsen na nkekãkekã. Ɔgye mber na enyimpisi dze anantsew do. Naaso, nokwar, no ho akatua no sõ papaapa. Nokwar yi wɔkyerɛkyerɛmu pefee na ndamyɛ mu wɔ Alma tsir 32 wɔ Mormon Nwoma no mu. Hɔ no sɔfo panyin okunyin yi kyerɛkyerɛ dɛ wodua Nyankopɔn n’asɛm wɔ hɛn akoma mu dɛ aba ara a, na sɛ yɛhwɛ do yie gugu do nsu, dodɔw ho efuw, hyɛ ho fa, na wɔkorado yie a, ndaamba ɔbɔsow eduaba a “ɔsom bo mapã, … ɔyɛ dɛw kyɛn eduaba nyina,” na ne ndzii no bɛma ɔkɔm na nsukɔm renndze hom da.13
Adzesũadze pii na wɔkyerɛkyerɛ wɔ tsir nwanwa yi mu, mbom ne nyina ne tsitsir nye enyansasɛm dɛ ɔwɔ dɛ yɛ nyɛn aba no na yɛtweɔn ma onyin na yɛdze gyedzi enyiwa “ahwɛ eduaba no kwan.”14 Alma se, hɛn ndɔbaa no “yɛbɛtsew.”15 Ɔnnyɛ nwanwa dɛ ne nkyerɛkyerɛ no osido mpɛn ebiasa serɛ mbɔdzembɔ nye abotar dze kora Nyame ne nsɛm no do wɔ hɛn akoma mu, “atweɔn,” dɛ mbrɛ ɔkã no, wɔ “penkyɛr … ma dua no oeyi n’eduaba ama hom.”16
COVID na kokoram, ekyingye na ahobow, sikasɛm ho haw na ebusua mu nsɔhwɛ horow. Mber bɛn ma wɔbɛma adzesoadze horow yinom do? Nyiano no nye dɛ “yɛbɛtsew” no ndɔbaa.17 Sɛ ɔyɛ mber tsia anaa mber tsentsen no nnyɛ hɛn na yɛbɛkã, mbom ɔnam Nyame n’adom do, nhyira horow no bɛba hɔn a wosuo Jesus Christ asɛmpa no mu dzen no. Dɛm asɛm no wosiesiee no wɔ ture kokoamu na wɔ bagua mu koko do wɔ Jerusalem mber pii a abɛsen.
Na afei ber a yetsie hɛn nkɔnhyɛnyi dɔfo dze ehyiadzi yi ba ewiei no, hom mma yɛnkaa, dɛ mbrɛ Russell Nelson dze n’abrabɔ nyina akyerɛ no, dɛ hɔn a “wɔtweɔn Ewuradze dze wobonu hɔn ahoɔdzen mu fofor, wɔdze ntsaba botu afow sor dɛ nkɔr, wobotu mbirika, na wɔnnkɛberɛ; wɔbɛnantsew, na wɔnnkɔtɔ bitsi.”18 Mobɔ mpaa dɛ “yɛbɛtsew”—enyimenyim anaa ekyir—dɛm nhyira horow no a hom mu kor biara a ɔhwehwɛ ahotɔ efi awerɛhow ho na ahotɔ efi hom yaw ho. Megye dase wɔ Nyankopɔn no dɔ na N’asɛmpa nwanwa ne Nsanananmu, a ɔyɛ, wɔ kwan biara do no, nyiano ma asɛm biara a yehyia wɔ abrabɔ yi mu. Wɔ Ewuradze Jesus Christ No ɔpon dzin no mu, amen.