Mbom Hom Nweɔn Daa, na Hom Ndzi Nkotoserɛ
Ndɛ metra me mpaabɔ ɔfrɛ no mu ma nkorɔfo nyina a wɔwɔ wiadze aman nyina mu.
Mo nuanom na nkyerɛbaa adɔfo, dapɛn a odzi ewiei mu wɔ No ɔnnkyebo abrabɔ somdwuma mu no, Jesus kyerɛkyerɛɛ N’esuafo no dɛ “hom nweɔn daa, na hom ndzi nkotoserɛ, ma hom eenya tum dɛ hom dze befi ndzɛmba yi a ɔbɛba yi nyina nsa, na hom eegyina nyimpa Ba no enyim.”1
Dza ɔkã “ndzɛmba yi a ɔbɛba” ansaana Ne Mbae a Otsĩa Ebien no nye “hom bɛtse kõ nye akosɛm nka[;] … ɔkɔm, [nye ɔyardom], nye asaase-wosow, bɛba mbeambea.”2
Nkyerɛkyerɛ na Ahyɛmudzi mu no, Agyenkwa no kãa dɛ, Ndzɛmba nyinara bɛyɛ begyabegya; … na suro bɛba nkorɔfo nyinara do.”3
Ampaara, yɛtse mber a ndzɛmba ayɛ begyabegya mu. Nkorɔfo dodowara suro ndaamba, na akoma pii adan efi hɔn gyedzi wɔ Nyankopɔn na Ne Ba, Jesus Christ mu.
Ewurkadze hyɛ akɛtseabakã nsɛm mu mã. Ehuhuw bra da bagua mu wɔ internet do. Esiei, asɔrdan, mosque, ntamadan, na nyamesom mbea ahorow wɔakɛsɛɛ hɔ pasaa.
Wiadze nyina mu nsan yarba edu wiadze n’afã beebiara—nyimpa ɔpepe na akã hɔn, a na ɔpepe kor na no mboree na woewuwu. Skuul abawdobɔ, asɔr som, awargye, asɛmpasomafo som, nye abrabɔ mu dza osisi a ho hia pii so woetwa do. Dza ɔkã ho so, woegya nyimpa pii ekyir ma wɔayɛ ankonam.
Guadzi na edwumayɛ a ayɛ basabasa no ama aahaw dodowara, nkanka, hɛn Ɔsor Egya ne mba abɔbɔfo no.
Yehu nkorɔfo a woedua hɔn ndzinoa do ayɛ ɔyɛkyerɛ dze akasa dza ɔhaw ho, asomdwee mu, na yeehu dɔm a wɔdze ebufuw resɛɛ adze.
Dɛm ber yi ara so, yɛkɔ do hu akõkoekõ wɔ wiadze yi mu.
Metaa dwen hom a hom ruhu amandze, rehaw, suro, anaa wɔayɛ ankonam no ho. Mema hom mu kor biara awerɛhyɛmu dɛ Ewuradze nyim hom, na Onyim hom haw na amandzehu, na Ɔdɔ hom—papaapa, ankorankor, dze kɔ bun mu na afebɔɔ.
Anafua biara sɛ mobɔ mpaa a, mibisa Ewuradze dɛ Onhyira hɔn a awerɛhow, yaw, ankonamyɛ, na nkrumsi ayɛ hɔn adzesoa. Minyim dɛ Asɔr baanodzifo nkaa no hɔn so wɔbɔ dɛm mpaabɔ no. Hom da hɛn akoma do, dɛ ankorankor na hom nyina, na yɛbɔ mpaa ma Nyankopɔn wɔ hom afã.
Mohweer nda pii mfeda wɔ United States etsifi boka afamu, resera America na Asɔr abakɔsɛm mbea, menye hɛn asɛmpasomafo na asɔrmba reyɛ nhyiamu, na meresera aban ma edwuma akɛse mu baanodzifo.
Kwesida, Ɔbɛsɛ ne da 20 no, menye mboanofo a wɔdɔɔ sõ kasae wɔ bea a ɔbɛn Boston, Massachusetts. Mugu do rekasa no, minyaa nkenyan dɛ menkã dɛ, “Mototɔ serɛ hom … dɛ hom mbɔ mpaa mma ɔman yi, mma hɛn baanodzifo, mma hɛn nkorɔfo, nye hɛn ebusua ebusua a wɔtse ɔman kɛse a Nyame kyekyeree mu yi.”4
Mekãa so dɛ America na wiadze yi mu aman pii, gyina nkwantanan, dɛ nna ma ɔtse mber a abɛsen no, na wohia hɛn mpaabɔ.5
Mo ntotɔserɛ no nna onnyi m’asɛm a makyerɛw no mu. Dɛm nsɛm no baa mo hɔ ber a metsee dɛ Sunsum no ekenyan me dɛ menserɛ hɔn a wɔwɔ hɔ no ma wɔmbɔ mpaa mma hɔn man na ne baanodzifo.
Ndɛ metra me mpaabɔ ɔfrɛ no mu ma nkorɔfo nyina a wɔwɔ wiadze aman nyina mu. Mbrɛ isi bɔ mpaa biara anaa onyia ibɔ mpaa ma no no, meserɛ fa wo gyedzi dzi dwuma-—ma wo gyedzi tse biara—na bɔ mpaa ma wo man na wo man mu baanodzifo. Dɛ mbrɛ mekãa no mfeda Ɔbɛsɛ wɔ Massachusetts no, yegyina nkwantanan kɛse wɔ abakɔsɛm mu, na asaase do aman hia ɔsor nkenyan na kwankyerɛ dzendzenndzen. Iyi mmfa amanyɛsɛm anaa dwumadzi ho nhyehyɛɛ ho. Iyi fa asomdwee na ayarsã a obotum aba ankorankor akoma na aman akoma mu—hɔn nkuropɔn, nkurow, na nkurase—edua Asomdwee Hen, na ayarsã nyina farbaa no do, Ewuradze Jesus Christ.
Abosoom kakra a abɛsen mu no, menya nkenyan dɛ kwan pa a obotum aboa sesei wiadze gyinabew no nye nkorɔfo nyina wɔbɔtwer Nyame emudzi mu yie na woedua nokwar mpaabɔ mu adan hɔn akoma ama No. Yɛrebrɛ hɛnho adze na yɛrohwehwɛ ɔsor nkenyan dze etsim anaa edzi dza ɔda hɛn enyim yi do konyim no bɛyɛ kwan dwuodwuoo a osi pi a yɛbɔkɔ kan awerɛhyɛmu mu dze edua ɔhaw mber yinom mu.
Kyerɛwsɛm no da mpaabɔ horow no a Jesus bɔe no edzi na Ne kyerɛkyerɛ fa mpaabɔ ho wɔ No ɔnnkyebo somdwuma ber mu. Hom kaa Ewuradze Ne Mpaabɔ:
“Hɛn Egya a ewɔ sor, wo dzin ho ntsew.
“W’ahendzi mbra. Wɔnyɛ wo pɛ wɔ asaase do, dɛ ɔsor.
“Ma hɛn hɛn daa daa edziba ndɛ.
“Na fa hɛn akaw kyɛ hɛn, dɛ mbrɛ hɛn so yɛdze akyɛ hɛn akafo.
“Na mma mmfa hɛn nnkɔ nsɔhwɛ mu, na mbom yi hɛn fi ɔbɔn no mu. Na ɔwo na ahendzi, nye tum, nye enyimnyam, yɛ wodze afebɔɔ. Amen.”6
Mpaabɔ dɛɛdɛw, a otsim botae do, a Christianfo nyina si do kã no, ma yehu no pefee dɛ ɔfata dɛ yɛdze hɛn ebisadze ma “Hɛn Egya a ɔwɔ sor’ akwantsen dze gye mbuae wɔ dza ɔhaw hɛn ho. Dɛm ntsi, hom ma yɛmbɔ mpaa ngye ɔsor kwankyerɛ.
Moto nsa frɛ wo dɛ bɔ mpaa daa.7 Bɔ mpaa ma w’ebusua. Bɔ mpaa ma aman mu baanodzifo. Bɔ mpaa ma akokodurfo akandzifo wɔ ndɛ ɔkõ a otsia amamfo nkitahodzi, ɔdomankoma egyapadze, amanyɛsɛm, ɔyardom a ɔkã nyimpa wɔwɔ wiadze mu nyina: esikafo na ehiafo, mbasirmba na mpanyin.
Agyenkwa no kyerɛkyerɛɛ hɛn dɛ mma yenntwa hɔn a yɛbɔ mpaa ma hɔn no do. Ɔkãa dɛ, “Hom ndodɔ hom atamfo, hom nhyira hɔn a wɔkã hom ndom, hom nyɛ papa mma hɔn a wɔtan hom, na hom nsɔr mma hɔn a wobu hom enyimtsia na wɔtseetsee hom”8
Calvary mbeamudua no do, bea a Jesus wui maa hɛn bɔn no, Ɔdze dza Ɔkyerɛkyerɛe no dzii dwuma ber a Ɔbɔɔ mpaa dɛ, “Egya, fa kyɛ hɔn, na wonnyim dza wɔreyɛ.”9
Yɛrobɔ mpaa nokwar mu ama hɔn a yesusu dɛ wɔyɛ hɛn atamfo no kyerɛ hɛn gyedzi dɛ Nyankopɔn botum asesã hɛn akoma na binom akoma. Mpaabɔ a ɔtse dɛm no wɔdɛ ɔhyɛ hɛn enyimpisi dzen dɛ yɛbɛyɛ nsesã horow a ohia wɔ hɛnankasa hɛn abrabɔ mu, ebusua ebusua, nye sɔn horow mu.
Bea a etse biara no, kasa biara ekã, anaa ɔhaw horow a ehyia no, Nyankopɔn tsie na Oyi wo ano wɔ Nankasa no kwan do na Nankasa ne mber pa do. Osiandɛ yɛyɛ Ne mba no ntsi, yebotum abɛn No ahwehwɛ mboa, awerɛkyekye, na pɛ a oekenyan dɛ edze papa soronko bɛba wiadze yi mu.
Erobɔ mpaa ama pɛrpɛrdzi, asomdwee, abɔbɔfo, na ayarfo tɔ dɛ ɔnnsõ. Yeebu nkotodwe wɔ mpaabɔ mu ewiei no, ohia dɛ yɛsoɛr fi hɛn nkotodwe enyim na yɛyɛ dza yebotum ayɛ dze aboa—dze boa hɛnho na nkaafo no.10
Nkorɔfo a wɔwɔ gyedzi a wɔdze mpaabɔ kãa hɔn ndzeyɛɛ ho dze yɛɛ biribi soronko wɔ hɔnankasa hɔn abrabɔ mu na binom abrabɔ mu ho fasusu hyɛ kyerɛwsɛm no mu mã. Mfatoho, Mormon Nwoma mu no, yɛkenkan Enos ho nsɛm. Wɔahyɛ no nsew dɛ “no nwoma tsiabaa ne nkyɛmu ebiasa mu ebien no kã mpaabɔ ho asɛm, anaa mpaabɔ ahorow ho, na nkaa no kã dza ɔyɛe wɔ no mbuae no ho”11
Yɛwɔ mfatoho pii wɔ mbrɛ mpaabɔ sii dze soronko baa hɛnankasa hɛn Asɔr abakɔsɛm mu, ɔrehyɛ ase fi Joseph Smith ne mpaabɔ a obue n’ano bɔe wɔ ndua kwã a ɔbɛn n’awofo hɔn mpuna dan wɔ afe 1820 fefew ber. Ɔrohwehwɛ bɔnfakyɛ na sunsum mu kwankyerɛ no, Joseph ne mpaabɔ no buei ɔsorsor. Ndɛ yɛyɛ Nkɔnhyɛnyi no na Latter-day Saintfo mbanyin na mbaa anokwafo a wɔbɔɔ mpaa na wodzii ho dwuma dze boae kyekyeer Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no, no mu adzedzifo.
Metaa dwen mbaa anokwafo tse dɛ Mary Fielding Smith ho a, wɔdze Nyame no mboa no, akokodur mu ara woyii hɔn ebusua fi atsetsee a ɔrodɔɔ sõ wɔ Illinois dzii hɔn kan baa bɔnsa yi mu, a n’ebusua no yɛɛ prɔmprɔm sunsum mu na honandua mu no ho. Ɔbɔɔ mpaa enyiberdo wɔ no kotodwe enyim, nkyii ɔyɛɛ edwuma dzen dze dzii ne taferbanyinmbɔmu do konyim na ohyiraa n’ebusua.
Mpaabɔ bepegya hɛn na wɔatwe hɛn aboa ano dɛ ankorankor, dɛ ebusua ebusua, dɛ asɔr, na dɛ wiadze mba. Mpaabɔ benya nhyɛdo wɔ abɔdze nyansapɛfo do na wɔaboa hɔn ma woekopue seal na ndur a ɔbɛma nsan yarba yi abɔ adze. Mpaabɔ bɛkyekye hɔn a owu afa hɔn dɔfo no hɔn werɛ. Ɔbɛma hɛn kwankyerɛ ma yehu dza yɛnyɛ mma hɛnankasa hɛn ankorankor bambɔ.
Enuanom na nkyerɛbaa, mehyɛ hom tsipia, dɛ hom enyimpi si wɔ mpaabɔ ho nyɛ kɛse. Mehyɛ hom tsipia dɛ hom mbɔ mpaa wɔ hom pia mu, hom daa daa nantsew mu, wɔ hom efiefi mu, hom ward horow mu, na, daa, wɔ hom akoma mu.12
Meda hom ase wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo ne baanodzifo afã, wɔ mpaabɔ a hom bɔ ma hɛn no. Mehyɛ hom tsipia dɛ hom nkɔ do mbɔ mpaa ama yeenya nkenyan na nyikyerɛ dze ama Asɔr no kwankyerɛ wɔ nkõdzen mber yi mu.
Mpaabɔ botum asesã hɛnankasa hɛn abrabɔ. Nokwar mpaabɔ rehyɛ hɛn nkuran no, yebotum etu mpon na yɛaboa binom so ma wɔayɛ dɛmara.
Mankasa mo sũahu ma minyim mpaabɔ no tum. Ɔnnkyɛree nna aka monko wɔ ɔfese. Nna makɛyɛ me nsa edur ma ɔnnkyɛree. Nna wɔayɛ tumm na bɔgya ada do, ɔahon, ma ɔyɛ yaw. Ber a metsena mo pon enyim no, nna munntum mmfa m’adwen nntsim ndzɛmba a ohia tsitsir no yie, osiandɛ nna yaw yi rotwe m’adwen.
Mubuu kotodwe wɔ mpaabɔ mu na mibisaa Ewuradze dɛ Ɔmboa me ma muntum mfa m’adwen nsi m’edwuma no do na minyɛ. Mosoɛree na mesanee kɔr nkrataa a aboa ano wɔ mo pon do no. Ntsɛmara no, adwenmutsewee bae ma mutumii dze m’adwen tsiim do wiei dza ohia tsitsir a ɔda m’enyim no.
Sesei wiadze mu begyabegyayɛ bɛyɛ dɛ ma ɔbor do ber a yɛhwɛ nsɛm ahorow na ɔhaw piinara no. Ɔyɛ me dasegye a ɔyɛ dzen dɛ sɛ yɛbɔbɔ mpaa na yebisa Ɔsor Egya nhyira horow na kwankyerɛ a yehia a, yɛbɛba ebohu mbrɛ yebesi botum ehyira hɛn ebusua ebusua, fipamfo, sɔn horow, na aman mpo a yɛtse mu no.
Agyenkwa no bɔɔ mpaa na nkyii “Okyinii yɛɛ yie”13 a Ɔrema abɔbɔfo edziban, Ɔrehyɛ hɔn a wohia no dzen na abamba, na Ɔretsen nsa wɔ ɔdɔ mu, bɔnfakyɛ, asomdwee, na ahomgye ma hɔn a wɔbɛba No hɔ nyina. Ɔkɔ do tsen Ne nsa ma hɛn.
Moto nsa frɛ Asɔrmba nyina, nye hɛn fipamfo na anyɛnkofo a wɔwɔ som binom mu wɔ wiadze nyina mu dɛ, wɔnyɛ dza Agyenkwa no tuu N’esuafo fo dɛ wɔnyɛ no: “Hom nweɔn daa, na hom ndzi nkotoserɛ mma asomdwee, ahotɔ, bambɔ na kwan a yɛdze bɔsom hɛnho nkorkor.14
Mbrɛ mpaabɔ no tum si sõ na mbrɛ wohia hɛn gyedzi mpaabɔ wɔ Nyankopɔn na No Dɔba wɔ ndɛ wiadze mu a! Hom ma yɛnkaa na hɛn enyi nsɔ mpaabɔ no tum no. Wɔ Jesus Christ ne dzin mu, amen.