Christ Amambra no
Yebotum hɛn nyina ama hɛn ankorankor asaase do amambra horow mu dza ɔkrɔn no asom hɛn bo, na yedze hɛnho nyina so ahyɛ onnyiewiei amambra no a ofi Jesus Christ asɛmpa ba no mu.
Hom nhwɛ wiadze nwanwa a yɛtse mu na yedzi nkitaho, ɔyɛ fie mã nkorɔfo ahorow pii, kasa horow, kusum, nye abakɔsɛm—wɔatserɛw egu aman ɔha na no mboree na ekuw ekuw mpempem mu, a kor biara amambra hyɛ mu mã. Adasa wɔ pii a ɔsɔ enyi na ɔsɛ nkamfo. Mbom ɔyɛ suban a yesũa dze—dɛm ndzɛmba no a ɔwɔ amambra mu a yenyin wɔ mu no—naaso obotum ayɛ ahoɔdzen kɛse asom hɛn wɔ abrabɔ mu, obotum so, sɛ ɔtɔfabi a, wɔayɛ akwansidze kɛse noara.
Ɔbɛyɛ dɛ ma amambra no ahɛn hɛn adwendwen na ndzeyɛɛ mu ara ma dɛ yennkotum asesã. Ne nyina mu no, ɔyɛ dza, yenya ho atsenkã na ɔkyerɛ hɛn nyimpa ban na ɔma yenya hɛn soronkoyɛ ho atsenkã. Obotum ayɛ nhyɛdo kɛse ara ma yennkotum ehu mbrɛwyɛ a ofir nyimpa anaa esintɔ a ɔwɔ hɛn ankasa hɛn amambra mu a, no nsunsuando nye yɛbɔpow dɛ yɛbɔtow mpanyimfo atsetsesɛm binom egu. Awerɛhyɛmu mbordo wɔ w’amambra no soronkoyɛ no botum egya wo ma apow—adwenkyerɛ, na ndzeyɛɛ a oye—ɔyɛ tsenenee mpo no.
Minyim aborɔba nyimdzifo bi a mfe kakra ara a abɛsen kɔ no, a ɔboa ma medze kyerɛ amansan fapem amambra adzehwɛ sin yi mu. Midzii kan hyiaa no wɔ Singapore ber a nna meyɛ n’ebusua no fie kyerɛkyerɛnyi no. Ɔyɛ ɔbemfo a ɔagye dzin wɔ Sanskrit na Tamil mu, na ofi India anaafo. Ne yer nwanwafo na ne mbabanyin beenu no yɛ Asɔrmba, mbom ɔno ɔanndɔm no da na oenntsie n’asɛmpa nkyerɛkyerɛ no pii. Nna mbrɛ ne yer na ne mbabanyin no rutu mpon no yɛ no enyigye na ɔboaa hɔn emudzi wɔ hɔn dwumadzi na Asɔr asodzii mu.
Ber a mekãa dɛ mebɛkyerɛ no asɛmpa fapem no na menye no akyɛ hɛn gyedzi no, ahyɛse no ɔtwee saanee. Ɔkyɛr kakra ana muruhu siantsir no: onyaa atsenkã dɛ ɔreyɛ dɛm bɛma ɔabɛyɛ obi a ɔkõ tsia ne nkyir, no nkorɔfo, na n’abakɔsɛm! N’adwen se no dɛ, ɔrebɛpa biribiara a ɔyɛ, biribiara a n’ebusua akyɛrɛ no dɛ ɔnyɛ, na ne India ɔdehyeyɛ no. Abosoom kakra mu no, yetumii kasaa faa ehiasɛm yinom ho. Ɔyɛ me enyigye mbordo (nna ɔnnyɛ me nwanwa dze) dɛ mbrɛ Jesus Christ asɛmpa no etum ebue n’enyiwa ma woehu adwen fofor bi so.
Nyimpa amambra mu dodowara no, papa na bɔn nyina wɔ mu, dza ɔma ntowdo na dza ɔsɛɛ.
Hɛn wiadze yi mu ɔhaw dodow ara yɛ adwenkyerɛ asorɔtow na kusum amandze a ofi hɔn amambra mu a wodzi esi ho nsunsuando. Mbom nkyɛ akõkoekõ na basabasayɛ nyina bɛyew akɔ sɛ wiadze bɛpen do agye n’asɔpɔkan amambra ato mu a, dza hɛn nyina nna yɛwɔ a ɔnnkyɛrɛɛ biara no. Amambra yi no hyɛ ase fi asetsena a ansaana nyimpa reba asaase do no. Nna ɔyɛ Adam na Enoch amambra no. Ɔyɛ amambra no a ne farbaa nye Agyenkwa no ne nkyerɛkyerɛ wɔ mber nkyekyɛmu ntamu no, na ɔwɔ hɔ ma mbaa na mbarimba bio wɔ hɛn nda yi mu. Ɔyɛ soronko. Ɔyɛ amambra no nyina mu dza ɔkrɔn kɛse na ofi enyigye ho nhyehyɛɛ kɛse a Nyankopɔn hyehyɛɛ na Christ maa ho abamba no. Ɔkã bɔ mu kyɛn ɔkyekyɛ mu. Ɔsã yarba kyɛn opira.
Jesus Christ asɛmpa no kyerɛkyerɛ hɛn dɛ abrabɔ wɔ botae. Nnyɛ esian kɛse anaa mfomdo wɔ wimu ekyirekyir na ɔdze hɛn baa ha! Siantsir bi ntsi na yɛwɔ ha.
Amambra yi si dasegye no dɛ hɛn Ɔsor Egya tse ase ne fapem do, dɛ Ɔwɔ hɔ ampara na Ɔdɔ hɛn mu kor biara, ankorankor. Yɛyɛ “[N’]edwuma na [N’]enyimnyam.”1 Amambra yi hyɛ nkuran dɛ yɛsom bo pɛr. Ekuwekuw anaa nkyekyɛmu biara nnyi mu. Ne nyina ekyir no, yɛyɛ nuambanyin na nkyerɛbaa, hɛn ɔsor awofo hɔn sunsum mu mba—ampaara. Enyimtsiabu biara nnyi hɔ anaa “hɛn ritsĩa hɔn” adwen biara nnyi amambra mu dza ɔkrɔn kɛse no mu. Hɛn nyina yɛyɛ “hɛn”. Hɛn nyina yɛyɛ “hɔn”. Yɛgye dzi dɛ yɛwɔ asodzi na nkontaabu ma hɛnankasa hɛnho, nkorkor, Asɔr no, na hɛn wiadze. Asodzi na nkontaabu ho hia ama yeenyin.
Ayamuyie, erohwɛ nkaafo nokwar mu tse dɛ Christ nye amambra yi no botantsim. Yɛtse hɛn fɛfo dasanyi n’ehiadze nkã, honandua na sunsum mu, na yedzi atsenkã no ho dwuma. Iyi yi enyimtsiabu na ɔtan fi hɔ.
Yenya nyikyerɛ ho amambra, a ogyina Nyame n’asɛm a nkɔnhyɛfo nya do (na hɛn mu kor biara dua Sunsum Krɔnkrɔn no do hu nokwar ma noho), Adasa nyina botum ehu Nyankopɔn ne pɛ na n’adwen.
Amambra yi gye nyimpa ne pɛ ho nkyerɛkyerɛ ho abamba. Yetum san mu yi no, no hia tsitsir ma hɛn mpontu na enyigye. Eresan mu eyi nyansa mu yɛ dza ohia papaapa.
Ɔyɛ adzesũa na nwomasũa amambra. Yɛhwehwɛ nyimdzee na nyansa na dza ɔkrɔn wɔ ndzɛmba nyina mu.
Ɔyɛ gyedzi na setsie amambra. Gyedzi wɔ Jesus Christ mu nye fapem a odzi kan wɔ hɛn amambra mu na setsie ma Ne nkyerɛkyerɛ na mbrasɛm no nye no nsunsuando. Iyinom ma yetum hyɛ hɛnho do.
Ɔyɛ mpaabɔ amambra. Yɛgye dzi dɛ Nyankopɔn nntsie hɛn nko, mbom Ɔboa hɛn so.
Ɔyɛ ahyɛmu na ayɛdze horow amambra, suban pa gyinapɛn, afɔrbɔ, bɔnfakyɛ na nnuho, nye yɛrohwɛ hɛn honandua temple no do yie. Iyinom nyina gye hɛn enyimpi si ma Nyame ho dase.
Ɔyɛ amambra a wɔdze asɔfodzi no hwɛ do, tumdzi no a wɔdze dzi dwuma wɔ Nyame ne dzin mu, Nyame no tum a wɔdze hyira Ne mba no. Ɔma ntowdo na otum ma ankorankor wɔbɛyɛ nkorɔfo apapa, baanodzifo, enãnom na egyanom, na adamfofo—na ɔtsew fie no ho.
Anwanwadze horow a ɔyɛ nokwar nnyɛ nã wɔ iyi, tsetse amambra mu panyin no mu, a wɔnam gyedzi wɔ Jesus Christ mu, asɔfodzi tumdzi, mpaabɔ, woho mpontu, nokwar nsakyeree, na bɔnfakyɛ do dze yɛ.
Ɔyɛ asɛmpasomafo edwuma. Akra som bo kɛse.
Christ n’amambra mu no, woepegya mbaa esi onnyiewiei sibew a wɔfata. Wɔnnhyɛ mbanyin ase, dɛ mbrɛ ɔwɔ ndɛ wiadze yi amambra dodow mu no, mbom wɔyɛ etsĩpɛmfo mãhyɛ mu wɔ ha na wiadze a ɔbɛba no mu.
Amambra no gye ebusua no n’ahotsew to mu. Ebusua no nye daapem ne fapem tɔw no. Ebusua no n’emudziyɛ no fata afɔrbɔ biara, osiandɛ, dɛ mbrɛ wɔakyerɛkyerɛ no, “konyimdzi biara nnyi hɔ a obotum apata fie no nkõgu.”2 Fie no nye bea a yɛyɛ hɛn edwuma a ɔkrɔn na bea a yenya enyigye kɛse no wɔ.
Christ amambra mu no, nhumu wɔ mu—na daapem botae na kwan na enyiwa tsim do. Ndzɛmba a ɔsombo afebɔɔ na amambra yi dwen ho. Ofi Jesus Christ asɛmpa, a ɔyɛ onnyiewiei mu, na ɔkyerɛkyerɛ hɛn asetsena ne dɛn ntsi, ebɛnadze na henfa no mu. (Ɔgye obiara, ɔnnyɛ nyiyimu.) Osiandɛ edze Agyenkwa ne nkyerɛkyerɛ ridzi dwuma no nsunsuando nye amambra yi ntsi, ɔboa ma ɔma ayarsã edur a hɛn wiadze yi hia no dzendzenndzen no.
Mbrɛ osi yɛ nhyira dɛ yɛkã adehye abrabɔ a ɔkrɔn yi ho! Yɛbɛba abɛkã iyi, amambra nyina mu dza ɔkrɔn kɛse ho no, behia nsesã. Nkɔnhyɛfo no akyerɛkyerɛ dɛ ohia dɛ yebegya biribiara a ɔwɔ hɛn amambra dadaw no mu a ɔnye Christ amambra no bɔ ebira no ekyir. Mbom ɔno nnkyerɛ dɛ ɔwɔ dɛ yegya biribiara wɔ ekyir. Nkɔnhyɛfo no so etsĩ mu akã dɛ wɔato nsa afrɛ obiara, dɛ yɛmfa hɛn gyedzi na talent horow na nyimdzee—dza oye wɔ hɛn abrabɔ mu na hɛn ankorankor amambra mu nyina no—nkã hɛnho mbra, na yɛma Asɔr no ndua asɛmpa no mu nsɛm do “mfa bi nkã hɛn ho.”3
Ɔnntɔkã dɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no bɛyɛ Western kuw anaa America amambra adze kɛse bi. Ɔyɛ amansan nyina asɔr, dɛ mbrɛ daa ɔwɔ dɛ ɔyɛ no. Ɔbor dɛm mpo, ɔyɛ abɔso dze. Afoforfo a wofi wiadze nyina mu no dze, dza ɔsom bo, nsonsonee, na enyigye bɛhɛn hɛn ebusua a ɔrokɔ do rinyin no mu. Latter-day Saintfo a wɔwɔ beebiara kɔ do hyɛ hɔn egyapadze na ekunyin ho fa na wodzi hɔn nyi, naaso sesei wɔkã dza ɔsõ koraa ho. Jesus Christ amambra no boa hɛn ma yehu hɛnho dɛ mbrɛ yɛtse ankasa, na ber a yɛdze tseneneeyɛ dua daapem ahwehwɛ mu hwɛ no, ɔma yetum hyɛ enyigye ho nhyehyɛɛ kɛse no mã.
Ntsi, me nyɛnko no ɛ, ɔba no dɛn? Oye, wɔkyerɛkyerɛɛ no adzesũadze horow no na ɔbɔdɔɔm Asɔr no. Ɔno na n’ebusua wɔasɔw hɔn ano mber yi mu na mfesantsen wɔ Sydney Australia Temple. Oegyaa biribi kakra mu—na oenya adze nyina ho ndaamba mfaso. Oebohu dɛ obotum akɔdo ahyɛ n’abakɔsɛm ho fa, ne tsetse ebusua, no ndwom n’asaw na akenkansɛm, n’edziban, n’asaase na no nkorɔfo akɔ do asɔ n’enyi. Oehu dɛ haw biara nnyi hɔ dɛ ɔdze n’amambra mu dza oye papa no bɛba amamabra a ɔkrɔn kɛse no mu. Oebohu dɛ edze dza ɔnye nokwar na tseneneeyɛ saa fi n’abrabɔ dadaw no mu dze ba ne dze fofor mu no, ɔboa ara ma opegya n’Ahotseweefo fekuwbɔ na ɔboa hɛn nyina ma yɛkã bɔ mu kor wɔ ɔsor ɔman mu.
Yebotum, nokwar, hɛn nyina ama hɛn ankorankor asaase do amambra horow mu dza ɔkrɔn no asom hɛn bo, na yetum so ahyɛ hɔn nyina ne tsetse amambra mu panyin no emudzi mu—asɔpɔkan dze no, ewiei dze no, onnyiewiei amambra no a ofi Jesus Christ asɛmpa no mu no. Egyapadze nwanwa bɛn na hɛn nyina yɛkyɛ yi. Jesus Christ ne dzin mu, amen.