Zion mu Nkyerɛbaa
Hom bɛyɛ tum kuw tsitsir wɔ Israel mboaboa ano mu, na wɔ Zion nkorɔfo hɔn nkyekyeree mu.
Me nkyerɛbaa adɔfo, wɔayɛ me nhyira dɛ menye hom kasa mber nwanwa yi mu wɔ wiadze abakɔsɛm mu no. Da biara no, nna yɛrebɛn enyimnyam ber no a Agyenkwa Jesus Christ bɛba asaase do bio no. Yenyim biribi kakra fa ndzɛmba huhu a obesisi ansaana Ne mbae no, naaso enyigye na awerɛhyɛmu hyɛ hɛn akoma mu mã so, yenyim enyimnyam anohoba horow a ɔbɛhyɛ mã ansaana Ɔasan aba no.
Dɛ hom yɛ Ɔsor Egya ne mbabaa adɔfo no, na dɛ Ewuradze Jesus Christ ne mbabaa wɔ n’ahenman mu no,1 hom wɔ kyɛfa a ohia tsitsir wɔ mber kɛse a ɔreba no mu. Yenyim dɛ Agyenkwa no bɛba nkorɔfo a wɔaboaboa hɔn ano na wɔayɛ ahosiesie dɛ wɔbɛtsena ase tse dɛ mbrɛ Enoch no kuropɔn mu nkorɔfo no yɛe no. Nna nkorɔfo a wɔwɔ hɔ no ayɛ kor wɔ Jesus Christ gyedzi mu na hɔn ho atsew ara ma wɔfaa hɔn kɔr sor.
Nyikyerɛ a Ewuradze dze ama a ɔkyerɛ dza ɔbɛba Enoch no nkorɔfo do na dza obesi wɔ mberano mãhyɛ odzi ewiei yi mber mu no, nye yi:
“Na da no bɛba ma asaase no aagye n’ahom, mbom ansaana dɛm da no bɛba no ɔsorsor bɛhyɛ sum, na nkataenyim kebii bɛkata asaase do; na sor bɔwosow, na asaase so; na amandzehu kɛse bɛba adasamba mu, mbom mo nkorɔfo no dze mobɔkora hɔn do;
“Na tseneneeyɛ na mebɛma efi sor aba famu; nokwar na mebɛma efi asaase mu epue, ma wɔagye dase wɔ nyia mo Woo no Kortoo no noho; no wusoɛr fi owu mu; nyew, nye adasa nyinara owusoɛr so; na tseneneeyɛ na nokwar na mebɛma woetwuw afa asaase no do tse dɛ nsuyirii, ma wɔaboaboa me mpamufo no ano efi asaase ne mfɛndzanan nyinara mu, dze hɔn aba bea a mibesiesie no, Kuropɔn Krɔnkrɔn, ama mo nkorɔfo aabɔ hɔn asen do, na wɔaahwɛ ber a medze bɛba no kwan; osiandɛ hɔ na me ntamadan no besi, na wɔbɛfrɛ no Zion, Jerusalem Fofor.
“Na Ewuradze see Enoch dɛ: Ber no ɔwo na wo kuropɔn nyinara behyia hɔn hɔ, na yɛbɛgye hɔn ato hɛn bo mu, na wobohu hɛn; na yɛbɛbaar hɔn kɔn, na hɔn so bɛbaar hɛn kɔn, na yɛbɛfew hɛn ano nkorkor;
“Na hɔ bɛyɛ me tsenabew, na ɔbɛyɛ Zion, dza obefi m’abɔdze nyinara a mayɛ mu aba no; na mfe apem ntamu no asaase no bɛgye n’ahom.”2
Nkyerɛbaa, hom mbabaa, hom mbanananom mbaa, nye mbaa a hom bɛtsetse hɔn no na wobedzi mu adɔntsen dze atsew nkorɔfo kuw a wɔnye Agyenkwa no bɛkã ho enya enyimnyam nkitahodzi. Hom bɛyɛ tum kuw tsitsir wɔ Israel mboaboa ano mu, na wɔ Zion nkorɔfo a wɔbɛtsena ase wɔ Jerusalem Fofor no mu no hɔn nkyekyeree.
Ewuradze edua No nkɔnhyɛfo do, abɔ hom anohoba. Relief Society ahyɛsɛ mber mu no, Nkɔnhyɛnyi Joseph Smith kãa kyerɛɛ nkyerɛbaa no dɛ, “sɛ hom tum dze hom ndzinoa horow no bɔ bra a, wonnkotum esiw abɔfo kwan dɛ wɔbɛyɛ hom mfɛfo.”3
Dɛm nkrabea nwanwa no hyɛ hom mu, na wɔresiesie hom ama.
President Gordon B. Hinckley kãa dɛ:
“Hom nkyerɛbaa … hom nntɔ do ebien wɔ hɛn Egya ne nhyehyɛɛ ma Ne mba hɔn onnyiewiei nhyehyɛɛ na yieyɛ mu. Hom yɛ nhyehyɛɛ ne fã a ohia tsitsir.
“Sɛ hom nnkã ho a, nhyehyɛɛ no nnkotum ayɛ edwuma. Hom nnkã ho a, nhyehyɛɛ no nyina bɛyɛ gyan.
Hom mu kor biara yɛ Nyame ne babaa, a wɔakyɛ hom abakan ndzinoa krɔnkrɔn.”4
Hɛn nkɔnhyɛnyi sesei, President Russell M. Nelson, akyerɛ hɔn kyɛfa a ɔwɔ Agyenkwa Ne mbae ho ahosiesie mu.
“Yennkotum esusu nhyɛdo a … mbaa wɔ, nnyɛ wɔ hɔn ebusua ebusua nko do mbom ɔsan so wɔ Ewuradze N’Asɔr do dɛ, nyernom, enãnom, nanaanom; dɛ nkyerɛmbaa na auntfo; dɛ akyerɛkyerɛfo na baanodzifo; na tsitsir ara dɛ gyedzi ho bambɔfo anokwafo.
“Iyi ayɛ nokwar wɔ asɛmpa mberano biara mu fitsi Adam na Eve hɔn aber do. Naaso berano yi mu mbaa yɛ soronko wɔ mbaa a wɔwɔ berano nkaa nyina mu, osiandɛ berano yi yɛ soronko koraa fi nkaa no ho. Soronkoyɛ no dze ndzinoa nye asodzi ba.”5
Berano no yi yɛ soronko osiandɛ Ewuradze bedzi hɛn enyim ma yɛayɛ ahoboa abɛyɛ tse dɛ Enoch kuropɔn no. Ɔakyerɛ mu akyerɛ N’asomafo na nkɔnhyɛfo dza wobehia ma wɔasakyer hɔn abɛyɛ Zion nkorɔfo.
Elder Bruce R. McConkie kyerɛkyerɛɛ dɛ:
“[Enoch ne] nda no yɛ emumuyɛdze na ndzebɔn nda, sum na etuatsew nda, ɔkõ da na amafõyɛ, da a oregya aba nsu a wɔdze bɛtsew asaase no ho.
“Mbom, nna Enoch yɛ nokwafo. ‘Ohun Ewuradze,’ na ɔnye no kasaa ‘enyim na enyim’ dɛ ma nyimpa kor nye kor kasa. (Moses 7:4.) Ewuradze somaa no dɛ ɔmbɔ nnuho ho dawur mma wiadze, na ɔmaa no tumdzi dɛ ‘[o]numa wɔ Egya no, na Ɔba no dzin mu, nyia adom na nokwar ahyɛ no mã no, nye Sunsum Krɔnkrɔn no, nyia ɔgye dase wɔ Egya no nye Ɔba no hɔnho no.‘ (Moses 7:11.) Enoch dzii ahyɛmu na ɔboaboaa agyedzifo anokwafo mboanofo ano, a hɔn nyina wɔbɛyɛɛ anokwafo ara ma ‘dɛ Ewuradze bae na ɔnye no nkorɔfo bɛtsenae,’ na wofi sor hyiraa hɔn. ‘Na Ewuradze frɛɛ no nkorɔfo Zion, osiandɛ wonyaa akoma kor na adwen kor, na wɔtsenaa ase wɔ tseneneeyɛ mu; na ohianyi biara nnyi hɔn mu.Moses 7:18.) …
“Ewuradze frɛɛ no nkorɔfo Zion ekyir no, kyerɛwsɛm no se Enoch ‘kyekyeer kuropɔn na wɔfrɛɛ no Krɔnkrɔnyɛ Kuropɔn, Zion mpo;’ ‘wɔfaa [Zion] kɔr sor’ bea ‘Nyankopɔn dze no kɔtoo nankasa no bo mu;” na “ofi dɛm aber no na wɔkãa dɛ, Zion eguan.’ (Moses 7:19, 21, 69.) …
“Zion yi ara a wɔfae kɔr sor no bɛsan aba bio … ber a Ewuradze dze Zion bɛba bio, na no mu amamfo no bɛkã Jerusalem fofor no a, nna wɔakyekyer no ho.”6
Sɛ dza abɛsen no yɛ nyienyim a, ber a Agyenkwa no bɛba no, mbabaa a woesi pi wɔ hɔn ahyɛmudzi a wɔnye Nyame edzi no bɔbor hɔn a wɔayɛ ahosiesie dɛ wɔbɛma No akwaaba ber a Ɔbɛba no hɔn fã. Mbom ma hɔn dodow bɛyɛ biara no, hom ntoboa wɔ koryɛ ne nkyekyeree wɔ nkorɔfo a woesiesie hɔn ama Zion no bɔbor ɔfã koraa.
Merebɛkyerɛ hom siantsir a megye dzi dɛ dɛm na ɔbɛyɛ no. Mormon Nwoma no ma hɛn Zion nkorɔfo bi ho asɛm. Hom kaa dɛ Agyenkwa no a ɔasoɛr no Ɔkyerɛkyerɛɛ hɔn, dɔɔ hɔn na Ohyiraa hɔn wiei no dɛ “wentwiwentwi biara ammba asaase no do, osian Nyankopɔn no ho dɔ a ɔtse nkorɔfo no hɔn akoma mu no ntsi.”7
Mo sũahu akyerɛkyerɛ me dɛ Ɔsor Egya ne mbabaa wɔ akyɛdze a wotum dze brɛ wentwiwentwi adze na wɔdze hɔn Nyame ho dɔ no ma tseneneeyɛ tahye na Nyame ho dɔ a wokenyan wɔ hɔn a wosom hɔn mu no.
Me mbabun ber mu no muhun bi wɔ hɛn nkorbata ketseaba a wohyia mu wɔ me mbafober mu fie no. Nna emi na mo nuabanyin nko na yekita Aaron Asɔfodzifo, me papa nko na okita Melchizedek Asɔfodzi no. Nkorbata no Relief Society president no yɛ obi ɔasakyer a no kun mmpɛ n’Asɔr som no. Asɔrmba no nyina yɛ nkyerɛbaa mpanyimfo a wonnyi obi a okita asɔfodzi wɔ hɔn efiefi. Mohwɛɛ me maame na dɛm nkyerɛbaa no dodɔɔ hɔnho na wopegyaa na wɔhwɛɛ hɔnho nkorkor a woenngyaa. Sesei mehu dɛ wɔmaa muhun Zion ho kakra wɔ me mbafober no.
M’adzesũa fa mbaa anokwafo ho sɔɔw do wɔ Asɔr no no nkorbata kakraba bi wɔ Albuquerque, New Mexico. Mohwɛɛ nkorbata president ne yer, mansin president ne yer na Relief Society president no dɛ wɔkã obiara a ɔasakyer fofor no n’akoma hyew. Kwesida noara a mifii Albuquerque, mfe ebien ekyir a medze hwɛɛ nkyerɛbaa hɔn nhyɛdo no, wɔtseew stake a odzi kan wɔ hɔ. Sesei Ewuradze dze temple esi hɔ.
Nkyii mutui kor Boston, hɔ na mosom wɔ mansin presidency mu a yɛhwɛ nkorbata nkakraba a wɔapetse aman ebien mu no do. Hɔ no mbaa a wɔdɔ na wɔdze bɔn kyɛ boae ma wɔdwedwee akoma na wosiesie wentwiwentwi kor anaa ebien bi. Kwesida no a mifii Boston no, President a Odzi Kan na n’Apamfo mu baako bɛkyekyeer stake a odzi kan wɔ Massachusetts. Sesei temple wɔ hɔ, a ɔbɛn bea nna nkorbata president no tse no. Nna woekenyan no aba Asɛmpakã dwumadzi mu na ekyir no wɔfrɛɛ no ma ɔsoom dɛ stake president na ekyir yi dɛ asɛmpakã dwuma president ɔnam ne yer dɔfo na nokwafo ne nhyɛdo ntsi.
Nkyerɛbaa, wɔmaa hom nhyira dɛ hom bɛyɛ Nyankopɔn ne mbabaa a hom wɔ akyɛdze soronko ahorow. Hom reba ɔnnkyebo abrabɔ yi mu no, hom dze sunsum mu ahom a obotum anyɛn binom na woepegya hɔn akɔ ɔdɔ na ahotsewee su a ɔbɛma wɔafata Zion kuw mu asetsena no bae. Ɔnnyɛ mpofirmu adze dɛ Relief Society, Asɔr no no kuw a odzi kan a wɔgyee enyim ara tsewee maa Ɔsor Egya ne mbabaa no, wɔ nsabran dɛ “Ayamuyie Nntwa Abrɔdɔ.”
Ayamuyie yɛ Jesus Christ no dɔ mapã no. Na ɔyɛ gyedzi wɔ No mu na No Werdambɔ a ɔmmbɔadze da no nsunsuando emudzi mu no ɔbɛma ɔwo, na hɔn a idɔ hɔn na isom hɔn no abɛfata sunsum mu akyɛdze kɛse dɛ yɛbɛtsena Zion anohoba man a yɛahwehwɛ akyɛr no mu. Hɔ no hom bɛyɛ Zion mu nkyerɛbaa, a Ewuradze dɔ hom ankasa na hɔn a hom ehyira hɔn no.
Megye me dase dɛ hom yɛ Ewuradze n’ahenman a ɔwɔ asaase yi do amamba. Hom yɛ Ɔsor Egya dɔfo ne mbabaa a, Ɔasoma hom aba wiadze no mu a Ɔama hom akyɛdze soronko a hom bɔɔ ho anohoba dɛ hom dze bedzi dwuma ehyira nkaafo. Mobɔ hom anohoba dɛ Ewuradze bosuo hom nsamu, edua Sunsum Krɔnkrɔn no do, agye hom taataa. Obedzi hom enyim kan ber a Hom boa no ma Osiesie No nkorɔfo ma wɔbɛyɛ Zion a Ɔabɔ ho anohoba no. Megye ho dase wɔ Jesus Christ ne dzin krɔnkrɔn no mu, amen.