Ntsimii Tum
Gyedzi na Nyankopɔn n’asɛm a ɔhyɛ hɛn ɔkra no bun mu mã no nko na ɔdɔɔ sõ a ɔbɛmee hɛn—na wɔama hɛn kwan ma yeenya No tum.
Mber a morohwehwɛ hɛn nkɔnhyɛnyi dɔfo, President Russell M. Nelson, ne nkyerɛkyerɛ mu no, muhun kasafua bi ɔataa akã no wɔ kasa pii mu. Kasafua yi nye tum.
Ne wiadze mfɛndzanan ehyiadzi a odzi kan mu no a wɔmaa no tsipia dɛ Ɔsomafo ekyir no, President Nelson kãa tum ho asɛm.1 Mfe pii ekyir no ɔakɔ do akyerɛkyerɛ afa tum ho. Yɛamaa President Nelson tsipia dɛ hɛn nkɔnhyɛnyi ekyir no, ɔakyerɛkyerɛ tum fapem ho asɛm—tsitsir ara Nyankopɔn no tum—na mbrɛ hɛn nsa besi botum akã. Ɔakyerɛkyerɛ mbrɛ yebesi botum dze Nyankopɔn no tum edzi dwuma ber a yɛsom binom,2 mbrɛ nnuhu si twe Jesus Christ na No Werdambɔ no tum no ba hɛn abrabɔ mu,3 na mbrɛ asɔfodzi—Nyankopɔn no tum na tumdzi—si hyira hɔn nyinara a wɔnye No dzi na wosie ahyɛmu horow no.4 President Nelson agye dase dɛ Nyankopɔn no tum no wɔ hɔ ma hɔn nyinara a wɔayɛ endowment wɔ temple mu ber a wosie hɔn ahyɛmudzi horow no.5
Menyaa nkenyan soronko bi ber a President Nelson too hɛn tafɛrbanyinmbɔmu wɔ Ebɔbira 2020 wiadze mfɛndzanan ehyiadzi mu no. Ɔkyerɛkyerɛ hɛn dɛ “hom nsũa na hom mbɔ mpaa mfa nhu tum na nyimdzee akyɛdze a wɔdze ama hom—anaa mbrɛana wɔdze rebɛma hom no, yie.6
Tafɛrbanyinmbɔmu ne ngyedo no, mesũa na mabɔ mpaa na mesũa ndzɛmba bi a mfaso a ɔfa tum na nyimdzee a wɔdze adom me no ho—anaa ma mbrɛana wɔdze robɔdom me no.
Yɛretse ase dza otwar dɛ yɛyɛ dze nya Nyankopɔn no tum wɔ hɛn abrabɔ mu no nngow, naaso meehu dɛ mubotum ayɛ ber a yɛdwendwen ho wɔ hɛn adwen mu na yɛbɔ mpaa ma Sunsum Krɔnkrɔn no ma ebue hɛn adwen mu.7 Elder Richard G. Scott maa nkyerɛase pefee wɔ dza Nyankopɔn no tum tse ho: “ɔyɛ tum a yɛdze yɛ ma ɔkyɛn dza hɛnankasa yebotum ayɛ.’’8
Yɛdze Nyankopɔn n’asɛm na gyedzi ho fapem rehyɛ hɛn akoma na mpo hɛn kra mu mã hia tsitsir wɔ yɛrotwe Nyankopɔn no tum ma ɔaboa hɛn wɔ ɔhaw mber yinom mu. Yeennya Nyankopɔn n’asɛm na gyedzi wɔ Jesus Christ mu wɔ hɛn akoma bun mu a, ebia hɛn dasee na gyedzi bɛpa, na ebia yɛbɛyew kwan no a yɛdze kɔ tum no a Nyankopɔn pɛ dɛ Ɔdze ma hɛn no do. Enyiwado gyedzi suar. Gyedzi na Nyankopɔn n’asɛm a ɔhyɛ hɛn ɔkra no bun mu mã no nko na ɔdɔɔ sõ a ɔbɛmee hɛn—na wɔama hɛn kwan ma yeenya No tum.
Mber a nna emi na Akyerɛbaa Johnson retsetse hɛn mba no, yɛhyɛɛ hɔn mu kor biara nkuran dɛ onsũa ndwom ho edwindadze kor bi bɔ. Mbom yɛbɛma hɛn mba no kwan ma ɔayɛ ndwom adzesũa nko, sɛ wɔyɛ hɔn afamudze na wosũa hɔn edwindadze no bɔ da biara a. Memenda bi, hɛn babaa Jalynn n’enyi gyee dɛ ɔnye anyɛnkofo bɔkɔ ekedzi agor, mbom nna onnyae nnyɛɛ ne sankubɔ adzesũa no. Onyim dɛ oesi no pi dɛ obosũa bɔ sima 30 no, ɔyɛɛ adwen dɛ obekyim akyerɛmber no, osiandɛ nna ɔmmpɛ dɛ obosũa bɔ ma abor do sima kor mpo.
Ber a nna ɔresen microwave fononoo no ho akɔ sanku ho no, ogyinae na opiapia bɔtom ahorow mu binom. Nkyɛ ɔwɔ dɛ okyim akyerɛmber no, okyiim microwave no dɛ ɔnoa edziban sima 30 na opia dɛ ɔnhyɛ ase. Osũaa bɔ sima 20 ekyir no, ɔsanee kɔr gyaadze dɛ ɔrokɔhwɛ dɛ mber dodow ahen na ɔaka na ohun dɛ ogya atɔ microwave no mu.
Ɔdze ntsẽatsẽamu dɛ fie no rehyew tuu mbirika kɔr mfikyir hɔ bea a nna mereyɛ edwuma wɔ no. Mutuu mbirika ntsɛmara kɔr fie, na nokwar, muhun dɛ microwave fononoo no redzɛw.
Mo mbɔdzembɔ mu dɛ hɛn fie nnkɛhyew no, misii microwave no n’ekyir, tuu plug no fii mu, na medze enyinam ahoma no maa microwave a nna ɔredzɛw no fii pon no do. Mepɛ dɛ meyɛ okunyin na memmpɛ dɛ esian besi hɛn fie no, motoow microwave a ɔrehyew no wɔ kɔntɔnkrɔn mu a medze enyinam ahoma no amma ɔannka mo honandua, sanee kɔr mfikyir hɔ, na motoow microwave no kɔtoo efuw no do. Hɔ no yetumii dze drubɛn a nsu wɔ mu duum ogya framee no.
Ebɛnadze na ɔannkɔ yie? Microwave fononoo hia biribi ma ɔatwe n’ahom no, na sɛ biribiara nnhyɛ mu a ɔbɔtwe ahom no a, fononoo nankasa fa ahom no, ɔdɔ hyeehyeehyeew, na obotum apa gya, a ɔsɛe noho wɔ ogya framee ma ɔatɔ nsõ.9 Hɛn microwave no nyina framee na ɔhyewee osiandɛ nna biribiara nnhyɛ mu.
Dɛmara no, hɔn a wɔwɔ gyedzi na Nyankopɔn n’asɛm wɔ hɔn akoma no bun mu no botum agye na woedzi egyen menaba a ogya wɔ ano a abɔnsam bɔsoma ampara dze abɛsɛɛ hɛn no do konyim.10 Annyɛ dɛm a, hɛn gyedzi, enyidado, na pisi nnkotum etsim, na tse dɛ microwave a nna hwee nnyi mu no, yebotum epira ara yie.
Mesũa dɛ mowɔ Nyankopɔn n’asɛm wɔ me kra no bun mu no, a gyedzi wɔ Ewuradze Jesus Christ na No Werdambɔ mu kã ho no, ma mo kwan ma motwe Nyankopɔn no tum no dze dzi abɔnsam na adze biara a ɔbɔtow abɔ me do konyim. Ber a yehyia ɔhaw horow no, yebotum adan Ewuradze n’anohoba a Paul kyerɛkyerɛɛ no dɛ: “Na Nyankopɔn amma hɛn suro sunsum, na mbom ahoɔdzen, nye dɔ na adwenmutsew dze a.”11
Yenyim dɛ Agyenkwa yɛ abofra no “onyinii, na ɔhyɛɛ dzen, na nyansa, hyɛɛ no mã: na nna Nyankopɔn adom wɔ no do.’’12 Yenyim dɛ ber a nna Orinyin no, “Jesus kɔr kan wɔ nyansa nye tsipɛn mu, na Nyankopɔn nye nyimpa hɔ enyimpa mu.’’13 Na yenyim dɛ ber a No somdwuma hyɛɛ ase no, Hɔn a wɔtsee Ne “nkyerɛkyerɛ [ɔ]yɛɛ hɔn ahobow: osiandɛ n’asɛm dze tum nam.’’14
Ɔnam ahoboaboa do no, Agyenkwa no nyinii wɔ tum mu na Otumii siwii Satan no nsɔhwɛ nyina ho kwan.15 Ber a yedzi Agyenkwa no fasusu do na yedua Nyankopɔn n’asɛm ne nsuae na yɛrehyɛ hɛn gyedzi dzen do dze yɛ ahoboa no, hɛn so yebotum atwe Nyankopɔn no tum dze esiw nsɔhwɛ kwan.
Mber yi a woesiw mboano ho kwan no ma daa daa temple nkɔree mmba do no, nokwar ara misi no pi dɛ mobɔkɔ do esũa adze na meesũa Nyankopɔn no tum ho asɛm beberee a ɔba hɛn hɔ no ber a yedzi na yesie temple ahyɛmu horow no. Dɛ anohoba a wɔbɔe wɔ Kirtland Temple ne tu hyɛ Nyame nsa mpaabɔ mu no, yefi temple mu puei a Nyame no tum no ayɛ hɛn akontar.16 Nyankopɔn no tum a wɔdze ma hɔn a wodzi na wosie temple ahyɛmu horow do no, ne nda mmpa ho anaadɛ akwansidze biara nnda do dɛ nnkenya ho kwan wɔ nsan yarba ber mu. No tum no no do tsew wɔ hɛn abrabɔ mu nko sɛ yɛpow dɛ yebesie hɛn ahyɛmudzi horow no na yɛammbɔ bra wɔ kwan a ɔbɛma yɛakɔ do afata dɛ yebenya No tum no a.
Mber a nna emi na me yer dɔfo rosom dɛ asɛmpakã dwuma baanodzifo wɔ Thailand, Laos, na Myanmar no, yehun Nyankopɔn no tum a ofi hɔn a wodzi na wosie ahyɛmu krɔnkrɔn horow wɔ temple no. Temple Ayɛdzegyefo Mboa Fotow no maa Ahotseweefo pii wɔ aman ebiasa yinom mu no kɔr temple ber a wodua hɔnankasa hɔn afɔrbɔ na ahoboaboa do yɛɛ dza wobotum ayɛ nyina ekyir no. Mekaa dɛ mehyia Ahotseweefo nokwafo 20 kuw a wofi Laos wɔ wimuhɛn gyinabea wɔ Bangkok, Thailand, a moroboa hɔn ma wɔakɔ wimuhɛn gyinabea fofor wɔ Bangkok akɔfow wimuhɛn dze akɔ Hong Kong. Nna enyigye ahyɛ asɔrmba yinom mã dɛ ewiei no worutu kwan dze akɔ Ewuradze ne fie.
Ber a Ahotseweefo pa yinom sanee ma yehyiaa hɔn no, nna hɔn ntsease wɔ asɛmpa mu na tum a ɔbata ho dze kã ho no a, ofi hɔn temple endowment a wonyae na ahyɛmudzi a wɔnye Nyankopɔn dzii no, nna no nsusuando no da edzi. Ɔyɛ pefee dɛ Ahotseweefo yinom puei fi temple mu a “[No] tum ahyɛ hɔn akontar.’’17 Tum yi a wɔdze bɛyɛ ma ɔakyɛn dza hɔnakasa botum ayɛ no maa hɔn ahoɔdzen ma wɔdze sɔɔw Asɔr n’asɔrbayɛ ho ɔhaw wɔ hɔn kurow mu na wɔkɔr kan a wɔgyee “enyigye na enyimnyam nsɛmpa ho dase kɛsenara, wɔ nokwar mu,’’18 ber a wɔkyekyer Ewuradze n’ahenman wɔ Laos.
Mber a yenntumii nnkɔr temple no, ana hɛn mu kor biara adan ahyɛmu horow a yedzii no wɔ temple no do dze abɔ kwan pɔkyee a ɔnnsesã wɔ hɛn abrabɔ mu a? Sɛ yesie ahyɛmudzi horow yinom a, wɔma hɛn enyido-adzehu na enyidoadze a ɔfa ndaamba ho na enyimpi si pefee a yɛfata dɛ ɔnam hɛn nokwardzi do yebenya dza Ewuradze dze abɔ anohoba no.
Moto nsa frɛ hom dɛ wɔnhwehwɛ tum no a Ewuradze pɛ dɛ ɔdze ma hom no. Megye dase dɛ ber a yɛhwehwɛ tum yi no, wɔdze ɔdɔ ho ntseasee kɛsenara a hɛn Ɔsor Egya wɔ ma hɛn no behyira hɛn.
Megye dase dɛ osiandɛ Ɔsor Egya dɔ emi na ɔwo ntsi, Ɔsomaa No Dɔba, Jesus Christ, dɛ ɔmbɛyɛ hɛn Agyenkwa na Pomfo. Megye dase wɔ Jesus Christ ho, Ɔno a ɔwɔ tum nyina,19 na megye wɔ Jesus Christ ne dzin mu, amen.