Ma Abotar Nyɛ N’Edwuma Pɛr Yɛ, na Bu Ne Nyina Dɛwdzi!
Sɛ yesie abotar a, hɛn gyedzi tu mpon. Sɛ hɛn gyedzi tu mpon a, dɛmara so na hɛn dɛwdzi yɛ.
Mfe ebien a abɛsen kɔ no, mo nuabanyin kumabaa, Chad wui. Ofii asaase do kɔr ntwamutam ekyir no. gyaa kwan wɔ ne yer, Stephanie; hɔn mba nkakramba beenu, Brayden na Bella hɔn akoma mu; na dɛmara wɔ ebusua nkaa no nyina mu. Yenyaa awerɛkyekye wɔ Elder Neil L. Andersen ne nsɛm wɔ wiadze mfɛndzanan ehyiadzi ase dapɛn ansaana Chad bowu dɛ: “Asaase nsɔhwɛ gyinabew bi mu no, abotar mu ara kɔ kan, na Agyenkwa n’ayarsa tum no dze kandzea, ntseasee, asomdwee, na enyidado bɛbrɛ wo’’ (“Wounded,,’’ Liahona, Ɔberɛfɛw 2018, 85).
Yɛwɔ gyedzi wɔ Jesus Christ mu; yenyim dɛ yɛbɛka Chad ho bio, naaso yennkohu no honandua mu no yɛ yaw! Pii na hɔn adɔfo ewuwu. Ɔyɛ dzen dɛ ebenya abotar na atweɔn mber no a yɛbɛsan akɛka hɔnho. no
Owui n’afehyia no,. yɛtsee nkã dɛ ɔyɛ dɛ fua kebii bi hyɛɛ hɛn do. Yɛhwehwɛɛ guandɔbea wɔ hɛn kyerɛwsɛm nsũae mu, yɛdze hyewbɔ bɔ mpaa, na yɛkɔr temple ntaataado. Asɔr ndwom yi ne kyerɛpɛn no tɔɔ hɛn nkã-tse do mber no: “Ahanamakye rehyɛ ase, wiadze no rosoɛr, Anafua no fua kebii no repa’’ (“The Day Dawn Is Breaking,” Asɔr ndwom, nkanee. 52).
Hɛn ebusua nyaa enyimpi dɛ 2020 bɛyɛ ahomkã afe! Nna yerusũa hɛn Come, Follow Me adzesũa wɔ Ahyɛmu Fofor James nwoma no mu dze rokɔ Ɔberɛfɛw 2019 n’ewiei no ber a ngyinado bi daa noho edzi kyerɛɛ hɛn. James, tsir 1, nyiyimu 2, kenkan dɛ “Mo nuanom, hom mbu no dɛw koraa sɛ hom kɔ abɛbrɛsɛ pii mu a’’ (Joseph Smith Nkyerɛasee, James 1:2 [wɔ James 1:2, ase nsɛnsin a]). Hɛn apɛdze dɛ yɛdze dɛw bɛhyɛ afe fofor ase, mfe du fofor no, yɛyɛɛ adwen dɛ 2020 mu no “yebobu no dɛw koraa.’’ Yɛtsee ho nkã dzendzenndzen ma Borɔnya a abasen no yɛkyɛɛ hɛn nuanom T-hyɛɛt a wɔakyerɛw mu akɛse, “Hom Mbu No Dɛwdzi Koraa.’’ Nokwar ara afe 2020 bɛyɛ dɛw na ehurusi afe.
Oye, yɛwɔ ha—mbom 2020 dze wiadze nyina nsan yarba COVID-19, aman basabasyɛ, odomankoma esian ahorow bebree, na sikasɛm ho ɔhaw bae. Hɛn Ɔsor Egya ma hɛn mber ma yɛdwendwen na yɛhwɛ hɛn ntseasee wɔ abotar na hɛn enyi da hɔ wɔ adwenpɔw ho dɛ yɛbɛsan mu eyi dɛwdzi.
James nwoma no ama yeenya nkyerɛase fofor. James, tsir 1, nyiyimu 3 na 4 kɔdo dɛ:
“Na hom nhu dɛ hom gyedzi ho nsɔhwɛ no yɛ abotar ho edwuma.
“Na hom mma abotar nwie n’edwuma yɛ pɛ, na hom eedzi mu pirim a ɔnnka hom hwee ara.”
Hɛn mbɔdzembɔ dɛ yebenya dɛwdzi wɔ hɛn nsɔhwɛ horow mu no, hɛn werɛ efir dɛ yerenya abotar nye adze tsitsir a ɔbɛma nsɔhwɛ horow no ayɛ mfaso.
Ɔhen Benjamin kyerɛkyerɛɛ dɛ hɛn dɛ yɛmpɔr honammunyi no ngu na “[yen]dua Ewuradze Christ no werdambɔ no do [m]bɛyɛ ɔhotsewnyi na tse dɛ abofra, gyaa woho ma, ɔdwe, ahobrɛadze, abotar, ɔdɔ hyɛ wo mã, nya pɛ dɛ ebɔsɔw biribiara’’ (Mosiah 3:19).
Preach My Gospel ne tsir 6 kyerɛkyerɛ Christ no su horow tsitsir a yebotum esua: “nye ahom a ibotum dze asɔw tweɔn, ɔhaw, ɔkõtsia, anaa amandzehu a nnkenya ebufuw, abagura, anaa dadwen. Ɔyɛ ahoɔdzen dɛ ebɛyɛ Nyankopɔn ne pɛ na agye Ne mber ato mu. Sɛ ewɔ abotar a, igyina dzen na itum sɔw abɛbrɛsɛ botoowyɛ na enyidado mu ara’’ (Preach My Gospel: A Guide to Missionary Service, rev. ed. [2019], 126).
Wɔdze abotar n’edumayɛ pɛr so botum akyerɛkyerɛ wɔ Christ n’edzikamfo esuafo no kor, Simon Canaanyi no n’abrabɔ mu. Nna Zealotfo no yɛ Jewfo amamfo kuw a nna wɔkõ tsĩa Roman mbra. Zealot kuw no kamfoo basabasayɛ dze tsĩaa Romefo, hɔn Jewfo mfɛfo, na Sadduceefo ber a wɔtoa hɔn gyee hɔn edziban na wodzi ndwuma horow ekyir dze nya hɔn botae (hwɛ Encyclopedia Britannica, “Zealot,” britannica.com). Nna Simon Canaanyi no yɛ Zealotnyi (hwɛ Luke 6:15). Susu Simon ho a ɔrobɔ mbɔdzen adɛfɛwdɛfɛ Agyenkwa no dɛ ɔmfa akõdze, ndzi nsordaafo kuw bi enyim, anaa ɔma basabasayɛ mbra Jerusalem. Jesus kyerɛkyerɛɛ dɛ:
“Na nhyira akã hɔn a wɔdwe, na hɔn na wobenya asaase no edzi. …
“Na nhyira akã mbɔbɔrhufo, na hɔn na wobohu hɔn mbɔbɔr. …
“Na nhyira akã esiesiefo, na hɔn na wɔbɛfrɛ hɔn Nyankopɔn mba’’(Matthew 5:5, 7, 9).
Ebia nkyɛ Simom dze enyigye na ahokekã bɛgye ne nkyerɛkyerɛ no ato mu na ɔakamfo, naaso kyerɛwsɛm no kyerɛɛ dɛ ɔnam Agyenkwa ne nhyɛdo na fasusu do no, no botae sesãe. Ne Christ osuanyiyɛ no bɛyɛɛ n’abrabɔ mbɔdzembɔ botae tsitsir.
Ber a yɛnye Nyankopɔn, dzi na yesie ahyɛmu horow no, Agyenkwa no botum aboa hɛn ma “ɔawo hɛn bio; nyew, Nyame awo [hɛn], wɔasakyer [hɛn] efi [hɛn] honam su nye asehwe tsebew mu, dze [hɛn] akɔ tsenenee mu ama Nyame aapon [hɛn] ma [yɛaabɛyɛ] ne mbabanyin na ne mbabaa’’ (Mosiah 27:25).
Hɛn nda mu afɛwdzi, nyamesom, na amanyɛ mbɔdzenbɔ kuw nyina mu no, hom mma Jesus Christ ho osuanyi nyɛ hɛn pisi koryɛ a ɔyɛ dzen dodow. “Na mbrɛ w’akoradze wɔ no, hɔ na w’akoma so wɔ’’ (Matthew 6:21). Ma hom mma hɛn werɛ mmfir so dɛ, osuanyi nokwafo “ayɛ Nyankopɔn ne pɛ,’’ ewie mpo no, “[ohia] abotar’’ (Hebrewfo 10:36).
Dɛmara dɛ yenhu dɛ hɛn gyedzi no nsɔhwɛ yɛ abotar ho edwuma wɔ hɛn mu no, sɛ yɛdze abotar dzi dwuma a, hɛn gyedzi nyin. Sɛ hɛn gyedzi nyin a, dɛmara so na hɛn dɛwdzi yɛ.
Ebɔw yi a abasen no, hɛn babasia a otsĩa ebien, Emma, tse dɛ asɛmpasomafo dodow wɔ Asɔr mu no, kɔɔr nhyɛ ankonamyɛ mu. Asɛmpasomafo dodow baa fie. Asɛmpasomafo dodow tweɔɔn edwumayɛ fofor. Dodowara ennya hɔn temple nhyira horow ansaana wɔrokɔ edwuma mbew do. Elderfo na nkyerɛbaa, yɛda hom ase. Yɛdɔ hom.
Emma na n’adamfo wɔ Netherlands no nyaa abagura wɔ adapɛn pii a odzi kan no mu—agyinabew pii mu no wokyii nyinsuwa. Nna wonya mber tseabaa a wɔnye nyimpa bi nya nkitahodzi na abowano a wommpue pii no, Emma n’ahodan wɔ Nyankopɔn do no nyinii. Yɛnye no bɔ mpaa wɔ abaɛfo online do na yebisaa mbrɛ yebesi botum aboa. Ɔserɛɛ hɛn dɛ yɛnye anyɛnkofo a ɔrekyerɛ hɔn adze no nya nkitahodzi wɔ abaɛfo online!
Hɛn ebusua nye Emma n’anyɛnkofo a wɔwɔ Netherlands no hyɛɛ ase nyaa abaɛfo online nkitahodzi nkorkor. Yɛtoo nsa frɛɛ hɔn ma wɔbɛka hɛn adapɛn dapɛn, online, ebusua-tɛtɛr Come, Follow Me.” nsũae no. Floor, Laura, Renske, Freek, Benjamin, Stal, na Muhammad nyina abɛyɛ hɛn anyɛnkofo. Hɛn anyɛnkofo bi fi Netherlands ahɛn “abow tseaba no mu’’ (3 Nephi 14:13). Wɔrekyerɛ binom so “mbrɛ kwan tsenenee no tse, na mbrɛ abow tseatseaba no tse, ɔno mu na ɔwɔ dɛ wɔhɛn’’ (2 Nephi 31:9). Wɔyɛ nuambanyin na nkyerɛbaa wɔ Christ mu. . Dapɛn biara no “yebu no dɛw koraa’’ ber a yɛbɔmu yɛ edwuma wɔ hɛn kankɔ wɔ ahyɛmudzi ananmɔn kwan no do.
“Hom mma abotar nwie n’edwuma yɛ pɛ’’ (James 1:4) wɔ hɛn ahom mu dɛ yehyia nyimpa dɛ ward ebusua ebusua mber a wɔnnhyɛ mu. Mbom yebu no dɛ dɛwdzi ber a ɔnam abaɛfo nkitahodzi horow fofor na Come, Follow Me Mormon Nwoma no nsũae do no , hɛn ebusua ebusua hɔn gyedzi rinyin.
President Russell M. Nelson bɔɔ anohoba dɛ, “Hom daa daa mbɔdzembɔ wɔ iyi mu no—mber mpo a hom nnya konyimdzi tsitsir biara ho atsenkã no—bɛsesã hom abrabɔ, hom ebusua dze, na wiadze no’’ (“Go Forward in Faith,” Liahona, May 2020, 114).
Bea yɛnye Nyankopɔn yɛ ahyɛmudzi krɔnkrɔn horow no—wɔatow—temple no mu. Bea yedzi Nyankopɔn n’ahyɛmudzi krɔnkrɔn horow do no—fie no—woebue. Yɛwɔ akwanya wɔ fie dɛ yesũa na yɛdwendwen temple ahyɛmudzi horow ne fɛw soronko no ho. Mpo a yennkotum ahɛn dan krɔnkrɔn no mu no, hɛn “akoma … bedzi dɛw kɛse wɔ nhyira a wobohue egu mo nkorɔfo hɔn tsir do no’’ (Nkyerɛkyerɛ na Ahyɛmudzi 110:9).
Pii hɔn edwuma efi hɔn nsa; binom so akwanya horow efi hɔn nsa. Naaso, yedzi dɛw a yɛnye President Nelson, a ndaansa yi ɔkãa dɛ: “Akɔnkye afɔrbɔ a hɛn asɔrmba dze ma kwa no akɔ sor ankasa, dɛmara dɛ ntoboa a wɔdze ma kwa ma hɛn nyimpa ho mboa fotow no. … Yɛbɔmu a yebedzi mber dzendzen yi do konyim. Ewuradze behyira hom ber a hom kɔdo hyira binom’’ (Russell M. Nelson’s Facebook page, post from Dzifuu 16, 2020, facebook.com/russell.m.nelson).
“Hom nhyɛ dzen’’ yɛ mbrasɛm fi Ewuradze hɔ, nnyɛ hom nsuro (Matthew 14:27).
Ɔtɔfabi a yennsie abotar ber a yɛdwen dɛ “yɛreyɛ biribiara yie’’ na yɛda ho nnya nhyira horow a yɛpɛ no. Enoch nye Nyankopɔn nantsewee mfe 365 ansaana ɔnye no nkorɔfo ennhu owu. Mfe ahaebiasa eduosia-enum a wɔreper ayɛ biribiara yie, na nkyii osii! (Hwɛ Nkyerɛkyerɛ na Ahyɛmudzi 107:49.)
Mo nuabanyin Chad no wu no bae abosoom wɔ hɛn nsoɛii ekyir nna yɛhwɛ Utah Ogden Mission do. Nna ɔyɛ anwanwadze dɛ ber a nna yɛtse Southern California, 417 asɛmpakã mbew nyina no a nkyɛ wobotum nye hɛn akɔ no wɔ afe 2015 mu no, wɔdze hɛn kɔr Utah etsifi afamu. Nna mission home kaar mu tsena no dzi sima 30 dze kodur Chad ne fie. Wohun Chad no kokoram yarba no mber a yenyaa hɛn asɛmpakã dwumadzi no. Mpo wɔ gyinabew dzendzen mu no, nna yenyim dɛ hɛn Ɔsor Egya dwen hɛnho na ɔroboa hɛn ma yeenya dɛwdzi.
Megye dase wɔ Agyenkwa Jesus Christ no ɔpon, ahotsew, ahobrɛadze, na dɛwdzi tum no ho. Megye dase dɛ sɛ yɛbɔ mpaa ma hɛn Ɔsor Egya wɔ Jesus ne dzin mu a, Obeyi hɛn ano. Megye dase dɛ ber a yɛtse, yebetsie, na yɛyɛ aso ama Ewuradze na No nkɔnhyɛnyi tseasefo, President Russell M. Nelson hɔn ndze no, yebotum “ama abotar ayɛ n’edwuma pɛr yɛ’’ na “yebu ne nyina dɛwdzi.’’ Jesus Christ ne dzin mu, amen.