Hom mma Nyankopɔn Ndzi Nyim
Ana ipɛ dɛ ema Nyankopɔn dzi nyim wɔ w’abrabɔ mu? Ana ipɛ dɛ ema Nyankopɔn yɛ nhyɛdo tum abɔso wɔ w’abrabɔ mu?
Mo nuanom na me nkyerɛbaa adɔfo, nsɛm nwanwa a wɔakã no ehyiadzi yi ase na kwan a wɔayɛ medze dɛ menye hom nkasa no ayɛ me enyigye dodow.
Bɔbor mfe 36 a mayɛ Ɔsomafo no, Israel mboano ho nkyerɛkyerɛ no akye m’adwen papaapa.1 Biribiara a ɔfa ho no ayɛ me ahobow, a somdwuma horow na edzin kã ho2 ɔyɛ Abraham, Isaac, na Jacob; hɔn abrabɔ na hɔn nyernom; ahyɛmu a Nyankopɔn nye hɔn dzii na ɔtsenee dua hɔn ebusua mu;3 ebusuakuw duebien a wɔbɔɔ apetse; nye nkɔnhyɛ ahorow a ɔfa mboano no ho wɔ hɛn nda yi mu.
Mesũa afa mboano no ho, abɔ ho mpaa, na mamee wɔ kyerɛwsɛm biara a ɔfa ho, na mebisa Ewuradze dɛ ɔnto me ntseasee mu.
Ntsi hom nsusu m’enyigye ber a wogyaa me kɔr nhumu fofor bi ndaansa yi. Minyaa Hebrewfo abemfo beenu bi hɔn mboa no, musũaa dɛ asɛmfua Israel ne nkyerɛasee kor wɔ Hebrew kasa mu nye “hom mma Nyankopɔn ndzi nyim.”4 Ntsi dzin Israel ankasa no kyerɛ obi a woenya ɔpɛ dɛ ɔbɛma Nyankopɔn edzi nyim wɔ n’abrabɔ mu. Nsusui no gyegye me kra mu!
Asɛmfua ɔpɛ hia tsitsir wɔ Israel ne nkyerɛasee mu.5 Hɛn nyina yɛwɔ hɛn pɛ. Yebotum asan mu eyi dɛ yɛbɛyɛ Israel, anaa yɛrennyɛ. Yebotum asan mu eyi dɛ yɛbɛma Nyankopɔn bedzi nyim wɔ hɛn abrabɔ mu, anaa yɛnnkɛyɛ. Yebotum asan mu eyi dɛ Nyankopɔn benya nhyɛdo tum abɔso wɔ hɛn abrabɔ mu, anaa yɛnnkɛyɛ.
Yɛnkaa mber kumabaa, nsakyeree mber tsitsir wɔ Jacob, Abraham ne nanabanyimba, n’abrabɔ mu. Bea a Jacob frɛɛ no Peniel (a ɔkyerɛ “Nyame n’enyim no”),6 Jacob nye taferbanyin-mbɔmu kɛse bi dzii aper. Wɔsɔɔ ne pɛ hwɛe. Ɔnam aperdzi yi mu, Jacob kyerɛɛ dza ohia no kɛse. Ɔkyerɛɛ dɛ ɔpɛ dɛ Nyankopɔn dzi nyim wɔ n’abrabɔ mu. Mbuae no, Nyankopɔn sesãa Jacob ne dzin yɛɛ no Israel,7 ɔkyerɛ “hom mma Nyankopɔn ndzi nyim.” Nkyii Nyankopɔn bɔɔ Israel anohoba dɛ nhyira nyina a wɔakã egu Abraham ne tsir do no bɛyɛ nedze.8
Awerɛhow mu ara, Israel asefo no buu Nyame n’ahyɛmu no do. Wosiiw nkɔnhyɛfo no abo na wɔammpɛ dɛ wɔbɛma Nyankopɔn edzi nyim wɔ hɔn abrabɔ mu. Dɛm no ntsi, Nyame bɔɔ hɔn apetse kɔr wiadze mfɛndzanan nyina.9 Ehumbɔbɔr mu ara, ekyir no Ɔbɔɔ anohoba dɛ Ɔbɔboa hɔn ano, dɛ mbrɛ Isaiah kãe no: “Mber tsia kakrabaa bi na madan wo egya, na mbom ehumbɔbɔr kɛse na medze bɔboa w’ano.”10
Hebrewfo kasa nkyerɛase wɔ Israel ho da hɛn adwen do no, yehu dɛ Israel mboano no nya nkyerɛasee bi kã ho. Ewuradze roboa hɔn a wɔpɛ dɛ Nyankopɔn dzi nyim wɔ hɔn abrabɔ mu no ano. Ewuradze roboa hɔn a wɔbɛsan mu eyi dɛ Nyankopɔn benya nhyɛdo tum abɔso wɔ hɔn abrabɔ mu.
Mfe ɔha ɔha abɛsen no, nkɔnhyɛfo akasa afa mboano yi ho,11 na ɔrokɔ do sesei! Dɛ ɔyɛ dza ohia kɛse ansaana Ewuradze ne Mbae a Otsĩa asõ no, ɔyɛ edwuma a ho hia tsitsir wɔ wiadze yi mu!
Mboano yi ɔkɔ do ansaana mfe apem no asõ no, ɔyɛ ankorankor a ne gyedzi retra na ɔpepe a worenya sunsum mu akokodur. Na dɛ yɛyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo asɔrmba yi, anaa “nda a odzi ekyir Israel ahyɛmufo,”12 wɔama hɛn asɛdze dɛ yɛmboa Ewuradze wɔ dɛm edwuma a ohia papaapa yi ho.13
Sɛ yɛkasa fa yɛroboaboa Israel ano wɔ ntwamutam n’afã ebien nyina ho a, nyew yɛkyerɛ, asɛmpasomafo edwuma, temple, na ebusua abakɔsɛm edwuma. Yɛrekyerɛ yerotow gyedzi na dasegye wɔ hɔn a yɛnye hɔn tse, yɛ edwuma, na yɛsom hɔn no hɔn akoma mu. Ber biara a yɛbɛyɛ biribiara aboa obiara no—wɔ ntwamutam n’afã biara no—ma woedzi na woesie hɔn ahyɛmu a wɔnye Nyankopɔn dzi no, nna yɛroboa ma wɔaboa Israel ano.
Ɔnnkyerɛɛ pii a nna me nanabanyin kor ne yer reper wɔ sunsum mu. Mebɛfrɛ no “Jill.” Akɔnkye , mpaabɔ na asɔfodzi nhyira ekyir no, nna Jill ne papa ruwu. Suro kyekyeer no dɛ ɔbɛyew n’egya na ne dasegye nyina.
Ewimbir koraa kor bi no, me yer, Akyerɛbaa Wendy Nelson, kãa Jill ne gyinabew no kyerɛɛ me. N’adzekyee no Wendy nyaa nkenyan dɛ ɔnye Jill bɛkyɛ mo mbuae wɔ no sunsum mu aperdzi no ho yɛ asɛmfua kor wɔ Borɔfo kasa mu! Asɛmfua no nye myopic.
Ekyir no Jill gyee too mu kyerɛɛ Wendy dɛ ahyɛse no mo mbuae no bubuu no koraa. Ɔkãa dɛ, “Nna mowɔ enyidado dɛ Grand Pa bɛma me awanwadze ho bɔhyɛ ama me papa. Mokɔr do dwendween dɛ dɛn ntsi na asɛmfua myopic nko na ɔyɛ dza ɔtsee dɛ ɔwɔ dɛ ɔkã.”
Jill n’egya twaa mu kɔree ekyir no, asɛmfua myopic no kɔr do baa n’adwen mu. Obuei n’akoma mu ma ɔbɛtsee ase kɔr bun mu mpo dɛ myopic kyerɛ “onnhu adze nnkɔ ekyir.” Na n’adwendwen hyɛɛ ase dɛ ɔredan. Nkyii Jill kãa dɛ, “Myopic ama megyina, madwen, na menya ayarsã. Afei asɛm no dze asomdwee hyɛɛ me mã. Ɔkaa me dɛ mentra m’adzehwɛ nkɔ ekyir na monhwehwɛ onnyiewiei no. Ɔkaa me dɛ nhyehyɛɛ krɔnkrɔn wɔ hɔ na dɛ me papa da ho tse ase na ɔdɔ me na ɔhwɛ me kwan. Myopic egya me aba Nyankopɔn nkyɛn.”
Motuw moho wɔ hɛn asew nanabasia no ho. Akoma yaw kɛse ber wɔ n’abrabɔ mu yi, Jill dɔfo rusũa mbrɛ ɔbɛgye Nyame ne pɛ ma ne papa ato mu, na oenya onnyiewiei nhumu ama nankasa n’abrabɔ. Osiandɛ ɔsaan mu yii dɛ ɔbɛma Nyankopɔn edzi nyim no, orinya asomdwee.
Sɛ yɛbɛma ho kwan a, nkyɛ akwan pii wɔ hɔ a Israel ne nkyerɛasee wɔ Hebrew mu botum aboa hɛn. Susu mbrɛ hɛn mpaabɔ ma asɛmpasomafo no—na hɛnankasa hɛn mbɔdzembɔ dɛ yɛbɔboa Israel ano—botum asesã a yɛdze adwenkyerɛ yi ato hɛn adwen do. Yɛtɔ dɛ hɛn na asɛmpasomafo yɛbɔ mpaa dɛ wobegya hɛn akɔ hɔn a wɔayɛ ahosie dɛ wɔbɛgye Jesus Christ asɛmpa nsan-ananmu no ato mu no. Modwen ho dɛ, woananom na wobegya hɛn akɔ sɛ yɛtotɔ serɛ dɛ yebohu hɔn a wɔpɛ dɛ Nyankopɔn dzi nyim wɔ hɔn abrabɔ mu?
Bia wobegya hɛn akɔ obi a ɔnngyee Nyankopɔn anaa Jesus Christ nndzii da mbom sesei ɔrohwehwɛ dzendzen dɛ obosũa afa Hɔn ho na Hɔn enyigye ho nhyehyɛɛ no. Binom wɔ hɔ a “wɔwoo hɔn wɔ ahyɛmu mu”14 eso wɔatɔ gon efi ahyɛmu anamɔn kwan no do. Bia sesei wɔayɛ krado dɛ wobonu hɔnho na wɔasan aba, na wɔama Nyame edzi nyim. Yebotum ebue hɛn abasa na hɛn akoma mu ayɛ hɔn akwaabadze dze aboa hɔn. Na binom a bia wobegya hɛn akɔ no enya atsenkã daa dɛ biribi ayew wɔ hɔn abrabɔ mu. Hɔn so wɔrohwehwɛ emuyɛ na enyigye a ɔba hɔn a wɔayɛ krado dɛ wɔbɛma Nyankopɔn edzi nyim wɔ hɔn abrabɔ mu no.
Asɛmpa asawu no a wɔdze bɔboa Israel ano no tra. Kwan wɔ mu ma obiara a obofua Jesus Christ asɛmpa no emudzi mu. Kor biara a wɔasakyer no bɛkã Nyankopɔn n’ahyɛmu mba no ho,15 sɛ ɔnam abawoo anaa wɔatsew no abanyɛn. Kor biara bɛyɛ adzedzifo mãhyɛ mu wɔ dza Nyame dze abɔ anohoba ama Israelmba anokwafo nyina!16
Hɛn mu kor biara wɔ nkrabea krɔnkrɔn osiandɛ kor biara yɛ Nyame ne ba. Kor biara yɛ pɛr wɔ N’enyiwa do. Nokwar yi no nsunsuando yɛ nwanwa dodow. Enuanom na nkyerɛbaa, meserɛ hom ntsie dza merebɛkã yi ahwɛyie mu ara. Nyankopɔn nndɔ ebusuakuw kor nnkyɛn kor. Ne nkyerɛkyerɛ wɔ asɛm yi ho yɛ pefee. Ɔto nsa frɛ obiara dɛ ɔmbra Ne nkyɛn, “bibinyi na borɔnyi, akowa na fahodzinyi, ɔbarimba na ɔbaa.”17
Misi hom tadua dɛ hom gyinabew wɔ Nyame enyim no nnyɛ hom wer enyi na ɔkyerɛ. Ewɔ enyimpa anaa nnyi enyimpa wɔ Nyame enyim no gyina wo som pa ma Nyame na Ne mbrasɛm do, na nnyɛ wo honam enyi bi.
Midzi awerɛhow dɛ hɛn enuanom na nkyerɛbaa Ebibifo a wɔwɔ wiadze nyina mu rosɔw enyimtsiabu na nyiyimu. Ndɛ mefrɛ hɛn asɔrmba a wɔwɔ beebiara dɛ hom ndzi kan ngyaa su na ndzeyɛɛ a ɔyɛ nyiyimu no. Mototɔserɛ hom dɛ hom mfa obu mma Nyankopɔn ne mba nyina.
Asɛmbisa a ɔwɔ hɔ ma hɛn mu biara a ebusuakuw mmfa ho no, yɛ pɛr. Ana ipɛ dɛ ema Nyankopɔn dzi nyim wɔ w’abrabɔ mu? Ana ipɛ dɛ ema Nyankopɔn yɛ nhyɛdo tum abɔsõ wɔ w’abrabɔ mu? Ipɛ dɛ ema Ne nsɛm, Ne mbrasɛm, na N’ahyɛmu nya nhyɛdo wɔ wo do da biara? Ipɛ dɛ ema Ne ndze kwan ma ɔbɔ biribiara do? Ana ipɛ dɛ biribiara Ohia ɔwo ma ayɛ no bor ɔahwehwɛ dze biara a? Ana ipɛ dɛ ima wo pɛ kɛhyɛ Ne dze mu?18
Susu mbrɛ ɔpɛ a ɔtse dɛm botum ehyira wo. Sɛ nnwaree na erohwehwɛ onnyiewiei adamfo a, wo pɛ dɛ “ebɛkã Israel ho” no bɔboa wo ma abɔ adwenpɔw nyia enye no bopue na mbrɛ wobisi bɔkɔ.
Sɛ awar hokãfo a ɔatõ n’ahyɛmudzi a, wo pɛ dɛ ibɛma Nyankopɔn edzi nyim wɔ w’abrabɔ mu no bɛma w’ahyɛmudzi no rinnya nkekaa. Agyenkwa no bɛsã w’akoma a ebubu no. Ɔsorsor bobue ber a ihwehwɛ ehu mbrɛ ibesi bɔkɔ kan. Onnhia dɛ ibekyinkyin anaa edwendwen.
Sɛ ewɔ nokwar asɛmbisa wɔ asɛmpa no ho anaa Asɔr no ho, dɛ mbrɛ asan mu eyi dɛ Nyankopɔn bedzi nyim no, wobegya wo ma ehu na atse nokwar trudoo na onnyiewiei ase a ɔbɔboa ama w’abrabɔ kwankyerɛ na wɔaboa wo ma etsim wɔ ahyɛmu anamɔn kwan no do.
Sɛ ihyia nsɔhwɛ a—sɛ nsɔhwɛ no mpo ba ber a abrɛ anaa ayɛ ankonam anaa wɔnntse wo ase a—dwen akokodur a ibotum enya ber a isan mu ma Nyankopɔn dzi nyim wɔ w’abrabɔ mu ber a itotɔserɛ No ma Ɔhyɛ wo dzen.
Sɛ w’ahwehwɛdze tsitsir nye ibɛma Nyankopɔn edzi nyim a, akã Israel ho, adwenpɔwbɔ pii yɛ mberɛw. Nsɛmasɛma pii bɛyɛ kwa! Inyim mbrɛ ibesi esiesie wo ho. Inyim dza ibɔhwɛ na ibɛkenkan, na bea ibɔhwer wo mber, na nyimpa enye no bedzi nkitaho. Inyim dza irohwehwɛ ayɛ. Inyim nyimpa ban a ipɛ ankasa dɛ ibɛyɛ.
Afei, mo nuanom na nkyerɛbaa adɔfo, ɔgye gyedzi nye akokodur ama Nyankopɔn eedzi nyim. Ɔgye sunsum mu edwuma a yɛwɔw do, ahoɔdzen mu dɛ yebonu hɛnho na yedua Jesus Christ no Werdambɔ no do yɛapor honammunyi no egu.19 Ɔgye daa daa mbɔdzembɔ a yɛkɔ do yɛ dze tu hɛn ankorankor asɛmpa adzesũa no mpon, dze esũa pii afa Ɔsor Egya na Jesus Christ ho na yɛahwehwɛ ankorankor nyikyerɛ na yedzi do.
Awerɛhow ber a Ɔsomafo Paul hyɛɛ ho nkɔm no,20 Satan rommbɔ mbɔdzen mpo nsuma Nyame ne nhyehyɛɛ a otu do sa no. Nsɛmbɔn atahye. Dɛm ntsi, kwan kor ara a ibotum edzi konyim sunsum mu nye ibesi nketse dɛ ibɛma Nyankopɔn bedzi nyim wɔ hɛn abrabɔ mu, yesũa dɛ yɛbɛtse Ne ndze na yɛdze hɛn ahoɔdzen aboa ma wɔaboa Israel ano.
Afei, ebɛn atsenkã na Ewuradze nya wɔ hɔn a wɔbɛpɛ dɛ Nyankopɔn dzi nyim no? Nephi twaa no tsia yie dɛ: “[Ewuradze] ɔdɔ hɔn a wɔdze no yɛ hɔn Nyankopɔn. Hwɛ, ɔdɔɔ hɛn egyanom na ɔnye hɔn dzii ahyɛmu, nyew, Abraham, Isaac na Jacob; na ɔkaa ahyɛmu a ɔnye hɔn dzii no.”21
Na ebɛnadze na Ewuradze pɛ dɛ Ɔyɛ ma Israel? Ewuradze abɔ anohoba dɛ “[ɔ]bɔkõ [hɛn] kõ, nye [hɛn] mba, nye [hɛn] mba hɔn mba nyina hɔn kõ ama hɔn, … ekesi ebusuasantsen ebiasa na anan do!”22
Ber a hom sũa hom kyerɛwsɛm abosoom esia a odzi do yi mu no, mehyɛ hom nkuran dɛ hom nkyerɛw no nkorkor dza Ewuradze abɔ ho anohoba dɛ Ɔbɛyɛ Israel ahyɛmufo no. Muhu dɛ ɔbɛyɛ hom ahobow. Hom ndwen anohoba yinom ho. Hom nye hom ebusua na anyɛnkofo nkã ho nsɛm. Nkyii bɔ anohoba yinom ho bra na hwɛ mbrɛ obesi bɛhyɛ mã wɔ wankasa w’abrabɔ mu.
Mo nuanom na me nkyerɛbaa adɔfo , sɛ hom san mu yi dɛ Nyankopɔn bedzi nyim wɔ hom abrabɔ mu a, hom bohu ama hom ho dɛ hɛn Nyame yɛ “Nyame a ɔyɛ anwanwadze.”23 Dɛ yɛyɛ nkorɔfo yi, yɛyɛ Ne ahyɛmu mba, na wɔdze ne dzin bɛfrɛ hɛn. Megye iyi ho dase wɔ Jesus Christ ne dzin krɔnkrɔn no mu, amen.