Imnaddfin permezz tal-Indiema
Minħabba l-pjan tal-Alla u l-Att tal-Fidwa ta’ Ġesù Kristu, aħna nistgħu nitnaddfu permezz tal-proċess tal-indiema.
Fil-mortalità aħna suġġett għal-liġijiet tal-bniedem u l-liġijiet ta’ Alla. Jiena kelli l-esperjenza mhux tas-soltu li niġġudika ċerta mġieba ħażina u mill-aktar serja skont dawn iż-żewġ liġijiet—fil-passat bħala parti mill-Qorti Suprema ta’ Utah u issa bħala membru tal-Ewwel Presidenza. Il-kuntrast li jiena esperjenzajt bejn il-liġijiet tal-bniedem u l-liġijiet ta’ Alla kabbru l-apprezzament tiegħi għar-realtà u l-qawwa tal-Att tal-Fidwa ta’ Ġesù Kristu. Skont il-liġijiet tal-bniedem, persuna li tkun ħatja tal-aktar reati serji tista’ tqatta’ ħajjitha l-ħabs mingħajr il-possibbiltà ta’ parole. Iżda skont il-pjan mimli ħniena ta’ Missierna tas-Smewwiet li tant iħobbna hija ħaġa verament differenti. Jiena rajt b’għajnejja li dawn l-istess dnubiet serji jistgħu jinħafru fil-mortalità minħabba s-sagrifiċċju tat-tpattija għad-dnubiet ta’ “dawk kollha li għandhom qalb maqsuma u spirtu sogħbien” (2 Nephi 2:7). Kristu jifdi u l-Att tal-Fidwa Tiegħu huwa reali.
Il-kompassjoni kollha mħabba tas-Salvatur tagħna hija espressa fl-għanja meraviljuża li l-kor għadu kif kanta.
Ejja għand Kristu; hu lest jisimek,
Minkejja fil-dlam inti żbaljajt.
Imħabbtu ssibek u b’ħlewwa tmexxik
Mil-lejl mudlam sad-dawl tal-jum.1
Is-sagrifiċċju tal-att tal-fidwa ta’ Ġesù Kristu jiftaħ il-bieb għall-“bnedmin kollha biex jindmu u jersqu lejh” (Doctrine and Covenants 18:11; ara wkoll Mark 3:28; 1 Nephi 10:18; Alma 34:8, 16). Il-ktieb ta’ Alma jirrapporta l-indiema u l-maħfra anke ta’ dawk li kienu nies ħżiena u qattiela (ara Alma 25:16; 27:27, 30). Il-messaġġ tiegħi llum huwa wieħed ta’ tama għalina lkoll, inkluż għal dawk li m’għadhomx membri tal-Knisja minħabba skomunika jew tneħħija tal-isem. Aħna lkoll midinbin li nistgħu nitnaddfu permezz tal-indiema. “Li tindmu mid-dnub mhux xi ħaġa faċli,” għallem il-Presbiteru Russell M. Nelson f’konferenza ġenerali passata. “Iżda ta’ min iħallas il-prezz biex jikseb il-premju.”2
I. Indiema
L-indiema tibda bis-Salvatur tagħna, u hija ferħ, mhux piż. Fid-devozzjonali tal-Milied, Diċembru li għadda, il-President Nelson għallem: “L-indiema vera mhijiex avveniment. Hija privileġġ mingħajr tmiem. Hija ħaġa fundamentali għall-progressjoni tagħna u biex ikollna s-serħan il-moħħ, il-faraġ, u l-ferħ.”3
Xi wħud mill-akbar tagħlim dwar l-indiema jinsab fid-diskor ta’ Alma, fil-Ktieb ta’ Mormon, lill-membri tal-Knisja li aktar tard iddeskrivihom li kienu fi stat ta’ “nuqqas ta’ twemmin,” “minfuħin bihom … infushom,” u li qalbhom kienet tinsab “fuq ir-rikkezzi u l-frugħa tad-dinja” (Alma 7:6). Kull membru ta’ din il-Knisja rrestawrata għandu ħafna x’jitgħallem mit-tagħlim ispirat ta’ Alma.
Aħna nibdew bil-fidi f’Ġesù Kristu, għaliex “huwa hu li jiġi biex ineħħi d-dnubiet tad-dinja” (Alma 5:48). Aħna għandna nindmu għaliex, kif għallem Alma, “jekk intom ma tindmux intom bl-ebda mod ma tistgħu tirtu s-saltna tas-smewwiet” (Alma 5:51). L-indiema hija parti essenzjali mill-pjan ta’ Alla. Peress li f’din l-esperjenza mortali tagħna aħna kollha se nidinbu u se ninqatgħu mill-preżenza ta’ Alla, il-bniedem ma jistax “isalva” mingħajr l-indiema (Alma 5:31; ara wkoll Helaman 12:22).
Dan ilu jiġi mgħallem mill-bidu taż-żminijiet. Il-Mulej talab lil Adam, “Għallmu dan lil uliedkom, li l-bnedmin kollha, kullimkien, għandhom jindmu, jew huma bl-ebda mod ma jkunu jistgħu jirtu s-saltna ta’ Alla, għaliex l-ebda ħaġa mniġġsa ma tista’ tgħammar hemmhekk, jew tgħammar fil-preżenza tiegħu” (Moses 6:57). Aħna għandna nindmu minn dnubietna kollha—l-għemejjel tagħna kollha jew in-nuqqas ta’ għemejjel tagħna li jmorru kontra l-kmandamenti ta’ Alla. Ħadd mhu eżentat. Ilbieraħ stess il-President Nelson qalilna, “L-aħwa, aħna lkoll jeħtieġ li nindmu.”4
Biex aħna nitnaddfu permezz tal-indiema, jeħtieġ li niċħdu dnubietna u nistqarruhom lill-Mulej u lill-imħallef mortali Tiegħu fejn ikun meħtieġ (ara Doctrine and Covenants 58:43). Alma għallem li aħna għandna wkoll “inwettqu għemejjel tas-sewwa” (Alma 5:35). Dan kollu huwa parti mill-istedina li nsibuha ta’ spiss fl-iskrittura biex immorru għand Kristu.
Jeħtieġ li aħna nieħdu sehem fis-sagrament kull jum tas-Sabbath. F’dik l-ordinanza aħna nagħmlu ċerti patti u nirċievu ċerti barkiet li jgħinuna negħlbu kull għemil u xewqa li jżommuna milli niksbu l-perfezzjoni li jistedinna biex niksbu s-Salvatur tagħna (ara Mattew 5:48; 3 Nephi 12:48). Hekk kif aħna “niċħdu lilna nfusna minn kull ħażen, u nħobbu lil Alla b’moħħna kollu u bil-qawwa u l-ħila tagħna kollha,” imbagħad inkunu nistgħu nsiru “perfetti fi Kristu” u “nitqaddsu” permezz tat-tixrid ta’ demmu, biex “insiru qaddisa, mingħajr tebgħa” (Moroni 10:32–33). X’wegħda dik! X’miraklu! X’barka!
II. Responsabbiltà u Ġudizzju Mortali
L-għan tagħna tal-pjan ta’ Alla għal din l-esperjenza mortali hu li “jippruvana” biex “jara jekk nagħmlux dak kollu li l-Mulej Alla jitlobna nagħmlu” (Abraham 3:25). Bħala parti minn dan il-pjan, aħna responsabbli lejn Alla u lejn il-qaddejja magħżulin tiegħu,u din ir-responsabbiltà tinvolvi kemm ġudizzju mortali kif ukoll divin.
Fil-Knisja tal-Mulej, il-ġudizzju mortali għall-membri jew il-membri prospettivi jiġi amministrat minn mexxejja li jfittxu li jiksbu direzzjoni divina. Hija r-responsabbiltà tagħhom li jiġġudikaw persuni li qed ifittxu li jersqu lejn Kristu biex jirċievu l-qawwa tal-Att tal-Fidwa Tiegħu fit-triq tal-patt lejn il-ħajja eterna. Il-ġudizzju mortali jiddetermina jekk il-persuna hijiex lesta għall-magħmudija. Hija denja dik il-persuna li tingħata rakkomandazzjoni biex tattendi t-tempju? Nidmet biżżejjed, permezz tal-Att tal-Fidwa ta’ Ġesù Kristu, dik il-persuna li isimha tneħħa mir-reġistri tal-Knisja, biex tkun tista’ terġa’ ssir membru mill-ġdid permezz tal-magħmudija?
Meta mħallef mortali msejjaħ minn Alla japprova persuna biex tkun tista’ tavvanza, bħal fil-każ ta’ privileġġi tat-tempju, huwa ma jkunx qed jiddikjara li dik il-persuna hija perfetta, u hu ma jkun qed jaħfer l-ebda dnubiet. Il-Presbiteru Spencer W. Kimball għallem li wara dak li huwa sejjaħlu “ir-rinunzja [mortali] tal-penali,” persuna “għandha wkoll tfittex u tiżgura mingħand Alla tas-sema indima finali, u hu biss jista’ jassolvi.”5 U jekk dik il-persuna tibqa’ ma’ tindimx minn ċerti għemejjel u xewqat midinba sal-Ġudizzju Finali, hija tibqa’ mniġġsa. Ir-responsabbiltà aħħarija, inkluż l-effett li finalment inaddaf tal-indiema, hija bejn kull wieħed u waħda minna u Alla.
III. Il-Qawmien mill-Imwiet u l-Ġudizzju Finali
Il-ġudizzju li hu deskritt l-aktar fl-iskrittura huwa l-Ġudizzju Finali li jiġi wara l-Qawmien mill-Imwiet (ara 2 Nephi 9:15). Bosta passaġġi fl-iskrittura jiddikjaraw li “aħna lkoll għad nidhru quddiem it-tribunal ta’ Alla” (Rumani 14:10; ara wkoll 2 Nephi 9:15; Mosiah 27:31) “li niġu ġġudikati skont l-għemejjel li wettaqna fil-ġisem mortali” (Alma 5:15; ara wkoll Rivelazzjoni 20:12; Alma 41:3; 3 Nephi 26:4). U se jiġu ġġudikati “skont għemilhom” (3 Nephi 27:15) u “skont ix-xewqa ta’ qalbhom” (Doctrine and Covenants 137:9; ara wkoll Alma 41:6).
L-għan tal-Ġudizzju Finali hu li jiddetermina jekk aħna rċevejniex dak li Alma ddeskrivih bħala “bidla kbira f’qalbna” (ara Alma 5:14, 26), fejn aħna sirna ħlejjaq ġodda fejn m’għandniex “aktar dispożizzjoni li nagħmlu l-ħażen iżda li nagħmlu t-tajjeb kontinwament” (Mosiah 5:2). L-imħallef ta’ dan huwa s-Salvatur tagħna, Ġesù Kristu (ara Ġwanni 5:22; 2 Nephi 9:41). Wara l-ġudizzju Tiegħu aħna lkoll se nistqarru “li l-ġudizzju tiegħu huwa ġust” (Mosiah 16:1; ara wkoll Mosiah 27:31; Alma 12:15), għaliex l-omnixxenti Tiegħu (ara 2 Nephi 9:15, 20) tah għarfien perfett dwar l-għemejjel u x-xewqat kollha tagħna, kemm dawk ġusti jew li ndimna minnhom, kemm dawk li ma ndimniex minnhom jew li bqajna ma bdilniex.
L-iskrittura tiddeskrivi l-proċess ta’ dan il-Ġudizzju Finali. Alma jgħallem li l-ġustizzja ta’ Alla tagħna teħtieġ li fil-Qawmien mill-Imwiet “kollox se jiġi rrestawrat skont l-ordni xierqa tiegħu” (Alma 41:2). Dan ifisser li “jekk f’din il-ħajja l-għemejjel tagħom ikunu tajbin, u x-xewqat ta’ qalbhom ikunu tajbin, … fl-aħħar jum huma se jiġu rrestawrati għal dak li hu tajjeb” (Alma 41:3). Bl-istess mod, “jekk l-għemejjel tagħhom jew ix-xewqat tagħhom huma ħżiena huma se jiġu rrestawrati għal dak li hu ħażin” (Alma 41:4–5; ara wkoll Helaman 14:31). Bl-istess mod, il-profeta Ġakobb għallem li fil-Ġudizzju Finali “dawk li huma ġusti se jibqgħu ġusti, u dawk li huma maħmuġin se jibqgħu maħmuġin” (2 Nephi 9:16; ara wkoll Mormon 9:14; 1 Nephi 15:33). Dan hu l-proċess li jseħħ qabel ma’ aħna se nieqfu quddiem dik li Moroni jsejħilha “l-iżbarra sabiħa tal-Kbir Ġehova, l-imħallef Etern tal-ħajjin u l-mejtin” (Moroni 10:34; ara wkoll 3 Nephi 27:16).
Biex niżguraw ruħna li aħna ndaf quddiem Alla, jeħtieġ li aħna nindmu qabel il-Ġudizzju Finali (ara Mormon 3:22). Kif Alma qal lill-midneb ibnu, aħna ma nistgħux naħbu dnubietna quddiem Alla “u jekk intom ma tindmux huma se jieqfu bħala xhieda kontrikom fl-aħħar jum” (Alma 39:8; enfażi miżjuda). L-Att tal-Fidwa ta’ Ġesù Kristu jagħtina l-uniku mod kif aħna nistgħu niksbu t-tindifa meħtieġa permezz tal-indiema, u ż-żmien tagħna biex nagħmlu dan hu f’din il-ħajja mortali. Għalkemm aħna mgħallmin li ċerta ndiema tista’ sseħħ fid-dinja tal-ispirti (ara Doctrine and Covenants 138:31, 33, 58), dik mhijiex ħaġa ċerta. Il-Presbiteru Melvin J. Ballard għallem: “Huwa aktar faċli li negħlbu n-nuqqasijiet tagħna u nservu lil Mulej meta l-ġisem u l-ispirtu huma magħqudin bħala ħaġa waħda. Dan huwa ż-żmien meta l-bnedmin huma aktar flessibbli u suxxettibbli. … Din il-ħajja hija ż-żmien li fih għandna nindmu.”6
Meta aħna nindmu, aħna jkollna l-assigurazzjoni tal-Mulej li dnubietna, inkluż l-għemejjel u x-xewqat tagħna, se jiġu mnaddfin u l-imħallef ħanin finali tagħna “mhux se jiftakarhom iżjed” (Doctrine and Covenants 58:42; ara wkoll Isaija 1:18; Ġeremija 31:34; Lhud 8:12; Alma 41:6; Helaman 14:18–19). Imnaddfin permezz tal-indiema, aħna nistgħu nikkwalifikaw għall-ħajja eterna, li s-Sultan Benjamin iddeskriviha bħala “li ngħammru ma’ Alla fi stat ta’ ferħ mingħajr tmiem” (Mosiah 2:41; ara wkoll Doctrine and Covenants 14:7).
Bħala parti mill-“pjan ta’ restawrazzjoni” ta’ Alla (Alma 41:2), il-Qawmien mill-Imwiet se jirrestawra “kull ħaġa … mal-ġisem perfett tagħha” (Alma 40:23). Dan jinkludi l-perfezzjoni tad-defiċjenzi u d-deformitajiet fiżiċi kollha miksuba fil-mortalità, inkluż dawk fit-twelid jew minħabba xi trawma jew mard.
Din ir-restawrazzjoni tipperfezzjonana mix-xewqat jew mil-vizzji mhux tajba jew mhux megħluba tagħna? Dan ma jistax isseħħ. Aħna nafu permezz ta’ rivelazzjoni moderna li aħna se niġu ġġudikati skont ix- xewqat tagħna kif ukoll l-għemejjel tagħna (ara Alma 41:5; Doctrine and Covenants 137:9) u li anke l- ħsibijiet tagħna se jikkundannawna (ara Alma 12:14). M’għandniex “nipprokrastinaw il-jum tal-indiema tagħna” sal-mewt, għallem Amuleki (Alma 34:33), għaliex l-istess spirtu li jippossedi ġisimna f’din il-ħajja—kemm jekk huwa tal-Mulej, kemm jekk tax-xitan—“se jkollu l-qawwa li jippossedi ġisimna f’dik il-ħajja eterna” (Alma 34:34). Is-Salvatur tagħna għandu l-qawwa u jinsab lest biex inaddafna mill-ħażen. Issa huwa ż-żmien biex infittxu l-għajnuna Tiegħu biex nindmu mix-xewqat u l-ħsibijiet ħżiena jew mhux xierqa tagħna biex nitnaddfu u nkunu preparati li nieqfu quddiem Alla fil-Ġudizzju Finali.
IV. Dirgħajn il-Ħniena
Il-qofol tal-pjan ta’ Alla u l-kmandamenti kollha Tiegħu hija l-imħabba Tiegħu għal kull wieħed u waħda minna, li hi “l-aktar ħaġa mixtieqa fost kull ħaġa oħra … u l-aktar ħaġa li twassal l-hena fir-ruħ” (1 Nephi 11:22–23). Il-profeta Isaija assigura anke lill-ħżiena li meta huma “jerġgħu lura għand il-Mulej, … huwa jħenn … [u] jaħfer ħafna” (Isaija 55:7). Alma għallem, “Ara, huwa jibgħat stedina lill-bnedmin kollha għaliex dirgħajn il-ħniena huma lesti biex jilqgħuhom” (Alma 5:33; ara wkoll 2 Nephi 26:25–33). Il-Mulej imqajjem mill-imwiet qal lin-Nefiti, “Araw, dan huwa driegħi kollu ħniena lest għalikom, u kull min jiġi, lilu jiena nilqa’” (3 Nephi 9:14). Minn dan it-tagħlim skritturali u xi tagħlim ieħor mill-iskrittura, aħna nafu li s-Salvatur tagħna li jħobbna ħafna jinsab b’dirgħajh miftuħa biex jilqa’ lill-bnedmin kollha bil-kundizzjonijiet ta’ mħabba li Hu stess fassal għal uliedu.7
Minħabba l-pjan ta’ Alla u l-Att tal-Fidwa ta’ Ġesù Kristu, jiena nixhed b’“dija perfetta ta’ tama” li Alla jħobbna u aħna nistgħu niġu mnaddfin bil-proċess tal-indiema. Aħna nwiegħdu li “jekk nibqgħu mexjin ‘il quddiem, niffesteġġjaw permezz tal-kelma ta’ Kristu u nibqgħu sodi sat-tmiem, araw, dan jgħid il-Missier: intom ikollkom il-ħajja eterna” (2 Nephi 31:20). Jalla aħna nagħmlu dan, jien nitlob f’isem Ġesù Kristu, amen.