Imħabba Kbira lejn Ulied Missierna
L-imħabba hija l-kwalità ewlenija u l-mottiv ewlieni għall-għanijiet spiritwali li impennjana bihom il-maħbub profeta tagħna.
Għeżież ħuti, dan huwa żmien mill-aktar uniku u kruċjali fl-istorja. Aħna mberkin li ngħixu fl-aħħar dispensazzjoni qabel it-Tieni Miġja tas-Salvatur. Fl-1829, fil-bidu ta’ din id-dispensazzjoni, is-sena ta’ qabel ma ġiet organizzata l-Knisja b’mod formali, ġiet mogħtija rivelazzjoni mill-aktar għażiża, li tiddikjara li “ħidma meraviljuża” kienet “waslet biex tiġi fis-seħħ.” Din ir-rivelazzjoni stabbilixxiet li dawk li jixtiequ jservu lil Alla jistgħu jikkwalifikaw għal dan is-servizz permezz tal-“fidi, it-tama, il-karità u l-imħabba, b’ħarsa fissa lejn il-glorja ta’ Alla.”1 Il-karità, li hija “l-imħabba pura ta’ Kristu”2 tinkludi l-imħabba eterna ta’ Alla lejn uliedu kollha.3
L-għan tiegħi dalgħodu hu li nenfasizza l-irwol essenzjali ta’ din it-tip ta’ mħabba fil-ħidma missjunarja, fil-ħidma tat-tempju u l-istorja tal-familja, u l-osservanza reliġjuża tal-familja ċċentrata madwar id-dar u ssapportjata mill-Knisja. L-imħabba lejn is-Salvatur u l-imħabba lejn għajrna4 hija l-kwalità ewlenija u l-mottiv ewlieni għall-għanijiet spiritwali5 li aħna ġejna mitlubin nagħmlu mill-maħbub profeta tagħna, il-President Russell M. Nelson, fit-tibdil imħabbar fl-2018.
L-Isforz Missjunarju biex Niġbru Flimkien lil Ulied Iżrael li Huma Mxerrdin
Fl-ewwel żminijiet ta’ ħajti jiena ġejt espost għar-relazzjoni li teżisti bejn il-ħidma missjunarja u l-imħabba. Meta jiena kelli 11-il sena, jiena rċevejt barka patrijarkali mingħand patrijarka li kien ukoll in-nannu tiegħi.6 Parti minn dik il-barka tgħid, “Jiena nbierkek b’imħabba kbira lejn għajrek, għaliex inti se tiġi msejjaħ biex ixxerred l-evanġelju fid-dinja … biex tirbaħ l-erwieħ għal Kristu.”7
Jiena fhimt anke f’dik l-età tenera li li wieħed jaqsam l-evanġelju ma’ ħaddieħor kienet xi ħaġa bbażata fuq l-imħabba kbira lejn l-ulied kollha ta’ Missierna tas-Smewwiet.
Bħala Awtoritjiet Ġenerali li 15-il sena ilu ġejna assenjati biex naħdmu fuq Ippridkaw l-Evanġelju Tiegħi, aħna kkonkludejna li l-kwalità tal-imħabba kienet mill-aktar essenzjali għall-ħidma missjunarja fi żmienna, bħalma dejjem kienet. Kapitlu 6, dwar il-kwalitajiet bħal ta’ Kristu, fosthom il-karità u l-imħabba, huwa konsistentement l-aktar kapitlu popolari fost il-missjunarji.
Bħala rappreżentanti tas-Salvatur, ħafna missjunarji jħossu fihom din it-tip ta’ mħabba, u meta jiġri dan, l-isforzi tagħhom jiġu mberkin. Meta l-membri jiksbu viżjoni ta’ din it-tip ta’ mħabba, li hija essenzjali biex huma jassistu lill-Mulej fl-għanijiet Tiegħu, il-ħidma tal-Mulej tkun tista’ tiġi fis-seħħ.
Jiena nħossi privileġġjat li kelli rwol żgħir f’eżempju mill-aktar meraviljuż ta’ din it-tip ta’ mħabba. Meta jien kont qed inservi bħala President tar-Reġjun tal-Gżejjer tal-Paċifiku, jiena rċevejt telefonata mingħand il-President R. Wayne Shute. Meta kien għadu żagħżugħ huwa serva missjoni ġewwa s-Samoa. Aktar tard, huwa reġa’ lura fis-Samoa bħala president tal-missjoni.8 Meta huwa ċempilli, huwa kien il-president tat-Tempju ta’ Apia, fis-Samoa. Wieħed mill-missjunarji żgħażagħ tiegħu, meta hu kien president tal-missjoni, kien il-Presbiteru O. Vincent Haleck, li llum huwa l-President Reġjonali fil-Paċifiku. Il-President Shute kellu mħabba kbira u rispett kbir lejn Vince u l-kumplament tal-familja Haleck. Ħafna mill-membri tal-familja kienu membri tal-Knisja, iżda missier Vince, Otto Haleck, il-patrijarka tal-familja (ta’ dixxendenza Ġermaniża u Samoana), ma kienx membru. Il-President Shute kien jaf li jien kont qed nattendi konferenza tal-wited u xi laqgħat oħra fl-American Samoa, u hu staqsieni jekk kontx nikkunsidra noqgħod fid-dar ta’ Otto Haleck biex b’hekk kont inkun nista’ naqsam l-evanġelju miegħu.
Jien u marti, Mary qgħadna ma’ Otto u martu, Dorothy, fid-dar sabiħa tagħhom. Waqt ħin il-kolazzjon jiena qsamt magħhom messaġġ tal-evanġelju u stedint lil Otto biex jiltaqa’ mal-missjunarji. Huwa rrifjuta l-istedina tiegħi b’mod ġentili iżda determinat. Huwa qal li kien jinsab kuntent li ħafna membri tal-familja tiegħu kienu Qaddisin tal-Aħħar Jiem. Iżda b’qawwa huwa indika li xi wħud mill-antenati ta’ ommu mis-Samoa kienu fost l-ewwel ministri Kristjani ġewwa s-Samoa, u huwa kien iħoss lealtà kbira lejn it-twemmin Kristjan tradizzjonali tagħhom.9 Madankollu, aħna sellimna lil xulxin bħala ħbieb ta’ veru.
Aktar tard, meta l-President Gordon B. Hinckley kien qed iħejji biex jiddedika t-Tempju ta’ Suva, fil-Fiji, huwa talab lis-segretarju personali tiegħu, Brother Don H. Staheli,10 biex iċempilli fi New Zealand biex nagħmlu l-arranġamenti. Il-President Hinckley ried jaqbad ajruplan mill-Fiji sal-American Samoa biex jiltaqa’ mal-Qaddisin. Xi ħadd issuġġerixxa lukanda partikolari li kienet intużat fi żjara qabel. Jiena talbt jekk stajtx nagħmel xi arranġamenti differenti. Brother Staheli qalli, “Inti l-President Reġjonali; żgur mhux problema.”
Immedjatament jiena ċempilt lill-President Shute u għidtlu li jista’ jagħti l-każ li kellna ċans ieħor li nbierku spiritwalment lill-ħabib tagħna Otto Haleck. Din id-darba l-missjunarju kien se jkun il-President Gordon B. Hinckley. Jien staqsejt jekk kenitx ħaġa xierqa għall-familja Haleck li huma jospitaw lilna lkoll fil-grupp li kien qed jivvjaġġa flimkien mal-President Hinckley.11 Il-President u Sister Hinckley, binthom Jane, u l-Presbiteru u Sister Jeffrey R. Holland ukoll kienu jagħmlu parti mill-grupp li konna qed nivvjaġġaw flimkien. Il-President Shute, flimkien mal-familja, għamlu l-arranġamenti kollha.12
Meta aħna wasalna mill-Fiji wara d-dedikazzjoni tat-tempju, aħna ngħatajna merħba sabiħa.13 Dik il-lejla aħna kellimna lill-eluf ta’ membri mis-Samoa u mbagħad tlaqna lejn id-dar tal-familja Haleck. Meta l-għada filgħodu aħna nġbarna għall-kolazzjon, il-President Hinckley u Otto Haleck kienu diġà għamlu ħbieb sew. Għalija kien interessanti l-fatt li huma t-tnejn kienu qed jiddiskutu l-istess ħwejjeġ li sena qabel konna tkellimna dwarhom jien u Otto. Meta Otto esprima l-ammirazzjoni tiegħu lejn il-Knisja tagħna iżda rriafferma l-lealtà tiegħu lejn il-knisja fejn kien jattendi, il-President Hinckley poġġa idu fuq spallejn Otto u qallu, “Otto, daqshekk mhux tajjeb biżżejjed; jeħtieġ li inti tkun membru tal-Knisja. Din hija l-Knisja tal-Mulej.” Dak il-ħin stajt, b’mod figurattiv, tara l-korazza reżistenti ta’ Otto taqa’ minn fuqu bir-rieda qawwija li kellu li jaċċetta dak li qal il-President Hinckley.
Dan kien il-bidu ta’ aktar tagħlim missjunarju u aktar umiltà spiritwali li wasslu biex ftit aktar minn sena wara, Otto Haleck ġie mgħammed u kkonfermat. Sena wara l-magħmudija tiegħu, il-familja Haleck ġiet issiġillata bħala familja eterna fit-tempju.14
Dak li verament missli qalbi tul din l-esperjenza inkredibbli kienet l-imħabba mill-aktar kbira tal-ministeru li wera l-President Wayne Shute għall-eks missjunarju tiegħu, il-Presbiteru Vince Haleck, u x-xewqa tiegħu li jara lill-membri kollha tal-familja Haleck magħqudin flimkien bħala familja eterna.15
Meta nitkellmu dwar il-ġabra ta’ Iżrael, jeħtieġ li aħna nallinjaw qlubna ma’ din it-tip ta’ mħabba u minflok sentimenti ta’ sempliċi responsabbiltà16 jew ħtija nimtlew b’sentimenti ta’ mħabba u parteċipazzjoni fis-sħubija divina li naqsmu mad-dinja l-messaġġ, il-ministeru u l-missjoni tas-Salvatur.17
Bħala membri aħna nistgħu nuru l-imħabba tagħna lejn is-Salvatur u lejn ħutna madwar id-dinja permezz tal-istedina sempliċi tagħna. L-iskeda l-ġdida tal-laqgħa tal-Ħadd tirrappreżenta opportunità eċċezzjonali għall-membri biex b’imħabba u b’suċċess jistiednu lill-ħbieb u lil dawk li jiltaqgħu magħhom biex huma jiġu u jaraw u jħossu l-esperjenza tal-Knisja.18 Laqgħa tas-sagrament spiritwali, li nittama li tkun sagra daqs kemm iddeskriviha l-bieraħ il-Presbiteru Jeffrey R. Holland, tiġi segwita minn laqgħa ta’ 50 minuta ffokata fuq it-Testment il-Ġdid u s-Salvatur jew xi indirizz relevanti mill-konferenza ffokat fuq is-Salvatur u d-duttrina Tiegħu.
Xi aħwa nisa tas-Soċjetà tal-Għajnuna staqsew għalfejn huma ġew mogħtija essajnment dwar il-“ġabra” flimkien mal-membri tal-kworum tas-saċerdozju. Hemm diversi raġunijiet għal dan, u l-President Nelson semma wħud minnhom fl-aħħar konferenza ġenerali. Huwa kkonkluda, “Fil-verità aħna ma nistgħux niġbru lil Iżrael mingħajrkom.”19 Fi żmienna aħna mberkin li bejn wieħed u ieħor 30 fil-mija tal-missjunarji full-time tagħna huma nisa. Dan jipprovdi inċentiv akbar biex l-aħwa nisa tas-Soċjetà tal-Għajnuna jaqsmu b’imħabba l-evanġelju ma’ ħaddieħor. Li huwa meħtieġ hu impenn kompassjonali, spiritwali u kollu mħabba minna lkoll—irġiel, nisa, żgħażagħ u tfal—biex naqsmu ma’ ħaddieħor l-evanġelju ta’ Ġesù Kristu. Jekk aħna nuru l-imħabba, it-tjubija u l-umiltà, ħafna jkunu dawk li jaċċettaw l-istedina tagħna. Dawk li jagħżlu li ma jaċċettawx l-istedina tagħna xorta waħda jibqgħu ħbieb tagħna.
Ħidma tat-Tempju u l-Istorja tal-Familja għall-Ġabra ta’ Iżrael
L-imħabba hija wkoll fil-qalba tal-ħidma tat-tempju u l-istorja tal-familja tagħna biex niġbru flimkien lil Iżrael fuq in-naħa l-oħra tal-velu. Meta aħna nitgħallmu dwar l-isfidi u d-diffikultajiet li ħabbtu wiċċhom magħhom l-antenati tagħna, l-imħabba u l-apprezzament tagħna lejhom jikbru. Il-ħidma tat-tempju u l-istorja tal-familja tagħna ssaħħet mhux ħażin permezz tat-tibdil ġdid, kemm fl-iskeda tal-laqgħa tal-Ħadd kif ukoll fl-avvanz taż-żgħażagħ fil-klassijiet u fil-kwora. Dan it-tibdil jipprovdi attenzjoni aktar kmieni u aktar qawwija relatata mat-tagħlim dwar l-antenati tagħna u l-ġabra ta’ Iżrael fuq in-naħa l-oħra tal-velu. Kemm il-ħidma tat-tempju, kif ukoll il-ħidma tal-istorja tal-familja, ġew imtejba ħafna.
L-internet huwa għodda importanti; id-dar issa saret iċ-ċentru ewlieni tagħna tal-istorja tal-familja. Il-membri żgħar tagħna huma verament kapaċi fir-riċerka tal-istorja tal-familja u huma spiritwalment motivati biex iwettqu l-magħmudijiet għall-antenati tagħhom, li lilhom tgħallmu jħobbu u japprezzaw. Minn meta seħħet il-bidla li qed tagħti ċans lil dawk li għandhom 11-il sena biex iwettqu l-magħmudijiet għall-mejtin, il-presidenti tat-tempju madwar id-dinja rrapportaw li l-attendenza kibret sew. Wieħed president tat-tempju infurmana li “kien hemm żieda mill-aktar sinjifikanti fil-membri li jiġu biex jagħmlu l-magħmudijiet … u dawk li għandhom 11-il sena jġibu magħhom aktar familji. … Anke f’età daqstant żgħira, huma jidhru li jifhmu sew is-sens ta’ qima u l-għan għall-ordinanza li jkunu qed iwettqu. Hija dehra mill-aktar sabiħa!”20
Jiena naf li l-mexxejja tagħna tal-Primarja u taż-żgħażagħ qegħdin jagħmlu, u se jkomplu jagħmlu, sforz ewlieni fil-ħidma tal-istorja tal-familja u tat-tempju. L-aħwa tas-Soċjetà tal-Għajnuna u tas-saċerdozju jistgħu b’imħabba jgħinu jwettqu r-responsabbiltà tagħhom tat-tempju u l-istorja tal-familja b’mod individwali kif ukoll billi jassistu u jispiraw lit-tfal u liż-żgħażagħ biex jiġbru flimkien lil Iżrael fuq in-naħa l-oħra tal-velu. Din hija ħaġa partikolarment importanti fid-dar u f’jum is-Sabbath. Inwegħidkom li l-ordinanzi mwettqa b’imħabba għall-antenati tagħna jispiċċaw biex isaħħu u jipproteġu liż-żgħażagħ u l-familji tagħna f’dinja li aktar ma tmur aktar qed issir mimlija ħażen. Jiena wkoll nixhed personalment li l-President Russell M. Nelson irċieva ċerti rivelazzjonijiet mill-aktar importanti relatati mat-tempji u l-ħidma tat-tempju.
Inħejju Familji Eterni u Individwi biex Jgħixu ma’ Alla
L-enfażi l-ġdida dwar l-istudju tal-evanġelju ċċentrat madwar id-dar u l-mod kif ngħixuh, u r-riżorsi li tipprovdi l-Knisja, huma opportunità kbira biex b’imħabba aħna nħejju familji eterni u individwi biex jiltaqgħu u jgħixu ma’ Alla.21
Meta raġel u mara jiġu ssiġillati fit-tempju, huma jidħlu fl-ordni mqaddsa taż-żwieġ fil-patt ġdid u etern, li hu ordni tas-saċerdozju.22 Flimkien huma jiksbu u jirċievu l-barkiet u l-qawwa tas-saċerdozju biex jiddirieġu l-affarijiet tal-familja tagħhom. In-nisa u l-irġiel għandhom ċerti rwoli uniċi kif hemm f’“Il-Familja: Proklamazzjoni lid-Dinja,”23 iżda r-responsabbiltà tagħhom hija waħda ugwali, kemm fil-valur, kif ukoll fl-importanza.24 Huma għandhom qawwa ugwali biex jirċievu r-rivelazzjoni għall-familja tagħhom. Meta huma jaħdmu flimkien fl-imħabba u fis-sewwa, id-deċiżjonijiet tagħhom jiġu mberkin minn Alla.
Dawk li jfittxu biex ikunu jafu r-rieda tal-Mulej, kemm għalihom bħala individwi, kif ukoll għall-familji tagħhom, għandhom jaraw li ħajjithom tkun dominata mis-sewwa, mill-ħlewwa, mit-tjubija u mill-imħabba. L-umiltà u l-imħabba huma l-karatteristiċi ewlenin ta’ dawk li jfittxu r-rieda tal-Mulej, speċjalment għall-familji tagħhom.
Li nipperfezzjonaw lilna nfusna, li aħna nikkwalifikaw għall-barkiet tal-patti,u li nitħejjew biex niltaqgħu ma’ Alla huma responsabbiltajiet individwali. Jeħtieġ li aħna nkunu kapaċi nfendu għal rasna u b’ħerqa inkunu impenjati li nagħmlu minn djarna refuġju mill-maltemp li jkollna madwarna25 u “santwarju ta’ fidi.”26 Il-ġenituri għandhom ir-responsabbiltà li jgħallmu lil uliedhom b’imħabba. Id-djar li jkunu mimlijin bl-imħabba huma kuntentizza, għaxqa u letteralment ġenna fl-art.27
L-għanja favorita ta’ ommi kienet “Imħabba fid-Dar.”28 Kull meta kienet tisma’ l-ewwel frażi, “Ġmiel madwarna jkollna lkoll bl-imħabba fid-dar,” kienet tħossha verament kommossa u d-dmugħ kien ifeġġ f’għajnejha. Bħala tfal aħna konna konxji li konna ngħixu f’dik it-tip ta’ dar; kienet waħda mill-ogħla prijoritajiet tagħha.29
Minbarra li nħeġġu li jkun hemm atmosfera ta’ mħabba fid-dar, il-President Nelson iffoka wkoll fuq kif aħna għandna nillimitaw l-użu tal-midja li jfixkel l-għanijiet ewlenin tagħna.30 Wieħed mit-tibdil partikolari li se jkun ta’ benefiċċju għal kważi kwalunkwe familja hu li l-internet, il-midja soċjali u t-televiżjoni jkunu għalina qaddejja minflok distrazzjoni jew, saħansitra, dak li jikkmandana. Il-gwerra għall-erwieħ tagħna lkoll, iżda partikolarment għal tat-tfal, qiegħda sseħħ fi djarna. Bħala ġenituri, jeħtieġ li aħna niżguraw li l-kontenut tal-midja ikun xieraq, tajjeb għall-età tal-individwi, u konsistenti mal-atmosfera ta’ mħabba li nippruvaw noħolqu.
It-tagħlim fi djarna jeħtieġ li jkun ċar u kompulsiv31 iżda wkoll spiritwali, ferrieħ u kollu mħabba.
Inwegħidkom li hekk kif aħna niffukaw fuq l-imħabba tagħna lejn is-Salvatur u l-Att tal-Fidwa Tiegħu, u nagħmluh il-qofol tal-isforzi tagħna li niġbru flimkien lil Iżrael fuq iż-żewġ naħat tal-velu, nimministraw lil ħaddieħor, u nitħejjew b’mod individwali biex niltaqgħu ma’ Alla, l-influwenza tal-avversarju tonqos u l-kuntentizza, l-għaxqa u l-paċi tal-evanġelju jimlew djarna b’imħabba bħal ta’ Kristu.32 Jiena nixhed dwar dawn il-wegħdiet duttrinali u niddikjara x-xhieda ċerta tiegħi dwar Ġesù Kristu u s-sagrifiċċju Tiegħu tal-fidwa f’isimna, f’isem Ġesù Kristu, amen.