Mga Yawe, mga Pakigsaad, ug Pasko sa Pagkabanhaw
Mga Kinutlo
Ang pagpakita sa Manluluwas ngadto ni Propeta Joseph Smith ug Oliver Cowdery ug ang mga yawe nga gitugyan pinaagi nila ni Moises, Elias, ug Elijah mahinungdanon sa Pagpahiuli sa ebanghelyo ni Jesukristo sa ulahing mga adlaw. Ang tahas ni Elijah sa pagpahiuli sa mga yawe sa pagkapari sa gahom sa pagselyo importante kaayo sa atong panaw sa pagbalik ngadto sa atong Amahan isip katawhan sa pakigsaad. …
Ang mga Judeo naghulat sa pagbalik ni Elijah sulod sa kapin 2,900 ka tuig, isip usa ka mag-uuna sa pag-abot sa Mesiyas …
Tungod sa Pagpahiuli, atong nasabtan ang importante ug mahinungdanon kaayo nga tahas nga gibuhat ni Elijah sa kaluwasan sa katawhan. Gitugyan ni Elijah ngadto ni Joseph Smith ang mga yawe sa pagkapari nga may kalabotan sa gahom sa pagselyo aron mabugkos ang sagrado nga mga ordinansa ug mga pakigsaad dinhi sa yuta ug didto sa langit. Naglakip kini sa puli nga mga ordinansa sa kaluwasan ug kahimayaan nga kinahanglan ipahigayon dinhi sa yuta diha sa mga templo sa Ginoo. Ang mga ordinansa sa pagselyo epektibo human niining kinabuhia ug sa kahangtoran—aron sa pagselyo sa mga bana ug mga asawa, mga ginikanan ug mga anak. …
Kamo mahimong makabaton niana nga kahibalo ug kompirmasyon pinaagi sa Espiritu kon inyong tun-an ang kinabuhi sa atong Manluluwas, ang pagpahiuli sa pagkapari, ug ang pagbalik sa mga yawe ni Elijah sa pagselyo nga naghiusa sa atong mga pamilya hangtod sa kahangtoran. Mabati ninyo pinaagi sa kasegurohan sa espirituhanong kompirmasyon nga ang atong Manluluwas nakatuman sa plano sa Amahan. Siya miula alang sa atong mga sala ug gibugto ang mga higot sa kamatayon aron kita makabalik ngadto sa Amahan ug sa Anak didto sa celestial nga gingharian.