Higugmaa ang Tanan; Higugmaa ang Matag Usa
Mga Kinutlo
Ang gugma nga sama kang Kristo motubo ug modaghan samtang kini ipakigbahin. Kon atong ipakita sa uban ang putli nga gugma ni Kristo, hingpit nilang mailhan kon unsa kadako ang pagpangga sa Ginoo kanila—ug, agig balos, ang kaugalingon nilang kapasidad sa paghigugma molambo ug molig-on. …
Mosaksi ko niini nga kamatuoran: Ang Dios ug ang Iyang Anak, si Jesukristo, nahigugma sa tanan—ug gihigugma Nila ang matag usa. …
Isip mga disipulo ni Jesukristo, kita mopamatuod Kaniya matag higayon nga atong ipakigbahin ang Iyang gugma ngadto sa tanan sa atong palibot—ug tabangan kini nga mogamot sa matag tawo nga atong mahimamat. …
Una, magmahigugmaon sa tanan.
Mga pilian ba kita, o makinaugalingon, sa pagtino kon kinsa ang takos sa atong gugma, o kita ba mopakita og sama kang Kristo nga gugma ngadto sa tanan nga atong gikauban? …
Ang pagkadisipulo wala gayod gituyo nga mahimong usa ka komportable nga sirkulo sa pamilyar nga mga higala nga nakatutok sa kaugalingon nilang mga interes. Hinuon, ang atong mga kongregasyon mga matahom nga nagkahiusang pagkadaiya [mosaic]—gipanindot sa lahi-lahi nga mga kaagi, mga kultura, ug mga kasinatian—apan nahiusa sa debosyon ngadto ni Kristo. …
Ikaduha, magmahigugmaon sa matag usa.
Mabaw ra ba ang atong pagpakig-uban sa uban, o tinud-anay ba kitang naningkamot nga makaila ug mopangga sa matag tawo nga atong mahimamat?. …
… Samtang mosulod kita sa panon ni Kristo pinaagi sa sagrado nga mga pakigsaad, kita mailhan, maihap, ug maatiman—usa ka tawo matag higayon. …
Samtang kita moatiman sa matag kalag, gitabangan nato silang makonektar sa Manluluwas, nagdapit kanila nga mamaayo ug mabag-o pinaagi sa Iyang maulaong dugo. Agig balos, ang atong kaugalingong kinabuhi mapanalanginan—mas mahisama kita sa Manluluwas ug mapuno sa hingpit nga kalipay.