Buhi diha kang Kristo
Mga Kinutlo
Naghunahuna ko kon hingpit ba natong nasabtan ang dakong kamahinungdanon sa atong pagtuo sa usa ka literal, unibersal nga pagkabanhaw. Ang kombiksyon nga ang kamatayon dili mao ang kataposan sa atong pagkatawo nag-usab sa tibuok panglantaw sa atong mortal nga kinabuhi. …
Ang pagkinabuhi nga takos aron mohimamat ni Kristo dili sayon nga buluhaton. Daghang mga magsusulat karon ang naghulagway sa panahon nga atong gipuy-an isip makahilo, usa ka panahon sa pagtamay o pagkamabatokon ngadto sa mga kaaway. …
Ang atong Manluluwas, si Jesukristo, nagtudlo kanato kon unsaon sa pagpakig-uban sa usag usa. Ang dagkong mga sugo sa balaod, Iyang gitudlo, mao ang paghigugma—sa Dios ug sa silingan (tan-awa sa Mateo 22:37–39). …
… Karon mahimo natong isulti nga kita gisugo sa paghigugma sa atong mga kaaway. Ang tanang mortal mga hinigugmang anak sa Dios. …
… Ang mga pakigsaad nga atong gihimo dili kalikayan nga nagbutang kanato isip matinud-anon nga mga partisipante sa mahangtoron nga panglimbasog tali sa kamatuoran ug sayop. Atong balansehon ang atong nagkalainlaing mga responsibilidad.
Kini nga pagbalanse dili sayon. … Apan isip mga sumusunod ni Kristo, kinahanglan kitang maningkamot nga magpuyo nga malinawon ug mahigugmaon kuyog sa ubang mga anak sa Dios nga wala nakigbahin sa atong mga mithi ug wala magbaton sa mga obligasyon sa pakigsaad nga atong gidawat. …
… Kita makasunod sa ehemplo ni Jesukristo, kinsa mao ang atong ehemplo, pinaagi sa pagpili sa paghigugma sa uban—bisan kon sila mopakita og gamay ra o walay gugma kanato. …
… Kini makapausab gayod sa kalibotan kon wagtangon sa mga sumusunod ni Kristo ang mapintas ug sakit nga mga pulong sa tanan nilang mga komunikasyon. …
Mga kaigsoonan, isip mga sumusunod ni Kristo, sundon nato Siya pinaagi sa paglikay sa panaglalis ug pinaagi sa paggamit sa pinulongan ug mga pamaagi sa mga tigpasiugda og kalinaw.