Mga Pag-ampo alang sa Kalinaw
Mga Kinutlo
Ang pagdangop ngadto sa Langitnong Amahan pinaagi sa mainitong pag-ampo sa panahon nga ang kalibotan daw nagkaguliyang gihimo na sukad pa sa sinugdanan sa kalibotan. Sa mga panahon sa kahadlok, trahedya, peligro, kasamok, o sakit, ang mga tawo kanunay nga modangop sa Dios pinaagi sa pag-ampo. Ang Iyang Hinigugmang Anak, si Jesukristo, nga pinaagi sa Iyang ngalan kita nag-ampo, buhi, nakaila kanato, nagbantay kanato, ug nag-atiman kanato. …
Sa mga gutlo sa kasakit, kamingaw, o kalibog, kita nasayod nga ang atong Langitnong Amahan ug ang Iyang Hinigugmang Anak nakahibalo sa atong mga kahimtang ug nga Sila nagtinguha sa pagpanalangin kanato. …
Ang pag-abli sa mga bintana sa langit pinaagi sa mainiton nga pag-ampo wala magkinahanglan og daghang pulong o mabulak-bulakon nga pinulongan. Hinuon, ang kakugi sa pag-ampo nga gikinahanglan sa Langitnong Amahan nga kita “mobu-bo sa [atong] mga kalag” sa pribadong mga dapit ug ang atong mga kasingkasing “magpadayon sa pag-ampo ngadto kaniya sa kanunay.” …
Ang Ginoo naghatag usab kanato og makapatandog nga ebidensya sa gahom sa wala gisulti nga mga pag-ampo nga gihalad sulod sa atong mga kasingkasing. …
Samtang kita magpadayon sa pag-ampo, bisan unsa pa ang mga kahimtang sa kinabuhi, ang Ginoo mohatag kanato sa Iyang kalinaw ug makanunayong suporta. …
… Ang makanunayong pag-ampo atol sa malipayong mga panahon ug usab atol sa mga panahon sa kalisod ug kasubo seguradong gantihan sumala sa Iyang kabubut-on ug tukma nga panahon.
Ako nasayod nga ang Dios nga Amahan buhi. Siya nahigugma nato. Maminaw Siya sa atong mga pag-ampo, ug sa daghang higayon motubag Siya pinaagi sa mga pagbati sa kalinaw. …
Mga kaigsoonan, ako mopamatuod nga ang saad sa Manluluwas tinuod ug nga ang usa ka mapaubsanong pag-ampo alang sa kalinaw sa inyong kasingkasing pagatahoron.