Jesukristo—ang Matuod nga Punoan sa Paras
Mga Kinutlo
“Ako mao ang tanom nga parras. … kamo mao ang mga sanga: Ang magapabilin kanako, kang kinsa magapabilin ako, mao siya ang magapamungag daghan: kay gawas kanako wala gayud kamoy arang mahimo.”
Pinaagi niining matahom ug makapatandog nga metapora, ang Manluluwas nagtudlo nga Siya ang matuod, kasaligan, ug importante nga tinubdan sa espirituhanong pag-amuma sa atong mga kalag. …
Ang pagpabilin diha kang Kristo dili usa ka panagsa o kaswal nga buhat; kini usa ka makanunayon, mahunahunaon, ug sagrado nga pagpili. …
Ang pagpabilin diha kang Kristo dili makatangtang sa mga palas-anon sa kinabuhi, apan pinaagi sa Iyang grasya kini mahimong mas gaan, ug ang atong mga kasingkasing malig-on pinaagi sa kahupayan ug kalinaw nga Iyang gisaad. …
Minahal kong kaigsoonan, ang tinuod nga kaalam sa atong panahon sa teknolohiya makita diha sa paggamit sa modernong mga himan uban ang espirituhanong pag-ila—pinaagi sa Espiritu Santo—nga dili motugot niini nga mopuli sa hustong tingog sa Matuod nga Punoan sa Paras. Ang atong Manunubos lamang ang tinuod nga makatubos kanato. Siya mao ang dalan, ang kamatuoran, ug ang kinabuhi sa kalibotan. …
Ang Matuod nga Punoan sa Paras nagtanyag og usa ka butang nga mas labaw ug mahangtoron kay sa kasikat o pagdayeg—ang saad nga “makapuyo sila uban sa Dios sa kahimtang nga walay kataposang kalipay.” …
… Kadtong magpabilin diha kang Jesukristo makaila ug mosalig sa Iyang tingog, ilabi na kon kini gisulti pinaagi niadtong Iyang gitawag aron morepresentar Kaniya. …
Niining sagrado nga panahon sa Pasko sa Pagkabanhaw, ako ligdong nga mopamatuod nga si Jesukristo mao ang Matuod nga Punoan sa Paras. Siya buhi. Nabanhaw Siya gikan sa mga patay, ug ang Iyang matubsanong gahom tinuod.