“Ania Ako, Ipadala Ako”
Mga Kinutlo
Gihigugma kaayo sa Langitnong Amahan ang Iyang mga anak nga gusto Niya nga ang matag usa kanato makadawat sa tanang panalangin nga Iyang natagamtaman. …
Ang Langitnong Amahan nahibalo nga kon moanhi kita sa yuta, mahimo kitang masayop ug magkinahanglan og tabang aron makabalik Kaniya. Nahibalo ba mo kon kinsa ang gipili sa Langitnong Amahan nga motabang kanato? Oo, si Jesus! Dako kaayo ang gugma ni Jesukristo sa Langitnong Amahan ug kanato, Siya miingon, “Ania ako, ipadala ako.”
Ang Langitnong Amahan mipadala ni Jesus dinhi sa yuta. Gipakita niya kanato unsaon sa pagpakabuhing malipayon. Gitudloan niya kita unsaon paghigugma sa Dios ug paghigugma sa uban. Sa Getsemani, giantos ni Jesukristo ang kasakit sa tanan natong mga sala ug mga hagit. Namatay Siya sa krus ug dayon, sa tanang labing dako nga milagro, nabanhaw Siya! Mao kana ang atong gisaulog karon sa Pasko sa Pagkabanhaw! Si Jesus, ang atong Ginoo ug Manluluwas, midaog sa gubat batok sa tanan nga lisod ug dili patas sa atong kinabuhi.
Si Jesukristo nakaila kaninyo, Siya nakasabot kaninyo, ug Siya nahigugma kaninyo. Gibuhat na ni Jesus ang tanan aron matabangan kamo. Pabilin nga duol Kaniya. Pagkat-on sa tanan nga inyong mahimo mahitungod Kaniya. Samtang maningkamot ka sa pagtuman sa labing importante nga mga sugo sa paghigugma sa Dios ug paghigugma sa uban, Siya motabang kanimo nga motubo ngadto sa talagsaong tawo nga kamo angayan nga mahimo! …
Gidapit ko kamo sa pag-ampo sa Langitnong Amahan ug mosulti, sama sa gibuhat ni Jesus, “Ania ako, ipadala ako.” Ug dayon padayon sa unahan, paglakaw uban Kaniya aron madala ang inyong kaugalingon ug ang uban ngadto ni Kristo.