Tanan Kinsa Makalahutay nga Maisogon
Mga Kinutlo
Ang paglahutay hangtod sa kataposan dili lamang usa ka walay hunong nga determinasyon sa pagkagot sa atong mga ngipon, pagsalig sa mga limitasyon sa atong pisikal nga kusog ug mental nga kapasidad, ug pagpadayon sa mga hagit ug mga kalisdanan sa mortal nga kinabuhi; kini labaw pa gayod niana. …
Ang paglahutay hangtod sa kataposan nakakonektar gayod sa espirituhanong gasa sa gugmang putli [o ang tiunay nga gugma ni Kristo]. …
Samtang kita mapanalanginan nga makadawat niining langitnon nga gasa, usa ka pagbag-o ang mahitabo sa atong espirituhanon nga kinaiya ug batasan. …
Alang sa mga disipulo sa Manluluwas, ang gugmang putli naglangkob sa unsa ang atong gibuhat ug sa unsa kita mamahimo samtang kini nga espirituhanon nga gasa sa kataposan moangkon kanato. …
Samtang kita mosunod, mohigugma, ug moserbisyo sa Manluluwas, kita anam-anam nga dili kaayo motutok sa atong kaugalingong mga tinguha ug interes ug mas motutok sa pagsabot ug pagtubag sa mga panginahanglan sa uban. Dili lang kita mohimo og mga buhat sa kaayohan; hinuon, ang atong kahimtang mausab ug mahimong mas mahisama kang Kristo. Busa, ang gugmang putli sa kataposan mao ang moangkon kanato. …
Ang hugpong sa mga pulong sa kasulatan nga “paglahutay hangtod sa kataposan” usa ka gibalik-balik nga pahinumdom sa dakong espirituhanong kausaban sa atong mga kasingkasing [tan-awa sa Mosiah 5:2] nga kinahanglan nga magpadayon sa tibuok natong kinabuhi; kini usab ang Iyang saad kon unsa kita mamahimo kon kita tinuod nga naangkon sa tiunay nga gugma ni Kristo.