Digital Lamang: Mga tubag gikan sa usa ka Apostol
Unsay Ipasabot sa Paghigugma sa Uban sama sa Paghigugma sa Manluluwas Kanako?
Ania ang duha ka panghunahuna mahitungod sa “bag-o nga sugo” sa Manluluwas.”
Gikan sa usa ka pakigpulong nga gihatag atol sa seminar alang sa bag-o nga mga lider sa misyon niadtong Hunyo 26, 2020
Sa kanunay maghunahuna ako mahitungod sa kabalaka nga tingali gibati ni Jesus samtang nasayran Niya nga ang Iyang mortal nga pangalagad nagkaduol na ang kataposan ug nga ang inadlaw, padayon nga pagpadagan sa Iyang bag-o lang kaayo nga Simbahan mapatong ngadto sa mga abaga sa usa ka dosenang ordinaryo kaayong mga tawo nga nasakop sa Simbahan labing dugay mga 36 ka bulan lamang. Igo na ba kaha ang ilang mga nahibaloan? Nasabtan ba kaha nila ang bisan unsang bahin sa unsay Iyang gipaningkamotan sa hilabihan nga itudlo kanila? Ila ba kahang mapas-an kining labihan kadako nga responsibilidad sa malamposong paagi?
Unsa nga kataposang leksiyon ang Iyang itudlo nga modala kanila latas sa Iyang pisikal nga pagkawala? Uban sa pangaliya, sa tinuod ang usa ka sugo, nga modulot kanato karon sama sa nahimo kaniadto, nga gisumada sa buhi nga Anak sa Dios sa Iyang tibuok nga pangalagad ug sa ilang kataposan, padayong responsibilidad sa usa ka konsepto—usa nga labing halapad, mahangturon nga baroganan:
“Ako magahatag kaninyo og bag-ong sugo, Nga kinahanglan maghigugmaay kamo ang usa sa usa; maingon nga Ako nahigugma kaninyo, kinahanglan maghigugmaay usab kamo ang usa sa usa.
“Kon maghigugmaay kamo mahibalo ang tanan nga kamo akong mga tinun-an.”
Duha ka Panghunahuna mahitungod Niini nga Bag-o nga Sugo
Motanyag ko og duha ka dihadiha nga mga panghunahuna mahitungod niini bag-o nga sugo nga gihatag kanato.
Una, kining kataposan nga Kristiyanismo nga sugo sa paghigugma ingon og yano kaayo. Si Jesus mahunahunaon kaayo sa pagpili sa usa ka baroganan, sa usa ka pangsukod nga tukon alang sa kalamposan nga sayon kaayo gunitan, kon dili man sayon kaayo nga sundon.
Ikaduhang panghunahuna nagtutok sa Manluluwas nga mitawag niining usa ka “bag-ong sugo,” kon gusto kong moingon, “Apan dili kini bag-o.”
Tingali makatabang ang pagkahibalo nga ang Griyego nga pulong nga gigamit dinhi alang sa “bag-o (kainen) nagpasabot og ka-presko, o katugbang sa dili na magamit, kay sa yano nga bag-o lang o lahi.” Kana nga lab-as o wala pa masulayi nga kahulogan niining bag-o nga sugo mao nga kini nga mga disipulo—ug sa tanan kanato—kinahanglan nga mohigugma sama sa paagi sa paghigugma ni Jesus: “Sama sa akong paghigugma kaninyo.” Mao kana ang bag-o nga bahin, ang lahi nga bahin, sa labihan ka daan nga balaod.
Ug may mga butang pa nga bag-o usab. Unsay gibuhat sa Manluluwas, ang Hanas nga Magtutudlo, mao ang pagbahin nianang usa sa dako nga sugo sa paghigugma ngadto sa duha ka bahin. Oo, kinahanglan sila nga mohigugma sa usag usa, apan si Kristo mitudlo nga mahimo kanang posible sa labing taas nga paagi lamang pinaagi sa paghigugma og una sa Dios. Sa ingon niana, mahimo Niyang isulti ang dako nga sugo isip ang duha ka dako nga sugo, walay usa ka bahin niini ang makompleto nga wala ang usa.
Si Presidente Howard W. Hunter kausa mitudlo: “Ang paghigugma sa atong isigkatawo maggikan sa gugma sa Dios nga maoy tinubdan niini.”
Kana nga panglantaw labihan ka lisod—bag-o, tingali moingon kita—ngadto sa pagsabot sa duha ka dako nga sugo. Sa Iyang tibuok nga pangalagad, si Kristo padayong miklaro sa Iyang walay pagkausab nga kamaunongon, sa Iyang hingpit nga kamasulundon, ug sa Iyang linahi nga relasyon sa paghigugma sa Iyang Amahan. Ang paghigugma sama sa paghigugma ni Kristo—“sama sa akong paghigugma kaninyo”—mao ang paghigugma sa Amahan labaw sa tanan, sa pagsunod Kaniya hangtod sa kataposan, ug didto makakaplag sa balaan nga pagdasig sa paghigugma sa atong mga isigkatawo sama sa atong kaugalingon. Sa pagkatinuod usa kini ka “bag-o nga ideya.”
Unsay Hitsura Niini nga Gugma
Si Mormon mihatag sa tingali labing maayo nga napaabot nga pamahayag sukad mahitungod niini nga matang sa gugma-—mahitungod sa gugmang putli, iyang tawag niini, “ang putli nga gugma ni Kristo”:
“Ang gugma nga putli mainantuson, ug mabination, ug dili masinahon, … dili dali nga masuko, dili maghunahuna sa dautan, … mainantuson sa tanan nga mga butang, matuohon sa tanan nga mga butang, molaum sa tanan nga mga butang, molahutay sa tanan nga mga butang.
“Busa, akong hinigugma nga mga kaigsoonan, kon kamo walay gugma nga putli, kamo walay kapuslanan, kay ang gugma nga putli dili mopakyas. Busa, unong ngadto sa gugma nga putli, nga mao ang labing mahinungdanon sa tanan. …
“Apan ang gugma nga putli mao ang tiunay nga gugma ni Kristo, ug kini molahutay sa kahangturan; ug bisan kinsa nga makaplagan nga aduna niini sa katapusan nga adlaw, kini makaayo uban kaniya.”
Si Eliza R. Snow kausa mireport sa usa ka pakigpulong nga gihatag ni Propeta Joseph Smith diin gigamit niya kadto nga mga bersikulo ug sa mga kaubanan niini gikan sa 1 Mga Taga-Corinto 13 isip iyang teksto. Niana nga sermon si Joseph miingon:
“Kinahanglan nga inyong ablihan ang inyong mga kalag alang sa uban kon magbuhat kamo og sama kang Jesus. … [Kamo] kinahanglan nga mosabot sa matag usa nga kapakyasan, isip mapatuyangon nga mga ginikanan ngadto sa huyang nga mga anak.
“… Ablihi ang inyong mga kasingkasing—ablihi kini alang sa uban; kinahanglan nga magmainantuson kamo ug mosabut sa mga kasaypanan ug sayop sa isigkatawo. Pagkabililhon sa mga kalag sa katawhan!”
Joseph ug Hyrum: Mga Ehemplo sa Kristohanon nga Paghigugma
Sa gabii sa wala pa si Propeta Joseph Smith, ug iyang igsoong lalaki nga si Hyrum Smith gipatay—sa pagkagabii sa Hunyo 26, 1844—giablihan na usab ni Hyrum ang Basahon ni Mormon, tingali didto na usab sa ika-12 nga kapitulo sa Ether, nga bag-o lang niyang gibasa. Nianang malisod nga panahon, sa mangitngit nga dapit, gibasa niya ang mahitungod sa makaluwas nga grasya sa gugmang putli, gani batok niadtong tingali mangalagad og walay kaangayan, kabayolente, ug kamatayon.
Kana nga pagpamatuod, gitanyag niana nga dapit, gibasa nianang gabii gayod sa kamatayon, mao ang usa sa 10,000 ka mga rason diin ako nasayod nga ang Basahon ni Mormon tinuod. Walay usa, gani bisan kinsa, nga moatubang na sa ilang Magbubuhat moabli og usa ka basahon sa kaugalingon nilang pagkalalang, nagtinguha og mahangturon nga paghupay niini, ug mokutlo gikan niini isip ang kataposang testamento nga ilang ikahatag sa mortalidad. Kining mga tawhanana walay gisulti kon unsang mga pasiaw ang ilang gipanghimo. Wala sila mangatawa kon pila ka tawo ang ilang gibinuangan. Wala, dala ang Basahon ni Mormon nga ilang gikuptan ug sa usa ka ekspresyon sa gugmang putli sa ilang mga ngabil, kining duha nangandam sa pagbarog sa atubangan sa hukmanan nga lingkoranan ni Kristo.
Ang matag elemento niining masulob-ong kasinatian nagsinggit og “kamatuoran, kamatuoran, kamatuoran.” “Ang mga tigpamatuod karon patay na, ug ang ilang testamento gigamit.” Ang ilang mga sapot sa gihapon walay lama.
“Walay bisan kinsa nga may gugma nga labaw pa niini, nga ang usa ka tawo naghalad sa iyang kinabuhi sa pagpakamatay alang sa iyang mga higala.” Sa pagkatinuod gihigugma ni Joseph ug ni Hyrum ang Ginoo.
Tingali dili kamo hangyoon sa pagtugyan sa inyong mga kinabuhi sama sa ilang gihimo, apan makahigugma kamo sa Manluluwas sa sama sa ilang gihimo. Palihog ablihi ang inyong mga kasingkasing ug batia ang gugma sa Ginoo alang kaninyo. Tugoti nga Siya mohunghong diha ninyo kon unsaon sa pagpakigbahin niana nga gugma ngadto sa Iyang mga anak.