Hisgotan Nato ang mahitungod sa Kwarta!
Labaw pa nga piho, basahon nato ang mahitungod sa dihang nagtudlo si Jesus mahitungod sa kwarta.
Mga paghulagway pinaagi ni Alyssa Petersen
Si Jesus nagsulti mahitungod sa kwarta sa daghang higayon diha sa mga kasulatan.
Ang “mga bahandi sa langit” (Mateo 6:20), ang sambingay sa mga puntil sa salapi (Mateo 25:14–30), o “dad-a ninyo ang tibuok ikapulo ngadto sa balay nga tipiganan” (Malaquias 3:10) mura og pamilyar? Atong rebyohon!
Mga Kinahanglan bersus Mga Gusto
Si Jesus nakahibalo nga adunay daghang butang nga inyong gikinahanglan (pananglitan, pagkaon) ug gusto (pananglitan, mga dula). Siya nagtudlo, “Pagtigom hinuon og mga bahandi alang sa inyong kaugalingon didto sa langit, diin walay taya ug anay nga makakutkot” (Mateo 6:19–21). Kadaghanan sa unsay mapalit sa kwarta hinay-hinay nga mawala o di na magamit, mao nga pagbantay kon unsa ang inyong paliton.
Mahimo kamo nga makaamping sa kwarta kon inyong ilain ang inyong mga panginahanglan gikan sa inyong mga gusto. Hunahunaa sa inyong kaugalingon, “Ako ba nga paliton kini tungod kay ako nagkinahanglan niini o tungod kay gusto nako kini?” Kon dili kamo segurado, sulayi sa paghulat og usa ka bulan; human molabay kana nga panahon, ipangutana og usab kadto nga mga pangutana. Pinaagi sa pagbuhat niini, inyong malikayan ang pagpalit og mga butang nga dinalian ug pagsulay nga daygon sa uban. Hinuon, mohimo kamo og maalamong mga desisyon kon kanus-a magtigom ug kanus-a mogasto og kwarta.
Paggamit sa Kwarta aron Mopanalangin sa Uban
Diha sa sambingay sa mga puntil sa salapi, si Jesus naglarawan sa agalon kinsa naghatag og lain-lain nga mga kantidad sa kwarta (gitawag og “mga puntil sa salapi”) ngadto sa tulo ka sulugoon. Duha ka sulugoon ang midoble sa kwarta nga gihatag nila, ug ang usa ka sulugoon milubong sa kwarta. Sa dihang mibalik ang agalon, nalipay siya sa duha ka sulugoon nga mipalambo sa ilang mga puntil sa salapi ug wala malipay sa sulugoon nga wala mopalambo niini (tan-awa sa Mateo 25:14–30).
Sama nga ang agalon diha sa sambingay mihatag sa iyang mga sulugoon og mga puntil sa salapi, kon ang Dios mopanalangin ninyo og kwarta, Siya maglaom nga gamiton ninyo ang inyong mga panalapi aron mopanalangin sa inyong kaugalingon ug sa uban. Samtang inyong atimanon ang uban, inyong gituman ang sugo ni Jesus nga “higugma[on] ang inyong isigkatawo sama sa inyong kaugalingon” (Marcos 12:31).
OK lang nga mopalit og nindot nga mga butang, apan kinahanglan usab nga inyong ikonsiderar ang mga panginahanglan sa inyong kaugalingon ug sa uban sa dili pa kamo mopalit. Samtang inyong hunahunaon ang panginahanglan sa uban, ang Dios motabang ninyo nga makahibalo unsaon sa paggamit sa kwarta aron panalanginan ang mga tawo sa inyong kinabuhi.
Mga Panalangin alang sa Ikapulo
Kon kamo nabalaka nga dili paigo ang inyong kwarta tungod kay nagbayad kamo og ikapulo, basaha kining makahupay nga mga pulong gikan sa Dios: “Dad-a ninyo ang tibuok ikapulo ngadto sa balay tipiganan … ug pinaagi niini sulayi ninyo ako … kon dili ba nako buksan kaninyo ang mga tamboanan sa langit, ug ibubo nako kaninyo ang nag-awas nga panalangin” (Malaquias 3:10). Kon mobayad kamo sa inyong ikapulo, ang Dios mopanalangin kaninyo nga mas labaw pa sa inyong mahunahunaan!
Tingali dili mo panalanginan sa temporal nga mga paagi—tingali wala moy kwarta nga gusto ninyo aron mapalit ang mahalong sinina nga gusto nimo, mao nga tingali kinahanglan ninyong ilangan ang dihadiha dayon nga katagbawan. Apan ang Ginoo mopanalangin kaninyo. Sa kadugayan, makita ninyo nga mas sayon na ang pagbayad og ikapulo, ug ang inyong espiritu mahimong mas daling makabawi gikan sa inyong pinansiyal nga mga kabalaka.
Ang Dios Motabang Kaninyo
Salig sa mga pulong ni Presidente Russell M. Nelson: “Walay kinutoban sa kapasidad sa Manluluwas sa pagtabang kaninyo” (Okt. 2024 nga kinatibuk-ang komperensiya [Liahona, Nob. 2024, 122]). Pinaagi sa mainampingong paggamit sa inyong kwarta aron masangkapan ang inyong mga panginahanglan, moatiman sa uban, ug mobayad sa inyong ikapulo, inyong madiskobrehan ang mas lawom nga gugma alang sa Dios ug sa uban ug ang pagpasalamat kon unsay anaa ninyo.