Tabang ug Giya alang sa Inyong Kaugmaon
Ang kinabuhi dili kanunay nga mosunod sa inyong mga plano, apan ang pagsalig diha sa Ginoo makapausab sa inyong kinabuhi aron mahimong mas maayo.
Usahay ingon og ang kalibotan puno sa walay kaseguroan. Tingali maghunahuna kamo kon unsay gitagana alang sa inyong kaugmaon. Mao usab ang akong gibati.
Ang akong mga ginikanan ug ako mipasakop sa Simbahan sa dihang 16 anyos pa ko. Nianang higayona, maulawon kaayo ko. Human magpasakop sa Simbahan, nakaangkon ko og kompiyansa. Nakat-onan nako kon kinsa ako, diin ako gikan, nganong ania ako dinhi, ug asa ako paingon human niini nga kinabuhi.
Akong naamgohan nga bisan tuod wala ko masayod sa detalye kon unsa nga matang sa mga butang ang akong buhaton sa akong kinabuhi, adunay tabang ug giya nga mogiya nako ngadto sa usa ka maayo nga kaugmaon.
Mao usab kini kanimo!
Giya gikan sa Propeta
17 anyos ko sa dihang ang propeta, si Presidente Spencer W. Kimball (1895–1985), mibisita sa South Korea niadtong 1975. Nakita nako siya diha sa usa ka miting diin mga 400 ka Korean nga mga batan-on ang nagpundok aron maminaw sa iyang tingog.
Si Presidente Kimball mipakigbahin kon giunsa niya pagtuon ang mga kasulatan ug pag-ampo kada adlaw sukad sa bata pa siya. Naghisgot siya mahitungod sa kaimportante sa pagtakda og mga prayoridad. Miingon siya nga kita kinahanglang motambong og seminary, mag-andam alang sa misyon ug mahangtorong kaminyoon, ug maningkamot padulong sa kaluwasan. Mipakigbahin usab siya sa iyang pagpamatuod.
Ang mga pulong sa propeta naglamdag sa akong panghunahuna. High school pa ko ato, apan dili ko interesado sa buluhaton sa eskwelahan. Ganahan ko og mga dula! Magdula ko og soccer kon naa koy higayon ug kasagaran magdula kaysa magtuon. Dili ko maayo nga estudyante. Human makadungog sa propeta, ganahan gihapon ko og soccer, apan nakadesisyon ko nga maghimo og pipila ka prayoridad.
Buhaton nako kutob sa akong mahimo nga magtuon. Moserbisyo ko og misyon, magpaselyo diha sa templo, ug magbaton og malipayon nga pamilya. Nasayod ko nga aron maangkon nako kining talagsaon nga kaugmaon, kinahanglan nakong mosunod sa propeta—bisan unsa pay mahitabo.
Uban sa tanang mga oportunidad ug mga hagit nga imong nasinati, ma-OK ra ka kon sundon nimo ang giya nga gihatag sa buhi nga mga propeta.
Usa ka Dili Segurado nga Misyon
Mipasalig ko nga moserbisyo og misyon, apan adunay gikinahanglan usab nga moserbisyo sa militar sa South Korea. Human sa high school, daghang batan-on nga kalalakin-an ang misulod sa militar, mituman sa ilang gikinahanglan nga serbisyo, ug diha-diha dayon mipadayon og edukasyon ug nakakita og mga trabaho. Lisod ang paghatag og laing duha ka tuig sa misyonaryo nga pagserbisyo. Dunay pipila lamang ka elder nga Koreano.
Sa dihang nag-edad ko og 19, akong gituman ang akong pasalig ug giandam ug gipadala ang akong mga papeles sa misyon. Gitawag ko nga moserbisyo sa Korea Busan Mission. Usa ka tuig ang milabay, gidani ko sa militar. Naguol kaayo ko nga kinahanglan kong mohunong sa akong misyon.
Dihang nahuman nako ang akong pagserbisyo sa militar paglabay sa tulo ka tuig, gibati nako nga wala pa makompleto ang akong misyon. Ang tanan misulti nako nga, “Nakaserbisyo na ka og misyon. Ang Ginoo nakasabot sa imong sitwasyon, mao nga ang pagserbisyo og usa lang ka tuig OK na.”
Nangutana ko sa akong suod nga higala sa seminary kon unsa gyod ang akong buhaton. Miingon siya nga siya nasayod nga ako moserbisyo og laing tuig sa akong misyon. Ang iyang pagsalig mihatag nako og kompiyansa ug kompirmasyon nga moserbisyo pa. Miserbisyo ko sa ikaduha nga tuig sa akong misyon didto sa Korea Seoul Mission. Sa higayon nga akong nahuman, 25 anyos na ko. Sa wala madugay naminyo ko nianang samang higala ug naselyo mi didto sa Laie Hawaii Temple.
Kini nga kasinatian mitudlo kanako nga mamaayo ra ka bisan kon ang mga butang dili mahitabo sa paagi nga inyong giplano. Kon ang inyong mga plano ug tumong mohaom ngadto sa kabubut-on sa Ginoo alang kaninyo, Siya motabang kaninyo sa inyong mga desisyon sa kinabuhi.
Ang Maayo nga Kaugmaon Posible
Bisan tuod dili ko segurado isip usa ka batan-on kon unsa nga matang sa kinabuhi ang akong maangkon, akong nahibaloan nga ang pag-una sa espirituhanong mga butang mao ang mahinungdanon alang sa kalamposan—dili lang niini nga kinabuhi, apan usab sa kinabuhi sa umaabot.
Sa dihang nabunyagan mo, nadawat ninyo ang gasa sa Espiritu Santo. Kon inyong hatagan og gibug-aton ang mga pag-aghat nga inyong madawat, ang Espiritu Santo manalipod kaninyo ug mogiya kaninyo sa sakto nga dalan nga inyong padulngan. Mabati usab ninyo ang kahupay ug kalinaw.
Samtang mag-andam kamo alang sa inyong kaugmaon, hinumdomi ang:
-
Pagtuon sa mga kasulatan.
-
Padayon sa pag-ampo.
-
Pagsunod sa propeta.
-
Kanunay nga mosalig sa Ginoo.
Sa dihang ako sama sa inyong pangidaron, akong nakat-onan ang mahitungod sa mga kinaiya ug mga hiyas sa Manluluwas nga ako mahimong sama Kaniya. Siya hingpit. Dili ko hingpit nga mahisama Kaniya niini nga kinabuhi, apan naningkamot ko kutob sa akong mahimo, ug nahimo kong mas maayo sa pagbuhat sa ingon.
Ako nasayod nga si Jesukristo buhi. Tungod Kaniya, ako adunay dakong paglaom alang sa umaabot—ug kamo makahimo usab!