Dali, Sunod Kanako
Doktrina ug mga Pakigsaad 71; 77; 82
Nakatago nga mga Bahandi
Kon tun-an pag-ayo ang kasulatan mas daghang benepisyo ang makuha kay sa pagsabot lang sa mga pulong nga anaa sa pahina.
Ang Ginoo mopalibog sa atong mga kaaway sa Iyang kaugalingong tukma nga panahon.
Ang Ginoo mopalibog sa atong mga kaaway sa kataposan.
Ang “mopalibog” sa usa ka tawo nagpasabot nga sorpresahon, pildihon, pakaulawan, hadlokon, o padismayahon sila.
Mao nga sa dihang ang Ginoo miingon ni Joseph Smith nga “kon adunay tawo nga mosupak batok kaninyo mahingpit ang iyang kapildihan sa akong kaugalingong tukma nga panahon” (Doktrina ug mga Pakigsaad 71:10), Siya nagsaad nga kadtong mosupak sa ebanghelyo sa umaabot nga adlaw makasinati sa negatibo nga mga sangpotanan sa ilang mga pagpili.
“Sa akong kaugalingong tukma nga panahon” nagpasabot nga ang Ginoo adunay Iyang kaugalingon nga tayming. Kinahanglan natong dawaton nga daghang tawo ang dili mahimong manubag alang sa ilang mga gibuhat dihadiha dayon—ug OK ra kana. Kinahanglan mosalig kita sa Ginoo ug sa Iyang tukmang panahon.
Kinahanglan kitang mobarog sa kamatuoran, siyempre. Apan sa pagbuhat nato niini, kinahanglan motahod kita sa mga gituohan sa uban ug sa ilang katungod nga mopili nga dili dawaton ang ebanghelyo.
Ayaw kabalaka mahitungod sa mga tawo nga gihimo na nga misyon ang pagpanaway ug pagdaot sa Simbahan, kinsa andam nga mamakak ug motuis sa atong mga gituohan. Isalig na lang kini sa Ginoo. Siya mopalibog kanila ug mohatag nila og kahigayonan nga makat-on ug mausab—sa kataposan.
Sama nato, ang mga hayop mahangtorong mga nilalang nga giatiman sa Langitnong Amahan.
Ang atong higalang mga hayop gilalang usab sa Langitnong Amahan.
Tingali mura kini og gamay lang nga detalye, apan adunay usa ka butang nga tinuod nga nindot kaayo nga gipadayag diha sa Doktrina ug mga Pakigsaad 77: May kalag usab ang mga hayop!
Kini usa ka butang nga gituohan kanunay sa daghang tawo—kini mabati nga tinuod—bisan kon ang Biblia ug Basahon ni Mormon wala gayod mohatag og tukma nga mga detalye. Karon ang Ginoo mipahayag niini sa dili piho nga mga pulong.
Sama sa mga tawo, ang mga “mananap” ug “mga butang nga nagkamang” ug “mga mananap sa kahanginan” espirituhanon nga gilalang sa sinugdanan. Ang ilang espiritu nga mga lawas, sama sa atoa, susama sa ilang pisikal nga mga lawas. Ug sila, sama nato, makatagamtam sa ilang “walay kataposan nga kalipay”—kamaya ug hingpit nga kalipay sa ilang nabanhaw nga mga lawas. (Tan-awa sa Doktrina ug mga Pakigsaad 77:2–3.)
Kita nakahibalo nga ang Langitnong Amahan milalang sa mga hayop, mihatag kanato og pagkatinugyanan nila, ug gusto nga mabination kita nga motratar nila. Sama nato, sila mahangtorong mga nilalang kinsa giatiman sa Langitnong Amahan.
Gamita sa matarong ang mga panalangin nga inyong nadawat.
Ang ideya nga uban sa dako nga gahom moabot ang dako nga responsibilidad wala magsugod sa mga superhero. Ang Manluluwas mipadayag sa sama nga sentimento sa dihang Iyang giingnan si Propeta Joseph Smith: “Kay siya nga gihatagan og daghan kaniya daghan ang gikinahanglan” (Doktrina ug mga Pakigsaad 82:3).
Ang atong mga talento, mga gasa, ug mga panalangin nagagikan sa Ginoo. Dili maayo nga ideya nga kini atong pasagdan. Kon ang Ginoo mipanalangin ninyo og maalamon nga panghunahuna ug kauhaw sa kahibalo, apan inyong giusikan ang inyong panahon sa eskwelahan ug makakuha lang og grado nga igong mopasar, nan wala ninyo gamita sa maayo ang inyong gasa. Mao gihapon alang sa usa ka tawo nga adunay atletikang kusog kinsa migamit sa iyang gahom aron bugal-bugalan ang uban, o ang usa ka tawo nga gipanalanginan og maayo nga pagbati sa pagkomedya [sense of humor] apan gigamit kini aron ipakaubos ang uban (daghan kanato ang kinahanglan nga trabahoon kini).
Gusto sa Ginoo nga buhaton nato ang atong labing maayo—ug kana ikomparar sa atong kaugalingong mga abilidad, lain pay ato, dili kini ni bisan kinsa. Depende kon unsa nga kahanas ang atong gihisgotan, ang inyong “labing maayo” tingali mas maayo o labing bati kaysa “labing maayo” sa uban. Ug OK ra kana! Pagmapasalamaton alang sa inyong mga kusog ug pagmapainubsanon kabahin sa inyong mga kahuyang, ug tugoti ang Ginoo nga motabang ninyo nga makab-ot ang inyong potensyal.