Digital Lamang: Dali, Sunod Kanako
Mga Kahoyng Peach ug Mahangturong Paglambo
Ang Langitnong Amahan nasayod kon unsay imong maabot. Ayaw pagkakontento sa mas ubos nga butang.
Dihang nagtanom ang akong pamilya og kahoyng peach sa among luyo nga nataran, nagsugod ko og pangandoy mahitungod sa kaugalingong hinimo nga peach pie. Apan ang linghod nga punoan nga among gitanom gamay ra, nga may pipila ka gagmiting nga sanga. Ingon og ang nag-inusarang peach mopalaylay sa tibuok nga kahoy.
Paglabay sa pipila ka ting-init, ang kahoy mitaas, may mga dahon, ug matahom. Ang mga langgam ganahan niini, ug ang akong pamilya nalipay sa landong nga gihatag niini. Apan wala gihapon kini makahimo sa angay untang buhaton niini—sa pagbunga og mga peach!
Mga pipila ka tuig kadto sa wala pa mitubo ang bisan usa ka prutas diha sa kahoy. Adunay pipila lamang ka peach nga gagmay, apan mas maayo na lang kini kay sa wala. Nagkinahanglan kini og laing ting-init aron ang kahoy magsugod og tubo sa igo nga gidak-on, tam-is nga mga peach aron (sa kataposan!) makahimo og pie nga akong gipangandoy.
Ang akong pamilya dili unta makaangkon nianang kaugalingong hinimo nga pie kon gipahunong pa namo ang pagtubo sa kahoy. Ang linghod nga punoan, ang landong, ug ang gamayng prutas dili ngil-ad, apan nasayod kami nga ang kahoy dunay potensiyal alang sa dugang pa. Kanunay nga aduna pay dugang nga mahimo aron padayon kining motubo.
Susama usab kana sa unsay pagtan-aw sa Langitnong Amahan kanato.
Kaluwasan ug Kahimayaan?
Kita sa kasagaran motawag sa plano sa Langitnong Amahan alang kanato og ang “plano sa kaluwasan,” apan unsa diay ang kaluwasan? Ug unsa may kalabotan niini kabahin sa kahimayaan?
Ang kaluwasan “nagpasabot sa pagkaluwas gikan sa pisikal ug espirituhanon nga kamatayon.” Posible kini pinaagi lamang sa Pag-ula ug Pagkabanhaw ni Jesukristo. Tungod Kaniya, ang tanan mabanhaw ug mabuhi sa hangtod (tan-awa sa Doktrina ug mga Pakigsaad 76:39–42). Ug tungod Kaniya, kita makahinulsol ug mapasaylo sa atong mga sala.
Apan kon ang mga tumong sa Langitnong Amahan alang kanato kutob ra diha, susama ra kana sa paggamit lamang sa akong kahoy nga peach alang sa landong. Nasayod Siya nga kita makahimo pa og mas daghan.
Ang kahimayaan “nagpasabot sa labing taas nga kahimtang sa kalipay ug himaya sa celestial nga gingharian” ug naglakip sa pagpuyo kauban sa Langitnong Amahan, ni Jesukristo, ug sa atong mga pamilya sa kahangtoran (tan-awa sa Doktrina ug mga Pakigsaad 76:62, 70). Naglakip kini sa panalangin sa padayong paglambo human niining kinabuhia—sa kahangtoran! Kay kita Iyang mga anak, kita mahimong molambo ug mamahimong sama Kaniya.
Pagpangandam alang sa Kahimayaan
Bisan og ang kahimayaan gitanyag man ngadto sa tanan, adunay pipila ka butang nga kinahanglan natong buhaton aron ikapakita ngadto sa Dios nga kita sa tinuoray andam nga modawat niini nga gasa. Ang mga kasulatan ug ang mga propeta nagtudlo nga ang mga kondisyon alang sa pagdawat niini nga mga gasa naglakip nga kita:
-
Modawat ni Jesukristo isip atong Manluluwas ug mogamit og pagtuo diha Kaniya.
-
Mabunyagan ug makadawat sa gasa sa Espiritu Santo.
-
Mohimo ug motuman sa mga pakigsaad sa templo.
-
Molahutay hangtod sa kataposan pinaagi sa pagtuman sa mga sugo.
Lapas pa sa dihadihang mga panalangin sa pagkamasulondon, ang pagsunod sa mga balaod sa Dios ug pagtugot sa atong kinaiyahan nga mausab pinaagi ni Jesukristo mag-andam kanimo sa pagdawat sa gasa sa kahimayaan. Gitakda Niya ang mga sumbanan. Ang matinud-anong pagsubay sa Iyang dalan mao ang bugtong nga paagi aron mahimaya.
Makahimo Ikaw Niini
Ikaw anak sa Dios, ug nagtanyag Siya kanimo sa tanan nga anaa Kaniya. Ayaw pagkakontento sa butang nga ubos kaysa kahimayaan.
Ang Langitnong Amahan nahigugma kanimo. Giandam Niya kini nga plano kay tuyo Niya ang pagtabang kanimo aron mahimo kini. Sigon sa gisulti ni Elder Patrick Kearon sa Korum sa Napulog Duha ka Apostoles, “Aduna bay mga butang nga gikinahanglan natong buhaton, mga kasugoan nga tumanon, mga aspeto sa atong kinaiyahan nga usbon? Oo. Apan uban sa Iyang grasya, kadto makab-ot ra nato, dili lapas pa sa atong maabot.”
Karon gayod, tingali mobati ka nga huyang ug dili hingpit. Apan ang Langitnong Amahan mao ang Hanas nga Hardiniro, ug nasayod Siya nga ikaw mas labaw kay sa usa ka linghod nga punoan. Ikaw usa ka kahoy nga peach nga nagtubo, ug Siya moalima kanimo, moatiman kanimo, ug moandam kanimo sa unsay imong maabot.