Ang Bidlisiw sa Akong mga Unos
Human sa pagkamatay sa akong lola, naghunahuna ko mahitungod sa pagtapos sa akong kaugalingong kinabuhi. Apan ang pagsalig sa plano sa kalipay sa Langitnong Amahan nakatabang nako nga mopadayon.
Mga litrato pinaagi ni Niel Kabiling
Kumusta! Ako si Honey Grace. Ako 17 anyos. Nagpuyo ko sa Iloilo, sa Pilipinas!
Pagkamatay sa Akong Lola
Bag-ohay lang, nakasinati ko og butang nga lisod kaayo. Ang akong amahan ug inahan nagbulag, ang akong inahan nagtrabaho sa gawas sa nasod. Nagdako ko sa akong lola—siya ang nagpaila nako sa ebanghelyo ug sa Simbahan. Apan karong tuiga, namatay siya nga wala damha.
Siya ang kataposang tawo nga akong gihunahuna nga mamatay. Usahay magtuo ko nga mamatay ko og una niya tungod kay himsog kaayo siya! Wala gyod siya mipakita og kahuyang ug kanunayng lig-on sa akong atubangan. Wala gyod nako mahunahuna ang akong kinabuhi nga wala siya.
Pagsabot sa Plano
Human sa iyang kamatayon, usahay ganahan nalang usab ko nga mamatay. Naghunahuna ko mahitungod sa pagtapos sa akong kaugalingong kinabuhi. Apan sa wala madugay miadto ko sa kalihokan sa kabatan-onan sa stake diin kami adunay leksiyon mahitungod sa plano sa kaluwasan.
Nasayod ko mahitungod sa plano sa kaluwasan, apan seguro wala kaayo ko makasabot niini tungod sa unsay nahitabo sa akong lola. Samtang naminaw ko, naghunahuna ko nga, “akong nalimtan ang mga panalangin sa sakripisyo ni Jesukristo alang kanako.”
Akong naamgohan nga si Jesukristo namatay sa pagluwas kanako. Dili nako kinahanglang taposon ang akong kinabuhi tungod sa akong mga kalisod. Ang plano sa kalipay naghatag kanako og paglaom nga akong makita pag-usab ang akong lola sa umaabot, tungod kay ang kinabuhi dili matapos kon kita mamatay. Kinahanglan kong motuman kanunay sa Manluluwas aron makakita ko niya pag-usab.
Pagkaplag og Kalig-on diha sa Templo
Human sa pagkamatay sa akong lola, ang akong ig-agaw mibalhin uban kanako ug nahimong akong tigbantay. Ang akong mga ig-agaw mao ang akong suod nga mga higala, apan ang kausaban lisod gihapon kaayo. Kinahanglan nakong makat-on sa pagbuhat sa tanang buluhaton nga kanunayng gibuhat sa akong lola. Kinahanglan kong momata para moeskwela ug moatiman sa balay.
Ang akong bishop kanunay maghisgot og pagbarog pinaagi sa kinaugalingong paningkamot, mao nga akong gipangita kini diha sa Librarya sa Ebanghelyo. Nakatabang kini nako nga makat-on sa pagbarog sa akong kaugalingong mga tiil.
Aduna gihapon koy kontak sa akong papa. Usa ka adlaw, nagkalalis mi. Nakigbisog gyod ko niini, apan sa kalit lang adunay higayon nga moadto sa usa ka biyahe sa kabatan-onan ngadto sa templo. Samtang didto ko sa templo, akong gibati ang kalinaw. Wala ko maghunahuna sa mga problema sa balay. Wala ko maghunahuna sa akong kasuko sa akong papa. Naghunahuna ko sa mga butang nga akong mahimo sa pagtabang kaniya. Naghunahuna ko nga mahimong usa ka maayong ehemplo. Naghunahuna ko mahitungod sa mahangtorong mga butang, pagpaselyo ngadto sa akong mga ginikanan diha sa templo sa umaabot. Nakahukom ko nga mangayo og pasaylo sa akong papa sa pagpakig-away niya.
Ang Manluluwas uban sa mga Bata, ni Michael Malm
Pagsalig sa Akong Manluluwas
Nakat-onan nako nga motutok kanunay kang Jesukristo ug sa Langitnong Amahan. Nakuha nako ang akong kalig-on gikan Nila, ug akong nahinumdoman nga Sila manalipod kanako.
Ang pagsabot sa plano sa kaluwasan, ilabi na sa Pag-ula sa Manluluwas, nakatabang nako nga mabuntog ang akong mga hunahuna nga maghikog. Kini mitabang nako nga mobati og kalinaw sa pagkinabuhi. Naghatag kini nako og paglaom nga mahimamat nako pag-usab ang akong lola sa pikas bahin sa tabil sa umaabot.
Si Jesukristo mao ang paglaom sa pagpadayon sa akong kinabuhi bisan aduna koy daghang hagit. Ang iyang gugma alang kanako walay kataposan. Siya mao ang bidlisiw sa akong kinabuhi. Kon magbagyo o mag-ulan man, anaa Siya. Siya ang akong Manluluwas. Siya ang akong panimalay. Siya ang akong kinabuhi. Gusto Niya nga ako mopadayon. Usa Siya sa mga rason nga gusto kong magpakabuhi.
Ang tagsulat nagpuyo sa Iloilo, Philippines.