Digital Lamang: Pangserbisyo nga mga Misyon
Adunay Paagi Kanunay sa Pagserbisyo
Gitawag kita sa Ginoo sa pagserbisyo. Nakaila Siya kanato ug nakahibalo sa atong mga kapabilidad.
Gitawag ko sa pagserbisyo isip misyonaryo ug nadestino sa Brazil Florianópolis Mission. Migahin ko og pito ka bulan didto ug misangpot sa sayo nga pagpauli. Sa dihang padulong na kong mouli, nag-ampo ko nanghangyo sa Langitnong Amahan nga dili ko i-release isip usa ka misyonaryo. Human ko mag-ampo, gibati nako ang Espiritu nga nagsulti nako nga ang tanan ma-OK ra.
Misalig sa Akong Pag-ampo
Atol sa akong unang semana sa balay, misalig ko sa akong gibati human ko mag-ampo didto sa airport. Nagsugod ko sa pagtabang sa temple store. Sa dihang nakahigayon ko sa pagpakigkita sa akong presidente sa stake, nalipay kaayo siya nga nakadungog sa akong pagserbisyo ug miingon nga dili ko niya i-release. Dayon gitudlo ko nga mahimong pangserbisyo nga misyonaryo sa misyon sa akong dapit, ang Recife Northeast Mission.
Unsay Gipasabot Niini alang Kanako
Ang akong pangserbisyo nga misyon naglakip sa nagkadaiyang mga buluhaton. Sa mga adlaw sa semana motabang ko sa temple shop, sa opisina sa templo, ug sa lawak labhanan. Kanunay adunay butang nga buhaton sa templo—ang mga misyonaryo dili gayod maglingkod lang didto.
Kada Sabado motabang ko sa institute. Miapil ko sa klase sa institute nga pagpangandam alang sa misyonaryo aron mopakigbahin unsay akong nakat-onan sa misyon—nindot kaayo ang bation nga mopakigbahin. Motabang usab ko sa pag-apud-apod og pagkaon ngadto sa mga estudyante human sa klase.
Dugang sa akong piho nga mga buluhaton, gamiton nako ang akong mga social network sa pagpakigbahin sa ebanghelyo. Aduna koy page nga gihimo nako sa dihang nag-edad ko og 17 anyos nga naghisgot mahitungod sa programa sa kabatan-onan.
Pagtukod sa Gingharian sa Dios
Gitawag kita sa Ginoo sa pagserbisyo. Nakaila Siya kanato ug nakahibalo sa atong mga kapabilidad. Ang pangserbisyo nga mga misyon dinasig sa Ginoo, ug kon kamo gisangonan nga moserbisyo, tungod kini kay ang Ginoo nagkinahanglan sa inyong tabang sa pagtukod sa Iyang gingharian.
Bisan kon maguol ko o mag-atubang og mga kalisod, ganahan kaayo ko nga makompleto nako ang matag bulan sa akong misyon ug makapamalandong sa unsang paagi ako milambo ug nalig-on atol nianang panahona. Ganahan ko sa akong misyon. Dinasig gayod kini sa Ginoo.