Tanang Butang Mahitungod sa Misyon
Mga Tubag ug Tambag
Ang mga misyon mahimong kulbahinam ug talagsaon—apan usab bag-o ug dili pamilyar. Ania ang mga tubag gikan sa mga misyonaryo sa pipila ka kasagarang mga pangutana sa kabatan-onan.
Mga paghulagway pinaagi ni Mike Mullan
Miserbisyo ko sa unang 11 ka bulan sa akong misyon sa Utah imbes nga adto sa akong madestinohan. Kini nga pag-usab sa assignment nahitabo tungod sa COVID-19 nga pandemya. Nakigsulti ko gamit ang akong kaugalingong pinulongan, mikaon sa pagkaon nga sinati nako, ug mibisita sa pamilyar nga mga tawo ug mga lugar. Talagsaon kaayo kadto!
Sa dihang gitangtang na ang mga restriksyon sa pagbiyahe, akong gigahin ang nahibiling pito ka bulan sa akong misyon sa matahom nga Dominican Republic (akong orihinal nga assignment). Nagbaktas ko og mga oras subay sa hayag ug bibo nga kadalanan, nagsulti og Kinatsila, mikaon og usa ka daghan kaayong platano [plantains] ug mangga, ug mitudlo sa ebanghelyo ni Jesukristo ngadto sa pipila sa labing mapainubsanon, makalingaw, ug matinud-anon nga mga tawo nga akong nahimamat sukad. Kini usab talagsaon gayod!
Wala gayoy duha ka misyon nga magkaparehas. Sama nga managlahi kaayo kitang tanan, ang atong mga misyon managlahi usab! Aduna ka bay mga pangutana mahitungod sa mga misyon? Sama sa unsa kini, unsaon sa pagpangandam, ug kon moserbisyo ba kaha ka?
P&T sa Misyon
Kuryoso nga mga kabatan-onan (sama gayod nimo!) mipadala kanamo sa ilang mga pangutana mahitungod sa mga misyon. Among gihangyo ang mga misyonaryo sa Arizona Gilbert Mission sa pagtubag nila.
P: Unsay kalainan tali sa pangserbisyo nga misyon ug sa pangtudlo nga misyon?
T: “Ang pangserbisyo nga mga misyonaryo ug pangtudlo nga mga misyonaryo adunay nakatakda nga mga sumbanan nga sundon aron sa pagrepresentar kang Jesukristo. Ang pangserbisyo nga mga misyonaryo sa kasagaran magpuyo uban sa ilang mga pamilya ug magrepresentar ni Jesukristo pinaagi sa pagserbisyo sa ilang kaugalingong mga komunidad. Parehas ra ang pagdawat sa Ginoo sa serbisyo sa pangtudlo nga mga misyonaryo ug sa pangserbisyo nga mga misyonaryo. Parehas ra ang ilang awtoridad ug parehas ra og bili ngadto Kaniya.”
Elder Joseph Duncan
P: Unsaon nimo nga mahimong suod ug komportable sa imong kompanyon kon gamay ra ang butang nga parehas mong ganahan?
T: “Magmatinguhaon sa pagkat-on mahitungod kanila ug gikan kanila. Mag-istorya bahin sa bisag unsa ug bahin sa tanang butang. Magtinabangay sa pagmugna og mga kasinatian. Mag-ampo alang kanila ug sa ilang pamilya nga isulti gayod ang ngalan.”
Sister Riley Johnson
P: Unsaon nimo pag-atubang ang kamingaw?
T: “Akong giatubang ang kamingaw pinaagi sa pagtrabaho, paghigugma sa mga tawo, ug sa pagtan-aw unsa na kalayo ang akong naabot ug unsa kadaghan ang akong mga panalangin. Wala pa gayod ko sukad makabati nga mas natagbaw, mibati nga mas nakita sa Dios, ug adunay labaw nga kalipay kay sa akong misyon.”
Sister Lucy Chapman
P: Sa unsang paagi nga nausab ang imong kinabuhi sukad sa imong pagmisyon?
T: “Ang misyon nakatabang nako sa pag-usab sa gitutokan sa akong kinabuhi. Sa wala pa ang akong misyon, nag-atiman ra gayod ko kon unsay hunahuna sa uban kanako. Ang akong misyon nakatudlo nako nga kon akong unahon ang Langitnong Amahan ug si Jesukristo, ang ubang butang mahiluna ra.”
Elder Jakob Blad
P: Unsaon man nako pag-andam ang akong kaugalingon aron makaadto og misyon?
T: “Sa dihang nangandam ko sa akong misyon, usa sa labing dakong tinubdan sa kalig-on alang nako mao ang kanunay nga pagtambong sa templo ug pagbasa sa Basahon ni Mormon. Ang paggahin og panahon sa balay sa Ginoo makahatag kanimo og gahom gikan sa kahitas-an sa pag-adto ug pagserbisyo nga maisogon!”
Elder Ammon Runger
P: Giunsa nimo pag-atubang ang personal nga mga hagit?
T: “Kon mag-atubang ko og personal nga mga hagit, makatabang nako ang pagtan-aw niini pinaagi sa mahangtorong panglantaw. Si Presidente Nelson nagsulti, ‘Kon ang mga pagpamugos sa kinabuhi nag-abot diha kaninyo, paghunahuna og celestial!’ Ang paghunahuna og celestial nakatabang nako nga makahibalo nga pinaagi ni Jesukristo akong mabuntog ang bisan unsang hagit tungod kay nasayod Siya kon unsa gayod ang akong giagian ug makahatag kanako og kalig-on.”
Elder Benjamin Baker
P: Unsa ang labing lisod nga bahin sa imong misyon?
T: “Ang pagpahiangay sa mga gilaoman nga mahitabo. Ang mga misyon dili kanunay nga eksaktong parehas sa imong gilaoman, apan kanunay kini nga tukma gayod sa imong gikinahanglan nga mahitabo niini. Ang Dios nahibalo sa mga detalye.”
Sister Taylee Martinez
P: Unsa ang labing nindot nga bahin sa pagmisyon?
T: “Ang katawhan. Tungod kay ang Dios nagpakabana sa imong mga relasyon diha sa imong kinabuhi, mopadala Siya kanimo og mga kompanyon, ubang mga misyonaryo, mga lider sa misyon, mga miyembro sa ward, ug mga tawo diha sa dalan kinsa motudlo kanimo og mga leksiyon, motabang kanimo nga molambo, ug mahimong ang mga relasyon nga maimo sa tibuok nimong kinabuhi. Ipadala sa Dios ang mga tawo nga angay nga matandog nimo, ug ang mga tawo nga angay nga motandog nimo.”
Sister Sarah Mueller
P: Giunsa sa misyon pagpalig-on nimo?
T: “Ang akong misyon nakapalig-on nako pinaagi sa akong relasyon ni Jesukristo ug sa Dios nga Amahan. Sa wala pa ko moserbisyo, gamay ra kaayo ko og nahibaloan kon unsay pagbati sa Ilang gugma. Sukad nga nahimo kong misyonaryo, nakita ko kini kada adlaw pinaagi sa mga milagro, ang gugma sa uban, ug labing importante, ni Jesukristo. Sa akong hunahuna wala unta ko makaila sa Iyang gugma sa laing paagi gawas lang sa pag-alagad Kaniya.”
Elder Ethan Withers
P: Unsay akong buhaton kon gibati nako nga dili ko takos nga magmisyon?
T: “Lisod para sa kadaghanan kanato nga mobati nga takos gayod nga magrepresentar ni Jesukristo sa matag gutlo sa atong kinabuhi. Nahupay ko sa pagkahibalo nga kanunay Niyang gihimong kwalipikado kadtong mibati niini nga paagi samtang naghimo sila sa gikinahanglan nga mga lakang aron mapakita sa Diyos nga naningkamot sila ug nagbag-o! Nakabati ko nga takos samtang akong nasinati ang makaayo nga gahom sa Pag-ula sa Manluluwas sa akong kinabuhi. Nasayod ko nga kitang tanan himoong takos samtang atong ibutang ang atong pagsalig ngadto Kaniya ug mosunod sa Iyang ebanghelyo.”
Elder Matthew Hollingsworth
P: Giunsa nimo pagdumala ang mga relasyon sa inyong panimalay samtang naa sa imong misyon?
P: “Gigamit nako ang akong mga relasyon samtang didto pa sa balay aron makatabang nako nga matuman ang akong katuyoan sa misyon tungod kay kini ang pipila sa akong labing maayong mga panig-ingnan! Akong gibuhat kutob sa akong mahimo aron dili ni makabalda nako apan gamiton hinuon ang ilang gugma, kalipay, ug suporta sa pagbuhat sa akong labing maayo alang sa akong Manluluwas, si Jesukristo!”
Sister Kimberly Pannell
P&T Digital nga mga Pakapin
P: Unsa ka kasagad nga makahimamat/makatudlo og mga tawo?
T: “Kada adlaw duna kay oportunidad nga makahimamat og bag-ong mga tawo ug mopakigbahin sa gugma ni Jesukristo alang kanila, bisan kon nakaila man sila sa dalan o mga miyembro sa ward. Usa ka pribilihiyo nga makabaton ug kahigayonan nga mahimamat ug makakat-on gikan sa daghan kaayong mga anak sa Diyos.”
Sister Nicole Hatch
P: Unsa ka kadugay sa missionary training center?
T: “Ang gidugayon sa panahon nga imong igahin sa MTC magdepende kon asa ka gikan ug kon asa ka moadto. Ang labing minos mga 2 ka semana ug ang labing dugay mga 9 ka semana. Ang mas dugay nga pagpabilin nagpasabot nga magkat-on ka og bag-ong pinulongan.”
Elder Samuel Martin
P: Giunsa nimo pagdumala ang imong oras aron makaluto og pagkaon?
T: “Akong planohon ang akong mga pagkaon alang sa semana atol sa adlaw sa pagpangandam. Mag-andam ko og maayong mga pagkaon nga sayon ug daling lutoon. Ganahan kong magkat-on og luto ug mosulay og bag-ong mga pagkaon!”
Elder Tyson Burr
P: May panahon ka ba sa pag-ehersisyo?
T: “Isip mga misyonaryo, duna mi panahon kada adlaw sa pag-ehersisyo. Niana nga panahon, mahimo kang modagan, o mogamit og bisan unsang ekipo sa pag-ehersisyo nga naa nimo o sa ubang mga misyonaryo.”
Elder Ethan Gibson
P: Unsa ka dugay ang imong pagkaanad sa pagkamisyonaryo?
T: “Para nako pipila lang kasemana kay akong gikalimtan ang akong personal nga mga tinguha sa dihang akong gisul-ob ang name tag. Sayo kong mihimo og desisyon nga itugyan ang akong kabubut-on ngadto sa Ginoo ug tugotan Siya nga himoon ko nga tawo nga maoy gusto Niya nga mahimo ko.”
Elder Nathan Meyers
P: Gibati ba nimo nga andam ka nga mobiya sa imong pamilya ug mga higala sa dili pa moadto sa imong misyon?
T: “Dugay na kong ganahan nga magmisyon, apan nahibalo ko nga adunay daghang mga butang nga akong kamingawan. Samtang akong gibutang akong pagtuo kang Jesukristo, ug hugot nga mihupot sa akong mga pakigsaad sa templo, ilabi na sa balaod sa pagpahinungod, akong nakita kon unsa pa ka daghan ang giandam sa Ginoo para nako.”
Sister Elanor Eden Van Slyke
P: Giunsa nimo pagkahibalo nga ganahan kang moserbisyo?
T: Midesider ko sa panahon sa akong pagka-primary nga moserbisyo ko og misyon! Sa tanang katuigan sa akong pagkabatan-on nakabaton ko og daghang espirituwal nga mga kasinatian nga nagpamatuod nga kinahanglan kong moadto aron sultihan ang uban mahitungod niini nga ebanghelyo!
Elder Carter Seeman
P: Makasugyot ka ba kon asa ka moadto?
T: Ang Ginoo ra gayod ang makabuot. Dili ka makasugyot kon asa ka moadto. Kon asa ka moadto mao ang dapit diin gikinahanglan ka sa Ginoo nga moadto, ug nagkinahanglan Siya sa imong personalidad ug kon kinsa ka diha niana nga misyon.
Elder Denis McLaughlin