Digital Lamang: Mga tubag gikan sa usa ka Apostol
Unsaon Nako sa Pag-atubang ang Walay Kaseguroan nga Umaabot?
Lakaw inubanan sa hingpit nga kalipay, ibutang ang inyong kamot ngadto sa kamot sa Dios, ug tugoti Siya nga mogiya kaninyo nga luwas paingon sa wala mahibaloi nga padulngan.
Gikan sa pakigpulong sa gradwasyon sa Brigham Young University—Hawaii niadtong Disyembre 8, 2023.
Basin ang inyong umaabot mogiya ninyo ngadto sa wala mahibaloi nga padulngan. Apan kon inyong “ibutang ang inyong kamot ngadto sa Kamot sa Dios,” ako nasayod nga ang Iyang giya “mas makaayo kaninyo kaysa kahayag ug mas luwas kaysa nahibaloan nga agianan.”
Unsay ipasabot sa “ibutang ang inyong kamot ngadto sa Kamot sa Dios?” Sa pagkatinuod, nagpasabot kini sa kanunay nga tinguha sa pagpaduol ngadto sa atong Langitnong Amahan ug sa atong Manluluwas, si Jesukristo, ug bation ang kalipay sa Ilang hingpit nga gugma. Kini nagpasabot og pagpangamuyo aron makasabot nga sila magauban kanato sa kanunay, pag-ila sa Ilang presensya ingon nga kini nakapalambo sa atong kinabuhi, ug pagsinati sa kalipay ug pasalamat nga gidasig gayod niana nga panag-uban. Nagpasabot kini sa “paghunahuna og celestial.”
Akong mga higala, kon maningkamot kita nga pagagiyahan sa kamot sa Dios ug dili sa bisan unsang impluwensya, kita mahatagan og gahom sa pag-atubang sa mga wala mahibaloi sa atong umaabot uban sa makapatunhay nga hugot nga pagtuo ug makanunayon nga pagsalig. Mag-ampo ko nga makakaplag kamo og hingpit nga kalipay sa inyong sunod nga mga lakang.
Gamita ang Kahayag ni Kristo
Nan, unsaon man, nga kita makaadto didto? Ang ebanghelyo ni Jesukristo napuno sa kahayag nga makahimo ug motabang nato nga makaplagan ang kamot sa Dios ug ang kalinaw ug hingpit nga kalipay nga Iyang gipangandoy nga atong makaplagan.
Si Jesukristo, ang atong minahal nga Manluluwas, mao ang labaw nga tinubdan sa kahayag sa atong kinabuhi. Siya Mismo ang mihatag og kaseguroan kanato, “Ako mao ang kahayag sa kalibotan. Ang mosunod kanako dili na gayod maglakaw diha sa kangitngit kondili makabaton hinuon sa kahayag sa kinabuhi.” Ang kahayag sa kinabuhi! Mao kana Siya. Mao kana ang Iyang gitanyag nato. Tungod sa Iyang kahayag, kita makapili gayod sa paglaom ug sa hingpit nga kalipay taliwala sa makalibog nga mga unos sa kinabuhi. Kon kamo nakadiskobre niini, mahibalo kamo sa milagro sa Iyang kahayag nga makatuhop sa bisan unsa nga kangitngit.
Ang pagpahimulos nianang banwag sa kahayag sa atong kinabuhi nagpasabot sa pagdiskobre sa unsay gihulagway ni Presidente Russell M. Nelson isip hingpit nga kalipay sa inadlaw nga paghinuslsol. Ang balikbalik nga pagdangop ngadto sa Dios sa matag higayon nga mosimang kita sa dalan makapalingkawas nato gikan sa mga gapos sa sala ug kaalaotan nga ihatag sa kaaway kanato. Makakat-on kita nga mahimuot sa oportunidad sa inadlaw—gani sa kanunay—nga paghinulsol ug himoon kini inubanan sa sinsero nga pasalamat.
Ang mga kasulatan mao ang laing bililhon nga tinubdan sa kahayag sa atong kinabuhi. Bisan asa man kamo sa inyong personal nga pagtuon sa mga kasulatan, ako moawhag kaninyo sa pagpadayon sa pagtinguha ug sa pagkat-on. Dili pa gayod ulahi alang nato nga ablihan ang atong mga kasingkasing ngadto sa mga kasulatan ug magiyahan sa kahayag niini.
Sama sa usa ka parola diha sa usa ka unos, ang templo usa ka makanunayon nga tinubdan sa kahayag ug usa ka simbolo sa kahilwasan. Ang dili mausab nga doktrina sa pagsimba diha sa templo naghatag og dili matarog nga pagkamakanunayon sa kalibotan nga puno sa kasamok ug kawalay kaseguroan. Pangitaa ang Dios diha sa Iyang balaan nga balay. Kay, “Kana nga gikan sa Dios mao ang kahayag; ug siya nga midawat sa kahayag, ug magpadayon diha sa Dios, makadawat og dugang nga kahayag; ug kana nga kahayag mag-anam og labaw kahayag ug labaw kahayag hangtod sa hingpit nga adlaw.
Kon inyong “ibutang ang inyong kamot ngadto sa Kamot sa Dios,” kon kamo mangita ni Kristo, makahuloganong magtuon sa mga kasulatan, ug maghimo og sagrado nga mga pakigsaad diha sa templo, ang kahayag nianang “hingpit nga adlaw” mag-anam kasanag. Gani, kamo mismo mahimong kabahin niana nga kahayag.
Moserbisyo sa Uban
Ang paggiya sa uban sama sa paagi sa paggiya sa Manluluwas, sa paagi nga gusto Niya unsaon nato sa paggiya, mao ang pagserbisyo kanila. Kasagaran kana nga pagserbisyo nagkinahanglan og sakripisyo ug paglambo gikan nato. Sa kanunay, ang ingon nga pagserbisyo makatabang nga malunsay ug mabalaan kita, mousab sa atong mga kasingkasing ug moumol sa atong mga kinaiya aron mas mahisama sa atong Ehemplo, nga si Jesukristo, ang labing halangdon nga sulugoon sa tanan.
Sa inyong paglakaw ngadto sa wala mahibaloi nga padulngan, nga nagkupot sa putli nga mga tinubdan sa kamatuoran ug kahayag, tugoti nga ang inyong panultihon mao “kang kinsa ko moserbisyo?” Hinumdomi nga si Kristo mitambag, “Ang labing dako kaninyo kinahanglang mahimo nga inyong sulugoon.” Sa panan-aw sa Ginoo, ang kahalangdon pagasukdon dili pinaagi sa atong personal nga mga kalamposan, apan pinaagi sa gugmang putli nga atong gipakita sa Iyang mga anak.
Pila ka paagi nga ang matag usa kaninyo “[maka]pataas [sa] mga kamot sa nawad-an og paglaom?” Mituo ko sa inyong abilidad sa pagserbisyo sa katawhan. Labing importante, ang inyong Amahan sa Langit mituo kaninyo. Nakaila Siya sa matag usa ninyo sa personal nga paagi, ug nagtunol Siya aron ipaabot kaninyo ang Iyang kamot ug mogiya kaninyo. Lakaw inubanan sa hingpit nga kalipay, ibutang ang inyong kamot ngadto sa kamot sa Dios, ug tugoti Siya nga mogiya kaninyo nga luwas paingon sa wala mahibaloi nga padulngan.