Walay Laing Makasabot Nako Sama sa Manluluwas
Ang akong panaw uban sa kanser nagtudlo kanako og daghang importante nga espirituhanong mga leksyon.
Gilitratohan ni Barbara Leite
Nagsugod kadtong tanan sa sakit sa ulo. Pagkataudtaod, ang mga labad sa ulo nagkagrabe ug nahitabo kada adlaw. Usahay makapasuka ni nako. Tungod niini, mihangyo ang akong doktor og MRI.
Ang resulta sa MRI nagpakita nga duna koy tumor nga gitawag ug germinoma sa sentro sa systema sa akong utok nga nagkontrol sa kalihokan sa tibuok lawas. Dihang una namong nahibal-an ang bahin sa tumor kaniadtong Oktubre 2023, wala mi masayod kon peligro o (kanserus) ba o dili peligro.
Miagi ko og lainlaing mga operasyon, ug gitangtang pa gani nila ang tumor. Mipauli ko ug morag maayo ra ang tanan, pero dugay nga miabot ang resulta sa biopsy. Mga pipila ka semana ang milabay, mibalik ang mga pagsakit sa akong ulo, mao nga gikuhaan ko og CT scan.
Ang Manluluwas Makaandam Nato sa Lisod nga mga Panahon
Sa dihang nadawat namo ang resulta sa CT scan, among nasayran nga wala pay 20 ka adlaw, ang tumor sa akong utok hingpit nga mibalik. Ang biopsy nagpakita nga ang tumor adunay kanser. Nahadlok kaayo ang akong mga ginikanan, apan kalmado ra ko. Nagtuo ko nga ang Manluluwas nag-andam na ug naglig-on nako.
Mga Milagro diha sa Kalisdanan
Human mahibal-an nga ang tumor dunay kanser, ang akong mga ginikanan ug ako mibiya sa among siyudad ug miadto sa espesyalista nga ospital sa kanser sa mga bata sa kapital sa estado, ang Curitiba. Ang unang bahin sa akong pagtambal mikabat og unom ka bulan, tali sa mga operasyon ug chemotherapy.
Naa koy laing MRI aron ma-eskedyul ang sunod nga operasyon. Gidahoman sa mga doktor nga pinaagi sa chemotherapy, ang tumor mikuyos na unta sa gidak-on sa liso.
Apan ang MRI nagpakita nga ang tumor hingpit na nga naayo! Ang Ginoo mihimo og milagro. Ang mga doktor wala gani maghunahuna nga posible kini. Mapasalamaton kaayo ko sa mga milagro nga akong nasinati, apan ang akong panaw nagpadayon nga lisod.
Pagsagubang sa Pagkawala uban sa Manluluwas
Sa pagsugod niini nga pagsulay, naguol ko tungod kay nawad-an ko og daghan kaayong mga butang. Kinahanglan kong mohunong sa pag-eskwela ug pagsimba. Wala na ko magdula og soccer, ug wala na koy kontak sa akong mga higala. Wala na sab ko makatambong sa seminary.
Nasayod ko nga ang Manluluwas, pinaagi sa Iyang Pag-ula, mohulip sa akong mga nawala. Wala ko kahibalo unsaon, wala ko kahibalo kon kanus-a, apan nagtuo ko nga si Jesukristo mohulip sa tanan niini nga mga butang nga nawala nako.
Walay laing makasabot nako sama Kaniya. Ang akong inahan nakasabot kaayo nako, apan dili 100 porsyento, sama sa pagsabot sa Manluluwas nako. Mao nga bisan og naguol ko sa tanan nga nawala nako ug sa tanan nga nahitabo, ang Manluluwas nag-uban nako sa tibuok panahon.
Pagbuntog sa mga Kalisod pinaagi sa Serbisyo
Usa ka paagi sa pagbuntog sa mga kalisod mao ang pagserbisyo sa Ginoo. Ang pagserbisyo nakakonektar nako sa Ginoo ug nakatabang nako nga maminaw sa Iyang tingog ug mosunod Kaniya.
Niining miaging tuig, duna mi FSY nga komperensiya, ug bisan og dili ko makatambong sa personal, ang magtiayon nga nagdumala sa sesyon midapit nako sa paghimo og bidyo nga magpaambit sa akong pagpamatuod.
Sa akong bidyo akong gipakigbahin kon sa unsang paagi nga bisan unsa pa ang nahitabo sa akong kinabuhi, ako dunay tinguha sa pagbuhat sa akong bahin ug sa pagserbisyo sa uban. Nakadawat kog 571 ka sulat gikan sa mga batan-on nga nakakita sa akong bidyo ug nadasig.
Ang pamilya ni Gustavo usa ka tinubdan sa iyang kalig-on. Gitahod niya ang iyang magulang nga lalaki ug babaye, kinsa parehong mga nakahuman og misyon.
Mga Leksiyon nga Nakat-onan
Nag-atubang gihapon ko sa akong hagit sa panglawas, apan kini nga kasinatian nakapaduol nako sa Manluluwas ug nakatudlo nako og daghang mga butang.
Nakakat-on ko nga magbaton og pailob ug mag-agad sa Ginoo kon mag-atubang og dili maayong balita, dili maayo nga mga kasinatian, o dili maayo nga mga sakit. Nakakat-on ko sa pagpangita og hingpit nga kalipay sa gagmay ug yano nga mga butang. Nakakat-on ko sa pagtan-aw sa kalibotan sa laing mga mata, sa pagtuon sa mga kasulatan, ug sa pagpakigsulti sa Balaang Espiritu.
Usa ka butang nga nakatabang nako sa espirituhanong paagi mao ang kanunay nga pagtuon sa mga kasulatan. Bisan sa dihang naospital ko, human sa operasyon o atol sa chemotherapy, nagpadayon ko sa pagtuon sa mga kasulatan o mga pakigpulong sa kinatibuk-ang komperensiya. Kon dili ko makabasa, akong hangyoon ang akong mama sa pagbasa nako, o akong patingogon ang audio.
Karon naa ko sa proseso sa radiotherapy, ug samtang naghulat sa mga pagtambal, gigamit nako ang FamilySearch Get Involved app. Atol sa radiation therapy, ganahan kong maghunahuna mahitungod sa mga kasulatan gikan sa seminary. Kon atong pilion nga unahon ang Ginoo, bisan sa lisod nga mga panahon, makahimo kini sa tanang kalainan. Gibati nako nga ang Ginoo nag-uban nako tungod kay nagpaduol ko Niya.
Si Jesukristo mao ang akong Manluluwas ug akong Higala. Nahibalo ko nga nahibalo Siya sa tanan nga akong gibati, nabati, ug bation. Ang tanan mahimong eksakto pinaagi sa Manluluwas.