Lima ka Mensahe alang sa Tanang Anak sa Dios
Kon magtinguha kamo niini, giyahan kamo sa Dios samtang higugmaon ninyo Siya sa tibuok ninyong kasingkasing ug maningkamot sa pagpanalangin sa uban.
Ang matag usa kanato talagsaon ug gihulma sa lahi nga hugpong sa mga kasinatian. Nakabaton usab kita sa usa sa labing mahinungdanong hiyas nga anaa sa tanan—kitang tanan mga anak sa Dios.
Bisan managlahi ang atong mga kahimtang, adunay piho nga mga mensahe nga kinahanglang madungog sa tanang anak sa Diyos. Ganahan ko nga mopakigbahin og lima niini nga mga mensahe kaninyo—mga mensahe nga akong gipanghinaot nga bation ninyo nga haom sa iyong indibidwal nga mga sirkumstansiya ug mga sitwasyon sa kinabuhi, nga gihatag pinaagi sa gasa ug gahom sa Espiritu Santo, alang lamang kaninyo.
1. Moabante Padulong sa Kahayag
Dili gayod mausab ang dagan sa adlaw. Mao ra gayod ang posisyon niini, makanunayon diha sa kalangitan, naghatag og kainit ug kahayag ngadto sa kalibotan.
Sa samang paagi, ang Dios anaa sa Iyang kalangitan. Dili gayod Siya mousab sa Iyang pamaagi, apan kita mausab.
Kitang tanan nagkinahanglan sa impluwensya sa Dios sa atong kinabuhi, ug gani kitang tanan adunay mga higayon nga atong bation nga anaa kita sa kangitngit. Kon moabot kanang mga higayona, pagmasaligon nga ang Dios, sama sa adlaw, kanunay nga anaa. Kon imong ipaduol ang imong kasingkasing ngadto Kaniya, gakson ka Niya ug pun-on ang imong kalag sa kahayag, kainit, kahibalo, ug giya. Anaa Siya kanunay.
2. Mas Maayo Pa Kamo kay sa Inyong Gihunahuna nga Kinsa Kamo
Ang Ginoo kanunay nga migamit sa gagmay ug huyang nga mga butang sa kalibotan sa pagpahitabo sa Iyang mahimayaong mga katuyoan. Sa kasagaran labing daghan ang Iyang mabuhat nga kalamposan pinaagi niadtong mibati nga gamay ra og kalamposan.
Tingale, imong nakita ang imong kaugalingon nga mas ubos kay sa unsa ikaw. Dili takos. Walay talento. Dili espesyal. Kulang sa kasingkasing, hunahuna, mga kapanguhaan, karisma, o pamarog aron mas magamit sa Dios.
Miingon ka nga dili ka perpekto? Dili igo ang imong kamaayo? Nan, parehas ta! Ikaw na tingali ang tawo nga gipangita sa Dios.
Kay “ang dili mahimo sa tawo mahimo sa Dios.”
Dawaton sa Dios ang imong mga talento ug mga abilidad ug padaghanon kini—bisan kon maingon nga sama kini kanihit sa pipila lamang ka tinapay ug isda. Kon mosalig ka Kaniya ug magmatinud-anon, Iyang palamboon ang imong mga pulong ug mga lihok ug gamiton kini aron sa pagpanalangin ug pagpangalagad sa pundok sa mga katawhan!
Wala magkinahanglan ang Dios og mga tawo nga walay sipyat. Gipangita Niya kadtong mohalad sa ilang “kasingkasing ug sa usa ka andam nga hunahuna,” ug Siya mohimo kanila nga “mahingpit diha kang Kristo.”
3. Pagkat-on sa paghigugma sa Dios ug sa Imong Silingan
Sa dihang ang usa ka Pariseo nangutana ni Jesus kon unsa ang labing dako sa mga sugo, ang Manluluwas miestablisar sa kataposang higayon kon unsa gayod ang atong mga prayoridad isip mga indibidwal ug isip usa ka Simbahan:
2. Higugmaa ang imong silingan.
Kon moatubang na kita sa Manluluwas diha sa atubangan sa hukmanan, mohatag kita og saysay kon giunsa nato pagsunod ang duha ka dagkong sugo.
Gitinguha ba gayod nato ang Dios? Ato ba Siyang gihigugma uban sa tibuok natong kasingkasing, gahom, hunahuna, ug kusog?
Gihigugma ba nato ang atong mga pamilya, mga higala, ug mga silingan? Giunsa nato pagpakita niana nga gugma?
Kinahanglan hinumdoman nato kanunay nga ang “tibuok nga [balaod] ug ang mga propeta” nagpunting ngadto sa duha ka dagkong sugo.
Mao kini ang tuyo ug tumong sa ebanghelyo ni Jesukristo. Kini ang pundasyon kon kinsa kita isip Iyang mga sumusunod.
4. Ang Panagbangi dili Kalikayan; ang Panagbingkil usa ka Pagpili
Usahay maghunahuna tingali mo nga makapahimuot kaayo ang kinabuhi kon wala lang untay daghang oposisyon, apan ang panagbangi dili kalikayan. Kondisyon kana sa mortalidad ug kabahin sa atong pagsulay. Ang panagbingkil, hinuon, usa ka pagpili. Usa kini ka paagi nga pilion sa ubang tawo sa pagtubag sa panagbangi.
Ang atong kalibotan napuno sa panagbingkil. Kita adunay paagi sa paggamit niini sa tanang higayon: sa balita, sa social media, ug gani, usahay, sa atong mga relasyon niadtong atong gihigugma.
Dili kita makausab sa gikusgon sa kaligutgot, kapungot, kasuko sa uban. Hinuon, mahimo kitang mopili sa atong pagtubag. Makapili kita sa mas maayong paagi—ang paagi sa Ginoo! Syempre, sayon ra kini isulti ug lisod buhaton.
Isip mga sumusunod ni Jesukristo, mosunod kita sa Iyang ehemplo. Dili kita mopakaulaw o moatake sa uban. Tinguhaon nato ang paghigugma sa Dios ug ang pag-alagad sa atong mga silingan. Tinguhaon nato nga malipayong magtuman sa mga sugo sa Dios ug magsunod sa mga baroganan sa ebanghelyo. Ug dapiton nato ang uban sa pagbuhat niini.
Dili kita makapugos ni bisan kinsa sa pag-usab. Apan makahigugma kita kanila. Makapakita kita og ehemplo kon unsa gayod ang gipahiuli nga ebanghelyo ni Jesukristo. Makadapit kita sa tanan sa pagduol ug pagpahisakop. Ug buhaton nato kini pinaagi sa pagkat-on sa paghigugma sa Dios ug pagtabang aron mopanalangin sa uban.
Ang Paagi, ni Jeanette Borup
5. Ang atong Langitnong Amahan Mao ang Dios sa Bag-ong mga Pagsugod
Samtang kitang mga mortal magpuyo niining talagsaon ug maanindot nga planeta, makahimo kita og mga sayop.
Dili kini sorpresa ngadto sa Dios.
Gipadala Niya ang Iyang Bugtong Anak aron magpuyo og hingpit nga kinabuhi ug maghimo og dako, mahangtorong sakripisyo nga molimpyo kanato gikan sa sala ug moabli sa pultahan ngadto sa pagkabalaan, kalinaw, ug himaya sa tibuok kahangtoran samtang maghinulsol kita ug adunay pagtuo Kaniya.
Ang atong Langitnong Amahan mao ang Dios sa bag-ong mga pagsugod. Sama lang nga ang matag pagsubang sa adlaw nagtimaan sa pagsugod sa bag-ong adlaw, matag panahon nga kamo maghinulsol, makahimo kamo og bag-ong pagsugod paingon sa inyong dalan sa pagkadisipulo. Mahimo kamong magsugod pag-usab. Sa makadaghan, adlaw-adlaw, makasugod kamo pag-usab.
Bisan unsa pa ang inyong mga kakulangan, bisan unsa pa ang inyong mga sayop, ang Dios makaayo, makadasig, ug makalimpyo kaninyo. Kay Siya ang Dios sa bag-ong mga pagsugod.
Akong minahal nga higala, nag-ampo ko nga makakaplag kamo og paglaom, kalig-on, ug hingpit nga kalipay sa inyong pagpanaw, nga makakaplag kamo sa Dios ug mohigugma Kaniya sa tibuok ninyong kasingkasing, ug nga maningkamot kamo sa pagpanalangin sa mga kinabuhi sa uban.