Mga Tingog sa Kabatan-onan
Nawad-an og mga Butang, Nakakaplag sa Manluluwas
Gi Hyun M., 16 anyos, Laguna, Philippines
Ganahan nga mokanta og mga himno, maminaw og musika, ug mangalagad sa mga kabatan-onan.
Paghulagway pinaagi ni Adam Howling
Kaniadto dili ko ganahan nga mosimba kay gibati nako nga wala koy mga higala didto. Sa eskwelahan, naa koy mga higala nga magkataw-anay mi. Apan gibati nako nga ang batan-ong mga babaye sa simbahan lahi kanako o tingali dili ganahan sa akong personalidad. Nagsugod ko sa pagpakaaron-ingnon nga natulog aron dili na ko makasimba.
Unya miabot ang pandemya sa COVID-19, ug nakasinati mi og panahon nga nawad-an og mga butang. Nagpuyo ko uban sa akong mama ug lola. Ang akong mama nawad-an sa iyang trabaho, ug naghunahuna mi nga kinahanglan namong mobiya sa among balay. Nagsugod ko sa pagpangita og mas baratong puy-anan, apan wala koy nakit-an. Hinoon, akong nakit-an ang Manluluwas.
Ang Simbahan nagsugod sa pagsibya sa mga panagtigom sa simbahan pinaagi sa online, ug ang akong inahan mopukaw nako ug motan-aw, nga nakatabang kanako sa “pagpakaaron-ingon hangtod nga nahimo nako.” Gibati nako nga ang Manluluwas mitabang nako, bisan kon wala ko moduol Kaniya. Ug sa dihang nagsugod ko sa pagduol Niya, Iyang gihimo ang Iyang kamot nga mas daling maabot. Ang pagkawala sa mga butang nakatabang nako sa pagkaplag sa Manluluwas.
Gihatagan ko sa among bishop og calling, ug ang ubang batan-ong mga babaye nahimong akong mga higala tungod kay giablihan nako ang akong kaugalingon ngadto kanila. Tungod kay gibati nako nga wala koy mga higala, nakaamgo ko nga ang uban tingali makasinati usab niini. Nakahunahuna ko nga angay kong mohimo sa unang lakang ug moduol.
Nahinumdom ko sa dihang turno na nako nga motabang sa pagtudlo og leksiyon sa simbahan. Sa akong hunahuna, dili gyod ko ganahan nga mobuhat niini. Apan sa dihang milampos ko, gibati nako ang kalipay. Kini nagtudlo nako nga ang ebanghelyo nindot kaayo. Daw dili kini mahulagway sa maayong paagi.
Sa kataposan, ang Ginoo mitabang sa akong inahan nga makakita og bag-ong trabaho. Salamat, nagpuyo gihapon mi sa among panimalay, ug gihimo kini sa Manluluwas nga mas balaan nga dapit. Mokatawa gihapon ko uban sa akong mga higala sa eskwelahan. Apan walay makalabaw sa kamaya nga gitanyag sa Manluluwas.