Sakop Ka na sa Team!
Ikaw adunay talagsaon nga butang nga ikatampo sa buhat sa Dios.
Dili ako maayo sa basketball. Wala ko kahibalo ngano, dapiton gihapon ko sa akong mga higala nga magduwa. Atol sa usa ka dula, nangandoy ko nga dili maari nako ang bola. Hinoon, napasa gayod ang bola ngari nako, ug nakahukom ko nga akong sulayan sa pag-shot. Samtang naglupad ang bola padulong sa ring, nakaseguro ko nga dili gyod masulod. Naigo sa backboard ang bola ug dayon nasulod sa ring.
Naka shot ko!
Miabiba ang akong mga higala samtang nakalitan ko. Gamay ra ko og natabang niadto nga dula, pero nindot kaayo ang gibati nga sakop ko sa team ug nakaapil sa akong gamay lang nga paagi.
Ang mas importante ug malungtaron kay sa pagkahimong kabahin sa basketball team, musika o grupo sa teyatro, team sa trabaho, o bisan unsa nga matang sa team mao ang pagkahimong kabahin sa team sa Dios ug pag-apil sa Iyang buhat sa kaluwasan ug kahimayaan.
Naghunahuna ba kamo kon daghan ba kaha kamo og mahimo sa buluhaton sa Diyos? Kon mao, aniay pipila ka makatabang nga mga butang nga hinumdoman kanunay.
Gikinahanglan Ka
Ang Dios makahimo sa Iyang kaugalingong buhat (tan-awa sa 2 Nephi 27:20–21), apan kita adunay oportunidad sa pag-apil sa Iyang buhat uban Kaniya. Naglakip kana kanimo!
Kon gibati ninyo nga dili mo maayo, hinumdomi nga dili gusto sa Diyos nga naa ra kamo sa daplin. Gikinahanglan mo Niya nga inyong ihatag ang tanan isip miyembro sa Iyang team ug malipayong moapil sa Iyang buhat.
Ang Ginoo nagsulti, “O kamo nga anaa sa pag-alagad sa Dios, tan-awa nga kamo moalagad kaniya sa tibuok ninyo nga kasingkasing, gahom, hunahuna ug kusog. …
“Busa, kon kamo adunay tinguha sa pag-alagad sa Ginoo kamo gitawag ngadto sa buhat” (Doktrina ug mga Pakigsaad 4:2–3).
Kon gusto nimo kini, modawat ang Dios sa inyong talagsaong mga talento ug abilidad ug gamiton kini sa katingalahang mga paagi. Mahimong dili ninyo kini makita karon, apan dunay daghang mga butang nga gikinahanglan sa Dios nga inyong buhaton aron makatabang sa pagpadayon sa Iyang dakong buhat sa unahan.
Hinumdomi ang Duha ka Dagkong Sugo
Dili igo ang pagserbisyo sa Diyos sa tibuok natong kasingkasing, gahom, hunahuna, ug kusog. Kinahanglang higugmaon usab nato Siya sa tanan nga anaa kanato (tan-awa sa Doktrina ug mga Pakigsaad 59:5). Ang Manluluwas nagtudlo nga ang labing mahinungdanon sa tanang mga sugo mao ang:
“Higugmaa ang Ginoo nga imong Dios sa tibuok mong kasingkasing, sa tibuok mong kalag ug sa tibuok mong hunahuna” ug “Higugmaa ang imong isigkatawo sama sa imong kaugalingon” (Mateo 22:37, 39).
Ang atong gugma sa Diyos makapalig-on sa atong mga tinguha ug katakos sa pagserbisyo Kaniya. Makadugang usab kini sa atong abilidad sa paghigugma ug pagserbisyo sa uban. Kon kadtong anaa sa imong palibot mobati nga tinud-anay kamo nga nahigugma ug nagpakabana kanila, makakita kamo og mga oportunidad sa pagpanalangin kanila ug pagtabang kanila nga mobati sa gugma sa Dios.
Pagtuon—Dayon Tingog!
Sa wala pa maorganisar ang Simbahan, ang magulang nga lalaki ni Propeta Joseph Smith nga si Hyrum mipahayag sa iyang tinguha sa pagserbisyo. Iyang gipangutana si Joseph kon unsay iyang mabuhat sa pagtabang sa buhat sa Dios. Si Joseph nakadawat og pagpadayag alang kang Hyrum. Ang Ginoo miingon:
“Ayaw pagtinguha sa pagpahayag sa akong pulong, apan unaha ang pagbaton sa akong pulong, ug unya, ang imong dila makasulti; unya, kon ikaw magtinguha, ikaw makabaton sa akong Espiritu ug sa akong pulong, oo, ang gahom sa Dios ngadto sa pagkabig sa mga tawo” (Doktrina ug mga Pakigsaad 11:21).
Nindot kini nga leksiyon ug sundanan alang kanatong tanan. Una, tun-i ang pulong sa Dios, ibutang kini sa inyong kasingkasing, ug unya mahimo ninyong isulti ug ipaambit kini. Dili gyod ninyo mahibal-an kon unsa ang maayo nga mahitabo sa inyong pagsulti. Makatabang mo sa pagdala sa kahayag ug kamatuoran sa Dios niadtong “kinsa natago gikan sa kamatuoran tungod kay wala sila masayod asa kini pangitaa” (Doktrina ug mga Pakigsaad 123:12).
Pagbaton og Mahangtoron nga Panglantaw
Ang buhat sa Dios kay para sa tanan Niyang mga anak. Usa ka importante nga bahin niana nga buhat gibuhat diha sa mga templo sa tibuok kalibotan, bisan alang niadtong nabuhi kanhi ug “namatay nga walay kahibalo [sa] ebanghelyo, kinsa unta makadawat niini” (Doktrina ug mga Pakigsaad 137:7).
Tingali maghunahuna mo kon ang inyong gibuhat karon makahimo ba gayod og kalainan, apan makatabang mo niadtong anaa sa pikas nga bahin sa tabil pinaagi sa pagpahigayon og mga bunyag para kanila diha sa templo. Ang pagtambong ug pagsimba sa templo sa tibuok ninyong kinabuhi makatabang ninyo sa paghupot og mahangtorong panglantaw—sa paghunahuna og celestial—ug magdala og kalipay ug espirituhanong gahom nganha kaninyo ug sa uban dinhi ug sa umaabot nga kinabuhi.
Uban niining mahangtorong panglantaw, inyong makita nga naa mo sa team—ang mananaog nga team sa Dios—ug kamo adunay importante nga bahin niini. Daghan kaayo ang inyong mahimo sa pagtabang niining importante nga buhat sa kaluwasan ug kahimayaan.
Apil ug tan-awa kon unsa ang mahimo sa Dios pinaagi kaninyo.