Asa Ikaw Makakaplag og Kalig-on sa Pag-atubang og Kausaban?

Ailia C., edad 16, nagpuyo karon sa Nicosia, Cyprus

Ganahang magsulat , ug magdula og softball.

Sa kasagaran molikay ko sa kausaban. Ganahan kong magplano daan kon unsay buhaton. Apan tungod sa trabaho sa akong papa, ang akong pamilya magsigeg balhin og puluy-anan. Niini nga estilo sa kinabuhi, dili gayod ka mahibalo kon unsay mahitabo.

Pananglitan, sa dihang mibiya kami sa Zimbabwe, ang plano mao nga ang akong papa moadto sa Afghanistan sulod sa usa ka tuig. Ang nahabilin sa akong pamilya magpuyo uban sa mga ginikanan sa akong mama. Hinoon, sa wala pa mobiya ang akong papa, nahibal-an namo nga dili sila magpadala og tawo ngado Afghanistan sa mubong panahon. Nagpasabot kadto nga dili mi mobalhin sa pagpuyo uban sa pamilya. Bisan sa akong kalipay nga naa ang akong papa, kining kalit nga kausaban lisod alang kanamong tanan.

Nasuko ko, ug subo lang, akong gipahungaw ang akong kasuko sa Langitnong Amahan sa makadiyot. Nahinumdom ko nga nag-ampo usa ka gabii ug misinggit lang kon nganong nasuko ko. Apan bisan pa sa akong kasuko, sa kataposan gitabangan ko Niya sa pagpaubos sa akong kaugalingon ug mobati og kalinaw. Murag nagsulti Siya nga, “Bisan unsa ang mahitabo, adunay maayo nga moabot niini. Salig lang nako. Nasayod ko nga lisod ni karon, apan masulbad ra ang tanan sa kataposan.” Nakalma ko ug nakahunahuna sa mga panghitabo. Kinahanglan kong makat-on nga mosalig sa Langitnong Amahan ug mahimong OK sa mga butang nga dili mahitabo sumala sa akong plano, tungod kay ang Iyang plano kanunay nga mas maayo.

Ang akong mga kasinatian sa kanunay nga pagbalhinbalhin og puluy-anan nakapaduol nako sa akong Manluluwas tungod kay Siya ang usa nga kanunay nakong masaligan. Ang mga higala moabot ug mobiya. Ang mga dapit moabot ug mawala. Apan ang Manluluwas anaa kanunay, ug Siya andam kanunay nga motabang sa bisan unsa nga akong giagian.