Digital Lamang: Dali, Sunod Kanako
Ayaw Kahadlok sa Pagbuhat og Maayo
Ang mga tawo sa kalibotan mahimong motuis sa kamatuoran, apan makasalig kita sa Ginoo alang sa pagsalig nga atong gikinahanglan sa pagpakigbahin sa Iyang kaayo.
Hunahunaa nga naggunit ka og litrato sa usa ka matahom ug mabulokon nga bulak. Gipakita nimo kini sa imong higala tungod kay nagtuo ka nga modayeg sila unsa kini katahom.
Pero, nasurprisa, ang imong mga higala nagmug-ot ug miingon, “Dili kana hulagway sa usa ka tinuod nga bulak! Nag-imbento ka lang og mga butang.” Gigisigisi nila kini ug gipanglabay ang mga piraso ngadto sa kahanginan samtang nanglakaw sila palayo.
Masabot, nga ikaw nasakitan. Nakahukom ka nga dili na gayod mopakita pag-usab sa imong paborito nga mga litrato ngadto ni bisan kinsa . Dili na ka gusto og laing reaksyon sama niana.
Morag medyo kataw-anan kini, di ba? Ngano kaha nga ang dili maayo nga kasinatian makapugong nimo nga mosulay pag-usab?
Adunay daghang tawo sa kalibotan nga mosulti nimo nga ang butang nga maayo ug tinuod sayop ug dili maayo. Tungod niana, usahay magduhaduha kita, kulbaan, o gani mabalaka sa pagbuhat og maayo pinaagi sa pagpakigbahin sa mga kamatuoran sa ebanghelyo, bisan kon kita adunay tinguha. Naghunahuna kita, “Unsa kaha kon isalikway ko nila?” o “Dili ko ganahan nga mobalda.” Gikombinser nato ang atong kaugalingon nga mas nagtabang kita sa usa ka tawo pinaagi sa dili pagpakigbahin sa kaayo.
Apan ang tinuod mao nga ang kamaayo magpabiling maayo. Bisan kon ang imong higala migisi sa imong litrato ug miingon nga ang bulak dili tinuod, dili kana makausab sa kamatuoran nga litrato kini sa usa ka matahom nga bulak. Mapahinumdoman gihapon nimo ang imong kaugalingon nga ikaw nakahibalo sa kamatuoran.
Ang Ginoo Nasayod sa Atong mga Kahadlok
Bisan pa og masuko o masilo ang usa ka tawo kon mopakigbahin ka sa mga kamatuoran sa ebanghelyo, dili kana makausab sa kamatuoran nga unsay imong gipakigbahin tinuod o maayo. Bisan pa niana, ang sosyal nga kabalaka, kinatibuk-ang kabalaka, o ubang mga hagit sa kahimsog posibling maghatag og kalisod aron mobati og pagsalig sa pagsulti ug paghimo og maayo. Ug bisan kon wala ka niana nga mga pakigbisog, mahimong lisod ang pagbuntog sa mga kahadlok sa paghukom o pagpakaulaw.
Sa dihang ang ebanghelyo ni Jesukristo gipahiuli, ang usa sa unang mga butang nga gisugo sa Ginoo kang Propeta Joseph Smith mao ang pagsangyaw sa pulong—sa pagpadala og mga misyonaryo. Tungod kay adunay daghang simbahan nga nangangkon nga anaa kanila ang kamatuoran, ang mga miyembro sa bag-ong gipahiuli nga Simbahan nakadawat og daghang dili makiangayon, madumtanon nga paghukom tungod sa lahi nga gituohan.
Nasayod ang Ginoo unsang mga matang sa kahadlok ang gibati sa Iyang bag-ong gitawag nga mga misyonaryo (ilabi na kay sila mga bag-ong kinabig mismo!). Gihupay Niya sila, sa pag-ingon, “Kon isalikway nila ang akong mga pulong, ug kini nga bahin sa akong ebanghelyo ug pangalagad, bulahan ka, kay sila dili na makabuhat pa og labaw nganha kanimo kay sa ilang nabuhat ngari kanako.” (Doktrina ug mga Pakigsaad 6:29).
Busa, unsa ang gipasabot niana?
Unsa ang Iyang Gisaad Kanato
Dili na sila makabuhat pa og labaw nganha kanimo kay sa ilang nabuhat ngari kanako Si Jesukristo lig-on. Mas gamhanan Siya kay ni Satanas, ang kaaway. Bisan og ang pag-antos sa tanang kasakit sa kalibotan gikinahanglan aron matuman ang Pag-ula, nabuntog gihapon Niya kining tanan. Bisan pa sa kasakit nga ihatag kanato sa mga opinyon, mga pulong, ug mga aksiyon sa uban, Siya makatabang nato sa pagbuntog usab niana.
“Bulahan kamo.” Bisan usa pay isulti sa uban kon mopakigbahin kita sa ebanghelyo o “mohimo og maayo,” ang Ginoo misaad sa pagpanalangin kanato. Ug ang mga panalangin nga Iyang gitanyag mas bililhon pa kay sa mga opinyon sa uban.
Mao nga, ang importante, misaad ang Ginoo nga kon kita mopakigbahin sa kaayo, mapanalanginan kita, ug dili kita angay nga mabalaka mahitungod sa unsay buhaton o isulti sa uban, tungod kay anaa ang Ginoo sa atong kiliran!
Miingon ang Ginoo ngadto ni Joseph Smith (ug kanato), “Ayaw kahadlok sa pagbuhat og maayo … ; … kon magpugas kamo og maayo kamo usab moani og maayo alang sa inyong ganti” (Doktrina ug mga Pakigsaad 6:33). Sa laing pagkasulti, kon ipakatap nato ang kaayo ngadto sa kalibotan—sa pagpakigbahin sa ebanghelyo, pagserbisyo, o bisan sa pagpaningkamot nga mas mahisama ni Kristo—mabati nato ug madawat ang mas daghan nga kaayohan sa atong kinabuhi. Ang gikinahanglan lang natong buhaton mao ang pagtutok kang Jesukristo ug pagsalig Kaniya alang sa kalig-on. “Kay kon kamo gitukod diha sa akong bato, dili sila magmadaogon.” (Doktrina ug mga Pakigsaad 6:34).