Mga Pangutana ug Mga Tubag
“Unsaon nako paggahin og panahon alang sa espirituwal nga mga butang kon daghan kaayo kog buhatonon sa akong adlaw?”
“Naningkamot ko sa pag-organisar sa mga butang nga kinahanglan nakong buhaton diha sa mubong mga sulat sa akong mobile phone. Kanunay nakong unahon ang pagtuon sa akong mga kasulatan, ug dayon buhaton nako ang akong homework. Kon akong unahon ang pagtuon sa mga kasulatan, mas masabtan nako ang akong homework ug makasinati ko og kalinaw sa akong adlaw.”
Adara L., 15, Mérida, Mexico
“Diha-diha dayon human sa akong pagmata sa buntag, akong basahon ang akong mga kasulatan ug mag-ampo. Kanunay nakong mabantayan nga mas sayon ang pagbasa ug pag-ampo sa buntag, kay sa pagsulay nga isal-ot kini sa akong busy nga eskedyul. Akong namatikdan nga kon buhaton nako kini, makaangkon ko og mas dakong kalig-on sa pagsukol sa tentasyon ug pagbaton og positibo nga kinaiya.”
Catelyn E., 17, California, USA
“Sa personal, nanlimbasog ko niini, mao nga sa akong hunahuna kinahanglan nimong hunahunaon kon unsa ang nahimo ni Jesus alang kanimo ug dayon segurohon nga igahin ang usa ka bahin sa imong adlaw ngadto Kaniya. Kon imong hunahunaon unsay Iyang nabuhat alang kanimo, sayon ra ang paggahin og panahon alang sa pag-ampo ug pagtuon sa kasulatan!”
Averi J., 14, Arizona, USA
“Makagahin kog panahon alang sa espirituwal nga mga butang pinaagi sa pagpaminos sa paggamit sa mga elektronik. Pinaagi sa pagpaminos sa paggamit sa mga elektronik, akong magamit ang panahon nga akong giusik-usikan sa una para sa mas mabungahong mga butang para sa Ginoo. Ang mga elektronik kanunay nga mahimong mapadaplin, dili sama sa atong mga kasulatan.”
Juliette J., 14, Texas, USA
“Ang mahinungdanon para nako mao ang pagbuhat sa espirituwal nga mga butang sa dili pa ako mobuhat sa ubang mga butang. Dili kini kanunay nga sayon, ilabi na tungod kay walay deadline alang sa pagtuon sa kasulatan sama sa homework nga aduna. Apan sama sa ikapulo, akong nakaplagan nga kon akong ihatag og una sa Ginoo ang akong panahon, aduna koy igong panahon nga mahibilin alang sa tanang butang.”
Jacob N., 19, Iowa, USA
Digital nga mga Pakapin:
“Usa ka butang nga nakatabang nako mao ang pagtutok sa akong mga prayoridad. Kanunay nga adunay mahinungdanong mga butang nga buhaton, apan ang pipila niini mahinungdanon kaayo nga ang espirituwal nga mga kalihokan dili makalangan niini bisan sa makadiyot. Kon akong unahon ang espirituwal nga mga butang, akong nasinati nga sa kasagaran adunay igong panahon sa nahibilin nga mga buluhaton”
Emmett C., 17, Utah, USA
“Kon tinuod kang nanlimbasog sa pagpangita og panahon alang sa Ginoo, mahimo nimong ikonsiderar ang pagkuha sa usa ka butang gikan sa imong kinabuhi nga makapugong kanimo sa pagbati sa espiritu ug sa pagtutok ngadto sa Dios. Usa ka ehemplo niini mao ang social media. Unsa ka taas ang imong gigahin nga oras sa pag-scroll sa social media? Kon imong tangtangon ang panahon nga imong gigahin sa social media, tingali masorpresa ka kon unsa ka dako sa panahon nga imong maggahin sa pagtutok sa Ginoo sa imong adlaw.”
Kimber Leigh D., 17, Tennessee, USA
“Magbasa ko sa mga kasulatan diha sa bus kon naa koy panahon. Samtang mangandam alang sa eskwelahan, maminaw sab ko sa mga himno sa Simbahan ug mga pakigpulong sa komperensiya.”
Emma S., 13, Utah, USA
“Usa ka butang nga angay nimong buhaton mao ang pagsulay sa paghimo sa pagtuon sa kasulatan nga usa ka bahin sa imong inadlaw nga eskedyul. Mahimo nimo kini sa dili pa matulog! Mahimo kang momata og mas sayo aron makatuon ka sa dili pa moadto sa eskwelahan o seminary. Mahimo kang maminaw sa musika sa Simbahan samtang mag-homework o ubang inadlaw nga mga butang. Makatabang kini aron imong mabati ang gahom sa Dios bisan kon nagbuhat og ubang mga butang. Usab, kinahanglan kang mangayo og tabang gikan sa imong mga ginikanan o sa bishop. Hinumdomi, ang Dios kanunayng motabang nimo sa paghimo niya nga bahin sa imong kinabuhi kon mag-ampo ka niya alang sa tabang ug giya.”
Colton N., 13, Utah, USA