Kon ang Kabubut-on Makapasakit

Ni Brynn Wengler

Mga Magasin sa Simbahan

Unsay inyong mahimo kon ang mga pagpili sa ubang tawo mopalayo nila gikan sa hingpit nga kalipay sa ebanghelyo?

Duna ka niini. Imong suod nga higala duna niini. Bisan ang uyoan sa inahan sa inyong ikaduhang ig-agaw duna niini! Gasa kini gikan sa Langitnong Amahan ngadto sa Iyang tanang anak sa yuta. Busa unsa kini nga gasa, mangutana ka? Kini ang kabubut-on, ang abilidad sa pagpili ug sa paglihok.

Ang atong abilidad sa paghimo og mga pagpili makapalambo kanato, ug importante kaayo kana aron makabalik kita ug makapuyo uban sa Langitnong Amahan. Apan kini nga gasa adunay lisod ug usahay sakit usab nga bahin: ang Ginoo nagtudlo kanato nga “himoa nga ang matag tawo mopili alang sa iyang kaugalingon” (Doktrina ug mga Pakigsaad 37:4), ug ang mga pagpili nga himoon sa mga tawo dili kanunay nga nindot, maayog resulta.

Kon ang mga tawo nga imong gihigugma mohimo og makapaguol nga mga pagpili, ilabi na sa mga pagpili nga mopahilayo kanila gikan ni Jesukristo, mahimong sakit kini. Sakit ang pagtan-aw sa tawo nga imong gihigugma nga magbuhat og mga butang nga nahibaloan nimo nga sa kataposan makahatag nila og kaguol. Tingali naghunahuna mo kon duna bay angay unta ninyong gihimo aron makatabang. Tingali nasuko mo o nasakitan nga ilang gigamit ang ilang kabubut-on sa maong paagi. Tingali gibati ninyo nga medyo responsable sa pagpili nga ilang gihimo.

Kon ugaling mibati kamo niini, padayon sa pagbasa. Atong klarohon ang pipila ka butang.

Ang Buluhaton sa Manluluwas

Ang una ninyong hinumdoman mao nga ang inyong mga minahal aduna nay Manluluwas. Si Jesukristo nag-antos na sa “mga kasakit sa tanang tawo, oo, sa mga kasakit sa tanang buhi nga binuhat, mga lalaki, mga babaye, ug mga bata” (2 Nephi 9:21). Gihigugma niya ang mga sakop sa imong pamilya ug mga higala, nakaila sa ilang kasingkasing, ug dili mobiya kanila. Nahibalo Siya kon unsaon sa pagtabang nila sa labing maayong paagi.

Bisan tuod dili imong trabaho ang pagbuhat sa butang nga ang Manluluwas lamang ang makahimo, makahimo ka sa pagtabang sa pagpundok sa Iyang nawala nga mga karnero. Apan unsay piho nga inyong mahimo? Ug unsa ang dili angay nimong buhaton? Ania ang pipila ka ideya.

DILI Imong Trabaho

Ayaw angkona ang responsibilidad sa mga pagpili sa ubang tawo. Ang tanang tawo nga adunay tulubagon maoy responsable sa ilang mga pagpili. OK ra nga maguol mahitungod sa desisyon sa usa ka tawo, apan dili imong trabaho ang pag-usab o pagtarong niini.
Ayaw paghukom. Ang mga kasulatan nagtudlo nato nga ang Dios mao ang atong kataposang maghuhukom (tan-awa sa Doktrina ug mga Pakigsaad 64:11). Imbes nga hukman ang usa ka tawo, pulihi ang dili matarong nga paghukom sa pagpasaylo ug gugma.
Ayaw pagsigeg balik-balik. Ang pagsulti sa usa ka tawo nga nakahimo siya og bati nga desisyon sa matag higayon nga magkasumpaki mo tingali dili makatabang. Kon mobati ka og pag-aghat sa pagpamatuod sa kamatuoran, seguroha nga nagagikan kini sa gugma.
Ayaw basola ang imong kaugalingon. Usahay makapasakit kita og tawo bisan kon naningkamot kita nga makatabang. Kon mahitabo man kana, ayaw sawaya ang imong kaugalingon. Hinuon, pagpangayo og pasaylo, pagpakigsulti pinaagi sa pagpaubos, ug pagsulay og bag-ong butang.

Imong Trabaho

Motabang pinaagi sa gugma. Bisan kon dili ka mouyon sa tanang mga pagpili nga gihimo sa usa ka tawo, makapakita gihapon ka nila og gugma. Unsaon nimo sa pagpakigsuod nila sa ubang maayong mga paagi? Sutaa ang parehong anaa ninyong duha!
Mag-ampo. Gamhanan ang pag-ampo, ilabi na kon mag-ampo ka alang sa sakop sa imong pamilya o higala gamit ang ngalan. Hangyoa ang Dios nga mopanalangin nila ug mopanalangin nimo aron masayod unsaon pagtabang. Dayon pagmapailobon sa Iyang tukmang panahon ug mga tubag.
Paminaw sa Espiritu Santo. Makadawat ka og piho nga pagpadayag (ug kahupay!) sa imong sitwasyon pinaagi sa Espiritu Santo. Paggahin og panahon sa mga dapit diin maanaa ang Espiritu.
Pagpakita og ehemplo. Ipadayon ang paghimo ug pagtuman sa imong mga pakigsaad ngadto sa Dios. Kon mas maduol ka Kaniya, mas mahimong sayon ang pagdawat og inspirasyon kon unsaon nga makatabang ka sa imong minahal. Makapakita ka og ehemplo ug kahayag.

Bisan kon masakit ang paagi sa usa ka tawo sa paggamit sa iyang kabubut-on, adunay pagkaayo ug paglaom nga moabot alang kanimo ug alang niadtong imong gihigugma ug gimahal. Pagmapailobon, tan-aw ngadto sa Manluluwas, ug gamita kanunay ang imong kaugalingong kabubut-on alang sa maayo.