Direkta sa Punto

Unsa ang pagpangalagad sa mga anghel? Ug nganong gilambigit man kini sa awtoridad sa Aaronic nga Pagkapari?

Sa dihang gipahiuli ni Juan nga Bautista ang Aaronic nga Pagkapari, naghisgot siya nga kini “naghupot sa mga yawe sa pagpangalagad sa mga anghel” (Doktrina ug mga Pakigsaad 13:1). Si Presidente Dallin H. Oaks, Unang Magtatambag sa Unang Kapangulohan, mipasabot sa koneksiyon tali sa Aaronic nga Pagkapari ug sa pagpangalagad sa mga anghel niini nga paagi:

“Sa kinatibuk-an, ang mga panalangin sa espirituhanong panag-uban ug komunikasyon anaa lamang niadtong limpyo. … Pinaagi sa mga ordinansa sa Aaronic nga Pagkapari sa pagbunyag ug sa sakramento, malimpyohan kita sa atong mga sala ug gisaaran nga kon kita mosunod sa atong mga pakigsaad makabaton kita kanunay sa Iyang Espiritu nga mag-uban kanato. Ako nagtuo nga kana nga saad wala lamang nagpasabot sa Espiritu Santo apan usab ngadto sa pagpangalagad sa mga anghel, kay ang mga ‘anghel mamulong pinaagi sa gahom sa Espiritu Santo; busa, sila namulong sa mga pulong ni Kristo’ (2 Nephi 32:3). Mao nga kadtong naghupot sa Aaronic nga Pagkapari nag-abli sa pultahan alang sa tanang mga miyembro sa Simbahan kinsa takos nga moambit sa sakramento aron makatagamtam sa pagpakig-uban sa Espiritu sa Ginoo ug sa pagpangalagad sa mga anghel” (Oct. 1998 general conference [Ensign, Nov. 1998, 39]).