1 Ug unya ang Ginoo miingon: Manaog kita. Ug nanaog sila sa sinugdanan, ug sila, nga mao ang mga Dios, miorganisar ug miumol sa kalangitan ug sa yuta.

2 Ug ang yuta, human kini maumol, walay sulod ug awaaw, tungod kay walay lain nga ilang giumol gawas lang sa yuta; ug ang kangitngit naghari sa ibabaw sa lawod, ug ang Espiritu sa mga Dios nagsuhid sa ibabaw sa katubigan.

3 Ug sila (ang mga Dios) miingon: Padan-aga ang kahayag; ug dihay kahayag.

4 Ug sila (ang mga Dios) nakabatyag sa kahayag, kay sanag kini; ug gibahin nila ang kahayag, o gilain kini, gikan sa kangitngit.

5 Ug gitawag sa mga Dios ang kahayag og Adlaw, ug ang kangitngit gitawag nila og Gabii. Ug nahitabo nga gitawag nila og gabii ang gikan sa kagabhion hangtod sa kabuntagon; ug gitawag nila og adlaw ang gikan sa kabuntagon hangtod sa kagabhion; ug mao kini ang una, o ang sinugdanan, nianang gitawag nila og adlaw ug gabii.

6 Ug ang mga Dios miingon usab: Himoa ang kawanangan sa taliwala sa katubigan, ug mobahin kini sa katubigan gikan sa katubigan.

7 Ug ang mga Dios mimando sa kawanangan, aron kini mobulag sa katubigan nga ubos sa kawanangan gikan sa katubigan nga ibabaw sa kawanangan; ug kini natuman, gani ingon sa ilang pagmando.

8 Ug gitawag sa mga Dios ang kawanangan, og Langit. Ug nahitabo nga nagsugod sa kagabhion hangtod sa kabuntagon ang gitawag nila og gabii; ug nahitabo nga nagsugod sa kabuntagon hangtod sa kagabhion ang gitawag nila og adlaw; ug kini mao ang ikaduhang higayon nga gitawag nila og gabii ug adlaw.

9 Ug mimando ang mga Dios, nga nag-ingon: Pundoka ang katubigan ubos sa langit ngadto sa usa ka dapit, ug patunghaa ang yuta nga uga; ug natuman kini sigon sa ilang gimando;

10 Ug gitawag sa mga Dios ang uga nga yuta, og Yuta; ug ang pagkapundok sa katubigan, gitawag nila, og Dagko nga Katubigan; ug nakakita ang mga Dios nga gituman sila.

11 Ug miingon ang mga Dios: Andamon nato ang yuta aron makapatubo og sagbot; ang tanom nga mopasanay og binhi; ang kahoy nga mopasanay og bunga, subay sa iyang matang, kansang binhi sa iyang kaugalingon mismo mopasanay sa iyang kaugalingong matang sa ibabaw sa yuta; ug natuman kini, gani sigon sa ilang gimando.

12 Ug ang mga Dios miorganisar sa yuta aron mopatubo og sagbot gikan sa iyang kaugalingong binhi, ug ang tanom aron momugna og tanom gikan sa iyang kaugalingong binhi, mopasanay og binhi sumala sa iyang matang; ug ang yuta aron mopatubo og kahoy gikan sa iyang kaugalingong binhi, nga mamunga, kansang binhi makapatubo lamang og sama kaniya, subay sa iyang matang; ug nakita sa mga Dios nga gituman kini.

13 Ug nahitabo nga giihap nila ang mga adlaw; sugod sa kagabhion hangtod sa buntag gitawag nila og gabii; ug nahitabo, nga ang gikan sa kabuntagon hangtod sa kagabhion gitawag nila og adlaw; ug mao kadto ang ikatulong higayon.

14 Ug giorganisar sa mga Dios ang mga kahayag sa kawanangan nga mao ang langit, ug gipahimo nila nga mabulag ang adlaw gikan sa gabii; ug giorganisar kini aron mahimong mga timailhan ug alang sa kapanahonan, ug alang sa mga adlaw ug mga tuig;

15 Ug giorganisar kini alang sa mga kahayag sa kawanangan sa langit aron mohatag og kahayag diha sa yuta; ug natuman kadto.

16 Ug ang mga Dios miorganisar sa duha ka dagkong kahayag, ang mas dako nga kahayag aron momando sa adlaw, ug ang mas gamay nga kahayag aron momando sa gabii; uban sa mas gamay nga kahayag gipahimutang usab nila ang mga bituon;

17 Ug ang mga Dios mipahimutang niini sa kawanangan sa langit, aron mohatag og kahayag sa yuta, ug aron momando sa adlaw ug sa gabii, ug aron mahimong paagi nga mabahin ang kahayag gikan sa kangitngit.

18 Ug ang mga Dios nagbantay niadtong mga butang nga ilang gimandoan hangtod nga misunod kini.

19 Ug nahitabo nga ang gabii nagsugod sa kagabhion hangtod sa buntag; ug nahitabo nga ang adlaw nagsugod gikan sa buntag hangtod sa kagabhion; ug mao kadto ang ikaupat nga higayon.

20 Ug ang mga Dios miingon: Atong andamon ang katubigan aron mopasanay og daghang maglihok nga mga linalang nga adunay kinabuhi; ug ang langgam, aron molupad sila ibabaw sa yuta diha sa lapad nga kawanangan sa langit.

21 Ug giandam sa mga Dios ang katubigan aron modala kini og dagkong mga balyena, ug matag buhi nga linalang nga molihok, nga padaghanon sa katubigan sumala sa ilang matang; ug matag langgam nga may pako sumala sa ilang matang. Ug nakita sa mga Dios nga kinahanglan kining sundon, ug nga ang ilang plano maayo.

22 Ug ang mga Dios miingon: Panalanginan nato sila, ug himoon sila nga mabungahon ug mosanay, ug mopuno sa katubigan diha sa kadagatan o dagkong katubigan; ug sugoon ang mga langgam sa pagdaghan diha sa yuta.

23 Ug nahitabo nga nagsugod sa kagabhion hangtod sa buntag ang gitawag nila og gabii; ug nahitabo nga nagsugod sa buntag hangtod sa kagabhion ang gitawag nila og adlaw; ug kadto ang ikalima nga higayon.

24 Ug giandam sa mga Dios ang yuta aron momugna sa buhi nga mga linalang sumala sa matang niini, mga baka ug mga butang nga magkamang, ug mga mananap sa yuta sumala sa ilang matang; ug natuman kini, sama sa ilang gipamulong.

25 Ug giorganisar sa mga Dios ang yuta aron mopatungha sa mga mananap sumala sa ilang matang, ug mga baka sumala sa ilang matang, ug matag butang nga magkamang sa yuta sumala sa iyang matang; ug nakita sa mga Dios nga mosunod sila.

26 Ug ang mga Dios nagtinambagay sa ilang kaugalingon ug miingon: Manaog kita ug magbuhat og tawo sumala sa atong dagway, sama kanato; ug hatagan nato sila og kamandoan sa mga isda sa dagat, ug sa mga langgam sa kahanginan, ug sa mga baka, ug sa tibuok yuta, ug sa matag butang nga nagkamang sa yuta.

27 Busa nanaog ang mga Dios aron buhaton ang tawo sumala sa ilang kaugalingong dagway, aron siya ilang buhaton sumala sa dagway sa mga Dios, aron sila ilang buhaton nga lalaki ug babaye.

28 Ug ang mga Dios miingon: Panalanginan nato sila. Ug ang mga Dios miingon: Mandoan nato sila nga magmabungahon ug magpasanay, ug mopuno sa yuta, ug mobuntog niini, ug momando sa mga isda sa kadagatan, ug sa mga langgam sa kahanginan, ug sa matag buhi nga butang nga naglihok diha sa yuta.

29 Ug ang mga Dios miingon: Tan-awa, hatagan nato sila sa matag tanom nga magdala og binhi nga makita sa ibabaw sa tibuok yuta, ug sa matag kahoy nga adunay bunga diha niana; oo, ang bunga sa kahoy nga nagdala og binhi ngadto kanila ihatag nato kini; alang kini sa ilang pagkaon.

30 Ug ngadto sa matag mananap sa yuta, ug sa matag langgam sa kahanginan, ug sa matag butang nga nagkamang sa ibabaw sa yuta, tan-awa, hatagan nato sila og kinabuhi, ug usab hatagan nato sila sa matag lunhaw nga tanom alang sa pagkaon, ug tanan niini nga mga butang iorganisar sa ingon niana nga paagi.

31 Ug ang mga Dios miingon: Buhaton nato ang tanan nga atong gisulti, ug organisahon kini; ug tan-awa, magmasulundon kaayo sila. Ug nahitabo nga gikan sa kagabhion hangtod sa buntag ang gitawag nila og gabii; ug nahitabo nga gikan sa buntag hangtod sa kagabhion ang gitawag nila og adlaw; ug nag-ihap sila sa ikaunom nga higayon.