Ti Libro ni Abraham

1 Iti daga dagiti ^aCaldeos, iti pagtaengan dagiti ammak, siak, ni ^bAbraham, naamirisko a nasken nga agsapulak iti sabali a lugar a ^cpagnaedak;

2 Ket, iti pannakaduktalko nga adda dakdakkel a ^aragsak ken talna ti pakinakem ken ^btalinaayko, dinawatko ti bendision dagiti ammak, ken ti karbengan a pannakaordenko tapno maipatungpalko met laeng daytoy; gapu ta maysaak met a pasurot ti ^ckinalinteg, nga agtarigagay met nga agbalin a maysa a maikkan iti adu a ^dpannakaammo, ken agbalin a nabilbileg a pasurot ti kinalinteg, ken maddaan iti ad-adu a pannakaammo, ken agbalin nga ama ti adu a pagilian, prinsipe ti kappia, ken agtarigagay nga umawat iti panangiwanwan, ken agtungpal kadagiti bilin ti Dios, nagbalinak a nainkalintegan nga agtawid, ti ^eNangato a Saserdote, nga agiggem iti ^fkalintegan a para kadagiti amma.

3 ^aNaitalek daytoy kaniak manipud kadagiti amma; naggapu kadagiti amma, manipud idi punganay ti panawen, wen, manipud pay idi punganay, wenno sakbay ti pannakabukel ti daga, agingga iti agdama a panawen, uray pay iti kalintegan ti ^binauna, wenno ti immuna a tao, nga isu ni ^cAdan, wenno immuna nga ama, agingga kadagiti ammak.

4 Dinawatko ti ^apannakadutokko iti Kinasaserdote a maibatay iti pannutok ti Dios kadagiti amma maipanggep kadagiti bukel.

5 Nalawag a di dinengngeg dagiti ^aammak, a nangtallikud iti kinalintegda, ken manipud kadagiti nasantuan a bilin nga inted kadakuada ti Apo a Diosda, iti ^bpanagdaydayaw kadagiti dios ti pagano, ti timekko;

6 Ta naikudi dagiti pusoda nga agaramid iti dakes, ken naiturong a namimpinsan iti ^adidiosen ni Elkena, ken iti dios ni Libna, ken iti dios ni Mamakra, ken iti dios ni Koras, ken iti dios ni Faraon, nga ari ti Egipto;

7 Ngarud inturongda ti puspusoda iti sakripisio dagiti pagano iti panangidatonda kadagiti annakda kadagitoy umel a pagrukbaban, ket dida dinengngeg ti timekko, ngem inkagumaanda nga ungawen ti biagko babaen ti ima ti saserdote ni Elkena. Ti saserdote ni Elkena ti saserdote met laeng ni Faraon.

8 Ita, iti daytoy a panawen kannawidan ti saserdote ni Faraon, ti ari ti Egipto, ti mangidaton iti altar a nabangon iti daga ti Caldea, a pagidatonan kadagitoy karkarna a dios, lallaki, babbai, ken ubbing.

9 Ket napasamak a nangaramid ti saserdote iti daton iti dios ni Faraon, ken kasta met iti dios ni Sagreel, a kas iti wagas dagiti Egipto. Ita ti init ti dios ni Sagreel.

10 Uray pay ti panagyaman-panangidaton iti ubing indaton ti saserdote ni Faraon iti altar a nagtakder iti turod a maawagan iti Turod ni Potipar, iti uluanan ti tanap ti Olisem.

11 Ita, nangidaton daytoy a saserdote iti daytoy nga altar iti tallo a birhen iti naminsan, nga isuda dagiti annak ni Onita, maysa kadagiti mabigbig nga an-annabo a nagtaud a mismo iti lomo ni ^aHam. Naidaton dagitoy a birhen gapu iti galadda; saanda nga ^bagtamed nga agdaydayaw kadagiti didiosen a naaramid iti kayo wenno bato, ngarud napapatayda iti daytoy nga altar, ket naaramid iti wagas dagiti Egipto.

12 Ket napasamak a rinanggasandak dagiti saserdote, tapno mapapataydak met, a kas iti inaramidda kadagidiay a birhen iti daytoy nga altar; ken tapno adda pannakaammoyo iti daytoy nga altar, ipakitak kadakayo ti pannakayam-ammo iti panangrugi daytoy a kasuratan.

13 Naaramid babaen ti pakabuklan ti sekkeg ti kama, a kas kadagiti Caldeos, ket nagtakder iti sango dagiti didiosen da Elkena, Libna, Mamakra, Koras, ken kasta met ti dios a kas iti adda ken ni Faraon, ti Ari ti Egipto.

14 Tapno adda pamalpalatpatanyo kadagitoy a didiosen, intedko kadakayo ti moda dagiti adda iti ladawan iti rugi, a ti wagas dagiti ladawan ninaganan dagiti Caldeos iti Raleno, a mangiparipirip iti simbolo ti panagsurat.

15 Ket idi inlayatda dagiti imada kaniak, tapno maidatondak ket ungawenda ti biagko, adtoy, immararawak iti Apo a Diosko, ket ^adimngeg ken nangikaso ti Apo, ket pinunnonak iti parmata ti Mannakabalin, ket nagtakder iti abayko ti anghel ti imatangna, ket dinagdagusna a ^bwinarwaran dagiti pungok;

16 Ket naiturong ti timekna kaniak: Abraham, Abraham, adtoy, Jehova ti ^anaganko, ket nangngegka, ket bimmabaak tapno wayawayaanka, ken tapno yadayoka iti balay ti amam, ken kadagiti amin a kabagiam, ket ipanka iti ganggannaet a ^bdaga a dimo pay ammo;

17 Ket gapu daytoy iti panangikayakayda iti puspusoda kaniak, tapno agdaydayawda iti dios ni Elkena, ken iti dios ni Libna, ken iti dios ni Mamakra, ken iti dios ni Koras, ken iti dios ni Faraon, nga ari ti Egipto; ngarud bimmabaak a mangsarungkar kadakuada, ken mangdadael iti nangilayat iti imana a mangdadael kenka, Abraham, anakko, tapno papatayennaka.

18 Adtoy, iturongkanto babaen ti imak, ken alaenkanto, tapno itedko kenka ti naganko, nga isu ti ^aKinasaserdote ti amam, ket adda kenka ti bilegko.

19 No ania ti adda ken ni Noe addanto met kenka; ngem babaen ti panagserbik maammuanto ti ^anaganko iti daga iti agnanayon, ta siak ti Diosmo.

20 Adtoy, adda ti Turod ni Potipar iti daga ti ^aUr, iti Caldea. Ket rinebba ti Apo ti altar ni Elkena, ken dagiti didiosen iti daga, ket awan pangngadua a dinadaelna ida, ket sinaplitna ti saserdote tapno matay; ket adda nakaro a panagleddaang iti Caldea, ken kasta met iti ikub ni Faraon; a nakaiparipiripan ni Faraon nga ari babaen ti naarian a dara,

21 Ita daytoy ari ti Egipto an-annabo a nagtaud kadagiti lomo ni ^aHam, ken nakiranud iti dara dagiti ^bCanaan babaen ti pannakaipasngay.

22 Manipud iti daytoy a kaputotan ti nagtaudan amin dagiti Egipto, ket kastoy ti pannakataginayon ti dara dagiti Canaan iti daga.

23 Gapu ta babai ti immuna a nakatakuat iti daga ti ^aEgipto, nga isu ti anak ni Ham, ken anak ni Egiptus, nga iti Caldeano iparipiripna ti Egipto, a mangiparipirip iti maiparit;

24 Adda iti uneg ti danum idi maduktalan ti babai ti daga, a kalpasanna nangitaenganna kadagiti annakna a lallaki; ket kastoy, manipud ken ni Ham, immadu dayta a puli a nangtaginayon iti lunod iti daga.

25 Ita ti immuna a gobierno ti Egipto binangon ni Faraon, ti inauna nga anak a lalaki ni Egiptus, ti babai nga anak ni Ham, ket naipasurot iti wagas ti gobierno ni Ham, a kinapatriarka.

26 Ni Faraon, gapu ta nalinteg a tao, nangipatakder iti pagarianna ket inukomna a nainsiriban ken nainkalintegan dagiti taona iti unos ti panagbiagna, a sipapasnek a mangsursurot iti wagas nga inrugi dagiti amma kadagiti immuna a kaputotan, kadagiti aldaw ti immuna a panagturay ti kinapatriarka, a kas iti panagturay ni Adan, ken kasta met ni Noe, ti amana, a nangted kenkuana iti ^abendision ti daga, ken iti bendision ti kinasirib, ngem inlunodna maipanggep iti Kinasaserdote.

27 Ita, iti pannakairaman ni Faraon iti dayta a kapuonan a dina koma pakaalaan iti kalintegan ti ^aKinasaserdote, iti laksid ti panagkalikagum ni Faraon a mangala iti kalintegan manipud ken ni Noe, babaen ni Ham, ngarud nayadayo ti amak gapu iti kinapanagrukbabda iti didiosen;

28 Ngem aganusak, kalpasan daytoy, a mangbinsabinsa iti panagsasaganad ti tawen manipud kaniak nga agsubli iti pannakairugi ti panagparsua, ta naipaima kaniak dagiti ^asinurat, nga iggemko ita a panawen.

29 Ita, kalpasan ti pannakasaplit ti saserdote ni Elkena agingga a natay, dimteng ti pannakatungpal dagidiay a banag a nasao kaniak maipanggep iti daga ti Caldea, a nasken nga addanto panagbisin iti daga.

30 Kas maibatay agturayto ti panagbisin iti intero a daga ti Caldea, ket naparigat unay ti amak gapu iti bisin, ket nagbabawi iti dakes nga insayangkatna kaniak, a mangungaw iti ^abiagko.

31 Ngem ti kasuratan dagiti amma, uray pay dagiti patriarka, maipanggep iti kalintegan iti Kinasaserdote, tinaginayon ti Apo a Diosko kadagiti imak; ngarud iti pannakaammo iti rugi ti pannakaparsua, ken kasta met kadagiti ^aplaneta, ken kadagiti bituen, kas iti pannakaipakaammoda kadagiti amma, naidulinko agingga iti daytoy nga aldaw, ket ikagumaakto nga isurat ti sumagmamano kadagitoy a banag iti daytoy a kasuratan, para iti pagimbagan dagiti an-annabo a sumarsaruno kaniak.