1 Ita imbilin ti Apo a Dios ti panagsaknap ti nakaro a panagbisin iti daga ti Ur, isu a ni ^aHaran, ti kabsatko, natay; ngem ni ^bTera, ti amak, nagbiag pay laeng iti daga ti Ur, dagiti Caldeos.

2 Ket napasamak a siak, ni Abraham, innalak nga asawa ni ^aSarai, ket ni ^bNahor, a kabsatko, innalana nga asawa ni Milca, nga anak a babai ni Haran.

3 Ita ^akinuna ti Apo kaniak: Abraham, pumanawka iti pagiliam, ken kadagiti kabagiam, ken iti balay ti amam, ket mapanka iti daga nga ipakitak kenka.

4 Ngarud pimmanawak iti daga ti ^aUr, dagiti Caldeos, tapno mapanak iti daga ti Canaan; ket intugotko ni Lot, ti anak a lalaki ti kabsatko a lalaki, ken ti asawana, ken ni Sarai nga asawak; ken kasta met a simmurot kaniak ti ^bamak, iti daga a ninagananmi iti Haran.

5 Ket nagsardeng ti panagbisin; ket nagbati ti amak iti Haran ket nagtaeng sadiay, ta adu ti arban iti Haran; ket sinublian manen ti amak ti ^apanagrukbabna kadagiti didiosen, ngarud nagtultuloy iti Haran.

6 Ngem siak, ni Abraham, ken ni ^aLot, ti anak a lalaki ti kabsatko a lalaki, nagkararagkami iti Apo, ket ^bnagparang kaniak ti Apo, ket kinunana kaniak: Tumakderka, ket itugotmo ni Lot; ta panggepko a yadayokayo iti Haran, ket aramidenka a ministro a mamaneknek iti ^cnaganko iti ganggannaet a ^ddaga nga itedkonto kadagiti bukelmo nga agnanayon a kukuada, no dumngegda iti timekko.

7 Ta siak ti Apo a Diosmo; agtaengak iti langit; ti daga ti ^apagbatayak; yunnatko ti imak iti baybay, ket tungpalenna ti timekko; bilinek ti angin ken ti apuy nga agbalin a ^bluganko; kunak kadagiti bantay—Pumanawkayo a dagus—ket adtoy, itayab ida ti alipugpog, a kellaat iti apagdarikmat.

8 ^aJehova ti naganko, ket ^bammok ti paggibusan manipud iti pangrugian, ngarud addanto kenka ti imak.

9 Ket aramidenkanto a dakkel a pagilian, ket ^abendisionankanto iti awan umasping, ket aramidek ti naganmo a naindaklan iti amin a pagilian, ket sikanto ti bendision kadagiti bukelmo a sumarsaruno kenka, tapno babaen dagiti imada paneknekandanto daytoy a panagserbi ken ^bKinasaserdote iti amin a pagilian;

10 Ket bendisionakto ida babaen ti naganmo; ta kas iti kaadu ti umawat iti daytoy nga ^aEbanghelio ti maawaganto iti naganmo, ket maibilangdanto kadagiti ^bbukelmo, ket bumangondanto ket bendisionandaka, a kas ^camada;

11 Ket ^abendisionakto dagiti mangbendision kenka, ket ilunodko dagiti mangilunod kenka; ket kenka (nga isu, iti Kinasaserdotem) ken kadagiti ^bbukelmo (nga isu, iti Kinasaserdotem), ta ikarik nga agtultuloy kenka daytoy a ^ckalintegan, ken kadagiti bukelmo a sumarsaruno (kayatna a sawen, dagiti pudno a bukel, wenno bukel ti bagi) mabendisionanto amin a kaamaan iti daga, a kas iti bendision ti Ebanghelio, nga isuda ti bendision ti pannakaisalakan, a kas iti agnanayon a biag.

12 Ita, kalpasan ti ipapanaw ti Apo a nakisao kaniak, ket impanawna ti rupana kaniak, kinunak iti pusok: Siaanus a ^asinapulnaka ti katulongam; ita nasarakankan;

13 Imbaonmo ti anghelmo a ^amangisalakan kaniak kadagiti didiosen ni Elkena, ket aramidek ti kabaelak a dumngeg iti timekmo, ngarud itag-aymo ti katulongam ket pumanaw a sitatalna.

14 Isu a siak, ni Abraham, pimmanawak a kas iti kinuna kaniak ti Apo, ken ni Lot kaniak; ket siak, ni Abraham, agtawenak iti ^ainnem-a-pulo-ket-dua idi pimmanawak iti Haran.

15 Ket innalak ni ^aSarai, a nagbalin nga asawak idi addaak idiay ^bUr, idiay Caldea, ken ni Lot, ti anak ti kabsatko a lalaki, ken amin a taraonmi a naurnongmi, ken amin a kararua a ^cnapasurotmi idiay Haran, ket sinurotmi ti dana nga agturong iti daga ti ^dCanaan, ket nagtaengkami kadagiti tolda bayat ti pannagnami;

16 Ngarud, kinaagnanayon ti salaknibmi ken ti ^abatomi ken ti salakananmi, bayat ti panagdaliasatmi manipud iti Haran a lumabas iti Jerson, nga agturong iti daga ti Canaan.

17 Ita siak, ni Abraham, nangbangonak iti ^aaltar iti daga ti Jerson, ket nangaramidak iti daton iti Apo, ket inkararagko a mapukaw koman ti ^bbisin iti balay ti amak, tapno saanda a mapukaw.

18 Kalpasanna limmabaskami iti Jerson babaen ti daga nga agturong iti lugar a Sekem; nga adda iti tanap ti More, ket nakadanonkamin iti nagbedngan ti daga dagiti ^aCanaan, ket nangidatonak iti ^bsakripisio sadiay iti tanap ti More, ket immawagak a siaanep iti Apo, gapu ta nakadanonkamin iti daga daytoy pagilian a managrukbab kadagiti didiosen.

19 Ket nagparang kaniak ti Apo a kas sungbat dagiti kararagko, ket kinunana kaniak: Kadagiti bukelmo itedkonto daytoy a ^adaga.

20 Ket siak, ni Abraham, timmakderak manipud iti altar a binangonko para iti Apo, ket inikkatko ket inyakarko iti bantay iti daya ti Betel, ket binangonko ti toldak sadiay, ^aBetel iti laud, ket ^bAi iti daya; ket sadiay nangbangonak iti sabali nga altar para iti Apo, ket ^cinawagak manen ti nagan ti Apo.

21 Ket siak, ni Abraham, nagdaliasatak, nga agturong pay laeng iti abagatan; ket nagtultuloy pay laeng ti panagbisin iti daga; ket siak, ni Abraham, inkeddengko ti mapan iti Egipto, nga agpalabas sadiay iti sumagmamano nga aldaw, ta nakaro unay ti panagbisin.

22 Ket napasamak idi dandaniakon makadanon iti Egipto, kinuna kaniak ti Apo: Adtoy, ni ^aSarai, nga asawam, makaay-ayo unay a babai a matmatan;

23 Ngarud mapasamakto, no makita dagiti Egipto, kunadanto—Isu ti asawana; ket papatayendaka, ngem didanto papatayen; ngarud nasken nga aramiden daytoy a nainsiriban:

24 Bay-am a kunana kadagiti Egipto, isu ti kabsatmo a babai, ket agbiagto ti kararuam.

25 Ket napasamak a siak, ni Abraham, imbagak ken ni Sarai, ti asawak, amin nga imbaga kaniak ti Apo—Ngarud sawem kadakuada, ikararagko kadakayo, sika ti kabsatko a babai, a makapasayaat kaniak a para iti pagimbagam, ket agbiagto ti kararuak gapu kenka.