1 Kalpasanna kinuna ti Apo: Bumabatayo. Ket bimmabada idi ^apunganay, ket isuda, a Dios, ^binurnos ken binukelda dagiti langit ken ti daga.

2 Ket awan nagyan ken naliday ti daga, kalpasan ti pannakabukelna, gapu ta awan ti sabali a binukelda no di ti daga; ket sipnget ti nagari iti lungog, ket ^anagintek ti Espiritu dagiti Dios iti rabaw dagiti dandanum.

3 Ket kinunada (dagiti Dios): Adda koma lawag; ket nagadda ti lawag.

4 Ket naawatanda (dagiti Dios) ti lawag, ta naraniag; ket biningayda ti lawag, wenno imbilinda a mabingay, manipud iti kasipngetan.

5 Ket ninaganan dagiti Dios ti lawag iti Aldaw, ket ti sipnget ninagananda iti Rabii. Ket napasamak a ninagananda iti rabii ti manipud iti sumipnget agingga iti agsapa; ket ninagananda iti aldaw ti manipud iti agsapa agingga iti sumipnget; ket daytoy ti immuna, wenno ti punganay, dayta ninagananda iti aldaw ken rabii.

6 Ken kinuna pay dagiti Dios: Adda koma ^atangatang iti ngatuen dagiti dandanum, ket bingayenna dagiti dandanum.

7 Ket binilin dagiti Dios ti tangatang, tapno bingayenna dagiti danum nga adda iti baba ti tangatang ken dagiti danum nga adda iti ngato ti tangatang; ket naaramid a kasta, a kas iti pannakabilinda.

8 Ket ninaganan dagiti Dios ti tangatang iti ^aLangit. Ket napasamak a ninagananda iti rabii ti manipud iti sumipnget agingga iti agsapa; ket napasamak a ninagananda iti aldaw ti manipud iti agsapa agingga iti sumipnget; ket daytoy ti maikadua a ^bgundaway a ninagananda iti rabii ken aldaw.

9 Ket imbilin dagiti Dios, a kinunada: Maurnong koma dagiti ^adanum iti baba ti langit iti ^bmaymaysa a lugar, ket ngumato koma ti daga a namaga; ket naaramid a kas iti imbilinda;

10 Ket impakdaar dagiti Dios a ti namaga a daga, Daga; ket dagiti naurnong a dandanum, impakdaarda, ^aDakkel a Dandanum; ket nakita dagiti Dios a natungpalda.

11 Ket kinuna dagiti Dios: Isaganatayo ti daga a pagtubuan ti ^aruot; mangparnuay dagiti mula iti bukel; agbunga ti kayo nga agbunga, iti kakikitana, a ti bukelna mangparnuay iti kakikitana iti daga; ket kasta ti naaramid, kas imbilinda.

12 Ket inurnos dagiti Dios ti daga a pagtubuan ti ruot manipud iti bukelna, ket ti mula agparnuay iti mula manipud iti bukelna, mangparnuay iti bukel a kakikitana; ket agpatubo ti daga iti kayo manipud iti bukelna, nga agbunga, a ti bukelna mamataud laeng iti kalanglangana, iti kakikitana; ket nakita dagiti Dios a natungpalda.

13 Ket napasamak a binilangda dagiti aldaw; manipud iti sumipnget agingga iti agsapa ninagananda iti rabii; ket napasamak, a ti manipud iti agsapa agingga iti sumipnget ninagananda iti aldaw; ket daytoy ti maikatlo a daras.

14 Ket binukel dagiti Dios ti ^alawag iti tangatang ti langit, ket binilinda a mailasin ti aldaw iti rabii; ket inurnosda ida nga agbalin a tanda ken para iti panawen, ken para iti aldaw ken iti tawen;

15 Ket inurnosda ida a para kadagiti lawag iti tangatang ti langit a mangted iti lawag iti daga; ket naaramid a kasta.

16 Ket inurnos dagiti Dios ti dua a dadakkel a lawag, ti ^anaranraniag ti mangituray iti aldaw, ken ti nalidlidem ti mangituray iti rabii; iti nalidlidem a lawag ti nangikaduaanda met kadagiti bituen;

17 Ket impuesto ida dagiti Dios iti tangatang ti langit, a mangted iti lawag iti daga, ken mangituray iti aldaw ken iti rabii, ken mangbilin a mangilasin iti lawag manipud iti sipnget.

18 Ket binuya dagiti Dios dagidiay banag a binilinda agingga a natungpalda.

19 Ket napasamak a manipud iti sumipnget agingga iti agsapa isu ti rabii; ken napasamak a manipud iti agsapa agingga iti rabii isu ti aldaw; ket dayta ti maikapat a daras.

20 Ket kinuna dagiti Dios: Isaganatayo dagiti danum a mangparnuay iti umdas nga aggargaraw a parsua nga addaan biag; ken dagiti tumatayab, tapno agtayabda iti ngato ti daga iti nawaya a tangatang ti langit.

21 Ket insagana dagiti Dios dagiti danum tapno mangparnuayda iti dadakkel a ^abaliena, ken tunggal nabiag a parsua nga aggunay, a patauden dagiti danum ti adu a kas iti kakikitada; ken tunggal nagpayak a tumatayab iti kakikitada. Ket nakita dagiti Dios a natungpalda, ken nasayaat ti planoda.

22 Ket kinuna dagiti Dios: Bendisionantayo ida, ket ibilintayo nga agbalinda a nabunga ket agpaaduda, ket punnuenda dagiti danum iti baybay wenno ^adadakkel a dandanum; ken bilinentayo nga agpaadu dagiti tumatayab iti daga.

23 Ket napasamak a manipud iti sumipnget agingga iti agsapa ti ninagananda iti rabii; ket napasamak a manipud iti agsapa agingga iti sumipnget ti ninagananda iti aldaw; ket dayta ti maikalima a daras.

24 Ket insagana dagiti ^aDios ti daga a pagtaudan ti nabiag a parsua iti kakikitana, ayup ken agkarayam a bambanag, ken narungsot a nabiag iti daga iti kakikitada; ket naaramid a kasta, a kas naibaga kadakuada.

25 Ket inurnos dagiti Dios ti daga a mangparnuay kadagiti narungsot a nabiag iti kakikitada, ken ayup iti kakikitada, ken amin a banag nga agkarayam iti daga iti kakikitada; ket nakita dagiti Dios a natungpalda.

26 Ket ^anagnanaming dagiti Dios ket kinunada: Bumabatayo ket ^bmangbukeltayo iti tao a ^ckalanglangatayo, a kaing-ingastayo; ket ikkantayo ida iti panangituray kadagiti ikan iti baybay, ken kadagiti tumatayab iti tangatang, ken kadagiti ayup, ken iti intero a daga, ken kadagiti amin nga agkarayam a banag nga agkarayam iti daga.

27 Isu a bimmaba dagiti ^aDios a mangaramid iti tao a kalanglangada, kalanglanga ti Dios ti nangbuklanda kenkuana, lalaki ken babai ti binukelda.

28 Ket kinuna dagiti Dios: Bendisionantayo ida. Ket kinuna dagiti Dios: Aramidentayo ida a nabunga ket agpaaduda, ken punnuenda ti daga, ken parmekenda, ket iturayanda dagiti ikan iti baybay, ken dagiti tumatayab iti tangatang, ken iti tunggal nabiag a banag nga aggargaraw iti daga.

29 Ket kinuna dagiti Dios: Adtoy, itedtayo kadakuada ti tunggal mula nga addaan bukel a tumaud iti intero a daga, ken tunggal kayo nga agbunga iti rabawna; wen, ti bunga ti kayo nga agparnuay iti bukel ti itedtayo kadakuada; isu daytoy ti ^ataraonda.

30 Ken iti tunggal narungsot a nabiag iti daga, ken iti tunggal tumatayab iti tangatang, ken iti tunggal banag nga agkarayam iti daga, adtoy, ikkantayo ida iti biag, ken kasta met nga ikkantayo ida iti tunggal nalangto a mula a kanenda, ket amin dagitoy a banag kastoy ti pannakaurnosda.

31 Ket kinuna dagiti Dios: Aramidentayo amin a banag nga imbagatayo, ket urnosentayo ida; ket adtoy, agbalindanto a nakatultulnog. Ket napasamak a manipud iti sumipnget agingga iti agsapa ti ninagananda iti rabii; ket napasamak a ti manipud iti agsapa agingga iti sumipnget ti ninagananda iti aldaw; ket imbilangda daytoy a ^amaikanem a daras.