1 Áádóó Enoch t’áá át’é biiníłkánígíí eíyá dį́įdi neeznádiin dóó bi’aan tádiin nááhai.

2 Áádóó baa hoolzhiizh Methuselah, Enoch biye’, éí t’áadoo atah bi’diisyį́į da, áko Diyin Bóhólníihii bibee ahada’dit’aah bohodoolnííł, éí Enoch yił aha’deet’ą́; háálá Enoch t’áá ááníigo yee yił aha’deet’ą́ áko Noah éí bí yits’ą́ą́dóó hodooleeł.

3 Áádóó baa hoolzhiizh Methuselah éí bí bits’ą́ą́dóó t’áá ałtso nahasdzáán bikáá’góó dah da’íldééhígíí áhodoonííł níigo yaa hoolne’ (éí Noah bits’ą́ą́dóó), áádóó bí éí díí yee hodíísįįd.

4 Áádóó ayóó át’áo kéyah bikáá’góó dichin hazlį́į́’, áádóó Diyin Bóhólníihii éí nahasdzáán tsʼídá bikʼeʼíyéʼígíí yikʼijįʼ kóyiilaa, áádóó lą’í da ákwe’é kéédahat’ínée daneezná.

5 Áádóó baa hoolzhiizh Methuselah tááłá’ídi neeznádiin dóó bi’aan tseebídiin dóó bi’aan tsosts’id nááhaigo, Lamech bá yizhchį́;

6 Áádóó Methuselah hináago, Lamech bá yizhchį́ dóó bikéé’dóó, ts’osts’idi neeznádiin dóó bi’aan tseebídiin dóó bi’aan naaki nááhai, dóó biye’ké dóó bitsi’ké bá nahaazhchį́;

7 Áádóó Methuselah t’áá át’é biiníłkánígíí eíyá nahast’éídi neeznádiin dóó bi’aan hastą́diin dóó bi’aan náhást’éí nááhai, áádóó dah nídiidzá.

8 Áádóó Lamech t’ááłá’ídi neeznádiin dóó bi’aan tseebídiin dóó bi’aan naaki binááhaigo, biye’ hazlį́į́’,

9 Áádóó Noah éí yee yiyíízhi’, kóníigo: Áádóó díí shiye’ naanish ádeil’ínígíí dóó nihíla’ bee ndeilnishígíí t’áá ákónéehii ádaaht’į́ nihidííniid, háálá Diyin Bóhólníihii kéyah yik’ijį’ haadzí’ígíí biniinaa.

10 Áádóó Lamech, Noah bá yizhchį́įgo, ashdladi neeznádiin dóó bi’aan nahast’édiin dóó bi’aan ashdla nááhaigo, biye’ké dóó bitsi’ké hazlį́į́’;

11 Áádóó Lamech t’áá át’é biiníłkánígíí eíyá ts’osts’idi neeznádiin dóó bi’aan ts’osts’idiin doo bi’aan ts’osts’id nááhai, áádóó dahnídiidzá.

12 Áádóó Noah éí dį́įdi neeznádiin dóó bi’aan ashdladiin binááhaigo, Japheth bá yizhchį́; áádóó dízdiin dóó bi’aan naaki bikéé’dóó Shem bá yizhchį́ éí Japheth bimá bishchį́, áádóó ashdladi neeznádiin binááhaigo Ham bá yizhchį́.

13 Áádóó Noah dóó biye’ké Diyin Bóhólníihii deidiizts’ą́ą́’, dóó yik’eh dahół’į́į ńt’ę́ę́’, áádóó Diyin God biye’ké daolyé dabidi’níí ńt’ę́ę́’.

14 Áádóó díí hastóí nahasdzáán bikáá’góó k’ee’ąą danoot’į́į́ł, bitsi’ bá ndahaazhchį́, hastóí biye’ké éí dabitsi’kéhígíí danizhónígo deilyiiłtsą́, dóó deizyeh, áádóó t’áá bí ádeinízingo yaa heeskai.

15 Áádóó Diyin Bóhólníihii Noah kwíídííniid: Niye’ké bitsi’ danilínígíí doo ákót’éego nda’iizyeh; háálá áko shooh nihokáá’ dine’é biye’ké sháháchį’ bik’ijį’ siláa doo, háálá shizaad doo yik’eh dahół’į́į da.

16 Áádóó baa hoolzhiizh Noah diyingo ádahodooníłígíí yaa hoolne’, áádóó Diyin God bits’ą́ą́dę́ę́’ ádaat’éii yee na’neeztą́ą́’, éí hodeeyáádą́ą́’ át’éhę́ęgi át’áo.

17 Áádóó Diyin Bóhólníihii Noah áyidííniid: Shi’Ii’ Sizį́ Diyinii doo t’áá áłahjį’ nihokáá’ dine’é bił hólǫ́ǫ da dooleeł, háálá bił bééhodoozįįł t’áá ałtso ats’íís bee dahólóonii dadínóonééł; bí éí t’ááłáhídi neeznádiin dóó bi’aan naadin binídoohah; áádóó nihokáá’ dine’é doo ádaa ńda’ookąąhgóó, tó bił dadidoolkǫǫłgo bich’į’ kódeeshłííł.

18 Áádóó íídą́ą́’ yé’iitsoh nahasdzáán bikáa’gi dahólǫ́ǫ ńt’ę́ę́’, áádóó Noah deidiyoołhééłgo yíká ádaat’į́į ńt’ę́ę́’; ákondi Noah éí Diyin Bóhólníihii bił hólǫ́ǫ ńt’ę́ę́’, áádóó Diyin Bóhólníihii bibe’adziilii éí bik’i hólǫ́ǫ ńt’ę́ę́’.

19 Áádóó Diyin Bóhólníihii é’éł’ínígíí bik’ehgo Noah yiyíísį́į́’, áádóó biNa’nitin Bee Yisdá’iildéehii nihokáá’ dine’é ba’áłchíní bee bił hólne’go bitah nanináa doo yidííniid, éí Enoch bee bił hóóne’ę́ęgi át’áo.

20 Áádóó baa hoolzhiizh Noah nihokáá’ dine’é ba’áłchíní ádaa ńda’oohkąąh yidííniid; ákondi bizaad t’áadoo yik’eh dahół’į́į da;

21 Áádóó ałdó’, éí bikéé’dóó dabidiizts’ą́ą’go, baa haaskai, dóó ádabiłní: Áko shooh, nihíyee’ Diyin God biye’ké daniidlį́; da’ nihíísh éí t’ahdoo nihokááʼ dineʼé bitsi’ké nihee dahaleeh da? Áádóó dooísh éí da’iidą́ dóó da’iidlą́ą da, áádóó da’iigeh dóó niha’áłchiní iigeh bee bá lą́ áda’iil’į́į da? Áádóó nihe’asdzą́ą́ niha’áłchíní ndeiyiiłchííh, dóó t’áá éí diné ayóó ádabóóziilii danilį́, éí ałk’idą́ą́’ dinéhéegi ádaat’é, diné ayóó át’áo béédaho’dílzin. Áádóó kót’áo Noah bizaad doo deiyóósts’ą́ą da ńt’ę́ę́’.

22 Áádóó Diyin God éí nahasdzáán bikáa’gi nihokáá’ dine’é bąąhági át’éii ayóó át’éego yaa naakaigo yiyiiłtsą́; áádóó nihokáá’ dine’é t’ááłá’í nízínígo bijéí biyi’ yaa ntsédaakeesígíí t’áá íiyisíí yóó’adabineez’aa’, t’óó bąąhígi’ át’éí áłahjį’ yaa naakai silį́į́’.

23 Áádóó baa hoolzhiizh Noah diné t’áá neinitin, kóníigo: Dashíínółts’ą́ą́’, dóó shizaad bik’eh dahonoł’į́;

24 Da’iinohdlą́ dóó nihibąąhági ádaat’eii baa nída’iinoohkąąh dóó Jesus Christ, Diyin God biYe’ binahjį’ tó bee danihi’diilzį́į́h, nihizhé’é ádaadzaayę́ęgi át’áo, Ii’ Sizį́ Diyinii nihaa dahidoolyeeł, áko t’áá ałtsoní nihił ííshją́ą́ ádadoolnííł; áádóó díí doo beda’oołaagóó, tónteel nihił didoolkǫǫł; ákót’ée ndi t’áadoo da’diists’ą́ą da.

25 Áko Noah yąąh bíni’, éí Diyin Bóhólníihii nihokáá’ dine’é nahasdzáán yikáá’ neiníláhígíí éí bijéí neezgaigo áyiilaa, dóó bijéí biyi’di yaa yínííł niizį́į́’.

26 Áádóó Diyin Bóhólníihii ádííniid: Nihokáá’ dine’é ííshłaaígíí ádeeshdįįł, díí nahasdzáán bikáá’dóó, t’áá áłah nihokáá’ dine’é dóó naaldlooshii da’ałchíní, dóó ni’ ndaa’na’ígíí, dóó yá biyi’di ndaat’a’ígíí; háálá díí hadadiishłaaígíí Noah bi’diił’á, dóó ádeishłaaígíí; dóó shíká ádííniid; háálá dabidiyoołhééłgo be’iina’ yíká ádaat’į́į́ ńt’ę́ę́’.

27 Áádóó Noah Diyin Bóhólníihii binéł’į́įgo ajooba’ yee yik’ijisdli; háálá Noah éí diné t’áá ákogi át’éii nilį́, dóó bił hoolzhishígíí biyi’ diné haałt’éii nilį́į ńt’ę́ę́’; dóó Diyin God yik’eh hół’į́į ńt’ę́ę́’, éí biye’ táłt’éego ałdó’ t’áá ákódaadzaa, Shem, dóó Ham, dóó Japheth.

28 Nahasdzáán éí Diyin God bidááhdóó nichxó’ígo adeesdee’, dóó atí’él’į́ t’áá ałtsogóó bii’ hólǫ́ silį́į́’.

29 Áádóó Diyin God nahasdzáán yinééł’į́į́, dóó, áko shooh, t’áá íiyisíí nichxǫ́’ígo adeesdee’, háálá t’áá ałtso bits’íís dahólónée nahasdzáán bikáa’gi nichxǫ’ígo deeskai.

30 Áádóó Diyin God Noah kóyidííniid: T’áá ałtso bits’íís dahólónii shidááhdóó nidahazt’i’ daazlį́į́’, háálá nahasdzáán atí’íl’į́ t’áá ałtsogóó bii’ hólǫ́ silį́į́’, áádóó áko shooh t’áá ałtso nahasdzáán bikáa’gi bits’íís dahólónii ndeestsxił.